1776890126

მულტიდისციპლინური გუნდის საკითხი რეალურად გადაწყვეტილია, თუმცა ესეც არ არის მარტივი საკითხი - სამუშაოა ექიმებთან და კლინიკებთან - ჯანდაცვის მინისტრი

მულტიდისციპლინური გუნდის საკითხი რეალურად გადაწყვეტილია, თუმცა ესეც არ არის მარტივი საკითხი, რადგან სამუშაოა ექიმებთან, კლინიკებთან და ბევრი თვალსაზრისით ასაწყობია, - ამის შესახებ ჯანდაცვის მინისტრმა მიხეილ სარჯველაძემ "ღამის კურიერის" ეთერში, დიუშენის სინდრომით დაავადებული ბავშვების საკითხზე საუბრისას განაცხადა.მისი თქმით, დღეს შეხვედრა ჰქონდა კლინიკებთან, რომლებიც პოტენციურად შეიძლება დაინტერესებულები იყვნენ და ვისთან თანამშრომლობითაც შეიძლება აიწყოს კერები, რომლებსაც მულტიდისციპლინური მართვის გამოცდილება ჩაბარდეს."რეალურად, ეს გადაწყვეტილი საკითხია, თუმცა ესეც არ არის მარტივი საკითხი, რადგან სამუშაოა ექიმებთან, კლინიკებთან და ბევრი თვალსაზრისით ასაწყობია. ეს კარგად იციან მშობლებმაც. როგორც აღვნიშნე, ეს გადაწყვეტილება მიღებულია, დღეს მაგალითად შეხვედრა მქონდა კლინიკებთან, რომლებიც პოტენციურად შეიძლება დაინტერესებულები იყვნენ და ვისთან თანამშრომლობითაც შეიძლება ასეთი კერები აიწყოს, რომელსაც მულტიდისციპლინური მართვის გამოცდილება ჩაბარდეს. მაგალითად, დასაგეგმი ხომ არის რომელი სპეციალობის ექიმები უნდა იყვნენ ამ მულტიდისციპლინური ჯგუფის მუშაობაში, ნეფროლოგი იქნება ეს, ენდოკრინოლოგი თუ ნუტრიციოლოგი და ა.შ. რეაბილიტოლოგი ვინ იქნება, პედიატრი ვის სჭირდება, ვის არ სჭირდება, როგორ ჯობია გამართვა, რომ მაგალითად, მარტო ისეთ კლინიკაში იყოს, სადაც სრულწლოვანების მიღწევის შემდეგ გაგრძელებენ პაციენტები მიჩვეულ ექიმთან, თუ ეს შეიძლება იყოს პედიატრიულ კლინიკაშიც. ეს ყველაფერი დავტოვეთ არჩევანზე. არის მაგალითად, რომ პაციენტს ვერცერთ შემთხვევაში ვერ ვაიძულებთ, რომ ერთ რომელიმე კლინიკაზე იყოს მიბმული და სხვა ალტერნატივა არ ჰქონდეს. აქ არის, როგორც არჩევანით კლინიკასთან და სპეციალისტებთან წვდომის შესაძლებლობაზე საუბარი, იმავდროულად გეოგრაფიულ ხელმისაწვდომობაზე საუბარი. არა მხოლოდ თბილისში უნდა იყოს ისეთ კერები, სადაც იქნება შესაძლებელი, რომ ამაზე სპეციალიზებული ექიმები მუშაობდნენ. ამ შეხვედრებზე არაერთხელ ითქვა და ვისაუბრეთ, რომ ვფიქრობთ, უცხოური გამოცდილების გასაზიარებლად, აქ სპეციალისტების ჩამოყვანას, ან აქაური სპეციალისტების გაგზავნას დასახელოვნებლად. მნიშვნელოვანია, რომ ეს არ არის ერთადერთი იშვიათი დაავადება, რამდენიმე ათეულია ასეთი დაავადება", - განაცხადა სარჯველაძემ.

1776889004

ერთ-ერთ ბოლო შეხვედრაზე, რომელიც გვქონდა მშობლებთან, ითქვა: ან წამალი, ან არაფერიო, ვფიქრობ, ეს არ არის სწორი მიდგომა, ასე საკითხის დატოვებას ნამდვილად არ ვაპირებ - მიხეილ სარჯველაძე

"ამ მედიკამენტებთან დაკავშირებით თუ ვისაუბრებთ, რაც არის მოთხოვნის მთავარი ფაბულა და ამასწინათ ერთ-ერთ ბოლო შეხვედრაზე, რომელიც გვქონდა მშობლებთან, ითქვა: ან წამალი, ან არაფერიო. ვფიქრობ, რომ ეს არ არის სწორი მიდგომა. ასე საკითხის დატოვებას, რომ ან წამალი, ან არაფერი - ნამდვილად არ ვაპირებ," - ეს განცხადება ჯანდაცვის მინისტრმა, მიხეილ სარჯველაძემ "რუსთავი 2-ის" გადაცემა "ღამის კურიერში" დიუშენის კუნთოვანი დისტროფიის სამკურნალო მედიკამენტების მოთხოვნასთან დაკავშირებით გააკეთა.მიხეილ სარჯველაძის განცხადებით, ჯანდაცვის სამინისტრო გააგრძელებს ყველა იმ საჭიროებაზე რეაგირებას, რომელიც შეიძლება ამ დიაგნოზის მქონე ადამიანს ჰქონდეს, - როგორც სისტემურად, ისე ინდივიდუალურად."ვფიქრობ, მედიკამენტებთან დაკავშირებით საკმაოდ ნათლად ავხსენი, რომ რაწამს გაჩნდება კითხვებზე პასუხები, მერე შეიძლება გადაწყვეტილების მიღება, მანამდე ეს, ბუნებრივია, გართულდება. წინასწარ თქმა - რა ვადაში, ან რა კონკრეტული პირობის არსებობის შემთხვევაში შეგვიძლია ვთქვათ, რომ ამაზე დასრულდა დისკუსია და გარკვეულია ყველაფერი, ამის თქმა მე დღეს არ შემიძლია და არავის დღეს, სამწუხაროდ, არ შეუძლია. ეს არ შეუძლია არც EMA-ს და არც FDA-ის.მაგრამ რაც შეეხება სხვა მიმართულებებით, რომელიც მართლაც არანაკლებად მნიშვნელოვანია, დიახ, რა თქმა უნდა, გავაგრძელებთ ყველა იმ საჭიროებაზე რეაგირებას, რომელიც შეიძლება ამ დიაგნოზის მქონე ადამიანისთვის იყოს საჭირო, იქნება ეს სისტემური, თუ ინდივიდუალური საჭიროების გარკვევა, რასაც მუდმივად თვალს ვადევნებთ და ბუნებრივია, ამაზე რეაგირების რეჟიმსაც ასე უნდა გაგრძელდეს, სხვაგვარად, ვფიქრობ, ეს წარმოუდგენელია. ეს არის სამართლიანიც და სწორიც, ასე ხდება ყველა სხვა დაავადების შემთხვევაშიც," - განაცხადა მიხეილ სარჯველაძემ.

1776885699

იშვიათი დაავადებების სამკურნალო სახელმწიფო პროგრამას ახალი კომპონენტი ემატება - ჯანდაცვის სამინისტრო

იშვიათი დაავადებების სამკურნალო სახელმწიფო პროგრამას ახალი კომპონენტი ემატება –  სპინალურ კუნთოვანი ატროფიის, დიუშენისა და ბეკერის კუნთოვანი დისტროფიის მქონე პაციენტებისთვის სერვისების ფართო სპექტრი იქნება ხელმისაწვდომი, – ამის შესახებ ინფორმაციას ჯანდაცვის სამინისტრო ავრცელებს.მათივე ცნობით, საუბარია ამბულატორიულ, სტაციონარულ და კვლევით მომსახურებებზე.ჯანდაცვის მინისტრი მიხეილ სარჯველაძე, მოადგილე თეა გიორგაძესთან ერთად, შეხვდა იმ კლინიკების ხელმძღვანელებს, რომლებიც შესაძლოა, პროგრამაში ჩაერთონ და ბენეფიციარებს ყველა სერვისი შესთავაზონ. მხარეებმა აღნიშნული მომსახურებების მნიშვნელობაზე იმსჯელეს და პაციენტების ჯანმრთელობისთვის მათი ეფექტურობა განიხილეს.როგორც მიხეილ სარჯველაძემ აღნიშნა, უწყებისთვის მნიშვნელოვანია თითოეულ პაციენტზე ზრუნვა და მათი ჯანმრთელობის უფლების დაცვა. მინისტრის განცხადებით, ნერვ-კუნთოვანი დაავადებების მკურნალობის ერთ-ერთი მნიშვნელოვანი კომპონენტი მათი მიმდინარეობის მონიტორინგია, სიახლის ამოქმედებით კი ბენეფიციარებს შესაძლებლობა ექნებათ, მიიღონ საჭირო სერვისების ფართო სპექტრი.ჯანდაცვის სამინისტროს ცნობით, პროგრამის ფარგლებში ბენეფიციარები ისარგებლებენ ნევროლოგის, კარდიოლოგის, პულმონოლოგის, ენდოკრინოლოგის, გასტროენტეროლოგის / ნუტრიციოლოგის, ორთოპედის კონსულტაციით, ასევე – კლინიკო-ლაბორატორიული და ინსტრუმენტული კვლევებით, როგორიცაა: ელექტროკარდიოგრაფია, ექოკარდიოსკოპია, 24-საათიანი ჰოლტერ-მონიტორინგი, სპირომეტრია, დენსიტომეტრია, ვიტამინ D კონცენტრაციის განსაზღვრა, გულმკერდის რენტგენოგრაფია, ხერხემლის რენტგენოგრაფია, სისხლის საერთო ანალიზი, შარდის საერთო ანალიზი, კრეატინკინაზას განსაზღვრა, თირკმლის ფუნქციური სინჯები (შარდოვანა, კრეატინინი), ღვიძლის ფუნქციური სინჯები (ტუტე ფოსფატაზა, ალტ, ასტ), ელექტროლიტების (ნატრიუმი, კალიუმი, ქლორი, მაგნიუმი, რკინა) განსაზღვრა, გლუკოზის განსაზღვრა სისხლში, განავლის კვლევა ფარულ სისხლდენაზე.„მომსახურებებს სახელმწიფო დააფინანსებს და პაციენტებისთვის სერვისები სრულად უფასო იქნება.პარალელურად, გრძელდება მუშაობა, რომ იშვიათი დაავადებების სამკურნალო სახელმწიფო პროგრამის ახალ კომპონენტში, ბავშვებთან ერთად, კვლევითი, სტაციონარული და ამბულატორიული მომსახურებები ზრდასრულმა ბენეფიციარებმაც მიიღონ“,- აღნიშნულია ჯანდაცვის სამინისტროს ინფორმაციაში.

1776884940

ამორალურია, როდესაც არასწორი შთაბეჭდილებების შექმნა ხდება მარტო იმიტომ, რომ პოლიტიკურად ან, გნებავთ, კომერციულად, ეს ვინმესთვის საინტერესოა - მიხეილ სარჯველაძე დიუშენის მკურნალობის საკითხზე

"მე კარგად მესმის ემოციური მდგომარეობისა, რომელშიც არიან პაციენტები და ოჯახის წევრები, მაგრამ ვერცერთ შემთხვევაში ვერ ვიქნები განწყობილი შემგუებლურად იმ პოლიტიკოსების, ან პოლიტიკურად ანგაჟირებული ადამიანების მიმართ, რომლებიც ან განზრახ, შეგნებულად ავრცელებენ მცდარ განცხადებებს, ან დილეტანტიზმთან გვაქვს საქმე," - ეს განცხადება ჯანდაცვის მინისტრმა, მიხეილ სარჯველაძემ "რუსთავი 2-ის" გადაცემა "ღამის კურიერში" დიუშენის კუნთოვანი დისტროფიის სამკურნალო მედიკამენტების მოთხოვნასთან დაკავშირებით გააკეთა.მისივე თქმით, ამორალურია, როდესაც აღნიშნულ თემაზე არასწორი შთაბეჭდილებების შექმნა პოლიტიკური ან კომერციული ინტერესების გამო ხდება."ეს სამწუხარო რეალობაა, როდესაც გაუაზრებლად, მაგრამ იმავდროულად, ძალიან უპასუხისმგებლოდ აკეთებენ განცხადებებს. ეს რომ იყოს ჩვეულებრივი, მიმდინარე პოლიტიკური პროცესი, რაც არ უნდა მწვავე იყოს ის, არ მექნებოდა ეს დამოკიდებულება, რომ არა ერთი მნიშვნელოვანი ფაქტორი - საუბარია მედიკამენტებზე. განსაკუთრებულად მნიშვნელოვანია, აღინიშნოს - თუნდაც ეთიკური და მორალური თვალსაზრისით, აბსოლუტურად ამორალურია, როდესაც არასწორი შთაბეჭდილებების შექმნა ხდება მარტო იმიტომ, რომ პოლიტიკურად ან, გნებავთ, კომერციულად, ეს ვინმესთვის საინტერესოა," - განაცხადა მიხეილ სარჯველაძემ.შეგახსენებთ, რომ დიუშენის კუნთოვანი დისტროფიის მქონე ბავშვების მშობლები აქციებს მართავენ სიცოცხლისთვის კრიტიკულად მნიშვნელოვანი, ძვირადღირებული მედიკამენტების ხელმისაწვდომობის მოთხოვნით. მათი შეფასებით, ყოველი დაგვიანებული დღე პირდაპირ აისახება ბავშვების მდგომარეობაზე და ზოგ შემთხვევაში, შეუქცევადი პროგრესირების რისკს ზრდის.ჯანდაცვის სამინისტრო განმარტავს, რომ ჯერ კიდევ არ არის საკმარისად დადასტურებული დიუშენის კუნთოვანი დისტროფიის სამკურნალო ახალი პრეპარატების ეფექტიანობა და მათი უსაფრთხოება. მათივე განცხადებით, გადაწყვეტილებების მიღება უნდა ეფუძნებოდეს მტკიცებულებებზე დაფუძნებულ მედიცინას და საერთაშორისო სტანდარტებს, რომ სახელმწიფოს პასუხისმგებლობაა, ნებისმიერი დაფინანსებული მკურნალობა იყოს უსაფრთხო, ეფექტიანი და გრძელვადიანად გამართლებული.

1776775257

„კითხვებზე პასუხების საჭიროების გამო იკავებენ თავს ევროპული სახელმწიფოები და არა იმის გამო, რომ რომელიმე სკანდინავიურ სახელმწიფოს ემპათია აკლია ან ენანება ერთ პაციენტზე, წლიურად, 2.5 მილიონიანი წამლის დაფინანსება“ - მიხეილ სარჯველაძე

„კითხვებზე პასუხების საჭიროების გამო იკავებენ თავს ევროპული სახელმწიფოები ამ დრომდეც და არა იმის გამო, რომ, მაგალითად, ვთქვათ, რომელიმე სკანდინავიურ სახელმწიფოს ემპათია აკლია ან ენანება ერთ პაციენტზე, წლიურად, 2.5 მილიონიანი წამლის დაფინანსება“ - განაცხადა ჯანდაცვის მინისტრმა მიხეილ სარჯველაძემ.მინისტრის განცხადებით, სწორედ ამ რისკებისა და საკმარისი მონაცემების არქონის გამო, საქართველოზე ძლიერი ეკონომიკის მქონე ქვეყნებიც კი თავს იკავებენ ამ მედიკამენტების სახელმწიფო დაფინანსებისგან.„არსებობენ ევროპული სახელმწიფოები, რომლებიც არიან საქართველოზე ბევრად მძლავრი, ვეებერთელა ფინანსური შესაძლებლობებით, ბევრად დაწინაურებული ჯანდაცვის სისტემებით. მაგალითად, ნორვეგია, ლუქსემბურგი, პორტუგალია, ნიდერლანდები, ლიხტენშტაინი. არ არის სწორი და ლოგიკური, რომ დავსვათ რიტორიკული კითხვა: ამ სახელმწიფოებს რა მიზეზით არ აქვთ ამ დრომდე შეტანილი საკუთარი ჯანდაცვის პროგრამაში ამ მედიკამენტების დაფინანსება?! - განაცხადა მიხეილ სარჯველაძემ.

1776772039

„ამ ყველაფერში ჩემთვის თუკი ვინმეს პოზიცია გასაგებია, ეს არის დიუშენის კუნთოვანი დისტროფიის მქონე პაციენტების, მათი მშობლების ემოციები და გრძნობები“ - მიხეილ სარჯველაძე

„ამ ყველაფერში ჩემთვის თუკი ვინმეს პოზიცია გასაგებია, ეს არის დიუშენის კუნთოვანი დისტროფიის მქონე პაციენტების, მათი მშობლების ემოციები და გრძნობები. უბრალოდ, მე მაქვს პასუხისმგებლობა და, სწორი გადაწყვეტილების მისაღებად, ვალდებული ვარ დავაყენო ყველა საკითხი, რომელიც ლეგიტიმურად საჭიროებს გარკვევას“ - განაცხადა ჯანდაცვის მინისტრმა.როგორც მიხეილ სარჯველაძემ აღნიშნა, დიუშენის მედიკამენტებთან დაკავშირებული საკითხები პაციენტების მშობლებთან არაერთხელ განიხილეს. მინისტრის განცხადებით, თითოეულ მათგანს აქვს შესაძლებლობა ნებისმიერ დროს მიიღოს სამინისტროსთვის ხელმისაწვდომი სრული ინფორმაცია.„დიახ, ჩვენი არაერთი შეხვედრის დროს ასეთი საკითხები დამიყენებია დღის წესრიგში. მითქვამს, რომ ეს არის თემები, რომელთა გარკვევასაც ვცდილობთ. როგორ და რამდენად ინტენსიურად - ამაზეც შემიძლია ვესაუბრო მშობლებს და მივაწოდო დეტალური ინფორმაცია. ეს ჩემი მოვალეობაა და ამას აუცილებლად გავაკეთებ. აღნიშნული საკითხების გარკვევას ჩვენს ხელთ არსებული ყველა საშუალებით გავაგრძელებთ, ბუნებრივია, შევეცდებით, რომ ვიპოვოთ პასუხი. იმედი მაქვს, ეს პასუხები იქნება დადებითი. არის ნაწილი მშობლებისა, რომლებთანაც ბოლო პერიოდამდე მაქვს შეხვედრები.აქვე აღსანიშნავია, რომ დიუშენის კუნთოვანი დისტროფია ერთადერთი არ არის იშვიათ დაავადებებს შორის. სხვა უამრავი საჭიროებაა. ამ ბოლო პერიოდის განმავლობაში ბევრი შეხვედრა უკვე გვქონდა ან ახლა არის ჩანიშნული რამდენიმე იშვიათ დაავადებასთან მიმართებით და ვიღებთ გადაწყვეტილებებს, სადაც ეჭვი და კითხვის ნიშანი არ არსებობს“ - განაცხადა მიხეილ სარჯველაძემ.

1776765516

არაფორმალური განათლების აღიარების პროგრამის ფარგლებში 20 მაძიებელი დაჯილდოვდა

აჭარის ჯანმრთელობისა და სოციალური დაცვის მინისტრის პირველი მოადგილე მარი ზანაქიძე და აჭარის დასაქმების სააგენტოს ხელმძღვანელი, თეიმურაზ კახიძე, არაფორმალური განათლების აღიარების პროგრამის ფარგლებში, სახელმწიფო დიპლომებისა და სერთიფიკატების გადაცემის ღონისძიებას დაესწრნენ.სამუშაოს 20 მაძიებელს კვალიფიკაციის დამადასტურებელი დოკუმენტი საქართველოს განათლების, მეცნიერებისა და ახალგაზრდობის სამინისტრომ გადასცა. კურსდამთავრებულებმა თეორიული და პრაქტიკული სწავლება კოლეჯში ,,ბლექსი" აჭარის დასაქმების სააგნეტოს მიზნობრივი პროგრამის ფარგლებში გაიარეს.შეხვედრაზე იმსჯელეს სფეროში არსებულ მიღწევებსა და პერსპექტივებზე. დაჯილდოვდნენ არაფორმალური განათლების აღიარების კომისიის წევრები და ექსპერტები, ხოლო მადლობის სიგელით დაჯილდოვდა აჭარის დასაქმების სააგენტო.პროგრამა მიზნად ისახავს ფორმალური განათლების მიღმა შეძენილი ცოდნისა და უნარების ოფიციალურ აღიარებას. პროგრამით დღემდე 345-მდე სერტიფიკატი და 10 დიპლომი გაიცა, რაც 80 სამუშაო მაძიებელს კარიერულ წინსვლას შეუწყობს ხელს.

1776748921

ჯანდაცვის სამინისტროში ბრიფინგი ჩაინიშნა

 21 აპრილს, 11:00 საათზე, ჯანდაცვის სამინისტროში ჯანდაცვის მინისტრის ბრიფინგი გაიმართება.

1776623909

COVID-ის ახალი შტამის სიმპტომები, რომელიც ბავშვებს განსაკუთრებულად აზიანებს - ექიმის რჩევები

კორონავირუსის ახალი შტამი „ციკადა“ სელექციური აღმოჩნდა: მოზრდილები მას მსუბუქად იტანენ, მაგრამ ბავშვები შეიძლება სერიოზულად დაავადდნენ.ექიმი განმარტავს, თუ რატომ ხდება ეს, რა სიმპტომებს უნდა მიაქციონ ყურადღება მშობლებმა და როგორ დავიცვათ ბავშვები პანიკის გარეშე.წინა შტამებისგან განსხვავებით, ვირუსის ეს ვარიანტი უჩვეულო სელექციურობას ავლენს. მიუხედავად იმისა, რომ ჰიბრიდული იმუნიტეტის მქონე მოზრდილები „ციკადას“ მსუბუქი რესპირატორული ინფექციის სახით იტანენ, ბავშვები უფრო დაუცველები არიან. ვირუსის მიმართ იმუნიტეტის არმქონე ბავშვებს უფრო მეტად აქვთ დაავადების გამძაფრების საფუძველი. კლინიკურ სურათში შედის ცხვირის შეგუბება, ყელის ტკივილი, ხველა, თვალების სიწითლე და შესაძლოა ყნოსვის დროებითი დაკარგვა.ექსპერტი განმარტავს, რომ საფრთხე ბავშვის იმუნოლოგიური გამოცდილების ნაკლებობაშია. ბავშვის ორგანიზმი ჯერ არ შეხვედრია ვირუსს, ამიტომ დამცავი T-უჯრედული რეაქციები არ განვითარებულა - „ციკადა“ იქ ხელსაყრელ გარემოს პოულობს. ეს ხსნის, თუ რატომ შეიძლება ბავშვებს, ვაქცინირებული ან გამოჯანმრთელებული მოზრდილებისგან განსხვავებით, დაავადების მძიმე მიმდინარეობა ჰქონდეთ.მისი თქმით, პანიკის საფუძველი არ არსებობს, თუმცა არ უნდა მოვდუნდეთ. დაცვის ყველაზე საიმედო მეთოდები ძველი და მარტივია: ვენტილაცია, დატენიანება, ხალხმრავალ ადგილებში პირბადეების გამოყენება და ხელების დაბანა. გაციების პირველივე ნიშნებისთანავე ბავშვი უნდა იზოლირებული იყოს, მიეცით თბილი სითხეები და დაისვენოს.

1776622185

თბილისში ექიმმა გლანდების ოპერაციის დროს 3 წლის ბავშვს ორგანიზმში, სავარაუდოდ, ქირურგიული ნემსის ნაწილი ჩაუტოვა, რომელიც შემთხვევით 9 წლის შემდეგ სტომატოლოგმა აღმოაჩინა - დეტალები

სიკვდილს შემთხვევით გადარჩენილი მოზარდი - თბილისში, ექიმმა 3 წლის ბავშვს გლანდების ოპერაციის დროს ორგანიზმში სავარაუდოდ ნემსი ჩაუტოვა - ეს მოზარდის ოჯახის მოსაზრებაა. ფიქრობენ, რომ ეს იყო ქირურგიული ნემსის ფრაგმენტი, რომელიც საყლაპავთან და სასიცოცხლო არტერიასთან ახლოს მდებარეობდა და ინფექციის მუდმივ რისკს ქმნიდა.მოზარდის დედა საუბრობს სანტიმეტრნახევრიანი კოროზირებული ქირურგიული ნემსის ნაწილზე, რომელიც თურქმა ექიმებმა მის შვილს საყლაპავიდან ამოუღეს. მშობელი დარწმუნებულია, რომ ქირურგიული ინსტრუმენტი ბავშვს 9 წლის წინ, გლანდების ოპერაციის დროს ჩაუტოვეს.გლანდების ოპერაცია ბავშვს 3 წლის ასაკში ჩაუტარდა. როგორც მშობლები იხსენებენ, ექიმთან მხოლოდ ტონზილექტომიაზე შეთანხმდნენ, თუმცა ჩარევა დაგეგმილზე დიდხანს გაგრძელდა და ქირურგმა ეს ადენოიდების ამოკვეთის აუცილებლობით ახსნა.როგორც მშობელი ჰყვება, ოპერაციის შემდეგ ბავშვს ქრონიკული ალერგიული რინიტის დიაგნოზი დაუსვეს, თუმცა უცხო სხეული ოპერაციიდან მხოლოდ 9 წლის თავზე, შემთხვევით აღმოაჩინეს, როდესაც სტომატოლოგიურ კლინიკაში ე.წ. ბრეკეტებისთვის მოსამზადებელი პანორამული რენტგენოლოგიური კვლევა ჩაუტარეს.როგორც დედა ჰყვება, უცხო სხეულის სახიფათო მდებარეობის გამო, ოპერაციის ჩატარება საზღვარგარეთ არჩიეს. მოზარდი თურქეთში წაიყვანეს, მკურნალობის ნაწილი სახელმწიფომ დააფინანსა. ნაწილის ანაზღაურება კი, ოჯახმა იმ ქირურგს მოსთხოვა, ვინც ბავშვს ოპერაცია 9 წლის წინ ჩაუტარა.ჩვენთან სატელეფონო საუბარში ქირურგმა იგივე გაიმეორა, რომ პაციენტის დედის მონაყოლს დამტკიცება სჭირდება. ექიმი როინ გაბეჩავა ამ ეტაპზე მომხდარზე პასუხისმგებლობას არ იღებს.შემთხვევას ახლა ჯანდაცვის სამინისტროს რეგულირების სააგენტო სწავლობს, რომელმაც ექიმის სავარაუდო გადაცდომა ან უნდა დაადასტუროს ან უარყოს. თუ მედიკოსის შეცდომა დამტკიცდება, მას საქმიანობის ლიცენზიის შეჩერება ემუქრება.

1776532401

მიხეილ სარჯველაძე დიუშენის სინდრომზე - „ძალიან გვტკივა გული ამ ბავშვებისთვის. რა თქმა უნდა, მაქსიმალურად ყველაფერს გავაკეთებთ და იმასაც განვმარტავთ, რას ვგეგმავთ და რა გაკეთებულა აქამდე ამ საკითხთან დაკავშირებით“

„მინდა გამოვეხმაურო დიუშენის სინდრომის საკითხს, რომელიც ბოლო დღეებში ვნებათაღელვის საგანი გახდა. ძალიან რთულ საკითხზე მიწევს საუბარი, როდესაც დიუშენის სინდრომზე ვსაუბრობთ. ეს მართლაც მძიმე დიაგნოზია და არ მინდა, რომ არასწორი შთაბეჭდილებები შეიქმნას დამოკიდებულებებსა და პოზიციებთან დაკავშირებით.აბსოლუტურად კარგად მესმის იმ ემოციებისა, რომლებიც აქვთ პაციენტებს, მათ მშობლებს, ოჯახის წევრებსა და გულშემატკივრებს. თავს ვალდებულად ვთვლი, რომ რამდენიმე დეტალი დავაზუსტოთ და საზოგადოებას მივაწოდოთ ინფორმაცია ამ საკითხის ირგვლივ - ყოველი ფაქტის, კლინიკური დასკვნისა და გარემოებისგაშუქებით. ამავდროულად, ეს აუცილებელია იმისთვისაც, რომ იმ ადამიანების სიყალბეს ავხადოთ ფარდა, რომლებიც ცდილობენ პაციენტებისა და მათი ოჯახის წევრების ემოციებით პოლიტიკური დივიდენდების მოპოვებას“ - აღნიშნულის შესახებ ჯანდაცვის მინისტრმა განაცხადა.მიხეილ სარჯველაძემ აღნიშნა, რომ ამ საკითხზე სამინისტროს ექნება დამატებითი კომუნიკაცია. „ეს არ არის მარტივი საკითხი, რომელზეც იოლად შეიძლება საუბარი, მათ შორის, ეთერისმეშვეობითაც. ეს მეტად რთული და სენსიტიური თემაა. თუმცა, მერწმუნეთ, რომ ამ დღეებში დუმილი არ ნიშნავს ნაკლებ ემპათიას. პირიქით, ძალიან გვტკივა გული ამ ბავშვებისთვის. რა თქმა უნდა, მაქსიმალურად ყველაფერს გავაკეთებთ და იმასაც განვმარტავთ, რას ვგეგმავთ და რა გაკეთებულა აქამდე ამ საკითხთან დაკავშირებით“ -განაცხადა ჯანდაცვის მინისტრმა.

1776332893

ჯანდაცვის მინისტრის მოადგილემ და UNICEF-ის წარმომადგენლის მოვალეობის შემსრულებელმა, ალექსანდრუ ნარტეამ, 2026 წლის სამოქმედო გეგმებს მოაწერეს ხელი

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე ირინე წაქაძემ და გაეროს ბავშვთა ფონდის (UNICEF) წარმომადგენლის მოვალეობის შემსრულებელმა, ალექსანდრუ ნარტეამ, 2026-2030 წლების თანამშრომლობის პროგრამის ფარგლებში, მიმდინარე წლის სამოქმედო გეგმებს მოაწერეს ხელი.დოკუმენტების ხელმოწერამდე, მხარეებმა მიმდინარე თანამშრომლობის, ბავშვთა ჯანმრთელობისა და უფლებების დაცვის მიმართულებით, პარტნიორობის კიდევ უფრო გაღრმავებაზე ისაუბრეს.ირინე წაქაძემ ალექსანდრუ ნარტეას მადლობა გადაუხადა UNICEF-თან მრავალწლიანი თანამშრომლობის, მხარდაჭერისა და საქართველოში ბავშვთა დაცვის სისტემის გაძლიერებაში შეტანილი წვლილისთვის. მინისტრის მოადგილემ ასევე ყურადღება გაამახვილა 2026 წელს გაწერილი აქტივობების მნიშვნელობაზე.ჯანდაცვის სამინისტროსა და UNICEF-ს შორის გაფორმებული სამოქმედო გეგმების მიზანია სახელმწიფო უწყებების მხარდაჭერა და ერთობლივი პროექტების განხორციელება ბავშვზე ორიენტირებული სოციალური და ჯანმრთელობის პროგრამების შემუშავების, სოციალური მომსახურებების ხელმისაწვდომობის გაზრდისა და ბავშვთა უფლებების რეალიზაციის ხელშეწყობის მიმართულებით.