1793986907

კაია კალასი: ნებისმიერი შეთანხმება, რომელიც რუსეთ-უკრაინის ომს დაასრულებს, რუსეთის ხელახალ თავდასხმას უნდა ზღუდავდეს, დათმობები აგრესორისგან უნდა იყოს და არა მსხვერპლისგან

პუტინს არ აქვს ევროპულ უსაფრთხოებაზე ვეტოს დადების უფლება, – ამის შესახებ ევროკავშირის უმაღლესმა წარმომადგენელმა, კაია კალასმა განაცხადა.მისი თქმით, ნებისმიერი შეთანხმება, რომელიც რუსეთ-უკრაინის ომს დაასრულებს, რუსეთის ხელახალ შეიარაღებასა და თავდასხმას უნდა ზღუდავდეს.„დათმობები აგრესორისგან უნდა იყოს, არა მსხვერპლისგან“, – აღნიშნა კაია კალასმა.პოლონელ და უკრაინელ კოლეგებთან ერთად გამართულ პრეზკონფერენციაზე ევროკავშირის უმაღლესმა წარმომადგენელმა ასევე განაცხადა, რომ ნებისმიერი მოლაპარაკების საფუძვლად მის მიერ წარდგენილი ის დოკუმენტი უნდა იყოს, რომელსაც ხელი ევროკავშირის საგარეო საქმეთა მინისტრებმა მოაწერეს.

1793972280

სიკორსკიმ ევროპელ მოკავშირეებს მოუწოდა, უკრაინაში ომის დასრულებაზე მოლაპარაკებები აღმოსავლეთ ევროპის უსაფრთხოების ინტერესების გათვალისწინების გარეშე არ გამართონ

პოლონეთის საგარეო საქმეთა მინისტრმა, რადოსლავ სიკორსკიმ ევროპელ მოკავშირეებს მოუწოდა, უკრაინაში ომის დასრულებაზე მოლაპარაკებები აღმოსავლეთ ევროპის უსაფრთხოების ინტერესების გათვალისწინების გარეშე არ გამართონ.„აღმოსავლეთ ევროპა და სკანდინავია ამ დისკუსიის მიღმა არ უნდა დარჩნენ. ჩვენ დაახლოებით 120 მილიონი ადამიანი ვართ. ფინეთს, ნორვეგიასა და ბალტიისპირეთის ქვეყნებს რუსეთთან საერთო საზღვარი აქვთ, ხოლო პოლონეთს როგორც რუსეთთან, ისე უკრაინასთან აქვს საზღვარი“, – განაცხადა სიკორსკიმ.ამასთან, ჟურნალისტებთან საუბრისას პოლონეთის პრემიერ-მინისტრმა, დონალდ ტუსკმა ევროპელ კოლეგებს მოუწოდა, ვლადიმერ პუტინის „ჭეშმარიტ განზრახვებთან“ დაკავშირებით „განსაკუთრებული სიფრთხილე“ გამოიჩინონ და მიმდინარე დიპლომატიურ პროცესს „რეალისტურად“ შეხედონ.„ზამთარში, შესაძლოა, პუტინს შეთანხმების მიღწევის ნაკლები სტიმული ჰქონდეს“, – განაცხადა პოლონეთის პრემიერ-მინისტრმა.მანამდე იტალიის პრემიერ-მინისტრმა, ჯორჯია მელონიმ ევროკავშირს მოუწოდა, განიხილოს, ვინ უნდა წარმოადგენდეს ბლოკს რუსეთ-უკრაინის ომთან დაკავშირებულ მოლაპარაკებებში და რა მანდატით.

1793969280

მკვლელობა, რომელიც 30 წლის განმავლობაში გაუხსნელი იყო - პოლიციამ ეჭვმიტანილს მოხუცებულთა თავშესაფარში მიაკვლია (უცხოეთი)

გერმანიაში, 32 წლის წინ მომხდარი სასტიკი მკვლელობის საქმე თანამედროვე დნმ-ტექნოლოგიების დახმარებით გახსნეს. 81 წლის მამაკაცი, რომელიც 1994 წელს 24 წლის ამერიკელი ტურისტის მკვლელობაში იყო ეჭვმიტანილი, პოლიციამ მოხუცებულთა თავშესაფარში დააკავა. მოგვიანებით მან დანაშაული აღიარა, სასამართლომ კი უვადო პატიმრობა მიუსაჯა.შემთხვევა 1994 წლის 26 სექტემბერს, გერმანიის ქალაქ კობლენცში მოხდა. 24 წლის ემი ლოპესი ევროპაში მოგზაურობდა და იმ დღეს ისტორიული ერენბრაიტშტაინის ციხესიმაგრის მონახულებას გეგმავდა. ახალგაზრდა ქალი ციხესიმაგრისკენ მიმავალ ბილიკზე გაუჩინარდა.მეორე მხრივ, მისი ცხედარი შემთხვევით აღმოაჩინეს ბავშვებმა, რომლებიც ტერიტორიაზე თამაშობდნენ. ქალს მძიმე დაზიანებები აღენიშნებოდა - მას თავის არეში ჰქონდა მიყენებული ჭრილობები, სხეულზე დანით მიყენებული მრავალი ჭრილობა და გაგუდვის კვალი.გამოძიება წლების განმავლობაში მიმდინარეობდა, თუმცა სამართალდამცველები დამნაშავის ვინაობის დადგენას ვერ ახერხებდნენ. საქმეზე ასობით კვალი შეისწავლეს და არაერთი ადამიანი დაკითხეს, მაგრამ შედეგი არ ჩანდა.გარდატეხა მხოლოდ ათწლეულების შემდეგ მოხდა. გამომძიებლებმა ხელახლა შეისწავლეს მსხვერპლის ტანსაცმელი და შემთხვევის ადგილიდან ამოღებული მტკიცებულებები. დაახლოებით 1600 ნიმუშის თანამედროვე მეთოდებით ანალიზმა დნმ-ის კვალი გამოავლინა, რომელიც სავარაუდო დამნაშავეს ეკუთვნოდა.გამოძიება 81 წლის გერმანიის მოქალაქემდე მივიდა. აღმოჩნდა, რომ მამაკაცი სამართალდამცველების ყურადღების ცენტრში ჯერ კიდევ 1999 წელს მოხვედრილა, როდესაც სხვა სექსუალური დანაშაულისთვის გაასამართლეს. თუმცა მაშინ ემი ლოპესის მკვლელობასთან მისი დაკავშირება შესაბამისი დნმ-მტკიცებულების არარსებობის გამო ვერ მოხერხდა.გამოძიების ვერსიით, 1994 წელს მამაკაცი ქალს ციხესიმაგრის ტერიტორიაზე შეხვდა და ცრუ დაპირებით, თითქოს გზას აჩვენებდა, განმარტოებულ შენობაში შეიტყუა. იქ მასზე სექსუალურად იძალადა და სასტიკად გაუსწორდა.2026 წლის 28 აგვისტოს სასამართლომ 81 წლის მამაკაცს მკვლელობისთვის უვადო პატიმრობა მიუსაჯა.  

1793968747

საფრანგეთში სასკოლო ავტობუსის ავარიის შედეგად ორი ბავშვი დაიღუპა

საფრანგეთის აღმოსავლეთ ნაწილში, შვეიცარიის საზღვართან, ავტოსაგზაო შემთხვევის შედეგად სასკოლო ავტობუსში მყოფი ორი მგზავრი დაიღუპა, 16 კი დაშავდა, - ინფორმაციას ფრანგული მედია ადგილობრივ ხელისუფლებაზე დაყრდნობით ავრცელებს.საფრანგეთის პრემიერ-მინისტრმა სებასტიან ლეკორნიუმ სოციალურ ქსელ X-ზე დაწერა, რომ ავარიას ორი ბავშვი ემსხვერპლა.ადგილობრივი პრეფექტურის განცხადებით, დაშავებულთაგან სამის მდგომარეობა კრიტიკულია.ქალაქ ლენტის მერმა, ივ კრისტიანმა, განაცხადა, რომ შემთხვევაში სასკოლო ავტობუსი მონაწილეობდა; თუმცა, ადგილობრივი პრეფექტურის ცნობით, საუბარია საქალაქთაშორისო ავტობუსზე.კრისტიანის თქმით, ავარიის შედეგად 70 ადამიანი დაზარალდა, ადგილობრივი პრეფექტურა დაახლოებით 40 დაზარალებულზე საუბრობს. ქალაქში გაიხსნა საზოგადოებრივი ცენტრი, სადაც ავარიის შედეგად დაზარალებულებს თავშესაფარსა და საჭირო დახმარებას სთავაზობენ.

1793968680

ნაუსედა: რუსები მხოლოდ მოლაპარაკებების მიმდინარეობის იმიტაციას ქმნიან, მოსკოვს მომავალ გაზაფხულამდე მოლაპარაკებების დაწყების სერიოზული სურვილი არ აქვს

ლიეტუვის პრეზიდენტი გიტანას ნაუსედა აცხადებს, რომ მოსკოვს მომავალ გაზაფხულამდე უკრაინასთან მოლაპარაკებების დაწყების სერიოზული სურვილი არ აქვს.მისივე თქმით, რუსეთი ტრადიციულად იყენებს ზამთრის თვეებს, რათა ქალაქებზე დარტყმებით ზეწოლა განაგრძოს.„რუსები მხოლოდ მოლაპარაკებების მიმდინარეობის იმიტაციას ქმნიან. მე მათ არ ვენდობი. თუ უკრაინა ამ ზამთარს გადაიტანს, რაშიც დარწმუნებული ვარ, სერიოზული მოლაპარაკებების შანსები 2027 წელს გაუმჯობესდება. უფრო ადრე ამას არ ველოდები“,  – განაცხადა ნაუსედამ.ნაუსედას  შეფასებით, რუსეთს ახლა სურს, ნახოს, როგორ რეაგირებს ალიანსი ე.წ. ჰიბრიდულ თავდასხმებზე.„არა მგონია, რომ რუსეთი ახლა ფართომასშტაბიანი ოპერაციებისთვის იყოს მზად. რუსეთის რესურსები უკრაინის ბრძოლის ველზეა კონცენტრირებული და იქ წარმატებას ვერ აღწევს, თუმცა პუტინი გვამოწმებს და სულ უფრო უახლოვდება მე-5 მუხლს, ანუ ნატო-ს ვალდებულებას კოლექტიური თავდაცვის კუთხით“, – აღნიშნა ლიეტუვის პრეზიდენტმა.

1793967420

ლიონში საპროტესტო აქცია გრძელდება, დემონსტრანტებმა ედუარ-ერიოს ლიცეუმის ჭიშკარს ცეცხლი წაუკიდეს, დაკავებულია ოთხი პირი

საფრანგეთის ქალაქ ლიონში სტუდენტების საპროტესტო აქცია გრძელდება. რონის დეპარტამენტის პრეფექტურის ინფორმაციით, სხვადასხვა სახის ინციდენტის გამო, შეფერხებულია 16 საშუალო სკოლისა და სამი უმაღლესი სასწავლებლის მუშაობა.პრეფექტურის ცნობით, სამართალდამცველებმა ოთხი ადამიანი დააკავეს. მათ ბრალად ედებათ სხვადასხვა საგნის სროლა, მოლოტოვის კოქტეილების გამოყენება და ცეცხლის გაჩენა.ლიონის მეექვსე რაიონის მერმა, სამუელ სულიემ სოციალურ ქსელში ვიდეო გაავრცელა, რომელშიც ედუარ-ერიოს სახელობის ლიცეუმის შესასვლელი ჭიშკარი იწვის.„ერიოს ლიცეუმი იწვის, შენობაში კი მოსწავლეები არიან, ზოგიერთი კი ამ ყველაფერს ზეიმობს. არ ვიცი, როგორ გამოვხატო ჩემი უდიდესი აღშფოთება“, – წერს სულიე.ცნობისთვის, გუშინ საპროტესტო მსვლელობები საფრანგეთის 73 ქალაქში გაიმართა. პროფკავშირების ინფორმაციით, ქვეყნის მასშტაბით 1.6 მილიონი ადამიანი გამოვიდა. საფრანგეთის შინაგან საქმეთა სამინისტროს მონაცემებით, გუშინ ქვეყნის მასშტაბით გამართული საპროტესტო აქციების დროს 448 ადამიანი დააკავეს. დაშავდა 53 სამართალდამცავი. მოქალაქეები ხელფასების ზრდას, ცხოვრების ხარჯების შემცირებასა და საჯარო მომსახურების გაუმჯობესებას ითხოვდნენ.

1793967297

ამსტერდამში კომპანია Microsoft-ის მონაცემთა ცენტრის მშენებლობას აპროტესტებენ, აქციაზე პოლიციასა და დემონსტრანტებს შორის დაპირისპირება მოხდა

ამსტერდამში, სლოტერდეიკის რაიონში, Microsoft-ის მონაცემთა ცენტრის მშენებლობის წინააღმდეგ ასამდე ადამიანი შეიკრიბა. ინფორმაციას „როიტერი“ ავრცელებს.დემონსტრანტებმა ტერიტორიის გარშემო არსებული ღობეები გაარღვიეს და ცენტრის მშენებლობისთვის განკუთვნილ ადგილზე შეიჭრნენ, რა დროსაც აქციის მონაწილეებსა და სამართალდამცველებს შორის დაპირისპირება მოხდა.როგორც მედია წერს, დემონსტრანტები პალესტინის მხარდამჭერ ლოზუნგებს სკანდირებდნენ.აქციის მონაწილეები არა მხოლოდ მონაცემთა ცენტრის მშენებლობას, არამედ თავად Microsoft-ის საქმიანობასაც აპროტესტებენ. მათი მტკიცებით, კომპანია პალესტინის ტერიტორიებზე ისრაელის ქმედებებს ხელს უწყობს.

1793964940

მარკ რუტე: ევროპამ რუსეთისგან წელს იმაზე დიდი რაოდენობით თხევადი ბუნებრივი აირი შეიძინა, ვიდრე რუსეთსა და აშშ-ს შორის დიზელის საწვავზე შეთანხმება ოდესმე მოიტანდა, ასე რომ, ევროპაც არ არის წმინდანი

ნატო-ს გენერალურმა მდივანმა, მარკ რუტემ ევროპული ქვეყნები რუსეთის ენერგორესურსების შესყიდვის გამო გააკრიტიკა და განაცხადა, რომ ევროპას არ აქვს საფუძველი, თავი რუსეთისგან ენერგომატარებლების შეძენის საკითხში სრულიად უდანაშაულოდ წარმოაჩინოს.ნიდერლანდურ სატელევიზიო გადაცემაში რუტესთან დისკუსიის ერთ-ერთი მთავარი საკითხი გახდა რუსეთისგან დიზელის საწვავის შესაძლო შესყიდვის შესახებ ინფორმაცია. წამყვანმა რუტეს შეახსენა უკრაინის პრეზიდენტ ვოლოდიმირ ზელენსკის პოზიცია, რომლის მიხედვითაც, რუსეთისგან მიღებული ფინანსური შემოსავლები მოსკოვს უკრაინის წინააღმდეგ ომის გაგრძელებისა და შეიარაღების შესყიდვის შესაძლებლობას აძლევს.რუტემ აღნიშნა, რომ ეს შეშფოთება გასაგებია, თუმცა ყურადღება ევროპის საკუთარ ენერგეტიკულ პოლიტიკაზეც გაამახვილა.„ევროპამ მიმდინარე წლის პირველ ნახევარში რუსეთში 6 მილიარდი ევროს ღირებულების გათხევადებული ბუნებრივი აირი შეიძინა. ეს გაცილებით მეტია, ვიდრე რუსეთსა და აშშ-ს შორის დიზელის საწვავის შესახებ შეთანხმება ოდესმე მოიტანდა, ასე რომ, ევროპაც არ არის წმინდანი“, – განაცხადა ნატო-ს გენერალურმა მდივანმა.წამყვანმა რუტეს უპასუხა და აღნიშნა, რომ საკითხი ევროპის უდანაშაულობა კი არა, რუსეთის მიერ ენერგორესურსებიდან მიღებული შემოსავლების ომის დაფინანსებისთვის გამოყენებაა. მისი თქმით, უკრაინისთვის ეს განსაკუთრებით მტკივნეულია, რადგან რუსეთი ენერგორესურსების გაყიდვით მიღებული ფულით იარაღს ყიდულობს და ამ იარაღით უკრაინის ქალაქებს ბომბავს.რუტემ ზელენსკის შეშფოთება გაიზიარა, თუმცა აღნიშნა, რომ ევროპის ენერგეტიკული შესყიდვებიც იმავე ლოგიკით უნდა შეფასდეს.„რუსეთისგან მიღებული შემოსავლებით შეძენილი იარაღი უკრაინას თუ ბომბავს, მაშინ იგივე კითხვა ევროპული შესყიდვების შემთხვევაშიც ჩნდება“, – აღნიშნა რუტემ.

1793963880

დიმიტრი პესკოვი: ევროპას უჭირს, გადაწყვიტოს, ვინ ისაუბრებს მათი სახელით სამშვიდობო მოლაპარაკებებში

კრემლში აცხადებენ, რომ ევროპას უჭირს, გადაწყვიტოს, ვინ ისაუბრებს მათი სახელით სამშვიდობო მოლაპარაკებებში.კრემლის პრესსპიკერის, დიმიტრი პესკოვის თქმით, ადრე თუ გვიან საჭირო გახდება ევროპელებთან საუბარი ორმხრივი უსაფრთხოების უზრუნველყოფის საკითხზე.„როგორც ვხედავთ, ისინი ჯერ ვერც კი წყვეტენ, ვის შეუძლია, მათი სახელით ისაუბროს“, – აღნიშნავს კრემლის პრესსპიკერი.ამასთან, პესკოვის თქმით, მოსკოვი და ვაშინგტონი პოზიტიურ განწყობას ინარჩუნებენ და ჰუმანიტარული მუშაობის გაგრძელებისთვის მზად არიან.„რა თქმა უნდა, ეს ძალიან პოზიტიური შეხვედრაა და მთავარია, რომ შენარჩუნებულია პოზიტიური განწყობა და მზადყოფნა, ასეთი ჰუმანიტარული მუშაობა შემდგომშიც განვაგრძოთ“, – განაცხადა პესკოვმა.მისივე თქმით, კრემლს ჯერჯერობით არ აქვს ინფორმაცია აშშ-ის პრეზიდენტ დონალდ ტრამპსა და რუსეთის პრეზიდენტის სპეციალურ წარმომადგენელ კირილ დმიტრიევს შორის შეხვედრის შედეგების შესახებ.

1793962855

პოლონეთში ბოლო დღეებში თვითმფრინავებში ასაფეთქებელი მოწყობილობის არსებობის შესახებ 20-ზე მეტი ცრუ შეტყობინება დაფიქსირდა

პოლონეთში ბოლო დღეებში სამგზავრო თვითმფრინავებში ასაფეთქებელი მოწყობილობის არსებობის შესახებ 20-ზე მეტი ცრუ შეტყობინება დაფიქსირდა, – ამის შესახებ პოლონური რადიო ევროპის საჰაერო ნავიგაციის უსაფრთხოების ორგანიზაცია Eurocontrol-ზე დაყრდნობით იუწყება.Eurocontrol-ი ევროპული ორგანიზაციაა, რომელიც საჰაერო მოძრაობის კოორდინაციასა და უსაფრთხოებას უზრუნველყოფს.ორგანიზაციის მონაცემებით, 5 ნოემბერს ბორტზე ასაფეთქებელი ნივთიერების არსებობის შესახებ შეტყობინება 14 რეისზე მიიღეს, 3 ნოემბერს კი – შვიდ რეისზე.ორგანიზაციის განცხადებით, ვითარებას აკვირდებიან და მჭიდროდ თანამშრომლობენ ავიაკომპანიებთან, აეროპორტებთან, საჰაერო ნავიგაციის მომსახურების მიმწოდებლებთან და ევროპის მასშტაბით მოქმედ სხვა ორგანიზაციებთან, რათა საჰაერო მიმოსვლის შესაძლო შეფერხებები მინიმუმამდე დაიყვანონ.მანამდე ევროკომისიაში განაცხადეს, რომ ავიარეისებზე ასაფეთქებელი მოწყობილობის არსებობის შესახებ შეტყობინებებს აკვირდებიან და ქვეყნებს მსგავსი ინციდენტების დამოუკიდებელი გამოძიებისკენ მოუწოდეს.ცნობისთვის, ბოლო დღეებში ასაფეთქებელი ნივთიერების არსებობის შესახებ შეტყობინებების გამო ევროპის არაერთ ქვეყანაში ავიამიმოსვლა შეფერხდა. კერძოდ, ჩეხეთში, რუმინეთსა და იტალიაში სამგზავრო თვითმფრინავები ავარიულად მას შემდეგ დაეშვნენ, რაც ბორტზე ასაფეთქებელი ნივთიერების არსებობის შესახებ შეტყობინებები მიიღეს.

1793957721

რუბიო: ჩემი გეგმა ყოველთვის იყო, პრეზიდენტ ტრამპის ადმინისტრაციაში მისი უფლებამოსილების ვადის ბოლომდე მემუშავა, მეცინება, როდესაც ამბობენ, რომ თანამდებობის დატოვებას ვაპირებ

მარკო რუბიომ უარყო ინფორმაცია, რომ დონალდ ტრამპის ადმინისტრაციის დატოვებას გეგმავს და თქვა, რომ არ იცის, „საიდან მოდის ეს ხმები“. ამის შესახებ აშშ-ის სახელმწიფო მდივანმა „ნიუ იორკ თაიმსთან” ინტერვიუში განაცხადა.რუბიოს განცხადება მედიაში გავრცელებულ ცნობებს მოჰყვა, რომლის მიხედვითაც, აშშ-ის სახელმწიფო მდივანი ტრამპის ადმინისტრაციიდან წასვლის შესაძლებლობას განიხილავს, რათა 2028 წლის საპრეზიდენტო არჩევნებისთვის მომზადება შეძლოს.„ჩემი გეგმა ყოველთვის იყო, პრეზიდენტ ტრამპის ადმინისტრაციაში მისი უფლებამოსილების ვადის ბოლომდე მემუშავა. სიმართლე გითხრათ, არ ვიცი, საიდან მოდის ეს ხმები“, – განაცხადა რუბიომ.მისივე თქმით, უყვარს ის საქმე, რომელსაც აკეთებს.„გარდა ამისა, ყოველთვის მეცინება, როდესაც ამბობენ, რომ თანამდებობის დატოვებას ვაპირებ. ვეკითხები: კონკრეტულად რომელი თანამდებობის?“ – აღნიშნა რუბიომ.ამასთან, ჟურნალისტის კითხვაზე, განიხილავს თუ არა 2028 წლის საპრეზიდენტო არჩევნებში მონაწილეობას, რუბიომ პასუხისგან თავი შეიკავა.„2028 წელზე აღარაფერს ვიტყვი. უბრალოდ, ამ თემაზე საუბარს აღარ ვაპირებ“, – აღნიშნა რუბიომ.

1793949357

მედია: ისრაელის პარლამენტის 67 წევრი მხარს უჭერს ეიზენკოტს, ხოლო ნეთანიაჰუს – 46, ქვეყნის პრეზიდენტი უახლოეს დღეებში გადაწყვეტს, ვის დაავალებს მთავრობის ფორმირებას

ისრაელის პრეზიდენტი ისააკ ჰერცოგი აცხადებს, რომ ჯერ არ გადაუწყვეტია, თუ ვის ანდობს მთავრობის ჩამოყალიბებას. მისივე თქმით, კვირას მიიღებს გადაწყვეტილებას, ისრაელის პრემიერ-მინისტრის, ბენიამინ ნეთანიაჰუს პარტია „ლიკუდს“ მიანდობს მთავრობის ჩამოყალიბების შანსს, თუ მის მთავარ კონკურენტს, გადი აიზენკოტის პარტია „იაშარს“.მედიის ცნობით, ჰერცოგმა ოთხშაბათს და ხუთშაბათს მოლაპარაკებები გამართა ისრაელის პარლამენტის არჩეულ ფრაქციებთან, რომლის დროსაც პარლამენტის 120 წევრიდან 67-მა მხარი დაუჭირა ეიზენკოტს, ხოლო 46-მა – ნეთანიაჰუს.როგორც მოლაპარაკებების დასრულების შემდეგ ტელევიზიით გაკეთებულ განცხადებაში ჰერცოგმა განაცხადა, მიუხედავად იმისა, რომ „კონსულტაციების შედეგები შეიძლება, ნათელი ჩანდეს“, არსებობდა „ურთიერთვეტო ბლოკებს შორის და თავად ბლოკების შიგნით“, რაც ართულებს იმის თქმას, ვის აქვს მთავრობის ფორმირების საუკეთესო შანსი.მედიის ცნობით, მას შემდეგ, რაც ჰერცოგი კანდიდატს დაასახელებს, მას მთავრობის ფორმირების მცდელობისთვის მაქსიმუმ 42 დღე ექნება. ახალი კოალიციის შექმნამდე ნეთანიაჰუ პრემიერ-მინისტრის პოსტზე დარჩება.ცნობისთვის, ისრაელის ცენტრალური საარჩევნო კომისიის საბოლოო შედეგებით, პირველ ადგილზე ქვეყნის პრემიერ-მინისტრის, ბენიამინ ნეთანიაჰუს პარტია „ლიკუდი“ გავიდა 27 მანდატით. ნეთანიაჰუსა და მის მოკავშირე პარტიებს 120-ადგილიან პარლამენტში, ჯამში, 53 მანდატი აქვთ, მისი მოწინააღმდეგე პარტიების კოალიცია „იაშარს“ – 48 მანდატი, არაბულ პარტიებს კი – 19 მანდატი. შედეგად, არაბული პარტიები მთავრობის ფორმირების პროცესში, შესაძლოა, გადამწყვეტი ძალა აღმოჩნდნენ.ახლა ისრაელის პრეზიდენტმა უნდა გადაწყვიტოს, ქნესეთის რომელ წევრს მიანდოს მთავრობის ფორმირება. ამასთან, პრეზიდენტი ვალდებული არ არის, მთავრობის ფორმირება არჩევნებში ყველაზე მეტი მანდატის მქონე პარტიის ლიდერს დაავალოს. მას შეუძლია, არჩევანი გააკეთოს იმ კანდიდატზე, რომელსაც სხვა პარტიებთან შეთანხმებისა და საპარლამენტო უმრავლესობის შექმნის მეტი შანსი აქვს.