1785496974

სასტუმრო „ინდიგოს“ მენეჯერი : სასტუმრომ ივლისის თვეში ფაქტობრივად პიკურ, 85%-იან დატვირთულობას მიაღწია - ევროპელი ტურისტებისთვის საქართველო სულ უფრო მიმზიდველი მიმართულება ხდება, რაც ქვეყანაში მაღალშემოსავლიანი ტურიზმის განვითარებას ხელს უწყობს

ბათუმში მდებარე საერთაშორისო ბრენდის სასტუმრო „ინდიგო“ ზაფხულის პირველ ტურისტულ სეზონს მაღალი დატვირთვით ხვდება.სასტუმროს აღმასრულებელი მენეჯმენტის წარმომადგენლის მაია მახათაძის განცხადებით, 2025 წლის დეკემბერში გახსნილი საერთაშორისო ბრენდის სასტუმრო ყოველთვიურ ზრდას აჩვენებს და ივლისში 85%-ზე მეტ დატვირთვას მიაღწია. მომდევნო თვეების ჯავშნების მნიშვნელოვანი ნაწილიც უკვე მიღებულია, რაც სეზონის წარმატებით გაგრძელების მოლოდინს ქმნის.„სასტუმრო „ინდიგოსთვის“ ეს გახლავთ პირველი წლის ციკლი. თითოეული თვე არის წინაზე უკეთესი და ივლისის თვეში ფაქტობრივად პიკურ, 85%-იან დატვირთულობას მიაღწია, რაც, ახალგახსნილი სასტუმროსთვის, ნამდვილად სასურველი შედეგია. ამასთან, ძალიან კარგი დინამიკა გვაქვს წინასწარი ჯავშნების ნაწილშიც: აგვისტოსა და სექტემბერ-ოქტომბრის ჯავშნების მნიშვნელოვანი ნაწილი უკვე მიღებული გვაქვს. საკმაოდ საინტერესო სეგმენტს მასპინძლობს ჩვენი სასტუმრო. მაღალმხარჯველუნარიანი ტურისტები სხვადასხვა ქვეყნიდან გვაქვს, როგორიც არის სპარსეთის ყურის ქვეყნები, ასევე ბრიტანეთიდან სტუმრები. ცენტრალური ევროპაც ძალიან საინტერესო მიმართულებად ჩამოყალიბდა ჩვენთვის. საერთოდ, ევროპელი ტურისტებისთვის საქართველო სულ უფრო მიმზიდველი მიმართულება ხდება, რაც ქვეყანაში მაღალშემოსავლიანი ტურიზმის განვითარებას ხელს უწყობს.”  - აღნიშნავს მაია მახათაძე.

1785493476

სასტუმრო „ქუთაისი ინნ“: ივლისი შარშანდელთან შედარებით რეკორდულად წარმატებული იყო

სასტუმრო „ქუთაისი ინში“ (Kutaisi Inn) მიმდინარე საზაფხულო სეზონი რეკორდული შედეგებით მიმდინარეობს. ივლისის თვე, გასულ წელთან შედარებით, განსაკუთრებით წარმატებული აღმოჩნდა, პოზიტიური დინამიკა აგვისტოს თვის ჯავშნებზეც ვრცელდება. „Inn ჯგუფის“ აღმასრულებელი დირექტორის ერეკლე კოკაიას შეფასებით, “ქუთაისი ინნ-ში” მაღალ დატვირთულობასა და საერთაშორისო ვიზიტორთა აქტივობას განაპირობებს დიდი ჯგუფების მიღების შესაძლებლობა, ასევე, ქუთაისის საერთაშორისო აეროპორტში ფრენების სიმრავლე და საქართველოს ტურიზმის ეროვნული ადმინისტრაციის მიერ განხორციელებული  მარკეტინგული კამპანიები თუ საერთაშორისო გამოფენები. „შარშანდელთან შედარებით, ივლისი რეკორდულად კარგი თვე იყო,  დატვირთულობამ, 90%-ს თავისუფლად მიაღწია. ამაში ხელი იმანაც შეგვიწყო, რომ დიდი ჯგუფები გვყავდა მიღებული, მათ შორის სპორტული ჯგუფებიც. გარდა ამისა, აგვისტოს 80%-იც უკვე დაჯავშნილია, რაც წინასწარი გაყიდვების ძალიან კარგი მაჩვენებელია…რეგიონებს შორის ყველაზე მაღალი პროცენტი ქუთაისში ევროპულ ბაზარს უკავია, რადგან აქ  Wizz Air ოპერირებს და შესაბამისად, ყველაზე დიდი კონცენტრაცია ევროპელი ტურისტების ქუთაისშია ხოლმე.შეიძლება ითქვას, რომ ტურიზმის ადმინისტრაციის რამდენიმეწლიანი აქტიური მარკეტინგის შედეგები უკვე რეალურად იგრძნობა ქუთაისშიც. ასევე, ევროპის ნაწილში პირდაპირი ჯავშნებით საგრძნობი მატება გვაქვს, მაგალითად,  ჯავშნების დინამიკით საგრძნობლად იმატა ნაკადმა ნიდერლანდებიდან.  ნებისმიერი საერთაშორისო გამოფენა თუ მარკეტინგული აქტივობა, რომელსაც ტურიზმის ეროვნული ადმინისტრაცია ახორციელებს, საქართველოს რეკლამაა და სასტუმრო სექტორზე ყოველთვის დადებითად აისახება“, - აღნიშნავს ერეკლე კოკაია.

1785479657

შატო „ვარციხე”: მიმდინარე სეზონზე დატვირთულობა 70-80%-ს აღწევს

იმერეთში მდებარე “შატო ვარციხეში“ საზაფხულო ტურისტული სეზონი სტაბილურად მიმდინარეობს.სასტუმროს წარმომადგენლის, ანი ქარციძის შეფასებით, მიუხედავად იმისა, რომ წინა წელთნ შედარებით დატვირთულობა მნიშვნელოვნად არ განსხავდება, არსებული 70-80%-იანი მაჩვენებელი სასტუმროსთვის პოზიტიურ ტენდენციად შეიძლება შეფასდეს.„დაახლოებით 70-80%-იანი დატვირთულობა გვაქვს და აგვისტოს თვის ჯავშნებიც კარგად მიდის - 25 ნომრიან სასტუმროში ჯავშნების დაახლოებით 60-70% უკვე შევსებულია. სტუმრების მოზიდვაში, ჩვენი სასტუმროს უპირატესობებთან ერთად, როგორიცაა მარანი, აუზები და ქუთაისის აეროპორტთან სიახლოვე,  დიდ როლს თამაშობს ტურიზმის ეროვნული ადმინისტრაციის პროექტებიც. განსაკუთრებით გამოვყოფდი გემოფესტს, რომელიც არამხოლოდ ჩვენს სასტუმროზე, მთლიანად ადგილობრივ ტურისტულ ბიზნესზე დადებითად აისახება“,- აცხადებს ანი ქარციძე.

1785478656

„ლოპოტა სპა რეზორტში“ საზაფხულო სეზონი სტაბილურად მაღალი დატვირთულობით მიმდინარეობს

კახეთის რეგიონში საზაფხულო ტურისტული სეზონი აქტიურ ფაზაშია. „ლოპოტა სპა რეზორტის“ კომერციული დირექტორის, მაკა ღლიღვაშვილის ინფორმაციით, სასტურმო კომპლექსში, ტრადიციულად, მაღალი დატვირთულობა ფიქსირდება. ივლისის თვეში საშუალო მაჩვენებელმა 90%-ს მიაღწია.როგორც მაკა ღლიღვაშვილი აღნიშნავს, წინასწარი ჯავშნების მიხედვით, აგვისტოს თვის დატვირთულობა უკვე 80%-მდეა.  ხოლო იმის გათვალისწინებით, რომ გლობალური ვითარების ფონზე, სულ უფრო მკვიდრდება ბოლო წუთებში დაჯავშნის ტენდენცია,  დატვირთულობის საბოლოო მაჩვენებელი, მოსალოდნელია,  კიდევ უფრო გაიზარდოს.მაკა ღლიღვაშვილი მიმდინარე სეზონზე საერთაშორისო ბაზრების დივერსიფიკაციაზე ამახვილებს ყურადღებას. „ამ სეზონზე ვხედავთ უფრო დივერსიფიცირებულ ბაზრებს, ვიდრე იყო წინა წლებში. შიდა ტურისტების გარდა, ჩვენ გვყავს სტუმრები ისრაელიდან, გალფის ქვეყნებიდან.  ევროპიდანაც არის ზრდა, მათ შორის ბრიტანეთიდან, და მთლიანობაში, ჩვენი სასტუმროს საერთაშორისო სტუმრების ეროვნული შემადგენლობა წელს გაცილებით მრავალფეროვანია, ვიდრე წინა წლებში.“  - აღნიშნავს „ლოპოტა სპა რეზორტის“  წარმომადგენელი.

1785418363

ნათია თურნავა The Banker-თან ინტერვიუში - ქართული ბანკების მიერ Nasdaq Calypso-ს პლატფორმის დანერგვის მიზანია ხელი შეუწყოს საფინანსო სექტორის განვითარების მომდევნო ეტაპს

საერთაშორისო საფინანსო გამოცემა The Banker საქართველოს ეროვნული ბანკის პრეზიდენტთან ნათია თურნავასთან ქვეყნის ხუთი უმსხვილესი კომერციული ბანკის მიერ Nasdaq Calypso-ს სისტემის დანერგვასთან დაკავშირებით ინტერვიუს აქვეყნებს.როგორც საქართველოს ეროვნული ბანკის პრეზიდენტმა, ნათია თურნავამ The Banker-ს განუცხადა, პროექტის მიზანია, სწრაფად მზარდ, თუმცა საგარეო შოკების მიმართ მოწყვლად, მცირე ღია ეკონომიკაში ხელი შეუწყოს საფინანსო სექტორის განვითარების მომდევნო ეტაპს.ნათია თურნავას განცხადებით, საქართველოს ეკონომიკის სტაბილურმა ზრდამ ბანკებისა და მათი კლიენტებისთვის სავალუტო, საპროცენტო და ლიკვიდობის რისკების ეფექტური მართვა კიდევ უფრო აქტუალური გახადა. ეს განსაკუთრებით მნიშვნელოვანია იმ ფონზე, როდესაც ქვეყანა მეტი პირდაპირი უცხოური ინვესტიციისა და კაპიტალის ბაზარზე ფინანსური ნაკადების მოზიდვას ისახავს მიზნად.„ეს ინიციატივა არა უბრალოდ პროგრამული უზრუნველყოფის პროექტი, არამედ ბაზრის განვითარების პროექტია, რომელიც  საბანკო სისტემის დიდ ნაწილში საერთო სტანდარტების შექმნაზეა მიმართული. როცა ბანკები  საერთო სტანდარტებით და უფრო ავტომატიზებული პროცესებით მუშაობენ, მონაცემები უფრო სანდოა. უკეთესი ინფორმაცია საშუალებას მისცემს ეროვნულ ბანკს, ადრეულ ეტაპზე გამოავლინოს მოსალოდნელი კონცენტრაციები ან სტრესული წერტილები და უფრო სრულყოფილი მონაცემების გამოყენებით მოახდინოს შესაბამისი რეაგირება“, - აღნიშნა ნათია თურნავამ The Banker-თან საუბრისას.Nasdaq Calypso - საზიარო პლატფორმა, რომელიცუზრუნველყოფს საბანკო სექტორის შემდგომიზრდის ხელშესაწყობად საჭირო საიმედო,საერთაშორისო დონის ინფრასტრუქტურას,საქართველოს ეროვნული ბანკის მხარდაჭერითადა საქართველოს ფინანსური ბაზრებისხაზინების ასოციაციის ეგიდით დაინერგება.აღნიშნული ინიციატივა „საქართველოსფინანსური ბაზრების განვითარების პროგრამის" (GMAP) ფარგლებში ხორციელდება.

1785409177

ნათია თურნავა - მსოფლიო ბანკის მხარდაჭერა კიდევ ერთხელ უსვამს ხაზს ქვეყნის ფინანსური სტაბილურობისა და საბანკო სექტორისადმი ნდობას

 მსოფლიო ბანკის აღმასრულებელ დირექტორთა საბჭომ საქართველოს კომერციული ბანკების სარეზოლუციო მზაობის პროექტი დაამტკიცა, რომლის ფარგლებშიც საქართველოს სარეზოლუციო ფონდისთვის 35 მილიონი აშშ დოლარის ოდენობის პირობითი დაფინანსება (ე.წ. საკრედიტო ხაზი) გახდება ხელმისაწვდომი. საჭიროების შემთხვევაში, აღნიშნული საკრედიტო ხაზი საბანკო რეზოლუციის პროცესის დაფინანსებას ითვალისწინებს.საქართველოსა და რეკონსტრუქციისა და განვითარების საერთაშორისო ბანკს (IBRD) შორის სასესხო შეთანხმებას დღეს ფინანსთა მინისტრმა ლაშა ხუციშვილმა და სამხრეთ კავკასიაში მსოფლიო ბანკის რეგიონულმა დირექტორმა როლანდ პრაისმა მოაწერეს ხელი.ხელმოწერის ცერემონიას დაესწრნენ ეროვნული ბანკის პრეზიდენტი ნათია თურნავა, ფინანსთა მინისტრის მოადგილე ეკატერინე გუნცაძე, სებ-ის პირველი ვიცე-პრეზიდენტი ეკატერინე მიქაბაძე, ფინანსთა სამინისტროს, ეროვნული ბანკისა და მსოფლიო ბანკის წარმომადგენლები.მსოფლიო ბანკის მიერ დამტკიცებული პროექტი სარეზოლუციო ფონდისთვის ქმნის 35 მილიონი აშშ დოლარის ოდენობის წინასწარ შეთანხმებულ საკრედიტო ხაზს. აღსანიშნავია, რომ ეს თანხა ჩვეულებრივ პირობებში არ გამოიყენება. მისი ამოქმედება შესაძლებელი იქნება მხოლოდ კანონმდებლობით განსაზღვრული შემთხვევის დადგომისას, როდესაც საქართველოს ეროვნული ბანკი მიიღებს კომერციული ბანკის რეზოლუციის გადაწყვეტილებას.ამასთან, საკრედიტო ხაზი სარეზოლუციო ფონდისთვის დამატებითი ფინანსური დაცვის მექანიზმი იქნება მისი სამიზნე ნიშნულამდე შევსების პერიოდში და ხელს შეუწყობს კომერციული ბანკის შესაძლო სარეზოლუციო პროცესის დროულად და ეფექტიანად განხორციელებას. პროექტის თანხები შესაძლოა გამოყენებულ იქნას მხოლოდ კანონმდებლობით ნებადართული სარეზოლუციო ღონისძიებებისთვის.ეროვნული ბანკის პრეზიდენტის ნათია თურნავას განცხადებით, მსოფლიო ბანკის მიერ აღნიშნული პროექტის დამტკიცება ადასტურებს საქართველოს მიერ საბანკო რეზოლუციისა და ფინანსური სტაბილურობის მექანიზმების განვითარების მიმართულებით მიღწეულ პროგრესს.„მსოფლიო ბანკის მხარდაჭერა კიდევ ერთხელ ხაზს უსვამს საბანკო რეზოლუციის ჯანსაღი და საიმედო ჩარჩოს მნიშვნელობას ქვეყნის ფინანსური სტაბილურობისა და საბანკო სექტორისადმი ნდობის განსამტკიცებლად. ეს პროექტი, ასევე ადასტურებს, რომ საქართველოს ეროვნული ბანკის მიერ დანერგილი რეზოლუციის არსებული მექანიზმი ეფექტიანია, შეესაბამება საუკეთესო საერთაშორისო პრაქტიკას და ქმნის მყარ საფუძველს სისტემური ბანკის შესაძლო ფინანსური სირთულეების წარმატებული და დროული მართვისთვის“,  - განაცხადა საქართველოს ეროვნული ბანკის პრეზიდენტმა.საბანკო რეზოლუცია წარმოადგენს კომერციული ბანკის ლიკვიდაციის ალტერნატივას და მოიაზრებს მის იმგვარ რესტრუქტურიზაციას, რომლითაც დაცული იქნება საჯარო ინტერესები, მათ შორის შენარჩუნდება კომერციული ბანკის კრიტიკული ფუნქციები - დეპოზიტების მიღება, სესხების გაცემა, საგადახდო მომსახურებები, ფასიანი ქაღალდების ბაზარზე საქმიანობა, საბითუმო დაფინანსება, უზრუნველყოფილი იქნება ფინანსური სტაბილურობა და მაქსიმალურად დაიცავს გადასახადის გადამხდელებს.რეზოლუცია უპირატესია ლიკვიდაციაზე მაშინ, როდესაც ფინანსური პრობლემების წინაშე მდგარი ბანკისთვის ლიკვიდაცია უფრო საზიანოა ფინანსური სტაბილურობისა და ქვეყნის ეკონომიკისთვის, ვიდრე რეზოლუცია.სარეზოლუციო ფონდი არის გადაუდებელი სიტუაციების შემთხვევების დროს გამოყენებადი ფონდი, რომელიც სტრესული სიტუაციების დროს დამატებითი ფულადი სახსრების წყაროს წარმოადგენს რეზოლუციის პროცესში. ფონდში კომერციული ბანკების შენატანები აკუმულირდება, რომელიც 2025 წლიდან დაიწყო, ხოლო ფონდის სამიზნე მოცულობა დაზღვეული დეპოზიტების 3 პროცენტს შეადგენს.სარეზოლუციო ფონდის ადმინისტრირებას საქართველოს ეროვნული ბანკი ახორციელებს, ხოლო ფონდის თანხების ინვესტირებას ახორციელებს დეპოზიტების დაზღვევის სააგენტო (საინვესტიციო მენეჯერი) კანონით გათვალისწინებული უფლებამოსილების და საქართველოს ეროვნულ ბანკსა და დეპოზიტების დაზღვევის სააგენტოს შორის გაფორმებული შესაბამისი შეთანხმების/ხელშეკრულების საფუძველზე.

1785406174

ეროვნული ბანკი მომხმარებლებს თაღლითური სქემის შესახებ აფრთხილებს

 ბოლო პერიოდში დაფიქსირდა რამდენიმე შემთხვევა, როდესაც უცნობი პირები მოქალაქეებს მობილური აპლიკაცია WhatsApp-ის და სხვა საკომუნიკაციო საშუალებებით უკავშირდებიან და თავს საქართველოს ეროვნული ბანკის წარმომადგენლებად აცნობენ. ამასთან, ისინი უკანონოდ იყენებენ ეროვნული ბანკის ლოგოს.„ჩვენს ხელთ არსებული ინფორმაციით, აღნიშული პირები მოქალაქეებს თითქოსდა სებ-ის მიმართ არსებული სასესხო ვალდებულების დაფარვასა და სხვა მსგავს ფინანსურ ოპერაციებში დახმარებას სთავაზობენ. ერთ-ერთ შემთხვევაში კი, მოქალაქეს განუცხადეს,  რომ მის პირად საბანკო მონაცემებზე დაფიქსირდა შესაძლო უნებართვო წვდომა და სესხის გააქტიურების მცდელობა, რის გადასამოწმებლადაც მოსთხოვეს იდენტიფიკატორების მითითებით შესულიყო შესაბამის დისტანციურ არხში - ინტერნეტ ან/და მობაილ ბანკში.ზემოაღნიშნული კომუნიკაციების ფარგლებში მომხმარებლებს ასევე სთხოვენ გადასცენ ინტერნეტ ან/და მობაილ ბანკში  ავტორიზაციისთვის საჭირო მონაცემები, მათ შორის, სახელი, პაროლი, აგრეთვე სხვა პირადი და ფინანსური ინფორმაცია.გთხოვთ გაითვალისწინოთ, რომ აღნიშნული მონაცემების გაცემის შემთხვევაში, თაღლითებმა შესაძლოა მოიპოვონ თქვენს საბანკო ანგარიშებზე წვდომა, რაც ქმნის უნებართვო ოპერაციების განხორციელებისა და მომხმარებლის ფინანსური ზარალის/ზიანის მიყენების საფრთხეს.საქართველოს ეროვნული ბანკი მოუწოდებს მოქალაქეებს გამოიჩინონ განსაკუთრებული ყურადღება და სიფრთხილე. არ გასცენ საკუთარი პერსონალური და ფინანსური ინფორმაცია. მათ შორის, ბანკის დისტანციურ არხებში ავტორიზაციისთვის  საჭირო მომხმარებლის სახელი და პაროლი, ასევე, აღნიშნული ინფორმაცია არ შეიყვანონ უცნობი პირებისგან მოწოდებულ საეჭვო ბმულებზე და არ სცადონ საბანკო/საბარათე ოპერაციების განხორციელება. ასეთი  სიტუაციის დაფიქსირების შემთხვევაში  მიმართონ შესაბამის სამართალდამცავ ორგანოებს.შეგახსენებთ, რომ საქართველოს ეროვნული ბანკი, ფინანსური სექტორის მომხმარებელთა უფლებების დაცვის მიზნით, პერიოდულად ავრცელებს გამაფრთხილებელ თუ საგანმანათლებლო ინფორმაციას ფინანსური თაღლითობის ხშირად გამოყენებულ სქემებთან დაკავშირებით. შესაბამისი შინაარსის მასალები განთავსებულია საქართველოს ეროვნული ბანკის ოფიციალურ და ფინანსური განათლების ვებგვერდებზე“, - - აღნიშნულია განცხადებაში.

1785340800

საქართველოს ეროვნული ბანკი ივლისის „მონეტარული პოლიტიკის ანგარიშს“ აქვეყნებს

ეროვნულმა ბანკმა საზოგადოებასთან კომუნიკაციის გაძლიერების მიზნით, გასულ წელს მონეტარული პოლიტიკის კომუნიკაციის ახალი, სცენარებზე დაფუძნებული მიდგომა დანერგა, რომლითაც უფრო გამჭვირვალე გახადა რისკების მართვისა და გადაწყვეტილებათა მიღების პროცესი. აღნიშნული ნაბიჯით ეროვნული ბანკი მონეტარული პოლიტიკის ჩარჩოს განვითარების მორიგ ეტაპზე გადავიდა, რითაც აუმჯობესებს მონეტარული პოლიტიკის რეაქციის ფუნქციის აღქმადობას და აძლიერებს პოლიტიკის გადაცემის არხების ეფექტურობას."მონეტარული პოლიტიკის ანგარიშში" ინფლაციის, ეკონომიკური ზრდისა და მონეტარული პოლიტიკის განაკვეთის იმ პროგნოზების აღწერას გაეცნობით, რომელთაც მონეტარული პოლიტიკის გადაწყვეტილება ეფუძნება. გამოცემის მიზანი სწორედ აღნიშნული გადაწყვეტილების საზოგადოებისთვის დეტალური ახსნაა.ზოგადად, სცენარებზე დაფუძნებული მიდგომა მოიაზრებს მაღალი გაურკვევლობის შედეგად წარმოქმნილი რისკების სპექტრის ანალიზსა და, მათზე საპასუხოდ, მონეტარული პოლიტიკის განაკვეთის შესაძლო ტრაექტორიების კომუნიკაციას. მონეტარული პოლიტიკის გადაწყვეტილებასაქართველოს ეროვნული ბანკი მონეტარული პოლიტიკის განაკვეთს, უცვლელად, 8.25% ინარჩუნებსმონეტარული პოლიტიკის გადაწყვეტილება მიმართულია იმისკენ, რომ მიწოდების მხრიდან მოქმედი ინფლაციური შოკის ამოწურვის შემდეგ ინფლაცია მიზნობრივ მაჩვენებელს სწრაფად დაუბრუნდესმაკროეკონომიკური პროგნოზიცენტრალური სცენარი სებ-ის განახლებული ცენტრალური სცენარის მიხედვით, ენერგორესურსების ფასები მიმდინარე წელს ინფლაციის ერთ-ერთ მთავარ განმსაზღვრელ ფაქტორად დარჩებაგეოპოლიტიკური ვითარების შედეგად გაზრდილი ენერგორესურსების ფასების გავლენით, 2026 წელს ინფლაცია საშუალოდ 5.2% იქნება. 2026 წლის მეორე ნახევრიდან კი შემცირებას დაიწყებს და 2027 წელს კვლავ მიზნობრივ 3 პროცენტიან მაჩვენებელს დაუახლოვდება.მომატებული ინფლაციური რისკები კვლავ საყურადღებო რჩებააქედან გამომდინარე, სებ ცენტრალურ სცენართან ერთად სხვადასხვა რისკ-სცენარსაც განიხილავს.მაღალინფლაციური სცენარიერთი მხრივ, სებ განიხილავს მაღალინფლაციური რისკის სცენარს, რომელიც მოიაზრებს გეოპოლიტიკური ვითარების უფრო მეტად გახანგრძლივებასა და გამწვავებას. ამის ფონზე, საერთაშორისო ბაზარზე სასაქონლო ფასები უფრო მეტად გაიზრდება, რაც ადგილობრივ ბაზარზე საწვავის ფასებზე გადმოეცემა. შედეგად საქართველოშიც მიწოდების მხრიდან მომდინარე ინფლაციური შოკი გაძლიერდება, რაც მეორე რიგის ეფექტებს გაამწვავებს და საბოლოოდ ინფლაცია ცენტრალურად სცენართან შედარებით მაღალი იქნება.დაბალინფლაციური სცენარიდაბალინფლაციური რისკის სცენარი გეოპოლიტიკური ვითარების სწრაფ დეესკალაციას მოიაზრებს. ასეთ პირობებში, საერთაშორისო სასაქონლო ბაზრებზე ფასების წნეხი მოსალოდნელზე ადრე შემცირდება. ამასთან, ფუნდამენტური ფაქტორების გაუმჯობესება შიდა ინფლაციურ წნეხს შეარბილებს, რაც ინფლაციის მიზნობრივ დონემდე დაბრუნებას და მონეტარული პოლიტიკის განაკვეთის უფრო სწრაფ ნორმალიზებას შეუწყობს ხელს.მონეტარული პოლიტიკის კომიტეტი პოლიტიკის განაკვეთს უცვლელად ინარჩუნებს, თუმცა მომატებული ინფლაციური რისკების გათვალისწინებით, მონეტარული პოლიტიკის შედარებით მკაცრი პოზიცია ხანგრძლივი პერიოდის განმავლობაში შენარჩუნდება.მონეტარული პოლიტიკის განაკვეთის შემდგომი ტრაექტორია დამოკიდებული იქნება საგარეო შოკების საქართველოს ეკონომიკაზე გადმოცემის სიძლიერესა და პოტენციურ გავლენაზე. თუ ინფლაციური რისკები, მეორე რაუნდის ეფექტები და ინფლაციური მოლოდინები, მოსალოდნელზე მეტად გაძლიერდება, ეროვნული ბანკი მზად არის მონეტარული პოლიტიკა დამატებით გაამკაცროს.გამოცემის ნახვა შესაძლებელია ეროვნული ბანკის ოფიციალურ ვებგვერდზე პუბლიკაციების განყოფილებაში.

1785332963

სასტუმრო „მესტია ინნ“: ზაფხულის ტურისტულ სეზონზე მაღალი დატვირთვა და საერთაშორისო ვიზიტორების სიმრავლეა

სვანეთში საზაფხულო ტურისტული სეზონი აქტიურ ფაზაშია. სასტუმრო „მესტია ინნის“ (Mestia Inn) გენერალური მენეჯერის, ნიკოლოზ პეტრიაშვილის განცხადებით, მაისიდან დღემდე რეგიონში ვიზიტორთა მაღალი დინამიკა ფიქსირდება და სასტუმროს დატვირთულობის მაჩვენებელი სტაბილურად ინარჩუნებს მაღალ, 70%-იან და მეტ ნიშნულს.როგორც ნიკოლოზ პეტრიაშვილი აღნიშნავს, მიმდინარე სეზონზე სტუმრების ძირითად სეგმენტს საერთაშორისო ტურისტები შეადგენენ. ვიზიტორთა გეოგრაფია საკმაოდ მრავალფეროვანია და მოიცავს როგორც ევროპის ქვეყნებს (ესპანეთი, იტალია, ნორვეგია, დანია, დიდი ბრიტანეთი, ირლანდია), ისე ამერიკის შეერთებულ შტატებს, ავსტრალიასა და ისრაელს. მისი განცხადებით, საერთაშორისო ბაზრებზე საქართველოს მიმართ ინტერესს მარკეტინგული კამპანიებიც უწყობს ხელს. „რეკლამებიც, როგორც ვიცი, გაშვებულია სხვადასხვა ქვეყნებში, ამიტომ ძალიან ბევრი საერთაშორისო ვიზიტორი გვყავს” – აღნიშნავს ნიკოლოზ პეტრიაშვილი.„ვიზიტორებს ძირითადად წინასწარ გაწერილი ტურისტული მარშრუტები აქვთ, სადაც ყაზბეგთან და ქუთაისთან ერთად, მესტია ერთ-ერთ აუცილებლად სანახავ დანიშნულების ადგილს წარმოადგენს. სტუმრები მესტიაში საშუალოდ 1-2 ღამით ჩერდებიან და ადგილობრივ ღირსშესანიშნაობებს ათვალიერებენ”.სასტუმროს მენეჯმენტის მოლოდინით, არსებული ჯავშნების მიხედვით, ვიზიტორების მაღალი ნაკადი  და დატვირთულობა სეზონის ბოლომდე უცვლელად გაგრძელდება.

1785312376

საქართველოს ეროვნული ბანკი მონეტარული პოლიტიკის განაკვეთს, უცვლელად, 8.25 პროცენტზე ინარჩუნებს

 საქართველოს ეროვნული ბანკის მონეტარული პოლიტიკის კომიტეტმა 2026 წლის 29 ივლისის სხდომაზე მონეტარული პოლიტიკის განაკვეთი უცვლელად შეინარჩუნა. მონეტარული პოლიტიკის განაკვეთი 8.25 პროცენტს შეადგენს.2026 წლის ივნისში საქართველოში წლიურმა ინფლაციამ 5.8 პროცენტი შეადგინა. მიზნობრივზე მაღალი ინფლაცია კვლავ ძირითადად ენერგორესურსების ფასების ზრდას უკავშირდება. ახლო აღმოსავლეთში გეოპოლიტიკური დაძაბულობის რეესკალაციის ფონზე ნავთობის საერთაშორისო ფასების მერყეობა კვლავ გაიზარდა. თუმცა, მიმდინარე საბაზრო ტენდენციები მიუთითებს, რომ ფასები წინა ესკალაციის პერიოდში დაფიქსირებულ დონესთან შედარებით დაბალია. ამასთან, კონფლიქტის გახანგრძლივებამ ენერგორესურსების ფასებიდან მომდინარე არაპირდაპირი ინფლაციური ეფექტების რისკები გააძლიერა. ინფლაციის შედარებით ხისტი ფასების ინდიკატორი, რომელიც უკეთ ასახავს გრძელვადიან ინფლაციურ პროცესებსა და ინფლაციურ მოლოდინებს, კვლავ მიზნობრივ დონესთან ახლოს ნარჩუნდება. კერძოდ, ივნისში საბაზო ინფლაციამ (სურსათის, ენერგომატარებლებისა და თამბაქოს გამორიცხვით) 3.2 პროცენტი შეადგინა. თუმცა, მომსახურების ინფლაცია 4.1 პროცენტამდე დაჩქარდა. აღნიშნული მიუთითებს, რომ საბაზო ინფლაციის ზომიერი მაჩვენებლის მიუხედავად, მეორე რაუნდის ეფექტების გაძლიერების რისკები კვლავ საყურადღებო ფაქტორად რჩება.სებ-ის განახლებული ცენტრალური სცენარის მიხედვით, ენერგორესურსების წვლილი ინფლაციაში მიმდინარე წელს მნიშვნელოვანი დარჩება. აღნიშნულის გათვალისწინებით, 2026 წელს საშუალო ინფლაცია 5.2 პროცენტი იქნება. 2026 წლის მეორე ნახევრიდან ინფლაცია შემცირებას დაიწყებს და საშუალოვადიან პერიოდში მიზნობრივ სამპროცენტიან მაჩვენებელს ეტაპობრივად დაუახლოვდება.ეკონომიკური აქტივობა, საგარეო შოკების პირობებში, მდგრადობას ინარჩუნებს. წინასწარი მონაცემებით, 2026 წლის მაისში ეკონომიკურმა ზრდამ 6.4 პროცენტი, ხოლო პირველ ხუთ თვეში საშუალოდ 7.8 პროცენტი შეადგინა. ზრდის ძირითად წყაროდ კვლავ მაღალპროდუქტიული, მომსახურებაზე ორიენტირებული სექტორები რჩება, რაც მოთხოვნის მხრიდან ინფლაციურ წნეხს ანეიტრალებს. ამასთან, მოლოდინების შესაბამისად, ახლო აღმოსავლეთში მიმდინარე კონფლიქტის უარყოფითი გავლენა საგარეო მოთხოვნაზე შეზღუდულია. შესაბამისად, განახლებული ცენტრალური სცენარით, 2026 წლის ეკონომიკური ზრდის პროგნოზი,  6.5 პროცენტზე, ნარჩუნდება.გეოპოლიტიკური ვითარება და მისგან მომდინარე ეკონომიკური შედეგები კვლავ გლობალური ეკონომიკის პერსპექტივის განმსაზღვრელ ერთ-ერთ ძირითად რისკად რჩება. აღნიშნული გაურკვევლობის ფონზე, მონეტარული პოლიტიკის კომიტეტმა ცენტრალურ სცენართან ერთად განიხილა, როგორც მაღალინფლაციური, ისე დაბალინფლაციური რისკების სცენარები.მაღალინფლაციური რისკის სცენარის რეალიზების შემთხვევაში ფუნდამენტური პროცესები მონეტარული პოლიტიკის განაკვეთის უფრო მაღალ ტრაექტორიას მოითხოვს, ვიდრე ცენტრალური სცენარი. აღნიშნული სცენარი გეოპოლიტიკური ვითარების მოსალოდნელზე ხანგრძლივი პერიოდით გამწვავებას ითვალისწინებს, რაც საერთაშორისო სასაქონლო ბაზრებზე ენერგორესურსების ფასების დამატებით ზრდას გამოიწვევს. ენერგორესურსების ფასების ზრდა ადგილობრივ ბაზარზე საწვავის ფასებზე აისახება, ხოლო გაზრდილი ტრანსპორტირების და წარმოების ხარჯების გავლით სხვა საქონლისა და მომსახურების ფასებზეც გავრცელდება. ამასთან, ბოლო პერიოდში არასახარბიელო კლიმატური პირობები საერთაშორისო ბაზრებზე ნედლეული სურსათის ფასების ზრდის დამატებით რისკს ქმნის. აღნიშნული რისკების რეალიზების შემთხვევაში, ინფლაცია ცენტრალურ სცენართან შედარებით მაღალი იქნება.მეორე მხრივ, მონეტარული პოლიტიკის კომიტეტის მიერ განხილული დაბალინფლაციური სცენარით გათვალისწინებული რისკების რეალიზაცია მონეტარული პოლიტიკის განაკვეთის, ცენტრალურ სცენართან შედარებით, უფრო სწრაფად ნორმალიზების შესაძლებლობას მოიაზრებს. ბოლო წლებში ეკონომიკაში მიმდინარე სტრუქტურული ცვლილებების შედეგად, იზრდება შედარებით მაღალპროდუქტიული და ნაკლებად იმპორტინტენსიური სექტორების წვლილი, რაც, ამავდროულად, ქვეყნის საგარეო პოზიციას აძლიერებს. ეროვნული ბანკის ცენტრალური სცენარის მიხედვით, აღნიშნული ტენდენცია ეტაპობრივად ნორმალიზდება, თუმცა შესაძლებელია, რომ იგი გრძელვადიან პერიოდშიც გაგრძელდეს. ამ შემთხვევაში, ერთი მხრივ, ეკონომიკის გრძელვადიანი პოტენციალის უფრო მაღალი ზრდა მოთხოვნის მხრიდან ინფლაციურ გავლენას შეამცირებს. მეორე მხრივ, ძლიერი საგარეო პოზიცია და დაბალი სუვერენული რისკის პრემია ეფექტური გაცვლითი კურსის ფუნდამენტური გამყარების ტენდენციას განაპირობებს, რაც დამატებით დისინფლაციურ გავლენას მოახდენს. ამასთან, გეოპოლიტიკური ვითარების სწრაფი დეესკალაციის შემთხვევაში, ენერგორესურსების ფასების  დაჩქარებული ტემპით შემცირებაც დაბალინფლაციური სცენარის განვითარების ერთ-ერთ განმაპირობებელ ფაქტორს წარმოადგენს. შედეგად, მთლიანი ინფლაცია ცენტრალურ სცენართან შედარებით უფრო სწრაფად დაუახლოვდება მიზნობრივ მაჩვენებელს.მიმდინარე მაკროეკონომიკური გარემოს, განახლებული სცენარებისა და რისკების შეფასების საფუძველზე, მონეტარული პოლიტიკის კომიტეტმა მიზანშეწონილად მიიჩნია, ამ ეტაპზე, მონეტარული პოლიტიკის განაკვეთის უცვლელად შენარჩუნება. თუმცა, მომატებული ინფლაციური რისკების გათვალისწინებით, მონეტარული პოლიტიკის მკაცრი პოზიცია შედარებით ხანგრძლივი პერიოდის განმავლობაში შენარჩუნდება. ეროვნული ბანკი აქტიურად აკვირდება საგარეო შოკების საქართველოს ეკონომიკაზე გადმოცემის ინტენსივობასა და მათ გავლენას. თუ ინფლაციური რისკები, მათ შორის მეორე რაუნდის ეფექტები და ინფლაციური მოლოდინები, მოსალოდნელზე მეტად გაძლიერდება, ეროვნული ბანკი მზად არის მონეტარული პოლიტიკა დამატებით გაამკაცროს. მონეტარული პოლიტიკის რეაგირება მიმართულია იმისკენ, რომ მიწოდების მხრიდან მოქმედი ინფლაციური შოკის ამოწურვის შემდეგ ინფლაცია სამპროცენტიან მაჩვენებელს სწრაფად დაუბრუნდეს.მონეტარული პოლიტიკის კომიტეტის შემდეგი სხდომა 2026 წლის 9 სექტემბერს გაიმართება. 

1785251760

ეროვნული ბანკი: მაისთან შედარებით, ივნისში საბანკო სექტორში განთავსებული დეპოზიტების მოცულობა ორ მილიარდ ლარზე მეტით გაიზარდა

საბანკო სექტორში განთავსებული დეპოზიტების მოცულობამ (ბანკთაშორისი დეპოზიტების გარდა) 2026 წლის ივნისის ბოლოსათვის 73.52 მილიარდი ლარი შეადგინა, რაც 2.13 მილიარდი ლარით, ანუ 2.98%-ით მეტია წინა თვის ბოლოს არსებულ მაჩვენებელზე.ცენტრალური ბანკის ცნობით, დეპოზიტების წლიურმა ზრდამ გაცვლითი კურსის ეფექტის გარეშე 22.86%-ი შეადგინა. ივნისში, წინა თვესთან შედარებით, ვადიანი დეპოზიტები გაიზარდა 782.71 მილიონი ლარით, ანუ 2.22%-ით, ხოლო მოთხოვნამდე დეპოზიტები – 1.34 მილიარდი ლარით, ანუ 3.71%-ით.საქართველოს ეროვნული ბანკის ინფორმაციით, დეპოზიტების ლარიზაციის კოეფიციენტმა 2026 წლის ივნისის ბოლოსათვის 56.16 პროცენტი შეადგინა. წინა თვის ბოლო მდგომარეობასთან შედარებით დეპოზიტების ლარიზაცია გაიზარდა 1.21 პროცენტული პუნქტით.ამასთან, ეროვნული ბანკის მონაცემებით, ივნისში ვადიან დეპოზიტებზე საშუალო წლიურმა შეწონილმა საბაზრო საპროცენტო განაკვეთმა 7.25% შეადგინა, მათ შორის, ეროვნული ვალუტით განთავსებულ დეპოზიტებზე – 8.90%, ხოლო უცხოური ვალუტით განთავსებულ დეპოზიტებზე – 2.52%.უცხოური ვალუტით განთავსებულ დეპოზიტებში აშშ დოლარის წილმა – 77.21% , ხოლო ევროს წილმა 20.14% შეადგინა.

1785250800

ეროვნული ბანკი: 2026 წლის ივნისში ლარში გაცემული სესხების მოცულობა თითქმის მილიარდი ლარით, უცხოურ ვალუტაში გაცემული სესხების მოცულობა კი, 311 მლნ ლარით გაიზარდა

საქართველოს ეროვნული ბანკის ინფორმაციით, ბანკების მიერ გაცემული სესხების მოცულობამ (ბანკთაშორისი სესხების გარდა) 2026 წლის ივნისის ბოლოსთვის 75.43 მილიარდი ლარი შეადგინა, რაც 1.30 მილიარდი ლარით, ანუ 1.75%-ით მეტია წინა თვის ბოლოს არსებულ მაჩვენებელზე.სესხების წლიურმა ზრდამ გაცვლითი კურსის ეფექტის გამორიცხვით 14.47% შეადგინა.ცენტრალური ბანკის ცნობით, ამავე პერიოდში, წინა თვესთან შედარებით, ეროვნული ვალუტით გაცემული სესხების მოცულობა 985.05 მლნ ლარით, ანუ 2.29%-ით, ხოლო უცხოური ვალუტით გაცემული სესხების მოცულობა 311.13 მლნ ლარით, ანუ 1.00%-ით გაიზარდა.ამასთან, სებ-ის მონაცემებით, რეზიდენტი იურიდიული პირებისათვის 2026 წლის ივნისის ბოლოს ბანკებს ეროვნული ვალუტით გაცემული ჰქონდათ 11.41 მილიარდი ლარის მოცულობის სესხი, რაც წინა თვესთან შედარებით 3.45%-ით მეტია, ხოლო უცხოური ვალუტით – 21.42 მილიარდი ლარის მოცულობის სესხი, რაც წინა თვის მაჩვენებელს 1.03%-ით აღემატება.ეროვნული ბანკის ანგარიშის მიხედვით, 2026 წლის ივნისის განმავლობაში 1.78%-ით, ანუ 701.19 მილიონი ლარით გაიზარდა რეზიდენტი შინამეურნეობების სექტორის დაკრედიტების მოცულობა და ივნისის ბოლოსათვის 40.11 მილიარდი ლარი შეადგინა.2026 წლის ივნისის ბოლოსთვის მთლიანი სესხების ლარიზაციის კოეფიციენტმა 58.37% შეადგინა და წინა თვის ბოლო მდგომარეობასთან შედარებით გაიზარდა 0.31 პროცენტული პუნქტით.