მსოფლიო • 1749840804

პუტინი ნეთანიაჰუს ირანის ბირთვული პროგრამის გარშემო არსებული საკითხების დიპლომატიის გზით გადაწყვეტისკენ მოუწოდებს

რუსეთის პრეზიდენტი ვლადიმერ პუტინი ისრაელის პრემიერ-მინისტრ ბენიამინ ნეთანიაჰუს მოუწოდებს, რომ ირანის ბირთვული პროგრამის გარშემო არსებული საკითხები დიპლომატიის გზით გადაწყდეს.კრემლის პრესსპიკერის, დიმიტრი პესკოვის თქმით, პუტინმა სატელეფონო საუბრის დროს „ხაზი გაუსვა მოლაპარაკებების პროცესზე დაბრუნებისა და ირანის ბირთვული პროგრამასთან დაკავშირებული ყველა საკითხის მკაცრად პოლიტიკური და დიპლომატიური გზებით მოგვარების მნიშვნელობას“.როგორც მედია იუწყება, რუსეთის პრეზიდენტმა ცალკე სატელეფონო საუბარი გამართა ირანის პრეზიდენტ მასუდ ფეზეშქიანთან, რომელთანაც თეირანის წინააღმდეგ ისრაელის ქმედებები დაგმო. პესკოვის თქმით, რუსეთი „გმობს გაეროს ქარტიის დარღვევით, ისრაელის ძალადობრივ ქმედებებს“ და სამძიმარს გამოთქვამს დაღუპულთა გამო.

მსოფლიო • 1749121925

კრემლში აცხადებენ, რომ პუტინი და ტრამპი პირისპირ შეხვედრაზე ჯერ არ შეთანხმებულან

რუსეთისა და აშშ-ის პრეზიდენტები 4 ივნისს გამართულ სატელეფონო საუბრისას პირისპირ შეხვედრაზე არ შეთანხმებულან, - აღნიშნულის შესახებ რუსეთის ფედერაციის პრეზიდენტის პრესმდივანი დიმიტრი პესკოვი აცხადებს.„საუბრის დროს შეთანხმება არ ყოფილა, რადგან სახელმწიფოს მეთაურებს შორის არსებობს საერთო მოსაზრება, რომ შეხვედრა აუცილებელია. შეხვედრა კი სათანადოდ უნდა იყოს მომზადებული“, - განაცხადა კრემლის წარმომადგენელმა.პესკოვის თქმით, პრეზიდენტებს შორის საუბარი კონსტრუქციული იყო.„პრეზიდენტებმა მართლაც ბევრი არსებითი და მნიშვნელოვანი საკითხი განიხილეს“, - დასძინა პესკოვმა.პუტინმა და ტრამპმა ამერიკელი ლიდერის თანამდებობის დაკავების შემდეგ მეოთხე სატელეფონო საუბარი გამართეს, რომელიც 1 საათსა და 10 წუთს გაგრძელდა.პუტინმა და ტრამპმა უკრაინის გარშემო არსებული ვითარება განიხილეს. 

მსოფლიო • 1748698904

რუსული დელეგაცია ორშაბათს სტამბოლში უკრაინასთან მოლაპარაკებებზე ჩავა - პესკოვი

რუსეთის პრეზიდენტის პრესმდივნის, დიმიტრი პესკოვის განცხადებით, რუსეთის დელეგაცია თურქეთის ქალაქ სტამბოლში გაემგზავრება და ორშაბათს დილით უკრაინასთან მოლაპარაკებების ახალი რაუნდის დასაწყებად მზად იქნება.პესკოვი აგრეთვე ადასტურებს, რომ რუსეთი უკრაინას 2 ივნისს ცეცხლის შეწყვეტის შესახებ მემორანდუმის საკუთარ ვერსიას წარუდგენს, თუმცა დოკუმენტის დეტალებს არ ასაჯაროებს.„მინდა გაცნობოთ, რომ ჩვენი დელეგაცია, მომლაპარაკებლების რუსული დელეგაცია სტამბოლში მიემგზავრება და ორშაბათს დილით მოლაპარაკებების მეორე რაუნდისთვის მზად იქნება“, - თქვა პესკოვმა.

პოლიტიკა • 1748626140

მშვიდობის სანაცვლოდ NATO აღმოსავლეთით აღარ გაფართოვდება - ტრამპი პუტინის პირობას დაპირებით პასუხობს

მშვიდობის სანაცვლოდ NATO აღმოსავლეთით აღარ გაფართოვდება - ტრამპი პუტინის პირობას დაპირებით პასუხობს. ალიანსი რუსეთის საზღვართან არ მივა, რაც NATO-ში უკრაინის, საქართველოსა და მოლდოვას მიღებას ავტომატურად გამორიცხავს. ამერიკის პრეზიდენტის პოზიცია უკრაინის საკითხებში მისმა წარმომადგენელმა ABC News-თან ინტერვიუში დაადასტურა. კიტ კელოგის თქმით, მათთვის გასაგებია, რომ პოსტსაბჭოთა ქვეყნების NATO-ში ინტეგრაცია რუსეთის ინტერესებს ეწინააღმდეგება და დღის წესრიგში არც უკრაინის გაწევრიანება დგას.გენერალ კელოგის განცხადება თბილისში არავის გაჰკვირვებია, მათ შორის არც ის, რომ ომის დასრულების ერთ-ერთი პირობა არა მხოლოდ უკრაინის, არამედ საქართველოს NATO-ში ინტეგრაციასაც უკავშირდება. სახელისუფლებო გუნდში ამბობენ, რომ თავიდანვე ნათელი იყო სამხედრო აგრესიის დაწყების გლობალური მიზეზი - კონკრეტული სახელმწიფოების სტრატეგიული ინტერესები. "ქართულ ოცნებაში" აცხადებენ, რომ მიმდინარე პროცესების მიუხედავად, საქართველო ყოველთვის იყო და რჩება ევროატლანტიკური ინტეგრაციის ერთგული.ტრამპის მზადყოფნას პუტინის პირობა განიხილოს, ომის დასრულების ამერიკულ ტაქტიკას უკავშირებენ ოპოზიციაში. ხელისუფლების ოპონენტები აცხადებენ, რომ საქართველოს NATO-ში გაწევრიანებაზე გადამწყვეტი სიტყვა სწორედ ამერიკას ეთქმის, ამიტომ იმედოვნებენ, რომ გაფართოების საკითხზე პოზიციები გადაიხედება.რა შედეგით დასრულდება უკრაინის საკითხზე ამერიკა-რუსეთის შეთანხმება - ამას საქართველოს ხელისუფლება ქვეყნის უსაფრთხოების გადმოსახედიდან აკვირდება. "ქართულ ოცნებაში" ამბობენ, რომ მოლაპარაკების მაგიდაზე NATO-ს გაფართოების საკითხს ამერიკა-რუსეთის ეროვნული ინტერესები განაპირობებს, თუმცა საქართველოს საკუთარი ინტერესი აქვს - გარანტია, რაც ქვეყანას სტაბილურობას და მშვიდობას შეუნარჩუნებს.კიტ კელოგის განცხადებას რუსეთიდან გამოეხმაურა და დახურული მოლაპარაკებების შედეგი უწოდა კრემლის პრესსპიკერმა. დიმიტრი პესკოვის თქმით, მოსკოვი მოხარულია, რომ აღმოსავლეთით NATO-ს გაფართოების დაუშვებლობის შესახებ ვაშინგტონს პუტინის განმარტებების ესმის.

მსოფლიო • 1748431086

ვემზადებით უკრაინულ მხარესთან მოლაპარაკებების შემდეგი რაუნდისთვის, უკრაინის საკითხზე რუსეთის მემორანდუმის მუშაობა ფინალურ ეტაპზეა - დიმიტრი პესკოვი

კრემლის პრესმდივანმა, დიმიტრი პესკოვმა განაცხადა, რომ უკრაინის საკითხზე რუსეთის მემორანდუმის მუშაობა ფინალურ ეტაპზეა. პესკოვის თქმით, უკრაინისა და რუსეთის მიერ წარდგენილი მემორანდუმის პროექტები მალე გახდება ცნობილი.„მალე ცნობილი გახდება იმ მემორანდუმის პროექტები, რომლებიც ორი მხრიდან იქნება წარდგენილი და საუბარი დაიწყება უკვე მოლაპარაკებებს შემდეგ რაუნდზე“, – განაცხადა რუსეთის პრეზიდენტის პრესმდივანმა.დიმიტრი პესკოვის თქმით, რუსეთი უკრაინასთან მოლაპარაკებების შემდეგი რაუნდისთვის ემზადება.„ჩვენ ძალიან დაძაბულ სამუშაოს ვაწარმოებთ. ვემზადებით უკრაინულ მხარესთან მოლაპარაკებების შემდეგი რაუნდისთვის. ამასთან, ჩვენ გავაგრძელებთ ჩვენს კონტაქტებს ამერიკელებთან“, – აღნიშნა პესკოვმა.როგორც კრემლის პრესმდივანმა განაცხადა, რუსეთი მადლობელია პირადად აშშ-ის პრეზიდენტის, დონალდ ტრამპის შუამავლობის ძალისხმევისთვის.

პოლიტიკა • 1747999115

პესკოვი აცხადებს, რომ რუსეთ-უკრაინას შორის მოლაპარაკებების შემდეგი რაუნდის ადგილთან დაკავშირებით ორივე მხარის თანხმობაა საჭირო

კრემლის პრესსპიკერის, დიმიტრი პესკოვის განცხადებით, რუსეთსა და უკრაინას შორის მოლაპარაკებების შემდეგი რაუნდის ადგილს შეარჩევენ, „როდესაც დრო მოვა“.პესკოვის თქმით, ამისთვის საჭიროა ორივე მხარის თანხმობა.„რა თქმა უნდა, ეს გადაწყვეტილება არ შეიძლება მიიღოს ერთმა მხარემ, ამისთვის საჭიროა ორივე მხარის თანხმობა. როდესაც დრო  მოვა, ეს გადაწყვეტილება ბუნებრივად იქნება მიღებული“, – აღნიშნა პესკოვმა.მანამდე რუსული და უკრაინული დელეგაციების მიღებაზე მზადყოფნა გამოთქვა რომის პაპმა ლეო XIV-მ. რუსეთის საგარეო საქმეთა მინისტრმა, სერგეი ლავროვმა ვატინაკი მოლაპარაკებებისთვის არარეალისტურ ადგილად შეაფასა. 

მსოფლიო • 1746861788

რუსეთი უარყოფს 30-დღიანი ცეცხლის შეწყვეტის შესაძლებლობას, თუ დასავლეთი არ შეწყვეტს უკრაინისთვის შეიარაღების მიწოდებას - პესკოვი

რუსეთის პრეზიდენტის პრესმდივანმა, დიმიტრი პესკოვმა განაცხადა, რომ რუსეთი უარყოფს 30-დღიანი ცეცხლის შეწყვეტის შესაძლებლობას, თუ დასავლეთი არ შეწყვეტს უკრაინისთვის შეიარაღების მიწოდებას.პესკოვის თქმით, კრემლი ამ ინიციატივის განხორციელებას შეუძლებლად მიიჩნევს, ვიდრე „ფრონტებზე რუსეთის ჯარები შეტევას ახორციელებენ და ამას საკმაოდ თავდაჯერებულად აკეთებენ“.მან ხაზგასმით აღნიშნა, რომ ზავის პერიოდში უნდა შეწყდეს დასავლური შეიარაღების მიწოდება შეერთებული შტატებიდან და ევროპის ქვეყნებიდან.„ეს უკრაინისთვის უპირატესობა იქნება. უკრაინა გააგრძელებს სრულ მობილიზაციას, ახალ ჯარებს გადაისვრის წინა ხაზზე. ის ამ დროს გამოიყენებს ახალი სამხედრო მოსამსახურეების მოსამზადებლად და მათთვის დასვენების მისაცემად, ვინც უკვე იბრძვის. რატომ უნდა მივცეთ უკრაინას ასეთი უპირატესობა?“ - განაცხადა კრემლის ოფიციალურმა წარმომადგენელმა.

მსოფლიო • 1746534538

დიმიტრი პესკოვი - ნავთობის ფასი რუსეთის ეკონომიკისთვის მნიშვნელოვანია, მაგრამ რუსეთის ეროვნული ინტერესები ყველაზე მაღლა დგას

ნავთობის ფასი რუსეთის ეკონომიკისთვის, საერთო ჯამში, მნიშვნელოვანია, მაგრამ რუსეთის ეროვნული ინტერესები ყველაზე მაღლა დგას, – ასე გამოეხმაურა რუსეთის პრეზიდენტის პრესმდივანი დიმიტრი პესკოვი აშშ-ის პრეზიდენტის, დონალდ ტრამპის განცხადებას, სადაც მან აღნიშნა, რომ ნავთობის ფასის ვარდნამ პუტინი უფრო მეტად დააფიქრა სამშვიდობო შეთანხმებაზე.პესკოვის თქმით, „ნავთობის საერთაშორისო ფასი ძალიან მნიშვნელოვანი ფაქტორია როგორც რუსეთის ბიუჯეტის ფორმირებისთვის, ასევე მთლიანად ქვეყნის ეკონომიკისთვის,, ის აქტუალური და მნიშვნელოვანია.„რა თქმა უნდა, რუსეთი, როგორც მოგეხსენებათ, დიდი ხანია, მუშაობს OPEC+ ფორმატში, რათა შეინარჩუნოს ფასები ოპტიმალურ დონეზე. ზედმეტად მაღალი და ძალიან დაბალი ფასები უარყოფითად მოქმედებს მთლიანად გლობალურ ეკონომიკაზე. ეს სამუშაო გრძელდება, ჩვენ ყურადღებით ვაკვირდებით საერთაშორისო ვითარებას, მაგრამ, ნებისმიერ შემთხვევაში, ნავთობის ფასები არ შეიძლება, იყოს ის ფაქტორი, რომელსაც შეუძლია, გავლენა მოახდინოს რუსეთის დამოკიდებულებაზე მისი ეროვნული ინტერესების მიმართ. რუსეთის ეროვნული ინტერესები პირველ ყოვლისა, ნავთობის ფასებზე მაღლა დგას“, – განაცხადა პესკოვმა.

მსოფლიო • 1746443490

დიმიტრი პესკოვი აცხადებს, რომ ვლადიმერ პუტინისა და დონალდ ტრამპის შეხვედრა აუცილებელია

რუსეთის პრეზიდენტის პრესმდივნის, დიმიტრი პესკოვის განცხადებით, ვლადიმერ პუტინისა და დონალდ ტრამპის შეხვედრა აუცილებელია.რუსეთის პრეზიდენტის პრესმდივანმა აღნიშნა, რომ კრემლი რუსეთისა და აშშ-ის პრეზიდენტების, ვლადიმერ პუტინისა და დონალდ ტრამპის შეხვედრას საჭიროდ მიიჩნევს, თუმცა, ის კარგად უნდა იყოს მომზადებული.„ასეთი შეხვედრა აშკარად განხილვის საგანია. ბევრი მიზეზის გამო, ჩვენ მივიჩნევთ, რომ ის, რა თქმა უნდა, აუცილებელია. შეხვედრა სათანადოდ უნდა იყოს მომზადებული, და ეს მოითხოვს ძალისხმევას სხვადასხვა დონეზე. ეს მოითხოვს მოსკოვსა და ვაშინგტონს შორის კონტაქტების გაგრძელებას, რომლებიც დაიწყო და ახლაც გრძელდება. ჯერჯერობით ამ საკითხზე რაიმე კონკრეტული ინფორმაცია არ არსებობს“,- განაცხადა პესკოვმა.როგორც რუსული მედია წერს, აშშ-ის პრეზიდენტმა განაცხადა, რომ განიხილავს პუტინთან შესაძლო შეხვედრას მაისის შუა რიცხვებში, საუდის არაბეთში, პესკოვმა კი განმარტა, რომ უახლოეს მომავალში ახლო აღმოსავლეთში ვიზიტები არ არის დაგეგმილი. 

მსოფლიო • 1745744551

„უკრაინა მზად არის, ცეცხლის უპირობოდ შეწყვიტოს... ახლა პრეზიდენტმა პუტინმა უნდა დაამტკიცოს, რომ ნამდვილად სურს მშვიდობა“ - ემანუელ მაკრონი

უკრაინაში ხანგრძლივი მშვიდობის დამყარების შესახებ მოლაპარაკებები გრძელდება. რუსეთის პრეზიდენტის პრესმდივნის, დიმიტრი პესკოვის თქმით, მოსკოვი ყოველგვარი წინაპირობის გარეშე უკრაინასთან მოლაპარაკებებისთვის მზად არის."შეხვედრისას ტრამპის წარმომადგენელ უიტკოფთან, ვლადიმერ პუტინმა კიდევ ერთხელ განაცხადა, რომ რუსული მხარე მზადაა უკრაინასთან მოლაპარაკების პროცესის გასაახლებლად, ყოველგვარი წინაპირობის გარეშე," - აცხადებს პესკოვი.უკრაინის პრეზიდენტთან შეხვედრის შემდეგ განცხადებას ავრცელებს ემანუელ მაკრონიც. საფრანგეთის პრეზიდენტის განცხადებით, უკრაინა მზად არის, ცეცხლი უპირობოდ შეწყვიტოს, საბოლოო გადაწყვეტილება კი ვლადიმერ პუტინმა უნდა მიიღოს."უკრაინაში ომის დასრულება არის მიზანი, რომელსაც ჩვენ ვიზიარებთ პრეზიდენტ ტრამპთან. უკრაინა მზად არის, ცეცხლის უპირობოდ შეწყვიტოს. პრეზიდენტმა ზელენსკიმ დღეს ეს დამიდასტურა. მას სურს ამერიკელებთან და ევროპელებთან მუშაობა ამის შესასრულებლად. ახლა პრეზიდენტმა პუტინმა უნდა დაამტკიცოს, რომ ნამდვილად სურს მშვიდობა. ჩვენ გავაგრძელებთ მუშაობას მსურველთა კოალიციის ფარგლებში, რათა მივაღწიოთ ცეცხლის შეწყვეტას და უკრაინაში სრულ და ხანგრძლივ მშვიდობას," - აცხადებს მაკრონი.

მსოფლიო • 1745504975

კრემლში აცხადებენ, რომ რუსეთი განაგრძობს შეერთებულ შტატებთან მუშაობას სამშვიდობო შეთანხმების მისაღწევად

რუსეთი განაგრძობს მუშაობას ამერიკულ მხარესთან, ჩვენ ორიენტირებული ვართ მშვიდობის მიღწევისკენ მიმართული ძალისხმევის გაგრძელებაზე, – ამის შესახებ კრემლის პრესსპიკერმა, დიმიტრი პესკოვმა განაცხადა.„ჩვენ და პრეზიდენტი პუტინი ვემხრობით მშვიდობის მიღწევას ჩვენი ქვეყნის ინტერესების უზრუნველყოფით. ეს სავალდებულო პირობაა. ეს სამუშაო გრძელდება“, – აღნიშნა პესკოვმა.​კრემლის სპიკერმა უარყო ის ფაქტიც, რომ რუსეთმა კიევის მიმართულებით თავდასხმა განახორციელა.„არა, ეს სიცრუეა. უკრაინული მხარე განაგრძობს პროპაგანდას. ჩვენი სამხედროები განაგრძობენ „სპეციალურ სამხედრო ოპერაციას“, თავიანთი ამოცანების შესრულებას, რომლებიც მათ დაუსახა უმაღლესმა მთავარსარდალმა და ამ ჩარჩოებში ახორციელებენ დარტყმებს სამხედრო ობიექტებზე“, – დასძინა პესკოვმა.ამასთან, დიმიტრი პესკოვის თქმით, ამერიკის პრეზიდენტის განცხადება, რომ უკრაინამ ყირიმი დიდი ხნის წინ დაკარგა, მათ აზრს შეესაბამება.

მსოფლიო • 1745498044

კრემლი ყირიმის შესახებ ტრამპის განცხადებით კმაყოფილია

კრემლში განაცხადეს, რომ ყირიმის შესახებ აშშ-ის პრეზიდენტ დონალდ ტრამპის განცხადება სრულად შეესაბამება რუსეთის „გაგებას“.რუსეთის სახელმწიფო სააგენტო „ტასის“ ცნობით, ტრამპის განცხადების შესახებ ჟურნალისტებმა მოსკოვში დღეს, 24 აპრილს გამართულ ბრიფინგზე ჰკითხეს პრეზიდენტ პუტინის პრესმდივან დმიტრი პესკოვს.„ეს სრულად კორესპონდირებულია ჩვენს გაგებასთან და იმასთან, რასაც უკვე დიდი ხანია ვამბობთ“, - იყო პესკოვის პასუხი.აშშ-ის პრეზიდენტმა დონალდ ტრამპმა 23 აპრილს განაცხადა, რომ უკრაინამ ყირიმი რუსეთს უბრძოლველად გადასცა 11 წლის წინ, ზელენსკი არ უნდა ტრაბახობდეს, რომ უკრაინა ყირიმის ოკუპაციას იურიდიულად არ აღიარებს და მას შეუძლია ჰქონდეს მშვიდობა ან იომოს კიდევ სამი წლის განმავლობაში ქვეყნის მთლიანად დაკარგვამდე.დასავლეთის მედიასაშუალებების ინფორმაციით, უკრაინაში ომის დასასრულებლად ტრამპის ადმინისტრაციის მიერ მომზადებული სამშვიდობო გეგმის ერთ-ერთი პუნქტი ითვალისწინებს 2014 წლიდან ანექსირებული ყირიმის რუსეთის ტერიტორიად აღიარებას აშშ-ის მხრიდან.პრეზიდენტი ვოლოდიმირ ზელენსკი აცხადებს, რომ უკრაინის ტერიტორიების ოკუპაციას იურიდიულად არასდროს აღიარებენ და ეს ქვეყნის კონსტიტუციითაა განსაზღვრული.