1794130380

პერსონალიზებული კიბოს ვაქცინა მელანომის დაბრუნების რისკს ამცირებს - ახალი კვლევა

მეცნიერებმა კიბოს მკურნალობაში მნიშვნელოვანი შედეგი მიიღეს - პერსონალიზებულმა mRNA ვაქცინამ, იმუნოთერაპიასთან კომბინაციაში, კანის ერთ-ერთი ყველაზე საშიში სიმსივნის, მელანომის, დაბრუნების ან პაციენტის გარდაცვალების რისკი 42%-ით შეამცირა. კვლევის შედეგები 2026 წლის ოქტომბერში, ევროპის სამედიცინო ონკოლოგიის საზოგადოების (ESMO) კონგრესზე წარადგინეს.მესამე ფაზის კლინიკურ კვლევაში 1 137 პაციენტი მონაწილეობდა. მათ მელანომა ქირურგიული გზით უკვე ამოკვეთილი ჰქონდათ, თუმცა დაავადების დაბრუნების მაღალი რისკი კვლავ არსებობდა. მონაწილეთა ერთი ჯგუფი პერსონალიზებულ ვაქცინასა და პემბროლიზუმაბს (Keytruda) იღებდა, მეორე კი - მხოლოდ პემბროლიზუმაბს.შედეგებმა აჩვენა, რომ მკურნალობის დაწყებიდან ორი წლის შემდეგ ვაქცინისა და იმუნოთერაპიის კომბინაციით ნამკურნალევი პაციენტების 82,2% ცოცხალი იყო და დაავადების რეციდივი არ ჰქონია. მხოლოდ იმუნოთერაპიის ჯგუფში ეს მაჩვენებელი 70% იყო.როგორ მუშაობს პერსონალიზებული ვაქცინა?ტრადიციული ვაქცინებისგან განსხვავებით, ეს პრეპარატი კიბოს განვითარების თავიდან ასაცილებლად კი არა, უკვე დიაგნოზირებული დაავადების მკურნალობისა და მისი დაბრუნების რისკის შესამცირებლად არის შექმნილი.მკვლევრები თითოეული პაციენტის სიმსივნის გენეტიკურ მახასიათებლებს სწავლობენ და ვაქცინას ინდივიდუალურად ამზადებენ. მისი მიზანია, იმუნურ სისტემას დაეხმაროს სიმსივნური უჯრედებისთვის დამახასიათებელი ცილების ამოცნობასა და მათ წინააღმდეგ ბრძოლაში.მიუხედავად იმედისმომცემი შედეგებისა, კვლევა გრძელდება. ამ ეტაპზე ჯერ არ არის დადასტურებული, აუმჯობესებს თუ არა მკურნალობა პაციენტების საერთო გადარჩენის მაჩვენებელს გრძელვადიან პერსპექტივაში. ვაქცინას მარეგულირებელი ორგანოების შეფასებაც სჭირდება, ამიტომ იგი ჯერ არ უნდა ჩაითვალოს საყოველთაოდ ხელმისაწვდომ, დამტკიცებულ მკურნალობად.

1794118930

დონალდ ტუსკი აცხადებს, რომ ქალაქ კრაკოვში მომხდარ თავდასხმაში ეჭვმიტანილის საცხოვრებელ სახლში სამი ადამიანის, სავარაუდოდ, მისივე ოჯახის წევრების ცხედრები იპოვეს

პოლონეთის პრემიერ-მინისტრის, დონალდ ტუსკის განცხადებით, ქალაქ კრაკოვში მომხდარ თავდასხმაში ეჭვმიტანილის საცხოვრებელ სახლში ორი ქალისა და ერთი მამაკაცის ცხედრები იპოვეს.მისივე თქმით, თავდამსხმელის საცხოვრებლის დასათვალიერებლად დრონი გამოიყენეს.როგორც ტუსკმა აღნიშნა, სახლში შესაძლოა დიდი რაოდენობით იარაღი იყოს.„დადასტურებული ინფორმაცია გვაქვს, დამნაშავის საცხოვრებელ სახლში ორი ქალი და ერთი მამაკაცი გარდაცვლილი იპოვეს. ეს მართლაც მძიმე ტრაგედიაა. არსებობს ძლიერი საფუძველი ვივარაუდოთ, რომ ისინი მისი ოჯახის უახლოესი წევრები იყვნენ“, – განაცხადა დონალდ ტუსკმა.საცხოვრებელი კორპუსიდან, სადაც თავდამსხმელი ცხოვრობდა, მოსახლეობის ევაკუაცია განხორციელდა. შენობაში კონტრტერორისტული დანაყოფის თანამშრომლები შევიდნენ.ცნობისთვის, პოლონეთის ქალაქ კრაკოვში მამაკაცმა ავტომობილიდან გამვლელების მიმართ ცეცხლი გახსნა. სროლის შედეგად დაიღუპა ექვსი და დაშავდა 16 ადამიანი. პოლიციის ცნობით, თავდამსხმელი 24 წლის პოლონეთის მოქალაქეა.

1794115115

დონალდ ტრამპმა თეთრი სახლის პრესსპიკერის ვაკანტურ პოსტზე UFC-ის პრეზიდენტი დანა უაითი მიიწვია

აშშ-ის პრეზიდენტმა დონალდ ტრამპმა თეთრი სახლის პრესსპიკერის ვაკანტურ პოსტზე UFC-ის პრეზიდენტი და აღმასრულებელი დირექტორი დანა უაითი მიიწვია.პლატფორმა Truth Social-ზე გავრცელებულ პოსტში პრეზიდენტმა უაითს „ნამდვილი მებრძოლი და მეომარი“ უწოდა და მოუწოდა, აღნიშნულ შეთავაზებას დათანხმდეს.ტრამპის ინიციატივით, უაითს გუნდში თანაშემწეებად ოქტაგონის ცნობილი ვარსკვლავები — ხაბიბ ნურმაგომედოვი, ისლამ მახაჩევი, ჯასტინ გეიჯი, დენიელ კორმიე, ამანდა ნუნესი და კაილა ჰარისი უნდა გაჰყვნენ. სახელმწიფოს მეთაურის განმარტებით, იმის მიუხედავად, რომ ზოგიერთი მათგანი უცხო ქვეყნის მოქალაქეა, ადმინისტრაციას „რადიკალი მემარცხენეებისგან“ თავდასაცავად სწორედ ასეთი მკაცრი და ძლიერი ფიგურები ესაჭიროება.

1794072930

პარიზსა და საფრანგეთის სხვა ქალაქებში საპროტესტო აქციები პოლიციასთან დაპირისპირებაში გადაიზარდა

საფრანგეთის დედაქალაქ პარიზში და ქვეყნის სხვა ქალაქებში საპროტესტო აქციები პოლიციასთან დაპირისპირებაში გადაიზარდა.ფრანგული მედიის თანახმად, პარიზში მსვლელობა რესპუბლიკის მოედნიდან დაიწყო, მოგვიანებით დემონსტრანტებმა გადაინაცვლეს ერის მოედანზე, სადაც სამართალდამცველებმა ცრემლსადენი გაზი გამოიყენეს. მანამდე მომიტინგეებმა სანაგვე ურნებს ცეცხლი წაუკიდეს.პარალელურად, პარიზში, კონკორდის მოედანზე, „ყვითელი ჟილეტების“ საკოორდინაციო ჯგუფის მოწოდებით, საპროტესტო აქცია მჯდომარე ფორმით მიმდინარეობდა. აღნიშნული შეკრება პრეფექტურის მიერ ნებადართული არ ყოფილა და „ყვითელი ჟილეტების“ საკოორდინაციო კომიტეტის ორი წევრი დააკავეს.მედიის ცნობით, პარიზის დემონსტრაციაში 75 ათასი ადამიანი მონაწილეობს.საპროტესტო აქცია პოლიციასთან დაპირისპირებაში გადაიზარდა ქალაქ ლიონშიც, სადაც, ბოლო მონაცემებით, თერთმეტი ადამიანია დაკავებული.ლილში აქციის ბოლოს ვითარება დაიძაბა, პოლიციამ წყლის ჭავლი გამოიყენა. აქციის მონაწილეებმა ცეცხლი წაუკიდეს ნაგვის ურნებს. აქციაზე პოლიციამ რამდენიმე ადამიანი დააკავა.ფრანგული მედიის თანახმად, ქვეყნის მასშტაბით აქციებში  250 ათასი ადამიანი მონაწილეობს.

1794066072

BBC: პოლიციის ცნობით, კრაკოვში სროლის შედეგად ხუთი ადამიანი დაიღუპა

მალოპოლსკას პოლიციის ცნობით, კრაკოვის მთავარ ბაზრის მოედანზე სროლის შედეგად ხუთი ადამიანი დაიღუპა და ათეულობით ადამიანი დაშავდა, მათ შორის პოლიციელები. ინფორმაციას BBC ავრცელებს.X-ზე გამოქვეყნებულ განცხადებაში პოლიციის დეპარტამენტი აცხადებს, რომ ადგილობრივი დროით დაახლოებით 15:00 საათზე მოედანზე ავტომობილით მოძრავმა მამაკაცმა „მანქანიდან შემთხვევითი ადამიანების მიმართულებით სროლა დაიწყო“.კიდევ ერთ განცხადებაში ნათქვამია, რომ დამნაშავეს პოლიციამ ესროლა და ის საავადმყოფოში გადაჰყავთ.შემთხვევის ადგილზე საგანგებო სამსახურებია მობილიზებული. ისინი მოსახლეობას მოუწოდებენ, მოერიდონ აღნიშნულ ტერიტორიას.

1794058582

ევროკავშირი ტრამპის მიერ შეთავაზებული მასშტაბური სამშვიდობო შეთანხმების გეგმას უარყოფს - Euronews

ევროპელმა ლიდერებმა უარყვეს აშშ-ისა და რუსეთის ნებისმიერი მცდელობა, ევროპის კონტინენტის უსაფრთხოების არქიტექტურა მათი მონაწილეობის გარეშე შეცვალონ, - ამის შესახებ Euronews-ი წერს. მედიის ინფორმაციით, ევროპელი ლიდერების განცხადებები აშშ-ის პრეზიდენტ დონალდ ტრამპის განცხადებას მოჰყვა, რომლის თქმითაც ვაშინგტონი შესაძლოა მოსკოვთან ფართომასშტაბიანი შეთანხმების მიღწევასთან ახლოს იყოს.ტრამპის განმარტებით, შეთანხმების მოქმედების სფერო შესაძლოა უკრაინას გასცდეს და მთელი ევროპა მოიცვას.მედიის ცნობით, ტრამპის მიერ ხუთშაბათს გაკეთებულმა განცხადებებმა ვაშინგტონის ევროპელ მოკავშირეებში შეშფოთება გამოიწვია. ისინი შიშობენ, რომ აშშ-ის ადმინისტრაცია შესაძლოა ისეთი უსაფრთხოების შეთანხმებისკენ მიდიოდეს, რომელიც რუსეთის პრეზიდენტ ვლადიმერ პუტინის გრძელვადიან მოთხოვნებს გაითვალისწინებს, ევროპული ინტერესების ხარჯზე.ტრამპის ინიციატივას ევროპელი ოფიციალური პირების მხრიდან წინააღმდეგობა მყისიერად მოჰყვა. ისინი ხაზგასმით აღნიშნავენ, რომ კონტინენტის უსაფრთხოების სისტემა უკვე ჩამოყალიბებულია და მისი ხელახლა განხილვა ევროპის გვერდის ავლით დაუშვებელია.„ჩვენ უკვე გვაქვს ჩამოყალიბებული ევროპის უსაფრთხოების არქიტექტურა.პრობლემა კვლავ ის არის, რომ რუსეთი მუდმივად არღვევს იმ ხელშეკრულებებს, რომლებსაც ეს სისტემა ეფუძნება. 2021 წელს NATO რუსეთისთვის საფრთხეს არ წარმოადგენდა და არც ამჟამად წარმოადგენს. პუტინს ევროპის უსაფრთხოების საკითხებზე ვეტოს უფლება არ აქვს,- განაცხადა ევროკავშირის საგარეო პოლიტიკის ხელმძღვანელმა კაია კალასმა.კალასმა ასევე ხაზი გაუსვა, რომ ნებისმიერი შეთანხმების განხორციელებისთვის მასში ევროკავშირის მონაწილეობა აუცილებელი იქნება.მის პოზიციას შეუერთდა პოლონეთის საგარეო საქმეთა მინისტრი რადოსლავ სიკორსკიც. მისი განცხადებით, უკრაინასა და ევროპის მომავალთან დაკავშირებული ნებისმიერი შეთანხმება, რომელიც ევროპის მონაწილეობის გარეშე იქნება მიღწეული, როგორც პოლიტიკურად მიუღებელი, ისე პრაქტიკულად განუხორციელებელი იქნება.„შეთანხმება უკრაინისა და ევროპის მომავალზე, რომელიც ჩვენს ზურგს უკან იქნება მიღწეული, არაგონივრული იქნება და რეალურად შეუძლებელია“, - განაცხადა სიკორსკიმ.

1794052381

სამმხრივი მოლაპარაკებებისთვის რუსეთი უკრაინის კრიტიკული ინფრასტრუქტურაზე ბალისტიკური რაკეტების გაშვებით ემზადება - ვოლოდიმირ ზელენსკი

გასულ ღამეს თავდასხმის დროს რუსებმა 36 ბალისტიკური რაკეტა გამოიყენეს, რომელთა სამიზნე კიევი და მიმდებარე რეგიონები იყო, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.უკრაინის პრეზიდენტმა აღნიშნა, რომ რუსეთი სამმხრივი მოლაპარაკებებისთვის ემზადება უკრაინის კრიტიკული ინფრასტრუქტურის მიმართულებით ბალისტიკური რაკეტების გაშვებით.„დარტყმის მთავარი სამიზნე კვლავ ენერგეტიკის სექტორია. დედაქალაქს ელექტროენერგიის, წყლისა და გათბობის საკითხში რთული ვითარება აქვს. საცხოვრებელი შენობები და ჩრდილოეთის ხიდი დაზიანდა, ხოლო საბავშვო ბაღი ნაწილობრივ განადგურდა“, – აღნიშნა უკრაინის პრეზიდენტმა.ზელენსკის თქმით, კიევის გარდა, კიდევ თორმეტი რეგიონი დაზარალდა. პარტნიორების, განსაკუთრებით კი შეერთებული შტატებისადმი მიმართვისას უკრაინის პრეზიდენტმა ხაზგასმით აღნიშნა, რომ როდესაც რუსეთი ცდილობს კიევსა და მთელ ქვეყანაში ელექტროენერგიის გათიშვას, „უკრაინა, არ შეიძლება, მარტო დარჩეს“.

1794047003

აშშ-ის სახელმწიფო დეპარტამენტი ირანის ბირთვულ პროგრამაზე ინფორმაციისთვის 20 მილიონ დოლარამდე ჯილდოს სთავაზობს

აშშ-ის სახელმწიფო დეპარტამენტის პროგრამა Rewards for Justice ირანის ბირთვული პროგრამის შესახებ ინფორმაციის მიმწოდებელს 20 მილიონ დოლარამდე ჯილდოსა და შესაძლო საცხოვრებელი ადგილის შეცვლას სთავაზობს.უწყების განცხადებით, ჯილდოს მიღება შესაძლებელია ირანის ბირთვული პროგრამის, მათ შორის მისი ობიექტების, აღჭურვილობისა და მასთან დაკავშირებული პერსონალის, მათ შორის სამეცნიერო წრეების წარმომადგენლების ან აღნიშნული კომპონენტების გადაადგილების შესახებ ინფორმაციის მიწოდებისთვის.2025 წელს ატომური ენერგიის საერთაშორისო სააგენტომ (IAEA) განაცხადა, რომ ირანი ურანს 60%-მდე ამდიდრებს. ეს დონე ტექნიკურად მცირე ნაბიჯითაა დაშორებული 90%-იან გამდიდრებას, რომელიც ბირთვული იარაღის დასამზადებლად არის საჭირო. ირანი ერთადერთი ქვეყანაა, რომელსაც ბირთვული იარაღი არ გააჩნია და რომელიც ურანს ასეთ მაღალ დონემდე ამდიდრებს. ექსპერტების შეფასებით, ამ რაოდენობის ურანი, შემდგომი გამდიდრების შემთხვევაში, შესაძლოა რამდენიმე ბირთვული იარაღის დასამზადებლად საკმარისი აღმოჩნდეს, აღნიშნულია ინფორმაციაში.სააგენტოს განცხადებით, ირანის რეჟიმის მიერ გარანტიების ვალდებულებების შესრულების საკითხში თანამშრომლობის ნაკლებობამ IAEA-ს ისლამური რესპუბლიკის მიერ ისეთი მნიშვნელოვანი კომპონენტების, როგორიცაა ცენტრიფუგები, წარმოებისა და მარაგების შესახებ ინფორმაციის უწყვეტი კონტროლის შესაძლებლობა დაუკარგა.

1794046846

EURONEWS: ფრანგი ადვოკატები შინაგან საქმეთა მინისტრს დემონსტრანტების მძიმე დაზიანებების გამო სასამართლოში უჩივიან

საფრანგეთში დემონსტრაციების დროს დაშავებული მოქალაქეების ინტერესების დამცველი იურისტები შინაგან საქმეთა მინისტრის ლორან ნუნიესის წინააღმდეგ სასამართლო დავის დაწყებას გეგმავენ. ინფორმაციას Euronews-ი ავრცელებს.ადვოკატები მინისტრს პოლიციის მხრიდან ძალის გადამეტებასა და ისეთი იარაღის გამოყენებაზე პასუხისმგებლობას აკისრებენ, რომელმაც აქციის მონაწილეებს მძიმე და შეუქცევადი დაზიანებები მიაყენა.6 ნოემბერს გამართულ პრესკონფერენციაზე ადვოკატმა არიე ალიმიმ განაცხადა, რომ სამართლებრივი დავის მიზანი იქნება მინისტრის პასუხისმგებლობის საკითხის დაყენება იმ იარაღის გამოყენებისთვის, რომელმაც დემონსტრანტები დაასახიჩრა.„ახლა მიგვაჩნია, რომ აუცილებელია პასუხისმგებლობა დავაკისროთ იმ პირს, ვინც ამ დასახიჩრებისა და მასშტაბური ზიანის უკან დგას - შინაგან საქმეთა მინისტრ ლორან ნუნიესს“, - განაცხადა ალიმიმ.იურისტები საფრანგეთის რესპუბლიკის იუსტიციის სასამართლოში (CJR) კოლექტიური საჩივრის შეტანას აპირებენ. ეს ერთადერთი ფრანგული სასამართლოა, რომელსაც უფლებამოსილება აქვს, განიხილოს მოქმედი მინისტრების მიერ სამსახურებრივი მოვალეობის შესრულებისას შესაძლო ჩადენილი სამართალდარღვევები, წერს ტელეარხი.ადვოკატები ნუნიესს ისეთი იარაღის გამოყენების ნებართვის გაცემაში ადანაშაულებენ, რომლის შესაძლო შედეგების შესახებაც, მათი მტკიცებით, მინისტრმა იცოდა. მათი შეფასებით, აღნიშნული საშუალებები მუდმივ დაზიანებებს იწვევს და საზოგადოებრივი წესრიგის დასაცავად შეუფერებელია.„ჩვენ კოლექტიურ საჩივარს შევიტანთ რესპუბლიკის იუსტიციის სასამართლოში ბატონი ლორან ნუნიესის წინააღმდეგ იმ ბრძანებების გამო, რომლებიც მან ისეთი იარაღის გამოყენებასთან დაკავშირებით გასცა, რომლის დასახიჩრების უნარის შესახებაც იცის“, - განაცხადა ალიმიმ. მისი თქმით, ევროპის სხვა ქვეყნებში ხალხის მასების კონტროლის მიზნით ასეთ იარაღს არ იყენებენ.კოლექტიურ საჩივართან შეერთებაზე ადვოკატების დაახლოებით 10 კლიენტი უკვე დათანხმდა. მთლიანობაში, იურისტთა ჯგუფი ბოლო კვირებში გამართული დემონსტრაციების დროს დაშავებულ სულ მცირე 18 ადამიანს წარმოადგენს.როგორც Euronews-ი წერს, სამართლებრივი დავის დაწყების გადაწყვეტილება საფრანგეთში რამდენიმე კვირის განმავლობაში მიმდინარე არეულობას მოჰყვა. თავდაპირველად აქციების ფარგლებში საშუალო სკოლების მოსწავლეები სასწავლო დაწესებულებების ბლოკირებას ახორციელებდნენ, მოგვიანებით კი საპროტესტო გამოსვლებმა უფრო ფართო მასშტაბი მიიღო. ამ ფონზე სულ უფრო მეტი კითხვა ჩნდება პოლიციის მიერ საზოგადოებრივი წესრიგის დაცვის მეთოდებთან დაკავშირებით.საფრანგეთის საინფორმაციო სააგენტო AFP-ის მონაცემებით, სექტემბრის შუა რიცხვებიდან სულ მცირე 20 ადამიანმა, რომელთა უმეტესობა მოზარდია, მძიმე დაზიანებები მიიღო. ისინი პოლიციის მიერ გამოყენებული სპეციალური რეზინის ჭურვების გამშვები მოწყობილობებიდან ნასროლმა ჭურვებმა ან ყუმბარებმა დააზიანა.ერთ-ერთი ყველაზე მძიმე შემთხვევა 17 წლის ბიჭს უკავშირდება, რომელიც 17 ოქტომბერს, სენტ-ეტიენში გამართული დემონსტრაციის დროს დაშავდა. პოლიციის მიერ გამოყენებული ყუმბარის აფეთქების შედეგად მას ხელი მძიმედ დაუზიანდა.

1794046624

THE TELEGRAPH: ირანი რუსეთთან მოწინავე საჰაერო თავდაცვის სისტემების მიწოდებაზე მოლაპარაკებებს აწარმოებს

რუსეთი და ირანი თეირანისთვის მოწინავე საჰაერო თავდაცვის სისტემების მიწოდების შესახებ შეთანხმებაზე მოლაპარაკებებს აწარმოებენ. ინფორმაციას The Telegraph-ი ავრცელებს.ირანის მაღალჩინოსნის განცხადებით, ისლამური რესპუბლიკა „ოპტიმისტურადაა განწყობილი“ და იმედოვნებს, რომ რუსეთის პრეზიდენტი ვლადიმერ პუტინი თეირანს საბოლოოდ მიაწვდის S-400-ის ტიპის საჰაერო თავდაცვის სისტემებს, რომელთა შეძენასაც ირანი წლების განმავლობაში ცდილობდა.ირანის უზენაესმა ლიდერმა მოჯთაბა ხამენეიმ ხუთშაბათს კრემლში საკუთარი უსაფრთხოების სამსახურის ხელმძღვანელი მოჰსენ რეზაი პირადი წერილით გაგზავნა. ირანელი მაღალჩინოსნის ინფორმაციით, წერილის მთავარი მოთხოვნა სწორედ აღნიშნული შეიარაღების მიწოდება იყო.შესაძლო შეთანხმებაზე მოლაპარაკებები ეწინააღმდეგება აშშ-ის პრეზიდენტის დონალდ ტრამპის განცხადებებს, რომ რუსეთი ირანს „საერთოდ არ ეხმარება“, წერს გამოცემა.მოსკოვში გამართული შეხვედრის შემდეგ რეზაიმ განაცხადა: „ბატონ პუტინთან მნიშვნელოვანი რეგიონული საკითხები განვიხილეთ. ასევე გაიმართა მნიშვნელოვანი საუბრები ომის შემდგომ პერიოდსა და რეგიონული უსაფრთხოების მოწყობაზე“.როგორც The Telegraph-ი წერს, მხარეებმა რუსეთსა და ირანს შორის ახალი გაზსადენის მშენებლობის საკითხიც განიხილეს.ცნობილია, რომ ირანმა ბოლო პერიოდში რუსეთთან იარაღის მიწოდების შესახებ რამდენიმე შეთანხმება გააფორმა. როგორც ჩანს, ეს გარიგებები თეირანის გრძელვადიანი გეგმის ნაწილია, რომელიც აშშ-თან ომის შემთხვევაში გადარჩენასა და ისლამური რესპუბლიკის შენარჩუნებას ისახავს მიზნად.The Telegraph-ის ინფორმაციით, ირანელ მაღალჩინოსნებს აშშ-თან ომის პირობებში გადარჩენის რამდენიმე გეგმა წარუდგინეს, მათ შორის რუსეთთან სამხედრო კავშირების გაღრმავების წინადადებაც.გასაიდუმლოებული დოკუმენტებიდან ირკვევა, რომ უსაფრთხოების სფეროს წარმომადგენლებმა შეიმუშავეს რეკომენდაციები, რომელთა მიხედვითაც, ირანმა უნდა განავითაროს „სტრატეგიული ურთიერთობები, განსაკუთრებით სამხედრო სფეროში, ისეთ დამოუკიდებელ გლობალურ ძალებთან, როგორებიც ჩინეთი და რუსეთია“, რათა ამერიკული ზეწოლა შეასუსტოს.რეკომენდაციები ირანის პარლამენტის საიდუმლო კომიტეტმა აშშ-ისა და ისრაელის მიერ ირანის წინააღმდეგ ომის დაწყებამდე, თებერვალში შეიმუშავა. დოკუმენტში განსაკუთრებული ყურადღება საჰაერო თავდაცვის, რაკეტებისა და დრონების შესაძლებლობების გაძლიერებას ეთმობა.S-400-ის მიწოდების შესახებ ახალი მოთხოვნა ირანის თავდაცვის პოლიტიკისთვის განსაკუთრებით მნიშვნელოვანია. აშშ-ისა და ისრაელის დარტყმებმა ირანის საჰაერო თავდაცვის სისტემები გაანადგურა და გამოავლინა ქვეყნის უუნარობა, დაეცვა საკუთარი საჰაერო სივრცე, ბირთვული ობიექტები და სამხედრო მეთაურები, მათ შორის აიათოლა ალი ხამენეი - მოკლული უზენაესი ლიდერი.ანალიტიკოსებისა და რეგიონული ოფიციალური პირების შეფასებით, მოსკოვი თეირანს მსგავსი შეიარაღების მიყიდვას წლების განმავლობაში ჰპირდებოდა, თუმცა მიწოდებისგან თავს იკავებდა, რადგან ისრაელთან და რეგიონის სხვა ქვეყნებთან ურთიერთობების გაუარესებას უფრთხოდა.ანალიტიკოსების აზრით, რუსეთს შესაძლოა სხვა მიზეზებიც ჰქონდეს, რის გამოც ამ სისტემების ირანისთვის გადაცემას მოერიდოს. უკრაინის მიერ რუსეთის ტერიტორიაზე ნავთობგადამამუშავებელ ქარხნებზე, ავიაბაზებსა და სხვა ობიექტებზე შორი მოქმედების დრონებითა და რაკეტებით განხორციელებული მუდმივი თავდასხმების გამო, თავად რუსეთის საჰაერო თავდაცვის შესაძლებლობებიც მნიშვნელოვნად არის დატვირთული. შესაბამისად, მოსკოვს შესაძლოა საკუთარი ყველაზე მოწინავე საჰაერო თავდაცვის სისტემების გასაყიდად საკმარისი რესურსი არ ჰქონდეს.

1794046460

რუსეთსა და უკრაინას პირველად სურთ კონფლიქტის მოგვარება - დონალდ ტრამპი

აშშ-ის პრეზიდენტის დონალდ ტრამპის განცხადებით, რუსეთმა და უკრაინამ კონფლიქტის მოგვარების სურვილი პირველად გამოთქვეს.როგორც თეთრი სახლის ლიდერმა ჟურნალისტებს განუცხადა, რუსეთი და უკრაინა ამერიკის შუამავლობით მასშტაბურ შეთანხმებას მიაღწევენ, რომელიც მთელ ევროპას მოიცავს.„რუსეთსა და უკრაინას, ვფიქრობ, პირველად სურთ კონფლიქტის მოგვარება. ჩვენ შეხვედრებს ვმართავთ. დღეს სატელეფონო საუბრები მქონდა, ხვალ კი კიდევ რამდენიმე საუბარი მექნება. ვფიქრობ, ძალიან მასშტაბურ შეთანხმებას მივაღწევთ. ჩემი აზრით, ეს შეთანხმება მთელ ევროპას მოიცავს“, - განაცხადა ტრამპმა.

1794046298

კრემლმა უკრაინასთან აბუ-დაბიში დაგეგმილი მოლაპარაკებებისთვის რუსეთის დელეგაციის შემადგენლობა დაასახელა

რუსეთის პრეზიდენტის პრესმდივანმა დიმიტრი პესკოვმა რუსული დელეგაციის შემადგენლობა დაასახელა, რომელიც 10-11 ნოემბერს აბუ-დაბიში უკრაინულ მხარესთან სამშვიდობო მოლაპარაკებებს გამართავს. ინფორმაციას რუსული მედია ავრცელებს.როგორც პესკოვმა აღნიშნა, რუსული დელეგაციის შემადგენლობაში შევლენ ვლადიმერ პუტინის თანაშემწე ვლადიმერ მედინსკი, საგარეო საქმეთა მინისტრის მოადგილეები სერგეი რიაბკოვი და მიხეილ გალუზინი.გარდა ამისა, რუსულ მხარეს მოლაპარაკებებზე წარადგენენ გენერალური შტაბის მთავარი სამმართველოს ხელმძღვანელი იგორ კოსტიუკოვი და მისი მოადგილე იური ჟიგარლოვსკი.რუსულ მხარეს კურირებას რუსეთის პრეზიდენტის თანაშემწე საგარეო ურთიერთობათა საკითხებში იური უშაკოვი გაუწევს.