1791275266

Delfi Lithuania-მ აჭარის ტურისტულ შესაძლებლობებს ვრცელი სტატია მიუძღვნა

ლიეტუვას ერთ-ერთმა წამყვანმა ონლაინმედია პლატფორმამ Delfi Lithuania აჭარის შესახებ ვრცელი სტატია გამოაქვეყნა, რომელშიც საქართველოს ზღვისპირა რეგიონი მკითხველისთვის ოთხივე სეზონის ტურისტულ მიმართულებადაა წარმოჩენილი.სტატია ბათუმს არა მხოლოდ საზღვაო კურორტად, არამედ აჭარის ბუნების, კულტურის, ისტორიისა და გასტრონომიის აღმოჩენის საწყის წერტილად წარმოაჩენს. მასალა მკითხველს აცნობს ქალაქის თანამედროვე და ისტორიულ არქიტექტურას, ზღვისპირა ინფრასტრუქტურას, აჭარის დაცულ ტერიტორიებს, მთიან რეგიონს, ადგილობრივ სამზარეულოსა და აქტიური ტურიზმის შესაძლებლობებს.„საქართველოს ამ ულამაზესი რეგიონის რამდენიმე სიტყვით აღწერა რთულია. მისი უნიკალური კულტურა, მრავალფეროვანი სამზარეულო და სტუმართმოყვარეობის მრავალსაუკუნოვანი ტრადიცია ამ მხარეში მოგზაურობას საქართველოს გაცნობის შესანიშნავ შესაძლებლობად აქცევს,“ წერს Delfi.lt.სტატიაში მნიშვნელოვანი ადგილი ეთმობა ეკო და სათავგადასავლო ტურიზმს. Delfi.lt მკითხველს აცნობს მტირალას ეროვნულ პარკს, ქობულეთისა და კინტრიშის დაცულ ტერიტორიებს, ბათუმის ბოტანიკურ ბაღს, მთიან აჭარას და რეგიონში არსებულ საფეხმავლო და საველოსიპედე მარშრუტებს. გამოცემა ასევე საუბრობს ჯომარდობის, კანიონინგის, ცხენით ჯირითისა და ჩირუხის მთაზე არსებული ზიპლაინის შესაძლებლობებზე.ბათუმის ურბანულ გარემოზე საუბრისას ავტორი ქალაქის ერთ-ერთ მთავარ უპირატესობად სხვადასხვა ეპოქის არქიტექტურის თანაარსებობას გამოყოფს — ისტორიული ბათუმიდან თანამედროვე ცათამბჯენებამდე. ,,ბათუმში დაბრუნებისას კონტრასტები არსად ქრება — ამჯერად მათ ბუნება კი არა, თავად ქალაქი ქმნის. ძველ ბათუმში შემორჩენილი XIX საუკუნის შენობები, მორთული ფასადებითა და აივნებით, იმ ეპოქას გვახსენებს, როდესაც ქალაქი შავი ზღვის მნიშვნელოვანი პორტის სახით ვითარდებოდა. თუმცა, საკმარისია რამდენიმე ქუჩა გაიარო და ქალაქის იერსახეს უკვე მინის ცათამბჯენები და თანამედროვე არქიტექტურა ცვლის“.Delfi.lt-ის მასალაში მნიშვნელოვანი აქცენტი კეთდება აჭარულ სამზარეულოზე. გამოცემა მკითხველს აცნობს აჭარულ ხაჭაპურს, ბორანოს, სინორსა და ჩირბულს, ასევე ქართული სუფრისა და ღვინის კულტურას. სტატიაში ხაზგასმულია საქართველოს მეღვინეობის მრავალათასწლოვანი ისტორია და აჭარის ადგილობრივი ვაზის ჯიშები — ჩხავერი და ქედის ცოლიკაური.გამოცემა ბათუმსა და აჭარას ოთხივე სეზონის მიმართულებად წარმოაჩენს. ზაფხულის საზღვაო დასვენებასთან ერთად, სტატია ყურადღებას უთმობს გაზაფხულისა და შემოდგომის ბუნებრივ და გასტრონომიულ შესაძლებლობებს, ასევე ზამთარში მთიან აჭარასა და გოდერძის სამთო-სათხილამურო კურორტს.სტატიის დასკვნით ნაწილში Delfi.lt ბათუმისა და აჭარის მთავარ უპირატესობად ერთ რეგიონში განსხვავებული ტურისტული გამოცდილებების მიღების შესაძლებლობას ასახელებს. „მისი ერთ-ერთი მთავარი უპირატესობაა შესაძლებლობა, ერთ რეგიონში საქართველოს სრულიად განსხვავებული მხარეები აღმოაჩინოთ — ცოცხალი ზღვისპირა ქალაქიდან აჭარის მთებამდე, მდინარეებსა და ხშირ ტყეებში დამალულ ჩანჩქერებამდე.“Delfi Lithuania (Delfi.lt) ლიტვის ერთ-ერთი ყველაზე ცნობილი და ფართოდ გავრცელებული ონლაინმედია პლატფორმაა, რომელსაც ყოველთვიურად საშუალოდ 700 000 რეალური მომხმარებელი ჰყავს.იხილეთ სტატია - https://www.delfi.lt/keliones/platus-pasaulis/milijonus-turistu-pritraukiantis-sakartvelo-kurortas-batumis-pajuris-tik-viena-is-priezasciu-cia-atvykti-120295523

1790947991

მარიამ ქვრივიშვილი ერთ-ერთი უმსხვილესი ტაილანდური კონგლომერატის Charoen Pokphand Group - ის (CP Group) თავმჯდომარეს შეხვდა

 ეკონომიკისა და მდგრადი განვითარების მინისტრი მარიამ ქვრივიშვილი ერთ-ერთი უმსხვილესი ტაილანდური კონგლომერატის Charoen Pokphand Group-ის (CP Group) თავმჯდომარეს, კრის სუოპაკიჯ ჩეარავანონტს შეხვდა.შეხვედრაზე სხვადასხვა სექტორში შესაძლო სამომავლო თანამშრომლობის საკითხები განიხილეს. აქცენტი გაკეთდა საქართველოს ეკონომიკის ტენდენციებზე, ლიბერალური ბიზნეს და საინვესტიციო გარემოზე, ასევე ბიზნესის ხელშეწყობის სამთავრობო პროგრამებზე.ქართულმა მხარემ ყურადღება გაამახვილა ანაკლიის ღრმაწყლოვანი ნავსადგურის პროექტზე, რომელსაც მთავრობა მსოფლიოში აპრობირებული „ლენდლორდის“ მოდელით ავითარებს, აგრეთვე რკინიგზის მოდერნიზაციაზე და თბილისის ახალ საერთაშორისო აეროპორტზე.შეხვედრაზე აქცენტი გაკეთდა საქართველოს ენერგეტიკული სექტორის პოტენციალზე, ენერგეტიკის სექტორში მიმდინარე და დაგეგმილ პროექტებზე. ასევე ხაზი გაესვა შავი ზღვის წყალქვეშა კაბელისა და მწვანე ენერგეტიკული დერეფნის პროექტის მიმდინარეობას.ერთ-ერთი უმსხვილესი ტაილანდური კონგლომერატი Charoen Pokphand Group-ი 23 ქვეყანაშია წარმოდგენილი და 456 ათასზე მეტ თანამშრომელს აერთიანებს. ბიზნეს გაერთიანება სხვადასხვა სექტორში საქმიანობს, მათ შორისაა, საკვებისა და აგრობიზნესის, საცალო და ელექტრონული ვაჭრობის, ტელეკომუნიკაციების, უძრავი ქონების, ინფრასტრუქტურის, ფინანსებისა და ავტოინდუსტრიის მიმართულებები.შეხვედრას ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, ინვესტიციების სააგენტოს დირექტორი მიხეილ ხიდურელი, საქართველოს ეკონომიკის განვითარების კორპორაციის გენერალური დირექტორი ირაკლი გაბრიაძე დაესწრნენ.ინფორმაციას ეკონომიკისა და მდგრადი განვითარების სამინისტრო ავრცელებს. 

1790857884

აჭარის ტურიზმის დეპარტამენტმა რეგიონი პარიზის ტურისტულ გამოფენაზე წარადგინა

აჭარის ტურისტულ შესაძლებლობებს პარიზის საერთაშორისო ტურისტულ გამოფენაზე გაეცნენ. IFTM Paris 2026-ის გამოფენაზე რეგიონი აჭარის ტურიზმის დეპარტამენტმა ტურიზმის ეროვნულ ადმინისტრაციასთან და ტურისტულ კომპანიებთან ერთად წარადგინა. აჭარის ტურისტული პოტენციალის პოპულარიზაციისა და სამომავლო თანამშრომლობის მიზნით დეპარტამენტის წარმომადგენლებმა სამუშაო შეხვედრები გამართეს ფრანგული და საერთაშორისო მედიის წარმომადგენლებთან. მათ შორის Le Figaro Voyage, Hachette, Petit Futé, Lonely Planet, National Geographic Traveller, საფრანგეთის DMC ალიანსის და საფრანგეთის ეროვნული ტელევიზიის წარმომადგენლებთან. პარიზის გამოფენაზე მსოფლიოს სხვადასხვა ქვეყნიდან 1600-ზე მეტი კომპანია და ორგანიზაცია იყო წარმოდგენილი.მიმდინარე წელს, აჭარის ტურიზმის დეპარტამენტმა რეგიონი 20-მდე საერთაშორისო ტურისტულ გამოფენაზე წარადგინა. მათ შორისაა იაპონიის, დუბაის, ბერლინის, მადრიდის, ნიუ-იორკის, ჩინეთის, ფრანქფურტის, ინდოეთის, ყაზახეთის, უნგრეთისა და ისრაელის გამოფენები. გარდა გამოფენებზე აჭარის პოპულარიზაციისა, რეგიონის შესახებ არაერთი მასალა გამოქვეყნდა საერთაშორისო გამოცემებსა და უცხოელი ინფლუენსერების გვერდებზე. წელს, აჭარას ბლოგერები პოლონეთიდან, იტალიიდან, ესპანეთიდან, გერმანიიდან, ყაზახეთიდან და უზბეკეთიდან სტუმრობდნენ. მათ მიერ მხოლოდ ერთ თვეში აჭარაზე გამოქვეყნებული კონტენტის ნახვებმა სოციალურ მედიაში 25 მილიონზე მეტი ნახვა დააგროვა. აჭარის ტურიზმის დეპარტამენტი რეგიონის პოპულარიზაციას წლის ბოლომდე გააგრძელებს, როგორც საერთაშორისო ტურისტულ გამოფენებში აჭარის წარდგენით, ისე მედიატურების ორგანიზებითა და სხვადასხვა მარკეტინგული კამპანიებით.

1790793689

გენადი არველაძე: CAREC-ის სავაჭრო პალატების ალიანსი კერძო სექტორს დაეხმარება, უფრო აქტიურად განახორციელოს ბიზნესპროექტები შუა დერეფანში

ეკონომიკისა და მდგრადი განვითარების მინისტრის მოადგილე გენადი არველაძემ CAREC-ის (ცენტრალური აზიის რეგიონული ეკონომიკური თანამშრომლობის პროგრამა) მინისტრთა 25-ე კონფერენციის ფარგლებში გამართულ ბიზნესფორუმში მიიღო მონაწილეობა.ღონისძიების ფარგლებში ჩამოყალიბდა CAREC-ის სავაჭრო პალატების ალიანსი, რომელშიც საქართველოც გაერთიანდა. ალიანსი თანამშრომლობის ღია პლატფორმაა, რომელიც CAREC-ის წევრი ქვეყნების სავაჭრო-სამრეწველო პალატებსა და ბიზნესასოციაციებს აერთიანებს.მინისტრის მოადგილის განცხადებით, CAREC-ის სავაჭრო პალატების ალიანსში საქართველოს გაერთიანება ხელს შეუწყობს ქვეყნის თანამშრომლობას აღნიშნული პროგრამის სხვა მონაწილე სახელმწიფოებთან შემდეგი მიმართულებებით - კერძო და საჯარო სექტორებს შორის თანამშრომლობის გაძლიერება, ინფრასტრუქტურული პროექტების განვითარება, რეგიონის საინვესტიციო და ბიზნესშესაძლებლობების, მათ შორის, ახალი ბიზნესპარტნიორობების ხელშეწყობა.„ალიანსი კერძო სექტორს დაეხმარება, უფრო აქტიურად განახორციელოს ბიზნეს პროექტები შუა დერეფანში და ხელი შეუწყოს ვაჭრობისა და ინვესტიციების მიმართულებით თანამშრომლობას,“ - აღნიშნა გენადი არველაძემ.საქართველოს ეკონომიკისა და მდგრადი განვითარების მინისტრის მოადგილე მონღოლეთში ვიზიტის ფარგლებში სიტყვით გამოვიდა CAREC-ის მინისტრთა 25-ე კონფერენციასა და სადისკუსიო პანელში, რომელიც შუა დერეფნის განვითარების მიმართულებებს მიეძღვნა.

1790779860

მთავრობამ პარლამენტს 2027 წლის ბიუჯეტის პირველადი ვერსია წარუდგინა

საქართველოს მთავრობამ პარლამენტს წარუდგინა 2027 წლის ბიუჯეტის პირველადი ვერსია, რომლის მიხედვით 2027-2030 წლების მაკროეკონომიკური პარამეტრები დაგეგმილია შედარებით კონსერვატიული პროგნოზების მიხედვით, აღნიშნული სრულ თანხვედრაშია საერთაშორისო საფინანსო ინსტიტუტების პროგნოზებთან და ითვალისწინებს: რეალური ეკონომიკური ზრდის პროგნოზი 2027 წლისთვის შეადგენს 5.0 პროცენტს, ხოლო მომდევნო წლებში 5.2-5.3 პროცენტის ფარგლებშია; ნომინალური მთლიანი შიდა პროდუქტი 2027 წელს 8.9 პროცენტით იზრდება და 126.4 მილიარდ ლარს შეადგენს. შემდგომ წლებში ზრდის პროგნოზი საშუალოდ 8.5 პროცენტია და 2030 წლისთვის 161.0 მილიარდ ლარს აჭარბებს; ერთ სულ მოსახლეზე გადაანგარიშებით მთლიანი შიდა პროდუქტის მაჩვენებელი 2027 წლის ბოლოსთვის 12.0 ათას დოლარს, ხოლო 2030 წლისთვის 15.0 ათას დოლარს აჭარბებს; ინფლაციის მაჩვენებელს მომდევნო წელს კლებადი ტენდენცია ექნება და წლის ბოლოსთვის მის მიზნობრივ მაჩვენებელს, 3.0 პროცენტს დაუბრუნდება. მომდევნო წლებშიც ინფლაციის პროგნოზი მისი მიზნობრივი მაჩვენებლის ფარგლებშია; მიმდინარე ანგარიშის დეფიციტი 2027 წლისთვის 4.5 პროცენტს შეადგენს, ხოლო მომდევნო წლებში 4.3 პროცენტამდე მცირდება; ბიუჯეტის დეფიციტი 2027 წლისთვის დაგეგმილია მთლიანი შიდა პროდუქტის 2.5 პროცენტის დონეზე, ხოლო შემდგომ წლებში მცირედით კლებადი ტენდენცია აქვს და 2.2 პროცენტამდე მცირდება; მთავრობის ვალის მაჩვენებელი 2027 წლისთვის 31.6 პროცენტის დონეზეა და მომდევნო წლებში ინარჩუნებს მცირედით კლების ტენდენციას; ნაერთი ბიუჯეტის საგადასახადო შემოსავლები 2027 წლისთვის დაგეგმილია 29.5 მილიარდი ლარის ოდენობით, ხოლო 2030 წლისთვის 41.0 მილიარდ ლარს აჭარბებს.ნაერთი ბიუჯეტის ჯამური შემოსულობები შეადგენს 37 მილიარდ 531 მილიონ ლარს, რაც 2026 წლის საპროგნოზო მაჩვენებელს 1 მილიარდ 526 მილიონი ლარით აღემატება.ჯამური შემოსულობების 85 პროცენტზე მეტს შემოსავლები წარმოადგენს, რომლის მოცულობა 32 მილიარდ 90 მილიონ ლარს აჭარბებს და მიმდინარე წლის საპროგნოზო მოცულობასთან შედარებით 1 მილიარდ 754 მილიონი ლარით მეტია.საგადასახადო შემოსავლების მოცულობა 2027 წლისთვის განსაზღვრულია 29 მილიარდ 520 მილიონი ლარის ოდენობით, რაც მიმდინარე წლის საპროგნოზო მოცულობას 2 მილიარდ 120 მილიონი ლარით, ხოლო თავდაპირველ გეგმურ მაჩვენებელს 2 მილიარდ 480 მილიონი ლარით.მომდევნო წლის განმავლობაში პროგნოზირებულია ზედმეტად გადახდილი გადასახადების დაბრუნება ჯამში 3 მილიარდ 200 მილიონ ლარზე მეტი მოცულობით.2027 წლის ბიუჯეტის ხარჯვითი ნაწილი დაგეგმილია 37 მილიარდ 562 მილიონი ლარის ოდენობით, რაც მიმდინარე წლის საპროგნოზო მოცულობას 1 მილიარდ 928 მილიონი ლარით აღემატება.2027 წლის ჯამური გადასახდელებიდან 25 მილიარდ 424 მილიონი ლარი მიიმართება მიმდინარე ხარჯების (საპროცენტო ხარჯების გარდა) დაფინანსებაზე, რაც 2026 წლის საპროგნოზო მოცულობას 2 მილიარდ 34 მილიონი ლარით აღემატება.მიმდინარე ხარჯები ძირითადად გაზრდილია შემდეგი მიმართულებებით:ჯანდაცვისა და სოციალური ხარჯები გაზრდილია 830 მილიონი ლარის ოდენობით, მათ შორის: მოსახლეობის საპენსიო უზრუნველყოფის ხარჯი გაზრდილია 555 მილიონი ლარით. კერძოდ, მოქმედი ინდექსაციის ფორმულის შესაბამისად 70 წლის და მეტი ასაკის პირთა პენსია იზრდება 60 ლარის ოდენობით და განისაზღვრება 555 ლარის ოდენობით (მაღალმთიან დასახლებებში 665 ლარს აჭარბებს), ხოლო 70 წლამდე ბენეფიციარებისთვის იზრდება 20 ლარით და 390 ლარს შეადგენს (მაღალმთიან დასახლებებში 468 ლარი); ინდექსაციის შესაბამისად იზრდება შეზღუდული შესაძლებლობის მქონე პირთა სოციალური გასაცემლები, რისთვისაც დამატებით გამოყოფილია 60 მილიონი ლარი; ჯანდაცვის პროგრამების დაფინანსება გაზრდილია 127 მილიონ ლარზე მეტით, რომლის ფარგლებში გათვალისწინებულია სასწრაფო დახმარების პერსონალისა და სოფლის ექიმი/ექთნის ხელფასების ზრდა; სოციალური რეაბილიტაციისა და ბავშვზე ზრუნვის პროგრამა გაზრდილია 26 მილიონ ლარზე მეტით; დაგროვებითი საპენსიო სქემის დაფინანსება გაზრდილია 60 მილიონი ლარით.განათლების ხარჯები - გაზრდილია 400 მილიონი ლარით, რომლის ფარგლებში გათვალისწინებულია საჯარო სკოლების მასწავლებლების, მათი ადმინისტრაციული პერსონალისა და საბავშვო ბაღების ხელფასების ზრდა. ასევე, გათვალისწინებულია უმაღლესი განათლების რეფორმის ფარგლებში სახელმწიფო უნივერსიტეტებში უფასო სწავლების დაფინანსება;საქართველოს კანონმდებლობის საფუძველზე, კერძო სექტორში ბოლო 4 კვარტალში გაზრდილი ხელფასების შესაბამისად, 8.4%-ით იზრდება საბაზო თანამდებობრივი სარგო საჯარო სექტორში, რისი გათვალისწინებითაც შრომის ანაზღაურების ფონდი გაზრდილია 395 მილიონი ლარით;გარემოს დაცვისა და სოფლის მეურნეობის პროგრამების დაფინანსება გაზრდილია 90 მილიონი ლარით;სპორტული ფედერაციების დაფინანსება გაზრდილია 50 მილიონი ლარით;სხვა დანარჩენი სახელმწიფო პროგრამების და მუნიციპალური სერვისების დაფინანსება გაზრდილია 269 მილიონი ლარით;2027 წლის ნაერთი ბიუჯეტიდან კაპიტალური ხარჯების დასაფინანსებლად მიიმართება 8 მილიარდ 431 მილიონ ლარზე მეტი, რაც მიმდინარე წლის საპროგნოზო მაჩვენებელს თითქმის 1 მილიარდი ლარით აღემატება.აღნიშნული თანხის ფარგლებში გათვალისწინებულია: მუნიციპალური ინფრასტრუქტურის გაუმჯობესებაზე მიიმართება 2 მილიარდ 700 მილიონ ლარზე მეტი; საგზაო ინფრასტრუქტურის გაუმჯობესებისთვის გამოყოფილია 1 მილიარდ 332 მილიონ ლარამდე, მათ შორის 723 მილიონი ლარია გათვალისწინებული ჩქაროსნული მაგისტრალების მშენებლობისთვის. განათლების მიმართულებით კაპიტალური ხარჯების დასაფინანსებლად გათვალისწინებულია 800 მილიონი ლარი; წყალმომარაგებისა და წყალარინების პროექტებზე მიიმართება 432 მილიონი ლარი; ენერგეტიკული ინფრასტრუქტურის გაუმჯობესებაზე გამოყოფილია 404 მილიონი ლარი, მათ შორის გათვალისწინებულია ენერგიის დამაგროვებელი მოწყობილობების მშენებლობა და რეგიონებში გაზიფიცირების სამუშაოების განახლება; სპორტული ინფრასტრუქტურის მშენებლობა-რეაბილიტაციაზე მიიმართება 310 მილიონი ლარი; ტურისტული ინფრასტრუქტურის განვითარებაზე გამოყოფილია 172 მილიონი ლარი; იძულებით გადაადგილებულ პირთა და მიგრანტთა განსახლების პროექტების დაფინანსებაზე გამოყოფილია 268 მილიონი ლარი; ჯანდაცვის ინფრასტრუქტურის გასაუმჯობესებლად გათვალისწინებულია 142.5 მილიონი ლარი; სამელიორაციო სისტემების მოდერნიზების პროექტებზე გამოყოფილია 145 მილიონი ლარი; მყარი ნარჩენების პროექტების განსახორციელებლად გათვალისწინებულია 106,4 მილიონი ლარი; პოლიციის, სახელმწიფო უსაფრთხოების და თავდაცვის მიმართულებით დაგეგმილი კაპიტალური ხარჯები შეადგენს 701 მილიონ ლარს; საქართველოს რკინიგზის გამტარუნარიანობის ზრდის მიზნით მიიმართება 250 მილიონი ლარი; თბილისის მეტროს მოდენრიზაციის პროექტის დაფინანსება შეადგენს 125 მილიონ ლარს; ანაკლიის პორტის მშენებლობის პროექტისთვის გამოყოფილია 125 მილიონი ლარი; სოფლების ინტერნეტიზაციის პროექტის ფარგლებში, ოპტიკურ-ბოჭკოვანი ქსელის მშენებლობაზე მიიმართება 107 მილიონი ლარი; ქუთაისის აეროპორტის ახალი ასაფრენ-დასაფრენი ბილიკის მშენებლობის დასასრულებლად გათვალისწინებულია 60 მილიონი ლარი; სხვა დანარჩენი კაპიტალური ხარჯები ჯამში შეადგენს 267 მილიონ ლარს;2027 წლის ბიუჯეტის პირველადი ვერსიის განხილვა საბიუჯეტო პროცესის თანახმად, გაგრძელდება პარლამენტში, სადაც მოხდება გამოთქმული წინადადებებისა თუ მოსაზრებების ასახვა, ხოლო დეკემბერში საბოლოო ვერსიის მიღება.

1790695144

თამარ იოსელიანი მსოფლიო ბანკის კვლევაზე: ჩვენ დერეფანს განვიხილავთ როგორც ერთიან სისტემას, რომელიც უნდა გავხადოთ კონკურენტუნარიანი, საიმედო, სწრაფი და შესაბამისად ამ მიმართულებით ეფექტიანი

„მსოფლიო ბანკის ახალი კვლევა კიდევ ერთხელ ხაზს უსვამს შუა დერეფნის მზარდ როლს და მის ეკონომიკურ პოტენციალს“, - ამის შესახებ ეკონომიკისა და მდგრადი განვითარების მინისტრის მოადგილე, თამარ იოსელიანმა მსოფლიო ბანკის ანგარიშთან დაკავშირებით განაცხადა.როგორც მინისტრის მოადგილე აცხადებს, რიგი ღონისძიებებით და ინფრასტრუქტურული პროექტებით 2040 წლამდე მოსალოდნელია ტვირთბრუნვის გაზრდა დაახლოებით 4-ჯერ და ასევე ტვირთის გადაზიდვის დროის შემცირება დაახლოებით 2/3-ით.„მნიშვნელოვანია ის ეკონომიკური ეფექტი, რაც მოსალოდნელია აღნიშნული ღონისძიებების გატარების საფუძველზე. კვლევის თანახმად, მშპ რეგიონში დაახლოებით 3.3%-ით გაიზრდება, ასევე შეიქმნება დაახლოებით 2 მილიონი სამუშაო ადგილი. ამ ყველაფერს საქართველო პასუხობს მწყობრი და თანმიმდევრული ხედვით, თუ როგორ უნდა განვითარდეს ქვეყნის სატრანსპორტო სისტემა“, - განაცხადა თამარ იოსელიანმა.მისი თქმით, ინფრასტრუქტურის განვითარება ქვეყნის ეკონომიკური პოლიტიკის მთავარი პრიორიტეტია.„2032 წლამდე ჩვენ ვგეგმავთ დაახლოებით 7 მილიარდი დოლარის ინვესტიციას ძირითად სატრანსპორტო ინფრასტრუქტურაში, რაც მოიცავს როგორც ანაკლიის ღრმაწყლოვან ნავსადგურს, რკინიგზის ისტორიულ მოდერნიზებას და ასევე საერთაშორისო აეროპორტების განვითარებას. ძალიან მნიშვნელოვანია იმის ხაზგასმა, რომ ჩვენ ამ ყველაფერს ვუყურებთ დიდ სურათში, რაც გულისხმობს ჩვენს საერთაშორისო პარტნიორებთან თანამშრომლობას, რადგან დერეფანს განვიხილავთ როგორც ერთიან სისტემას, რომელიც უნდა გავხადოთ კონკურენტუნარიანი, საიმედო, სწრაფი და შესაბამისად ამ მიმართულებით ეფექტიანი“, - აღნიშნა ეკონომიკისა და მდგრადი განვითარების მინისტრის მოადგილემ.მსოფლიო ბანკის ახალი ანგარიშის მიხედვით, 2040 წლისთვის შუა დერეფნის გამტარუნარიანობა შესაძლოა გაოთხმაგდეს, ხოლო მგზავრობის სავარაუდო ხანგრძლივობა ორი მესამედით შემცირდეს. ანგარიშის მიხედვით, ასეთი სარგებლის მიღება დერეფნის ცხრა ქვეყანაში - სომხეთში, აზერბაიჯანში, საქართველოში, ყაზახეთში, ყირგიზეთის რესპუბლიკაში, ტაჯიკეთში, თურქეთში, თურქმენეთსა და უზბეკეთში იქნება შესაძლებელი.

1790692260

ქუთაისის აეროპორტი განვითარების ახალ ეტაპზე გადადის - ლევან მოსეშვილი

3.5 კმ-იანი ასაფრენ-დასაფრენი ზოლი საშუალებას მოგვცემს, მივიღოთ ფართოფუზელაჟიანი საჰაერო ხომალდები, რაც უფრო შორ მანძილზე ფრენების განხორციელების, მეტი მგზავრის მომსახურებისა და სატვირთო გადაზიდვების დაწყების შესაძლებლობას მოგვცემს. ეს კი ქუთაისის საერთაშორისო აეროპორტს განვითარების ახალ ეტაპზე გადაიყვანს,- ამის შესახებ საქართველოს აეროპორტების გაერთიანების გენერალურმა დირექტორმა, ლევან მოსეშვილმა ქუთაისის საერთაშორისო აეროპორტის 14 წლისთავისადმი მიძღვნილ ღონისძიებაზე განაცხადა.მისი თქმით, წლის ბოლოს დაგეგმილია ახალი ასაფრენ-დასაფრენი ზოლისა და მასთან დაკავშირებული ინფრასტრუქტურის გახსნა.ლევან მოსეშვილმა ქუთაისის საერთაშორისო აეროპორტის განვითარების მნიშვნელობაზე, ავიაკომპანიებთან პარტნიორობასა და სამომავლო გეგმებზე ისაუბრა.„ქუთაისის საერთაშორისო აეროპორტი 14 წლისაა, დღეს პარალელურად ვზეიმობთ ჩვენი მთავარი პარტნიორი კომპანიის, Wizz Air-ის ბაზის დაარსებიდან 10 წლის იუბილეს. ქუთაისის საერთაშორისო აეროპორტიდან სრულდება 32 მიმართულებით ფრენები, აქედან 25 მიმართულება ევროპულია, რაც ძალიან მნიშვნელოვანია ტურისტული სეგმენტის განვითარებისთვის“, – განაცხადა ლევან მოსეშვილმა.მისივე თქმით, აეროპორტისთვის ავიაკომპანიებთან მჭიდრო თანამშრომლობა და ახალი მიმართულებების დამატება ერთ-ერთი მნიშვნელოვანი პრიორიტეტია.საიუბილეო ღონისძიებას საქართველოს ეკონომიკისა და მდგრადი განვითარების მინისტრის მოადგილე თამარ იოსელიანი, საქართველოს აეროპორტების გაერთიანების გენერალური დირექტორი ლევან მოსეშვილი, Wizz Air-ის კორპორაციული მიმართულების ხელმძღვანელი ოუენ ჯონსი და ადგილობრივი ხელისუფლების წარმომადგენლები დაესწრნენ.საიუბილეო თარიღთან დაკავშირებით, ერთი კვირის განმავლობაში ქუთაისის საერთაშორისო აეროპორტში სხვადასხვა გასართობი ღონისძიება გაიმართება. ამასთან, პარტნიორი კომპანიების მიერ მგზავრებისთვის სპეციალური შეთავაზებები იმოქმედებს.ინფორმაციას საქართველოს აეროპორტების გაერთიანება ავრცელებს.

1790692140

თამარ იოსელიანი: წლების განმავლობაში ქუთაისის საერთაშორისო აეროპორტის მთავარ პარტნიორს - „ვიზეარს“ ძალიან დიდი წვლილი აქვს შეტანილი მის განვითარებაში, რაც ნამდვილად ჩანს რიცხვებში და შედეგიც ნათელია

„ქუთაისის საერთაშორისო აეროპორტი 14 წლისაა, ასევე დღეს Wizz Air-ის ბაზის დაარსებიდან 10 წლის იუბილეს აღვნიშნავთ. ეს ორი თარიღი ერთმანეთთან განსაკუთრებულად და მჭიდროდ არის დაკავშირებული“, - განაცხადა ეკონომიკისა და მდგრადი განვითარების მინისტრის მოადგილე თამარ იოსელიანმა ქუთაისში გამართულ საიუბილეო ღონისძიებაზე.როგორც მინისტრის მოადგილემ აღნიშნა, ქუთაისის საერთაშორისო აეროპორტიდან პირველი რეისი სწორედ კომპანია „ვიზეარმა“ შეასრულა კიევის მიმართულებით, ხოლო 2016 წლიდან პირველი ბაზა დაარსდა, რაც უმნიშვნელოვანესი წინ გადადგმული ნაბიჯი იყო.„7 მიმართულებიდან დღეს უკვე 24 მიმართულებაზე ვართ ასული, ჩვენს მთავარ სტრატეგიულ პარტნიორთან ერთად, რაც ძალიან მნიშვნელოვანია, ზოგადად კი, 16 ქვეყნის მიმართულებით 31 ქალაქში დავფრინავთ. ასევე უნდა აღინიშნოს, რომ ამ წლების განმავლობაში ქუთაისის საერთაშორისო აეროპორტის მთავარ პარტნიორს - „ვიზეარს“ ძალიან დიდი წვლილი აქვს შეტანილი მის განვითარებაში, რაც ნამდვილად ჩანს რიცხვებში და შედეგიც ნათელია. 2023 წელს ქუთაისის საერთაშორისო აეროპორტი მოემსახურა 1 მილიონ 600 ათას მგზავრს, 2024-ში დაახლოებით 1 მილიონ 700 ათას მგზავრს მოვემსახურეთ, ხოლო 2025 წელს უკვე გვქონდა ძალიან შთამბეჭდავი რიცხვები - დაახლოებით 1 მილიონ რვაასი ათას მგზავრზე მეტს მოვემსახურეთ“, - განაცხადა თამარ იოსელიანმა.რაც შეეხება მიმდინარე 2026 წლის მონაცემებს, მინისტრის მოადგილის თქმით, ქუთაისის საერთაშორისო აეროპორტში მგზავრთნაკადის პოზიტიური დინამიკა კვლავ გრძელდება და პირველი 8 თვის მონაცემები ძალიან დადებითია.„მიუხედავად იმისა, რომ ზოგადად საავიაციო სექტორში გამოწვევებია მსოფლიოში, ქუთაისის საერთაშორისო აეროპორტი, ასე ვთქვათ, თამასას ინარჩუნებს“, - აღნიშნა თამარ იოსელიანმა.

1790605140

საქართველო-აზერბაიჯანი-თურქეთის საბაჟო ადმინისტრაციების ხელმძღვანელი პირების შეხვედრა გაიმართა

ქალაქ გიოგოლოში საქართველოს, აზერბაიჯანისა და თურქეთის რესპუბლიკების საბაჟო ადმინისტრაციების ხელმძღვანელი პირების ერთობლივი საბაჟო კომიტეტის რიგით მე-5 შეხვედრა გაიმართა, რომელსაც ესწრებოდნენ საქართველოს ფინანსთა სამინისტროს შემოსავლების სამსახურის უფროსი მამუკა ბარათაშვილი,  აზერბაიჯანის რესპუბლიკის სახელმწიფო საბაჟო კომიტეტის თავმჯდომარე, შაჰინ ბაგიროვი და თურქეთის რესპუბლიკის ვაჭრობის მინისტრის მოადგილე, სეზაი უჩარმაკი.საბაჟო ადმინისტრაციების ხელმძღვანელმა პირებმა, სამმხრივი შეხვედრის ფარგლებში ყურადღება გაამახვილეს რეგიონული სატრანზიტო პოტენციალის განვითარებაზე, შუა დერეფნისა და ბაქო–თბილისი–ყარსის სარკინიგზო ხაზის ეფექტიანობის გაზრდაზე, ასევე საბაჟო პროცედურების გამარტივებაზე. ამასთან, განხილვის ერთ-ერთი მთავარი მიმართულება იყო წინასწარი საბაჟო ინფორმაციის გაცვლის შემდგომი განვითარება, საერთაშორისო სატრანზიტო სისტემების ურთიერთთავსებადობა და საზღვრის კვეთისთვის საჭირო დროის კიდევ უფრო შემცირება.სამუშაო შეხვედრების მსვლელობისას, მხარეებმა ასევე იმსჯელეს ელექტრონული დეკლარირებისას ინფორმაციის წინასწარი გაცვლასა და „ერთიანი ფანჯრის“ პრინციპის შემდგომ განვითარებაზე. განსაკუთრებული ყურადღება დაეთმო ციფრული საბაჟოს განვითარებას და გაზრდილი ტვირთნაკადის პროცესში, ხელოვნური ინტელექტის გამოყენებით რისკების ერთობლივი მართვის შესაძლებლობების განვითარებას.აღსანიშნავია, რომ შეხვედრაზე ხაზი გაესვა ნარკოტიკული საშუალებებისა და სხვა აკრძალული საქონლის უკანონო გადაადგილების წინააღმდეგ ერთობლივი ბრძოლის მნიშვნელობას, ოპერატიული ინფორმაციის დროულ გაცვლასა და შესაბამის სტრუქტურულ ერთეულებს შორის კოორდინაციის გაძლიერებას.ფინანსთა სამინისტროს შემოსავლების სამსახურის უფროსის თქმით,  უმნიშვნელოვანესი პროცესია სამ ქვეყანას შორის არსებულ მჭიდრო და შედეგზე ორიენტირებული თანამშრომლობა.,,ჩვენი მთავარი ამოცანაა, უსაფრთხოებისა და კანონიერი ვაჭრობის ფარგლებში, 3 ქვეყნის საზღვრებს შორის გადაადგილებულ ტვირთებსა და სატრანსპორტო საშუალებების მიმართ  შეუფერხებლად განხორციელდეს საზღვრის კვეთის პროცედურები, რაც ხელს შეუწყობს მთლიანად რეგიონის სატრანზიტო-ეკონომიკური პოტენციალის გაძლიერებას. ამასთან, აღსანიშნავია, რომ საბაჟო ადმინისტრაციების განვითარება, შეუძლებელია ნაყოფიერი თანამშრომლობის გარეშე, იმედი  მაქვს ჩვენი შემდეგი შეხვედრისთვის მნიშვნელოვანი და საინტერესო სიახლეებით წარვდგებით“, - აღნიშნა მამუკა ბარათაშვილმა.აღნიშნულ შეხვედრებს შემოსავლების სამსახურის მხრიდან ესწრებოდნენ შემოსავლების სამსახურის უფროსის პირველი მოადგილე მიხეილ ჩოკოშვილი, ასევე საბაჟო დეპარტამენტის ხელმძღვანელი, კიაზო ახალაია, საერთაშორისო ურთიერთობათა დეპარტამენტის უფროსი, არჩილ დარახველიძე, საინფორმაციო ტექნოლოგიების ცენტრის უფროსი, ვახტანგ ლაშქარაძე, აზერბაიჯანის რესპუბლიკის ქალაქ განჯაში საქართველოს გენერალური კონსული, კახაბერ აბდალაძე და  სხვა ხელმძღვანელი პირი.

1790346840

ჩვენი მიზანია, მზარდი დაკავშირებადობა და ტვირთნაკადები გარდავქმნათ უფრო ფართო ეკონომიკურ შესაძლებლობებად - ვახტანგ ცინცაძე

ჩვენი მიზანია, მზარდი დაკავშირებადობა და ტვირთნაკადები გარდავქმნათ უფრო ფართო ეკონომიკურ შესაძლებლობებად, – ამის შესახებ ეკონომიკისა და მდგრადი განვითარების მინისტრის მოადგილე ვახტანგ ცინცაძემ ბაქოში მიმდინარე აზერბაიჯანის მეორე საერთაშორისო საინვესტიციო ფორუმზე სიტყვით გამოსვლისას განაცხადა.ღონისძიება აზერბაიჯანის პრეზიდენტის პატრონაჟით გაიმართა.შუა დერეფნის შესაძლებლობებზე საუბრისას, მინისტრის მოადგილემ აღნიშნა, რომ რეგიონის ქვეყნები სულ უფრო მეტად აცნობიერებენ, რომ შუა დერეფნის სრული პოტენციალის რეალიზება მხოლოდ კოორდინირებული და ერთობლივი ძალისხმევით არის შესაძლებელი.„სატრანსპორტო კავშირების გაძლიერება, ვაჭრობის ხელშეწყობის გაუმჯობესება, ციფრული დაკავშირებადობის განვითარება და ინფრასტრუქტურისა და სერვისების ჰარმონიზაცია სასიცოცხლოდ მნიშვნელოვანი იქნება დერეფნის უფრო ეფექტიან, კონკურენტუნარიან და მდგრად სისტემად ჩამოსაყალიბებლად.ღრმა ეკონომიკურ ინტეგრაციასთან ერთად, ამ ძალისხმევას შეუძლია წვლილი შეიტანოს უფრო უსაფრთხო და საიმედო ღირებულებათა ჯაჭვების შექმნასა და ცენტრალური აზიის, სამხრეთ კავკასიის, თურქეთის, ევროპისა და ჩინეთის ბაზრებს შორის მჭიდრო კავშირების დამყარებაში. შესაბამისად, ჩვენი მიზანი უნდა იყოს არა უბრალოდ სატრანზიტო მოცულობების გაზრდა, არამედ იმის უზრუნველყოფა, რომ მზარდი დაკავშირებადობა გარდაიქმნას მეტ ინვესტიციად, ხელი შეუწყოს პროდუქტიულობისა და დამატებული ღირებულების ზრდას და დასაქმების ახალ შესაძლებლობებს მთელ რეგიონში“, – აღნიშნა მინისტრის მოადგილემ.პანელურ დისკუსიაში ვახტანგ ცინცაძესთან ერთად მონაწილეობდნენ თურქმენეთის, ყაზახეთის, გერმანიის, ჩინეთის მთავრობების წარმომადგენლები, ასევე Kibar Holding-ის და საერთაშორისო საფინანსო კორპორაციის (IFC) ხელმძღვანელი პირები.ინფორმაციას ეკონომიკისა და მდგრადი განვითარების სამინისტრო ავრცელებს.  

1790266800

ჩინეთში ვიზიტის ფარგლებში შევთანხმდით სამუშაო ჯგუფების ჩამოყალიბებაზე, ვიმუშავებთ კონკრეტული მიმართულებებით, მათ შორის საქართველოდან ჩინეთში პროდუქტების ექსპორტზე - გენადი არველაძე

საქართველოსა და ჩინეთს შორის სტრატეგიული პარტნიორობა ხელს უწყობს ჩინეთის სახელმწიფოსთან ეკონომიკური თანამშრომლობის განვითარებას, – ამის შესახებ განცხადება ეკონომიკისა და მდგრადი განვითარების მინისტრის მოადგილემ, გენადი არველაძემ ჩინეთში ვიზიტის შეჯამებისას გააკეთა.როგორც მინისტრია მოადგილემ აღნიშნა, ეკონომიკური თანამშრომლობის განვითარებას განსაკუთრებით უწყობს ხელს მაღალი დონის ვიზიტები, რომლებიც ბოლო წლების განმავლობაში ორ სახელმწიფოს შორის ხორციელდება.„გვქონდა შესაძლებლობა, მაღალი დონის შეხვედრები გაგვემართა როგორც სახელმწიფო, ასევე კერძო სექტორის წარმომადგენლებთან. გვქონდა ძალიან მნიშვნელოვანი შეხვედრა ტრანსპორტის მინისტრთან, ასევე კომერციის მინისტრის მოადგილესთან, სადაც თანამშრომლობის კონკრეტული მექანიზმები და ის მნიშვნელოვანი პროექტები განვიხილეთ, სადაც მომავალში ორ ქვეყანას შეუძლია ითანამშრომლოს. ასევე შევთანხმდით გარკვეული სამუშაო ჯგუფების ჩამოყალიბებაზე, სადაც კონკრეტული მიმართულებებით ვიმუშავებთ. აღნიშნული შეეხება ვაჭრობის მიმართულების გაძლიერებას, საქართველოდან იმ მნიშვნელოვანი პროდუქტების ექსპორტის ხელშეწყობას ჩინეთის ბაზარზე, რომელსაც ჩვენ ვაწარმოებთ“, – აღნიშნა მინისტრის მოადგილემ.როგორც გენადი არველაძემ განაცხადა, სამუშაო ჯგუფების შექმნა ორ ქვეყანას შორის ეკონომიკური თანამშრომლობის გაღრმავებას შეუწყობს ხელს.„აღნიშნული სამუშაო ჯგუფი დააჩქარებს იმ პროცესებს, რომელიც ხელს შეუწყობს სხვადასხვა, როგორც ელექტრონულ პლატფორმაზე ჩინეთში ჩვენი პროდუქტების პოპულარიზაციას, ასევე სხვადასხვა გამოფენებში მონაწილეობას და ბიზნეს კონტაქტების დამყარებას სხვადასხვა სავაჭრო მისიების ორგანიზებით“, – განაცხადა არველაძემ.  

1790238947

ეკატერინე მიქაბაძემ საერთაშორისო რეზერვებისა და საჯარო აქტივების მართვის ფორუმში მიიღო მონაწილეობა

საქართველოს ეროვნული ბანკის პირველმა ვიცე-პრეზიდენტმა ეკატერინე მიქაბაძემ უზბეკეთის ცენტრალური ბანკის მიერ ტაშკენტში გამართულ საერთაშორისო საჯარო აქტივების მართვის ფორუმში (IPAM Forum 2026) მიიღო მონაწილეობა.ფორუმმა ცენტრალური ბანკების, საერთაშორისო რეზერვებისა და სახელმწიფო აქტივების მართვაზე პასუხისმგებელი ინსტიტუტების, საერთაშორისო საფინანსო ორგანიზაციებისა და წამყვანი საინვესტიციო კომპანიების წარმომადგენლებს უმასპინძლა.ეკატერინე მიქაბაძემ მონაწილეობა მიიღო პანელურ დისკუსიაში „აქტივების სტრატეგიული განაწილება სუვერენული პორტფელებისთვის“, რომელიც სახელმწიფო საინვესტიციო პორტფელების სტრატეგიულ დაგეგმვას, აქტივების განაწილებას, დივერსიფიკაციასა და საინვესტიციო რისკების მართვას დაეთმო.სესიის მონაწილეებმა გრძელვადიანი საინვესტიციო მიზნების გათვალისწინებით პორტფელების სტრატეგიული ფორმირების, აქტივების ოპტიმალური განაწილებისა და რისკების მართვის თანამედროვე მიდგომებზე იმსჯელეს. ეკატერინე მიქაბაძესთან ერთად, სესიაში ასევე მონაწილეობდნენ Goldman Sachs Asset Management-ის მმართველი დირექტორი რიჩარდ მული, შვეიცარიის ეროვნული ბანკის რაოდენობრივი ანალიზისა და სხვადასხვა აქტივის მონიტორინგის მიმართულების ხელმძღვანელი ვინსენტ კრეტოლი და J.P. Morgan Asset Management-ის ვიცე-პრეზიდენტი კამერონ მაკკრიმონი. სესიის მოდერატორი მსოფლიო ბანკის RAMP-ის უფროსი ფინანსური ოფიცერი და ჩართულობის მენეჯერი რეზარტ ერინდი იყო.სებ-ის პირელი ვიცე-პრეზიდენტის განცხადებით, დღეს ცენტრალური ბანკების სავალუტო რეზერვების მართვა მხოლოდ უსაფრთხოების, ლიკვიდობისა და მომგებიანობის დაბალანსებას აღარ გულისხმობს. შესაბამისად, შეიცვალა აქტივების სტრატეგიული განაწილების მიდგომებიც. „საერთაშორისო ბაზრებზე გაზრდილი გაურკვევლობის, ეკონომიკური ფრაგმენტაციისა და გეოპოლიტიკური რისკების გათვალისწინებით, საქართველოს ეროვნულმა ბანკმა ქვეყნის საერთაშორისო რეზერვების მდგრადობის უზრუნველსაყოფად, აქტივების სტრატეგიული განაწილების პროცესის შედეგად, საერთაშორისო რეზერვების მნიშვნელოვანი დივერსიფიკაცია განახორციელა“, - აღნიშნა ეკატერინე მიქაბაძემ. IPAM Forum 2026-ის ფარგლებში ასევე განიხილეს გლობალური ფინანსური ბაზრებისა და საერთაშორისო რეზერვების მართვის ტენდენციები, რეზერვებისა და საჯარო აქტივების მართვის მდგრადი ჩარჩოები, გლობალური ფინანსური არქიტექტურის განვითარების პერსპექტივები და ოქროს როლი თანამედროვე სარეზერვო პორტფელებში.ფორუმის მიზანი საჯარო აქტივებისა და საერთაშორისო რეზერვების მართვის მიმართულებით საერთაშორისო დიალოგის გაღრმავება, გამოცდილების გაზიარება და პროფესიული თანამშრომლობის გაძლიერება იყო.