ყირიმში ტერორიზმის საფრთხის ყვითელი დონე გამოცხადდა – პუტინმა დაცვის გაძლიერება ბრძანა

რუსეთის პრეზიდენტმა, ვლადიმირ პუტინმა ყირიმის ხიდისა და ნახევარკუნძულისკენ ენერგორესურსების მიმწოდებელი ინფრასტრუქტურის დაცვის გაძლიერების ბრძანება გასცა.

ამასთან, ყირიმის ე.წ ლიდერის, სერგეი აკსენოვის ცნობით, ნახევარკუნძულზე ტერორიზმის საფრთხის მაღალი – ყვითელი დონე გამოცხადდა, რომელიც 23 ოქტომბრამდე იმოქმედებს.

,,რეგიონში სიმშვიდეა, სიტუაცია სრულად კონტროლდება რესპუბლიკური და ადგილობრივი აღმასრულებელი ხელისუფლების მიერ. ყირიმის რესპუბლიკის, მისი მცხოვრებლებისა და სტუმრების უსაფრთხოებას სრულად უზრუნველყოფენ სამართალდამცავი ორგანოები“, - წერს სერგეი აკსენოვი ,,ტელეგრამ“ არხზე.