1713777532

საკონფერენციო დატვირთულობა პირველ კვარტალში საკმაოდ აქტიური იყო და მეორე კვარტალში საკონფერენციო დარბაზები უკვე გადავსებულია – Pullman Tbilisi Axis Towers

„სასტუმრო Pullman Tbilisi Axis Towers-ისთვის 2024 წლის პირველი კვარტალი საკმაოდ კარგად დაიწყო. 2023 წლის პირველ კვარტალთან შედარებით სასტუმროში ტურისტების შემოდინების კუთხით აღინიშნება 15%-იანი ზრდა. ჩვენთვის რაოდენობრივად TOP სტუმრები არიან მეზობელი ქვეყნებიდან, გალფის ქვეყნებიდან, ინდოეთიდან და ჩინეთიდან. 2024 წლის პირველ კვარტალში ტურისტების ზრდა გვქონდა ასევე ევროპის ქვეყნებიდანაც, თუმცა ევროპიდან დიდი ზრდა ამ ეტაპზე სამწუხაროდ არ არის“, – აცხადებს Pullman Tbilisi Axis Towers-ის მარკეტინგის დეპარტამენტის ხელმძღვანელი თათია ჩიკვაიძე.მისივე განმარტებით, Pullman Tbilisi Axis Towers-ში ტურისტები საშუალოდ 2-3 ღამით რჩებიან.„უმეტესად ჩამოდიან ტურისტული მიზნებისთვის, საქმიანი ვიზიტებისთვის და ასევე ბიზნეს შეხვედრებისთვის.საკონფერენციო დატვირთულობა საკმაოდ აქტიური იყო 2024 წლის იანვარ-მარტში და გეტყვით, რომ მეორე კვარტალში, სამივე თვე ამ მიმართულებით, უკვე გადავსებულია“, – აცხადებს თათია ჩიკვაიძე.2024 წლის პირველ კვარტალში საქართველოში 938,644 ტურისტული ვიზიტი შედგა, 2023 წელთან შედარებით ზრდა +11%-ია, 2019 წლის მონაცემებთან შედარებით კი ზრდა +6.4%-ს შეადგენს.იანვარი-მარტის პერიოდში საერთაშორისო მოგზაურების ვიზიტებმა 1.3 მილიონიან ნიშნულს მიაღწია, ზრდა გასული წლის ანალოგიურ პერიოდთან შედარებით +7.6%-ია, რაც 2019 წლის მონაცემის 80.4% აღდგენაა.საერთაშორისო მოგზაურებისა და საერთაშორისო ტურისტული ვიზიტების რაოდენობა გამოითვლება მსოფლიო ტურიზმის ორგანიზაციის რეკომენდაციით შემუშავებული მეთოდოლოგიის მიხედვით და მოიცავს უკვე განხორციელებულ და დასრულებულ ვიზიტებს.

1712305075

თებერვალში საქართველოში მშენებლობა 2.6 პროცენტით გაძვირდა

სტატისტიკის ეროვნული სამსახურის მონაცემებით, 2024 წლის თებერვალში მშენებლობის ღირებულების ინდექსი წინა თვესთან შედარებით 2.6 პროცენტით გაიზარდა.საქსტატის ცნობით, აღნიშნული ცვლილება ძირითადად განპირობებული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 16.7 პროცენტიანი ზრდით, რამაც 2.84 პროცენტული პუნქტი შეიტანა ჯამური ინდექსის ცვლილებაში.„წინა წლის შესაბამის თვესთან შედარებით მშენებლობის ღირებულების ინდექსი გაიზარდა 9.9 პროცენტით. ინდექსის ზრდა, უმეტესწილად, გამოწვეული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 46.8 პროცენტიანი ზრდით და სამშენებლო მასალების 2.5 პროცენტიანი გაძვირებით, რამაც, შესაბამისად, 8.4 და 1.44 პროცენტული პუნქტი შეიტანა ჯამური ინდექსის ცვლილებაში. ამასთან, 2022 წლის თებერვალთან შედარებით მშენებლობის ღირებულების ინდექსი გაიზარდა 15.1 პროცენტით“, – აცხადებენ საქსტატში.

1712129068

მსოფლიოში 2 781 მილიარდერია, რომელთა ქონება ჯამში $14.2 ტრილიონად ფასდება -Forbes

ჟურნალმა Forbes მილიარდერთა ყოველწლიური რეიტინგი გამოაქვეყნა. პირველ ადგილს კი რეიტინგში ფრანგი ბიზნესმენი ბერნარ არნო იკავებს, რომლის ქონებაც 223 მილიარდ დოლარად ფასდება. არნოს და მის ოჯახს ეკუთვნის ჰოლდინგი LVMH, რომელშიც ფუფუნების საგნების მწარმოებელი კომპანიები არიან გაერთიანებულები.მეორე ადგილზეა Tesla-სა და Space X-ს დამფუძნებელი და სოციალური ქსელის X მფლობელი ილონ მასკი ($195 მილიარდი), მესამეზეა Amazon-ის დამფუძნებელი ჯეფ ბეზოსი ($194 მილიარდი).სიაში პირველად მოხვდა ამერიკელი მომღერალი ტეილორ სვიფტი (1,1 მილიარდი), რეიტინგში ასევეა ChatGPT-ს შემქმნელი სემ ალტმანი (1 მილიარდი)Forbes-ის მონაცემებით, 2024 წელს მილიარდერების რაოდენობა მსოფლიოში რეკორდულ 2 781-ს აღწევს. ეს 141-ით მეტია, ვიდრე შარშან და 26-ით მეტი, ვიდრე 2021 წელს, როდესაც წინა რეკორდი დამყარდა.Forbes-ი აღნიშნავს, რომ მსოფლიო ელიტა ისეთი მდიდარია, როგორც არასოდეს და მისი კოლექტიური ქონება 14,2 ტრილიონ დოლარს შეადგენს.

1711959476

2025 წლიდან ბაზარზე ზედამხედველობასა და კონტროლს დამატებით 101 სამშენებლო პროდუქტი დაექვემდებარება

სამშენებლო პროდუქტების ჩამონათვალს, რომელთა ბაზარზე კონტროლს ეკონომიკის სამინისტროს ბაზარზე ზედამხედველობის სააგენტო ახორციელებს, მომავალი წლიდან კიდევ 101 დასახელების პროდუქტი დაემატება. როგორც ეკონომიკისა და მდგრადი განვითარების სამინისტროს ინფორმაციაშია აღნიშნული, შესაბამის დადგენილებაში ცვლილება საქართველოს მთავრობის სხდომაზე სამინისტროს ინიცირებით დაამტკიცეს.ეკონომიკის სამინისტროს ცნობით, ცვლილებით განსაზღვრულ სამშენებლო პროდუქტებს შორისაა ფიქსირებული ხანძარსაწინააღმდეგო სისტემები, გაზის ჩაქრობის სისტემების კომპონენტები, კვამლისა და სითბოს საკონტროლო სისტემები, ფიქსირებული ხანძარსაწინააღმდეგო სისტემა – საფრქვევებისა და წყალის შესხურების სისტემების კომპონენტები, ხანძრის გამოვლინებისა და სახანძრო განგაშის სისტემები, ფიქსირებული ხანძარსაწინააღმდეგო სისტემები, შლანგის სისტემები, თბოიზოლაციის პროდუქტები, კომპოზიტური საიზოლაციო კომპლექტები/სისტემები, სახურავის საფარი, ქვის წყობა და მასთან დაკავშირებული პროდუქტები, იატაკზე დასაგები პროდუქტები, ბრტყელი მინა, პროფილირებული მინა და მინის ბლოკის პროდუქტები, ასევე ხისგან დამზადებული პანელები და ელემენტები, სივრცის გათბობის მოწყობილობები და ა.შ.„მნიშვნელოვანია, რომ დადგენილების ამოქმედებამდე, ბაზარზე ზედამხედველობის სააგენტო მჭიდრო კომუნიკაციაში იქნება კერძო სექტორთან, იგეგმება მათთან საინფორმაციო ხასიათის შეხვედრები, რომ ეკონომიკური ოპერატორები დეტალურად გაეცნონ რეგლამენტის მოთხოვნებს და ჰქონდეთ შესაძლებლობა, აღნიშნულ მოთხოვნებთან შესაბამისობაში მოიყვანონ სამშენებლო პროდუქტები.გარდამავალ პერიოდში, 2025 წლის პირველ იანვრამდე, ბაზარზე ზედამხედველობის სააგენტო, შემოწმების ფარგლებში გასცემს საჭირო რეკომენდაციებს საქართველოს ბაზარზე განთავსებული სამშენებლო პროდუქტების ტექნიკური რეგლამენტის მოთხოვნებთან შესაბამისობაში მოსაყვანად, რაც მნიშვნელოვნად დაეხმარება სექტორს ცვლილებებთან ადაპტირებაში.როგორც სააგენტოში აცხადებენ, განახლებული ტექნიკური რეგლამენტით სამშენებლო პროდუქტებისთვის შეიქმნება ისეთი საკანონმდებლო სივრცე, რომლის პირობებშიც ჯანმრთელობისა და უსაფრთხოების კონკრეტული მოთხოვნები იმპერატიულად იმოქმედებს ბევრად გაფართოებულ სფეროში, რაც, თავის მხრივ, მეტად ეფექტურად და მრავალმხრივ უზრუნველყოფს მომხმარებელთა სიცოცხლის, ჯანმრთელობის, საკუთრებისა და გარემოს სამშენებლო პროდუქტით გამოწვეული ზიანისგან დაცვას“,- აღნიშნულია ეკონომიკისა და მდგრადი განვითარების სამინისტროს მიერ გავრცელებულ ინფორმაციაში.

1711698374

თებერვალში საქართველოს ეკონომიკა 9.5 პროცენტით გაიზარდა - საქსტატი

სტატისტიკის ეროვნული სამსახურის წინასწარი შეფასებით, 2024 წლის თებერვალში, წინა წლის შესაბამის პერიოდთან შედარებით, რეალური მთლიანი შიდა პროდუქტის ზრდამ 9.5 პროცენტი შეადგინა, ხოლო იანვარი-თებერვლის საშუალო მაჩვენებელი 7.7 პროცენტია.საქსტატის ცნობით, 2024 წლის თებერვალში, წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა ისეთმა დარგებმა, როგორიცაა დამამუშავებელი მრეწველობა, მშენებლობა, პროფესიული, სამეცნიერო და ტექნიკური საქმიანობები, ინფორმაცია და კომუნიკაცია, ტრანსპორტი და დასაწყობება.კლების ტენდენცია დაფიქსირდა ენერგეტიკის და სამთომოპოვებითი მრეწველობის სექტორებში.

1711433554

სახმელეთო ტრანსპორტის სააგენტო შეზღუდული ტიპის ნებართვების გაცემასთან დაკავშირებით განცხადებას ავრცელებს

გვსურს, კიდევ ერთხელ გამოვეხმაუროთ იმ პროცესს, რომელიც ბოლო რამდენიმე დღეა, სახმელეთო ტრანსპორტის სააგენტოს მიერ შეზღუდული ტიპის ნებართვების გაცემასთან დაკავშირებით მიმდინარეობს, გაცნობებთ, რომ სახმელეთო ტრანსპორტის სააგენტომ 18 მარტიდან შეზღუდული ტიპის ნებართვების სრულად გაცემის გადაწყვეტილება მიიღო და პროცესი მომსახურების ოფისებში დღემდე შეუფერხებლად მიმდინარეობს, – ამის შესახებ სახმელეთო ტრანსპორტის სააგენტოს მიერ გავრცელებულ განცხადებაშია ნათქვამი.როგორც სახმელეთო ტრანსპორტის სააგენტოში აცხადებენ, ყველა დაინტერესებულ პირს, რომლებსაც 2023-2024 წლების განმავლობაში მიღებული აქვთ მესამე ქვეყნის (თურქეთი, რუსეთი, ყაზახეთი) ნებართვა, შესაძლებლობა აქვთ, წინასწარ გაცხადებულ თარიღებში მიიღონ შესაბამისი ნებართვები.„აქვე, გვინდა, გამოვეხმაუროთ გავრცელებულ ცნობას გარკვეული ჯგუფებისათვის დამატებითი სიების მიხედვით ნებართვების გადაცემასთან დაკავშირებით: ცალსახად ვაცხადებთ, რომ ეს ინფორმაცია სიმართლეს არ შეესაბამება და გადამზიდავების შეცდომაში შეყვანას ემსახურება. დაინტერესებულ პირებს მხოლოდ სააგენტოს მომსახურების ოფისებში გაკეთებული განაცხადების საფუძველზე შეუძლიათ ნებართვების მიღება. ასევე, კიდევ ერთხელ განვმარტავთ, რომ მიმდინარეობს მოკვლევა გადამზიდავების მიერ გავრცელებულ ინფორმაციაზე ე.წ. „გადაყიდვების“ შესახებ და მოვუწოდებთ ყველა პირს, მსგავსი ფაქტის არსებობის შემთხვევაში, დაუყონებლივ მიაწოდოს ინფორმაცია ეკონომიკისა და მდგრადი განვითარების სამინისტროს შიდა აუდიტის სამსახურს. შეზღუდული ნებართვების გაცემა დაინტერესებულ პირთათვის ნებართვების რაციონალურად განაწილების პრინციპით სრულიად გამჭირვალედ მიმდინარეობს. სააგენტოს მომსახურების ოფისებში საერთაშორისო გადაზიდვების ორმხრივი (იმპორტი/ექსპორტი) და ტრანზიტული ტიპის ნებართვების გაცემა დღემდე შეუზღუდავად მიმდინარეობს. აგრეთვე, ბოლო პერიოდში, პარტნიორ ქვეყნებთან წარმოებული მოლაპარაკებების საფუძველზე, გაცვლილი ნებართვების რაოდენობამ უპრეცედენტოდ მაქსიმალური ოდენობა შეადგინა“, – ნათქვამია განცხადებაში.

1711373280

საქართველოს ნავსადგურებში გემების შემოსვლისა და გასვლის ფორმალობები მარტივდება - რას გულისხმობს "ერთი ფანჯრის" სისტემით მომსახურება

დარგობრივი ეკონომიკისა და ეკონომიკური პოლიტიკის კომიტეტმა "საქართველოს საზღვაო კოდექსში ცვლილების შეტანის შესახებ" კანონპროექტი მეორე მოსმენით განიხილა.როგორც ეკონომიკისა და მდგრადი განვითარების მინისტრის მოადგილემ განმარტა, კანონპროექტის მიღების შედეგად, საქართველოს ნავსადგურებში დაინერგება "ერთი ფანჯრის" სისტემით მომსახურება, გამარტივდება და გაციფროვნდება გემების შემოსვლისა და გასვლის ფორმალობები. გურამ გურამიშვილის თქმით, ეს საგრძნობლად დააჩქარებს, უფრო სანდოსა და დაცულს გახდის არსებულ პროცესებს."გაციფროვნებული სისტემა ნავსადგურებს საშუალებას მისცემს გაზარდონ მიღებული გემების და შესაბამისად ტვირთბრუნვის რაოდენობა, რაც თავის მხრივ, ხელს შეუწყობს საქართველოს ეკონომიკურ განვითარებას და საზღვაო სექტორის მდგრადობას", - განმარტავენ უწყებაში.კომიტეტმა კანონპროექტი, მეორე მოსმენით, მუხლობრივად განიხილა და მხარი დაუჭირა პარლამენტის პლენარულ სხდომაზე გატანას.

1710750696

ანაკლიის პორტის საზღვაო ინფრასტრუქტურის მშენებლობისთვის საერთაშორისო ტენდერი გამოცხადდა

მსოფლიო ბანკის შესყიდვის პროცედურების მიხედვით, ანაკლიის პორტის საზღვაო ინფრასტრუქტურის პროექტირებისა და სამშენებლო სამუშაოების განხორციელებისთვის საერთაშორისო ტენდერი გამოცხადდა, - ამის შესახებ აღნიშნულია ეკონომიკის სამინისტროს მიერ გავრცელებულ ინფორმაციაში.სამინისტროს განცხადებით, სატენდერო დოკუმენტაცია ე.წ. „დიდი ოთხეულის კომპანიებს“ (Boskalis, DEME, Jan De Nul, Van Oord) დაეგზავნათ. აღნიშნულ კომპანიებს საზღვაო სამუშაოების პროექტირების და წარმოების მდიდარი გამოცდილება გააჩნიათ. მნიშვნელოვანია, რომ პორტის საზღვაო სამუშაოების დიდი წილი მოდის ფსკერის დაღრმავებაზე, ხოლო აღნიშნული კომპანიები გლობალური დაღრმავების/დამღრმავებელი ფლოტის 80%-ს ფლობენ.„სამუშაოების შესყიდვის სატენდერო დოკუმენტაციის ევროპულ კომპანიებთან („დიდი ოთხეული“) დაგზავნის მიზანშეწონილობა საერთაშორისო საკონსულტაციო კომპანია HAEDES B.V.-თან კონსულტაციის შედეგად გამოიკვეთა. აღნიშნული კომპანია შპს „ანაკლიის საზღვაო ნავსადგურმა“ სამუშაოების დროულად, საიმედოდ და მაღალი ხარისხით შესრულების, ტექნიკური დავალების მომზადებისა და შემდგომში წარმოდგენილი წინადადებების შერჩევა-შეფასების მიზნით დაიქირავა.აღნიშნული შესყიდვისთვის გამოყენებული იქნება ერთეტაპიანი შესყიდვის პროცედურა, ლიმიტირებული საერთაშორისო საბაზრო მიდგომების გამოყენებით. მოწვეულმა პრეტენდენტებმა სატენდერო წინადადებები უნდა წარმოადგინონ ტექნიკური და ფინანსური მიმართულებით.გამარჯვებულად გამოვლინდება წინადადება, რომელიც დააკმაყოფილებს მოთხოვნებს/შერჩევის კრიტერიუმებს და ექნება ჯამური (ტექნიკური წინადადების ქულას პლუს ფინანსური წინადადების ქულა) უმაღლესი ქულა.სატენდერო დოკუმენტაციასთან დაკავშირებით დამაზუსტებელი კითხვების დასასმელად და კონკურენტუნარიანი სატენდერო წინადადებების მოსამზადებლად (წარმოსადგენად) მონაწილეებს 45 დღიანი ვადა მიეცათ.პრეტენდენტების მიერ წარმოდგენილი წინადადებების ტექნიკურ და ფინანსურ ნაწილში შეფასებას უზრუნველყოფს შპს ,,ანაკლიის საზღვაო ნავსადგურის“ მიერ სპეციალურად შექმნილი სატენდერო კომისია, საერთაშორისო კონსულტანტებთან ერთად.აქვე ნიშანდობლივია, რომ პროექტის მასშტაბურობიდან გამომდინარე და შესაბამისი მოთხოვნების გათვალისწინებით, ასეთი შესყიდვები პრაქტიკაში გამოირჩევა უცხოური კომპანიების აქტიური ჩართულობით და კონკურენციის მაღალი ხარისხით, რასაც მსგავსი მასშტაბის ტენდერებში განაპირობებს საერთაშორისო საფინანსო ინსტიტუტებისა და დონორი ორგანიზაციების პროცედურების, მათი სტანდარტული პირობებისა და საკვალიფიკაციო მოთხოვნების, ასევე გასაფორმებელი ხელშეკრულებებისათვის FIDIC-ის ტიპის სამშენებლო კონტრაქტის პირობების გამოყენება.შპს ,,ანაკლიის საზღვაო ნავსადგურმა,“ რომელიც 2023 წელს სახელმწიფოს მიერ დაფუძნდა, უკვე განახორციელა მოსამზადებელი სამუშაოები საზღვაო ინფრასტრუქტურის (ფსკერდაღრმავება, ტალღმტეხელი) მშენებლობის მიზნით - განახლდა/შეიქმნა ძირითადი საპროექტო დოკუმენტაცია, დაქირავებულ იქნა საკონსულტაციო კომპანია, რომელიც მონაწილეობდა სატენდერო დოკუმენტაციის მომზადებაში და ამჟამად მონაწილეობს გამოცხადებული საერთაშორისო ტენდერის წარმართვაში, რომლის შედეგად გამოვლინდება გამარჯვებული და დაიწყება ანაკლიის ღრმაწყლოვანი პორტის საზღვაო ნაწილის სამშენებლო პროცესი. დოკუმენტაციის განახლება და პორტისთვის აუცილებელი გარკვეული სამუშაოები კერძო პარტნიორის შერჩევის პარალელურად განხორციელდება.შპს „ანაკლიის საზღვაო ნავსადგურს“ კაპიტალშენატანის სახით, გადაეცა პირველი ფაზის სამშენებლო სამუშაოებისთვის საჭირო მიწის ნაკვეთების ნაწილი.ანაკლიის პორტის პროექტის განხორციელება ხელს შეუწყობს ათასობით ახალი სამუშაო ადგილის შექმნას, ადგილობრივი მოსახლეობის სოციალურ-ეკონომიკური მდგომარეობის გაუმჯობესებას, საქართველოზე გამავალი სატრანსპორტო დერეფნის კონკურენტუნარიანობის ზრდას, საქართველოს ტერიტორიის გავლით ახალი ტვირთნაკადების მოზიდვას, ასევე ნავსადგურის მიმდებარედ, წარმოებისა და ლოგისტიკური სერვისების განვითარებას“, - აცხადებენ სამინისტროში.

1710314190

საქართველოს ავიაბაზარზე ოპერირებას ორი ახალი დაბალბიუჯეტური ავიაკომპანია Transavia და AJET-ი იწყებს

საქართველოს საავიაციო ბაზარზე ოპერირებას ორი ახალი დაბალბიუჯეტური ავიაკომპანია Transavia და AJET-ი იწყებს. ფრენები 2024 წლის ზაფხულის სანავიგაციო სეზონიდან შესრულდება. ნიდერლანდების სამეფოს დაბალბიუჯეტური ავიაკომპანია Transavia რეგულარულ საჰაერო მიმოსვლას ამსტერდამიდან თბილისის მიმართულებით განახორციელებს, ხოლო თურქული დაბალბიუჯეტური ავიაკომპანია AJET-ი რეგულარულ რეისებს სტამბული - თბილისი - სტამბულის საჰაერო ხაზზე შეასრულებს.ავიაკომპანია Transavia-ს მიერ, საქართველოს სამოქალაქო ავიაციის სააგენტოში წარმოდგენილი ფრენის განრიგის შესაბამისად, ამსტერდამი - თბილისი - ამსტერდამის მიმართულებით ავიარეისები 2024 წლის 20 აპრილიდან ოქტომბრის ბოლომდე კვირაში 2 სიხშირით, ყოველ ოთხშაბათს და შაბათს შესრულდება.რაც შეეხება ავიაკომპანია AJET-ს, იგი სტამბული - თბილისი - სტამბულის საჰაერო ხაზზე ფრენებს 2024 წლის 31 მარტიდან ოქტომბრის ბოლომდე, ყოველდღიურად განახორციელებს.საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტომ, ავიაკომპანია Transavia-სა და AJET-ს საქართველოს მიმართულებით რეგულარული საჰაერო მიმოსვლის განხორციელებისათვის აუცილებელი ნებართვები 2024 წლის 12 მარტს მიანიჭა.

1709812390

დეკემბერთან შედარებით, იანვარში მშენებლობა გაიაფდა, წლიურად კი - გაძვირდა - საქსტატი

სტატისტიკის ეროვნული სამსახურის მონაცემებით, 2024 წლის იანვარში მშენებლობის ღირებულების ინდექსი, წინა თვესთან შედარებით, 4.4 პროცენტით შემცირდა. აღნიშნული ცვლილება ძირითადად განპირობებული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 22.9-პროცენტიანი კლებით, რამაც -4.7 პროცენტული პუნქტი შეიტანა ჯამური ინდექსის ცვლილებაში.საქსტატის ცნობით, 2024 წლის იანვარში, წინა წლის შესაბამის თვესთან შედარებით, მშენებლობის ღირებულების ინდექსი გაიზარდა 6.2 პროცენტით. ინდექსის ზრდა უმეტესწილად გამოწვეული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 18.7-პროცენტიანი ზრდით და სამშენებლო მასალების 3.3-პროცენტიანი გაძვირებით, რამაც, შესაბამისად, 4.42 და 1.94 პროცენტული პუნქტი შეიტანა ჯამური ინდექსის ცვლილებაში.ამასთან, 2022 წლის თებერვალთან შედარებით, მშენებლობის ღირებულების ინდექსი 12.2 პროცენტით გაიზარდა.

1709552496

2024 წლის თებერვალში საქართველოში წლიურმა ინფლაციამ 0.3 პროცენტი შეადგინა - საქსტატი

სტატისტიკის ეროვნული სამსახურის ინფორმაციით, 2024 წლის თებერვალში, წინა თვესთან შედარებით, ინფლაციის დონემ საქართველოში – -0.04 პროცენტი, ხოლო წლიური ინფლაციის დონემ 0.3 პროცენტი შეადგინა.რაც შეეხება საბაზო ინფლაციას, საქსტატის ცნობით, აღნიშნულმა მაჩვენებელმა 2024 წლის თებერვალში, გასული წლის შესაბამის პერიოდთან შედარებით, 2.6 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი 2.4 პროცენტით განისაზღვრა.„ყოველთვიური ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:ტანსაცმელი და ფეხსაცმელი: წინა თვესთან შედარებით ფასები შემცირდა 4.6 პროცენტით, რაც თვის ინფლაციაზე -0.19 პროცენტული პუნქტით აისახა. ფასები შემცირდა როგორც ფეხსაცმლის (-8.3 პროცენტი), ისე ტანსაცმლის (-3.3 პროცენტი) ქვეჯგუფებზე;ტრანსპორტი: ჯგუფში ფასები შემცირდა 1.0 პროცენტით, რაც თვის ინფლაციაზე -0.11 პროცენტული პუნქტით აისახა. ფასები შემცირდა პირადი სატრანსპორტო საშუალებების ექსპლუატაციასა (-1.7 პროცენტი) და სატრანსპორტო საშუალებების შეძენაზე (-0.5 პროცენტი). ამასთან, ფასები გაიზარდა სატრანსპორტო მომსახურებაზე (0.9 პროცენტი);ალკოჰოლური სასმელები, თამბაქო: ჯგუფში ფასები გაიზარდა 1.9 პროცენტით, რაც თვის ინფლაციაზე 0.13 პროცენტული პუნქტით აისახა. ფასები, ძირითადად, გაზრდილია ალკოჰოლურ სასმელებზე (3.3 პროცენტი);ავეჯი, საოჯახო ნივთები, სახლის მოვლა: ჯგუფში ფასები მომატებულია 1.4 პროცენტით, რაც 0.08 პროცენტული პუნქტით აისახა მთლიან ინდექსზე. ჯგუფში ფასები გაიზარდა შემდეგ ქვეჯგუფებზე: მინის ჭურჭელი, მაგიდის და საოჯახო ჭურჭელი (2.7 პროცენტი), ავეჯი, საოჯახო ნივთები, ხალიჩები და სხვა იატაკის საფარი (2.1 პროცენტი), ყოველდღიური საყოფაცხოვრებო საჭიროების საქონელი და მომსახურება (1.5 პროცენტი). ამასთან, ფასები შემცირდა საოჯახო საფეიქრო ნაწარმზე (-1.7 პროცენტი);ჯანმრთელობის დაცვის ჯგუფში ფასები გაიზარდა 0.8 პროცენტით, რაც 0.08 პროცენტული პუნქტით აისახა თვის ინდექსზე. ფასების მატება დაფიქსირდა სამედიცინო პროდუქციის, აპარატურის და მოწყობილობის (1.2 პროცენტი) და ამბულატორიული სამედიცინო მომსახურების (0.4 პროცენტი) ქვეჯგუფებზე”, – აღნიშნულია საქსტატის მიერ გამოქვეყნებულ ანგარიშში.

1708585062

ივნისიდან Jazeera Airways ელ-ქუვეითიდან ბათუმის მიმართულებით ოპერირებას იწყებს

ქუვეითური დაბალბიუჯეტური ავიაკომპანია Jazeera Airways 14 ივნისიდან ელ-ქუვეითიდან ბათუმის მიმართულებით ოპერირებას იწყებს.საქართველოს აეროპორტების გაერთიანების ინფორმაციით, თბილისის შემდეგ ბათუმი იქნება საქართველოში მეორე მიმართულება, სადაც Jazeera Airways კვირაში 7 სიხშირით, ზაფხულის ტურისტულ სეზონზე იფრენს. საქართველოს აეროპორტების გაერთიანების გენერალური დირექტორის, ირაკლი ქარქაშაძის განცხადებით, ავიაკომპანიასთან მოლაპარაკებების წარმატებით დასრულება განაპირობა იმან, რომ საქართველო სპარსეთის ყურის ქვეყნებისთვის ერთ-ერთი პრიორიტეტული მიმართულებაა.,,Jazeera Airways-მა საქართველოს ავიაბაზარზე ოპერირება 2018 წელს თბილისის საერთაშორისო აეროპორტში დაიწყო. მას შემდეგ რაც ორწლიანი მოლაპარაკებები ავიაკომპანიასთან საქართველოს აეროპორტების გაერთიანებამ წარმატებით დაასრულა. ჩვენ მუდმივად ვაგრძელებთ ავიაკომპანიებთან კომუნიკაციას და თანამშრომლობას, რათა მეტი მიმართულება და მეტი სიხშირე შევთავაზოთ ჩვენს მგზავრებს. შედეგად, ავიაკომპანია 14 ივნისიდან 16 სექტემბრის ჩათვლით ელ-ქუვეითი-ბათუმი-ელ-ქუვეითის საჰაერო ხაზზე ფრენებს ყოველდღიურად შეასრულებს“, - განაცხადა ირაკლი ქარქაშაძემ.გალფის ქვეყნების მხრიდან საქართველოს მიმართ ინტერესი მზარდია. ქუვეითიდან საქართველოს 2023 წელს 77,392 მგზავრი ეწვია. სპარსეთის ყურის ქვეყნებიდან კი ჯამში საქართველოში გასულ წელს 1,094,695 მგზავრი ჩამოვიდა.