უკრაი

ლოურენს უილკერსონი - საქართველოსთვის საუკეთესო პოზიციაა, დარჩეს ნეიტრალური, ივაჭროს ყველასთან, აყვავდეს, როგორც ჰაბი და შეინარჩუნოს მთავრობა, რომელიც ამ ფილოსოფიას მიჰყვება

ძალაუფლების გადანაცვლება დასავლეთიდან აღმოსავლეთისკენ შეუქცევადი პროცესია. მართალია, ჩინეთი ამ ცვლილების მთავარი მამოძრავებელია, მაგრამ ეს მხოლოდ მისი დამსახურება არ არის. აშშ-ის პოლიტიკამ უნებლიეთ აიძულა რუსეთი და ჩინეთი, შეექმნათ ფაქტობრივი ალიანსი, – ამის შესახებ აშშ-ის არმიის გადამდგარმა პოლკოვნიკმა, სახელმწიფო მდივნის ადმინისტრაციის ყოფილმა ხელმძღვანელმა (2001-2005 წლებში) ლოურენს უილკერსონმა გადაცემაში „42-ე პარალელი“ განაცხადა.მისივე თქმით, სულ უფრო მეტად ჩანს, რომ ინდოეთიც დაინტერესებულია ამ ჯგუფთან დაახლოებით ან, სულ მცირე, ნეიტრალიტეტის შენარჩუნებით, ნაცვლად იმისა, რომ დასავლეთის მხარე დაიჭიროს.ამასთან, ლოურენს უილკერსონის რეკომენდაციაა, რომ „საქართველო ამ ცვლილებების ეპიცენტრში აღმოჩნდეს“.„ჩვენ თავადვე შევუწყვეთ ხელი ამ მასშტაბურ და გარდაუვალ ცვლილებას. ახლა ეს პროცესი იმაზე ბევრად სწრაფად და ჩვენთვის მეტი წინაღობით მიმდინარეობს, ვიდრე საჭირო იყო. ეს დაბრკოლებები ჩვენივე ხელით შევქმენით და უკრაინის კონფლიქტი ამის ყველაზე თვალსაჩინო მაგალითია. ჩემი რეკომენდაცია საქართველოსთვის, ისევე როგორც ინდოეთისთვის, არის ის, რომ ამ ცვლილებების ეპიცენტრში უნდა აღმოჩნდეთ. ვაჭრობა თქვენს რეგიონზე ორივე მიმართულებით გაივლის: აღმოსავლეთიდან დასავლეთისკენ, დასავლეთიდან აღმოსავლეთისკენ და, სავარაუდოდ, ჩრდილოეთიდან სამხრეთისკენაც. ატლანტიკის მეორე მხრიდან მომდინარე დასავლური ძალაუფლების დაღმასვლა გაცილებით მკვეთრი და სწრაფი იქნება, ვიდრე თავიდან ველოდი.81 წლის ვარ და შეიძლება მოვესწრო კიდეც იმ დროს, როცა დანარჩენი მსოფლიო ისე აშკარად გაერთიანდება ამერიკის წინააღმდეგ, რომ ჩვენი გადარჩენაც კი გაჭირდება. კონტექსტისთვის გეტყვით: მიზეზი, რის გამოც აშშ-ის სამიზნე ვენესუელას 300 მილიარდი ბარელი ნავთობის მარაგია და, რის გამოც ტრამპის ადმინისტრაცია ნავთობტანკერებს აკავებს, არის ბერკეტის მოპოვება. ამ ნავთობს ხელში თუ არ ჩავიგდებთ, ჩვენ დავკარგავთ უნარს, შევაჩეროთ გლობალურ ნავთობსაზოგადოებაში დაწყებული მოძრაობა, აშშ დოლარიდან სხვა ვალუტებზე გადასვლა. გადავლენ ისინი იუანზე, რუპიაზე, რუბლზე თუ ვალუტების კალათაზე, მნიშვნელობა არ აქვს. გლობალურ ნავთობვაჭრობაში დე-დოლარიზაცია ამერიკული იმპერიისთვის კატასტროფა იქნება. დღეს აშშ მხოლოდ ჩვენი მთლიანი ვალის პროცენტებში წელიწადში ტრილიონ დოლარს იხდის. კონგრესის საბიუჯეტო ოფისი ვარაუდობს, რომ ხუთ წელიწადში ეს ციფრი 2 ან 3 ტრილიონამდე ავა. ეს ეკონომიკურად დაგვღუპავს. ჩვენი საკრედიტო რეიტინგი ფსკერზე დაეცემა, რაც შეუძლებელს გახდის ჩვენი სახაზინო ვალდებულებების მსოფლიო ბაზარზე გაყიდვას. მყიდველების მოსაზიდად მოგვიწევს საპროცენტო განაკვეთების ასტრონომიულ ნიშნულამდე აწევა, რაც კიდევ უფრო დაამძიმებს ჩვენს ფისკალურ მდგომარეობას“, – მიიჩნევს ლოურენს უილკერსონი.მისივე აზრით, სწორედ სავალალო ფისკალური მდგომარეობით აიხსნება ვენესუელას ნავთობზე ფოკუსირება.„ეს დროებითი ამოსუნთქვაა. ვენესუელა უფრო მეტ ნავთობს ფლობს, ვიდრე საუდის არაბეთის ცნობილი მარაგებია. მასზე კონტროლი მოგვცემს იმ ძალას, რომ დავბრუნდეთ ბაზრებზე და შევაჩეროთ გლობალური მოძრაობა დოლარიდან სხვა ვალუტებისკენ ნავთობით ვაჭრობაში. თქვენ ამ ძვრების შუაგულში ხართ. თქვენ არ ჰგავხართ თურქეთს, რომელიც ერთგვარად ეთამაშება იდეას და ალბათ განახორციელებდა კიდეც, რომ ნატო-ს სამხრეთის საყრდენი გამოაცალოს ალიანსიდან გასვლით; მას სურდა ენახა, შეძლებდა თუ არა, თავადვე დაპირისპირებოდა ძალაუფლების ამ შეუქცევად გადანაცვლებას ან მისი ნაწილი მაინც ჩაეგდო ხელთ. ვფიქრობ, სწორედ ეს იყო ერდოღანის თავდაპირველი გეგმა, მაგრამ მერე გადაიფიქრა. ახლა ის ცდილობს, დინებას მიჰყვეს და ისარგებლოს ტრანსპორტირების მოსაკრებლებითა და მილსადენებით, როგორიცაა ჯეიჰანის მილსადენი, რათა ამ სავაჭრო ნაკადებიდან სარგებელი ნახოს. სწორედ ამას ვურჩევ კავკასიასაც: არ დაუკავშირდეთ არცერთ დიდ ძალას, არ აიღოთ არცერთი მსხვილი მოთამაშის „ქრთამი“, იყავით დამოუკიდებლები, იყავით ნეიტრალურები და მიეცით საშუალება ამ გლობალურ ვაჭრობას, თქვენზე გადაიაროს, ვიდრე თქვენ თქვენს წილს იხეირებთ. თქვენ უნდა იყოთ დამოუკიდებელი, ნეიტრალური ქვეყანა, რომელიც მონაწილეობს ამ შეუკავებელ ცვლილებაში და კარგად ხედავს, საით მიცურავს „გემი“ და სად არის ამ ძალის გენერატორი. ეს არ ნიშნავს, რომ ადრე თუ გვიან არ მოგიწევთ საქმის დაჭერა ჩინეთთან, რომლის რეალური ძალა უკვე აღემატება მის ამჟამინდელ გლობალურ როლს და ის უფრო მეტისკენ ისწრაფვის. ჩინეთს კარგად ვიცნობ და არ ვფიქრობ, რომ ისინი აუცილებლად საფრთხედ იქცევიან, მაგრამ ისტორია სავსეა მაგალითებით, როცა სახელმწიფოები იმაზე დომინანტები ხდებიან, ვიდრე მსოფლიოს შეუძლია აიტანოს. ამჟამად ჩინეთს არავინ აკონტროლებს, საკუთარი შიდა გამოწვევების გარდა, რომლებიც საკმაოდ სერიოზულია. ჩინეთმა მიაღწია იმ წერტილს, სადაც მისთვის სულერთია ტრამპის ტარიფები იშვიათ მიწა-ლითონებსა და სხვა ნედლეულზე, რომელიც აშშ-ის თავდაცვის დეპარტამენტს, უფრო სწორად, „ომის დეპარტამენტს“ სჭირდება. როცა ისეთი ძლიერი ხარ, როგორიც ჩინეთი, შეგიძლია, აშშ-ს უთხრა: „ამ ლითონების გაყიდვას იმიტომ კი არ გიბლოკავ, რომ შენი დაზიანება მინდა, არამედ იმიტომ, რომ ჩემს საკუთარ შიდა ინდუსტრიას სჭირდება“. ჩინეთი იმდენად წარმატებულია, რომ თავადვე მოიხმარს იმ მასალებს, რომლებიც დენ სიაოპინმა წლების წინ ასე ოსტატურად ჩაიგდო ხელში. ისინი აღარ ცდილობენ, მსოფლიოს ფასები უკარნახონ; ისინი უბრალოდ ცდილობენ, გამოკვებონ საკუთარი გიგანტური შიდა მრეწველობა“, – აღნიშნა ლოურენს უილკერსონმა.მისივე თქმით, საქართველომ უნდა გამოიყენოს თავისი გეოგრაფიული მდებარეობა, რომ ნახოს მოგება და აკეთოს ბიზნესი ამ პროცესში ჩართულ ყველა მხარესთან.„ნუ აირჩევთ მხარეს, რუსეთს, ნატო-ს (რომელიც თავისი ძველი დიდების აჩრდილიც აღარაა) და ნურც ამერიკას. გქონდეთ ურთიერთობა ყველასთან და ფოკუსირდით გადარჩენაზე. არავის „დაუკრათ თავი“ და, რა თქმა უნდა, ნუ მოახდენთ რუსეთის პროვოცირებას. მათ 2008 წელს აჩვენეს, რისი გაკეთება შეუძლიათ, როცა განრისხებულები არიან და ეს კიდევ ერთხელ დამაჯერებლად დაამტკიცეს უკრაინაში. აქ სხვა პრობლემაცაა: როგორც კლაუზევიცი აღნიშნავდა, ომს თავისი დინამიკა აქვს, როგორც კი ის დაიწყება. ევროპამ შესაძლოა, შექმნას „თვითაღსრულებადი წინასწარმეტყველება“, სადაც რუსეთი იმაზე შორს წავა, ვიდრე აპირებდა. პუტინმა ნათლად თქვა, რომ მას არ სურს შემდგომი გაფართოება; მას არ სურს უკრაინის „ნარჩენების“ მართვა ან იქაურ რადიკალურ ელემენტებთან გამკლავება. თუმცა, თუ დასავლეთი „საკმარისად სულელი“ აღმოჩნდება, ჩვენ შეიძლება სწორედ ეს შედეგი ვაიძულოთ. შეხედეთ ფრიდრიხ მერცს გერმანიაში. ვფიქრობ, ის ჩავარდება, მაგრამ ღმერთმა დაგვიფაროს, თუ წარმატებას მიაღწევს. მერცი, BlackRock-ის ყოფილი აღმასრულებელი დირექტორი, კოლაფსირებული გერმანული ეკონომიკის წინაშე დგას. მისი გამოსავალია მშპ-ს 5%-ის დახარჯვა თავდაცვასა და გადაიარაღებაზე. სულ რაღაც ორიოდე დღის წინ Rheinmetall-ის გენერალურმა დირექტორმა განაცხადა, რომ მათი მიზანია, გადაუსწრონ Lockheed Martin-სა და Northrop Grumman-ს და გახდნენ უდიდესი „სიკვდილით მოვაჭრეები“ მსოფლიოში. სტატიაში გამოქვეყნებული იყო ჰაუბიცებისა და ტანკების სურათები. ეს ჩვენ უკვე ვნახეთ ერთხელ ევროპის შუაგულში. ვერ ვიტყოდი, რომ ეს მოვლენები კარგის ნიშანია, მით უმეტეს გერმანიის დღევანდელ პოლიტიკურ ფონზე, სადაც AfD-ს რეალური შანსი აქვს, არჩევნებზე მოსახლეობის 51%-იანი მხარდაჭერა მიიღოს და პირველი პარტია გახდეს. ეს უკიდურესად სახიფათო სიტუაციაა. საქართველოსთვის საუკეთესო პოზიციაა, დარჩეს ნეიტრალური, ივაჭროს ყველასთან, აყვავდეს, როგორც სამეწარმეო ჰაბი კავკასიაში და შეინარჩუნოს მთავრობა, რომელიც ამ ფილოსოფიას მიჰყვება“, – განაცხადა ლოურენს უილკერსონმა.ცნობისთვის, აშშ-ის არმიის გადამდგარმა პოლკოვნიკმა და სახელმწიფო მდივნის ადმინისტრაციის ყოფილმა ხელმძღვანელმა (2001-2005 წლებში) ლოურენს უილკერსონმა განცხადება გააკეთა, სადაც საუბრობდა, თუ როგორ იყენებდა აშშ-ის ცენტრალური სადაზვერვო სააგენტო (CIA) მედიასა და არასამთავრობო ორგანიზაციებს.„ჩვენ ვყიდულობდით გაზეთების რედაქტორებს, ტელევიზიებს, არასამთავრობოებს, ისინი CIA-ს მიერ იყვნენ ჩანერგილი, ეს გავაკეთეთ საქართველოშიც, ძალიან წარმატებული ვიყავით“, – განაცხადა ლოურენს უილკერსონმა.

მსოფლიო • 1766168036

მხოლოდ მოლაპარაკებების გზით მიღწეული შეთანხმება გვაძლევს რუსეთ-უკრაინის ომის დასრულების შესაძლებლობას – მარკო რუბიო

აშშ-ის სახელმწიფო მდივანი მარკო რუბიო აცხადებს, რომ უკრაინაში ომის დასრულების მოლაპარაკებების პროცესში აშშ შეთანხმების თავს მოხვევას არავისთვის არ გეგმავს.მისივე თქმით, ომის დასასრულებლად პროგრესი მიღწეულია, მაგრამ ამისთვის ჯერ კიდევ საჭიროა გზის გავლა.როგორც რუბიომ პრესკონფერენციაზე ჟურნალისტებთან საუბრისას აღნიშნა, შეერთებულმა შტატებმა დიდი დრო დახარჯა უკრაინის ომის დასრულების მცდელობაში.„ვფიქრობ, ყველა დამეთანხმება, რომ დედამიწაზე არის მხოლოდ ერთი ქვეყანა, რომელსაც შეუძლია ორივე მხარესთან საუბარი და გარკვევა, არსებობს თუ არა ამ ომის მშვიდობიანად დასრულების გზა. ეს არის შეერთებული შტატები. ჩვენ დიდი დრო და ენერგია დავხარჯეთ ამ ომზე. როგორც იცით, პრეზიდენტ ტრამპს უკრაინაში ომზე უფრო მეტი შეხვედრა ჰქონდა უცხოელ ლიდერებთან და სხვებთან, ვიდრე ნებისმიერ სხვა თემაზე. ჩვენ უახლოეს მომავალში ვერცერთი მხარისგან ვერ ვხედავთ დანებებას და ამიტომ მხოლოდ მოლაპარაკებების გზით მიღწეული შეთანხმება გვაძლევს ამ ომის დასრულების შესაძლებლობას. მოლაპარაკებების გზით მიღწეული შეთანხმება ორ რამეს მოითხოვს, ორივე მხარემ რაღაც მიიღოს და ორივე მხარემ რაღაც დათმოს“, – განაცხადა რუბიომ.

მსოფლიო • 1766162604

ვიქტორ ორბანი აცხადებს, რომ გაყინული რუსული აქტივების გამოყენება რუსეთისთვის „ომის გამოცხადების“ ტოლფასი იქნებოდა

ვიქტორ ორბანი აცხადებს, რომ გაყინული რუსული აქტივების გამოყენება რუსეთისთვის „ომის გამოცხადების“ ტოლფასი იქნებოდა.უნგრეთის პრემიერი ტყუილს უწოდებს განცხადებებს, რომ ომი დანახარჯების გარეშე აწარმოონ, ომის დასრულების შემდეგ კი რუსეთი ხარჯებს სამხედრო კომპენსაციის სახით დაფარავს.„ისინი მშვიდად საუზმობენ სახლში, სვამენ ყავას და ფიქრობენ, რომ მორალური თვალსაზრისით, სწორია, დაეხმარო პატარა ქვეყანას, რომელსაც თავს დაესხნენ. რა თქმა უნდა, არც ისე პატარას. ბოლომდე არც ის არის ნათელი, ვინ ვის დაესხა თავს. თუმცა, ნებისმიერ შემთხვევაში, ჩვენ ახლა ვეხმარებით ქვეყანას, რომელიც ძალადობის მსხვერპლი გახდა და ეს არაფერი გვიჯდება, მაგრამ საბოლოოდ, ისინი გადაიხდიან,“ – განაცხადა ვიქტორ ორბანმა.მანამდე, უნგრეთის პრემიერ-მინისტრმა ევროკავშირის გადაწყვეტილებას, უკრაინას ფინანსური მხარდაჭერისთვის 90 მილიარდ ევროს გამოეყოს, „უკიდურესად ცუდი“ უწოდა და აღნიშნა, რომ ეს „დაკარგული ფულია“.

მსოფლიო • 1766159770

გაყინული რუსული აქტივები ომის დასრულების შემდეგ უნდა გამოიყენონ, უცნაურია, რომ ჩვენ ორი წლით ადრე გავცემთ ფულს, როდესაც სამშვიდობო შეთანხმება ახლოვდება – ანდრეი ბაბიში

ჩეხეთის პრემიერ-მინისტრის, ანდრეი ბაბიშის განცხადებით, გაყინული რუსული აქტივების გამოყენება რუსეთ-უკრაინის ომის დასრულების შემდეგ უნდა მოხდეს.როგორც ბაბიშმა აღნიშნა, ჩეხეთი უკრაინისთვის 90 მილიარდი ევროს ოდენობის ერთობლივი სესხის გამოყოფასთან დაკავშირებით პასუხისმგებლობას არ აიღებს.„ვთვლი, რომ ეს თანხა ომის დასრულების შემდეგ უნდა გამოიყენონ. უცნაურად მიმაჩნია, რომ ჩვენ უკვე დღეს, ორი წლით ადრე გავცემთ ფულს, როდესაც სამშვიდობო შეთანხმება ახლოვდება. ეს რატომღაც ერთმანეთთან თანხვედრაში არ მოდის,“ – განაცხადა ჩეხეთის პრემიერმა და აღნიშნა, რომ ზოგიერთი სახელმწიფო კვლავ დაჟინებით მოითხოვს გაყინული რუსული აქტივების უკრაინის დასაფინანსებლად გამოყენებას.

მსოფლიო • 1766157133

ზელენსკის ვიზიტი ვარშავისა და კიევისთვის კარგი ამბავია, მაგრამ ცუდი ამბავია რუსეთისთვის – კაროლ ნავროცკი

პოლონეთის პრეზიდენტის, კაროლ ნავროცკის განცხადებით, მისი უკრაინელი კოლეგის, ვოლოდიმირ ზელენსკის ვიზიტი ვარშავისა და კიევისთვის კარგი, ხოლო მოსკოვისთვის ცუდი ამბავია, – ამის შესახებ ნავროცკიმ უკრაინის პრეზიდენტთან ერთად გამართულ პრესკონფერენციაზე განაცხადა.„ვოლოდიმირ ზელენსკის ვარშავაში ვიზიტი კარგი ამბავია პოლონეთისთვის, ვარშავისა და კიევისთვის, მთელი ჩვენი რეგიონისთვის, მაგრამ ცუდი ამბავი რუსეთის ფედერაციისთვის, რადგან ეს არის დასტური, რომ პოლონეთი, უკრაინა და რეგიონის ქვეყნები სტრატეგიულ და უსაფრთხოების საკითხებში ერთად დგანან“, – განაცხადა კაროლ ნავროცკიმ.ამასთან, პოლონეთის პრეზიდენტმა აღნიშნა, რომ მას და ზელენსკის საერთო ხედვა აქვთ იმასთან დაკავშირებით, რომ რუსეთი, როგორც ნეოიმპერიული პოსტსაბჭოთა სახელმწიფო, ევროპას საფრთხეს უქმნის.უკრაინის პრეზიდენტი კი იმედოვნებს, რომ მისი ვარშავაში ვიზიტი პოლონეთთან ურთიერთობებში „ახალ და კიდევ უფრო მნიშვნელოვან გვერდს გახსნის“.„იმედი მაქვს, ეს ვიზიტი გახსნის ახალ და კიდევ უფრო მნიშვნელოვან გვერდს უკრაინისა და პოლონეთის ურთიერთობებში, არა მხოლოდ მეზობლების, არამედ იმ ევროპული ელემენტების ურთიერთობებშიც, რომელთა გარეშეც ევროპის მთელ ნაწილში თავისუფლება უბრალოდ არ იქნება. უკრაინა ახლა არა მხოლოდ იღებს მხარდაჭერას ჩვენი მეგობრებისგან, ჩვენი მეზობლებისგან, არამედ გვთავაზობს თავის გამოცდილებას ამ ომში თავდაცვის სფეროში.დღეს უკრაინას აქვს ყველაზე მოწინავე ტექნოლოგიები ადამიანების სიცოცხლის დასაცავად და ყველაზე ძლიერი შესაძლებლობები იარაღის წარმოებისთვის. იარაღი, რომელიც თანამედროვეა, რომელიც ეფექტურია და მე პოლონეთს ვთავაზობ ამ გამოცდილებას. დღეს ამაზე ვისაუბრეთ და ამ კონტაქტებს გავაგრძელებთ. ჩვენ გვსურს, გამოვიყენოთ ეს გამოცდილება სოლიდარობის მიზნით, რათა გავაძლიეროთ ჩვენი სახელმწიფოები, ჩვენი რეგიონი, ჩვენი ევროპა. უკრაინა პოლონეთს დრონებისგან დაცვის საკითხზე კონსულტაციებს სთავაზობს. ჩვენ ვიცით, როგორ გავუმკლავდეთ დრონების თითოეულ ტიპს“, – განაცხადა ვოლოდიმირ ზელენსკიმ.

კრიმინალი • 1766154753

ქართველმა მამაკაცმა სასამართლოში აღიარა, რომ 14 წლის შვილის თვალწინ თოკით ცოლის დახრჩობა სცადა

44 წლის ქართველ მამაკაცს საბერძნეთის ქალაქ თესალონიკის სასამართლომ წინასწარი პატიმრობა შეუფარდა მას შემდეგ, რაც 34 წლის პარტნიორის თოკით დახრჩობა სცადა.ინფორმაციას ამის შესახებ ბერძნული მედია აქვეყნებს. პირველ ეტაპზე, გამომძიებლის წინაშე მამაკაცმა უარყო მის წინააღმდეგ წაყენებული ბრალდებები და განაცხადა, რომ ქალმა პოლიციაში საჩივარი ეჭვიანობის ნიადაგზე, შურისძიების მიზნით შეიტანა. თუმცა ბრალდებულმა, მოგვიანებით, მოსმართლის წინაშე დანაშაული აღიარა.საქმის მასალების თანახმად, 44 წლის მამაკაცმა, პარტნიორის (რომელიც წარმოშობით უკრაინელია) დახრჩობა კამათის დროს სცადა, მათი 14 წლის შვილის თვალწინ, რომელმაც, სავარაუდოდ, მომხდარი დაადასტურა. ქალმა, როგორც თავად განაცხადა, გაქცევა საბრძოლო ხელოვნების სწავლების შედეგად მიღებული თავდაცვის უნარების წყალობით მოახერხა. გავრცელებული ინფორმაციით, მას კისერსა და ხელზე ძალადობის კვალი აღენიშნება.

პოლიტიკა • 1766154240

ლევან მაჭავარიანი: ერთი მადლობაც არ მოგვისმენია უკრაინის ხელისუფლებისგან იმ დახმარებისთვის, რაც უკრაინისთვის გვაქვს გაწეული. ერთადერთი არ შევეხიდეთ ჩვენი მოქალაქეებით და არ აღმოვჩნდით იმ ომში, რომელიც ჩვენი საომარი არ იყო

სამწუხაროა, რომ ერთი მადლობაც არ მოგვისმენია უკრაინის ამჟამინდელი ხელისუფლებისგან იმ დახმარებისთვის, რაც უკრაინისთვის გვაქვს გაწეული. ერთადერთი არ შევეხიდეთ ჩვენი მოქალაქეებით და არ აღმოვჩნდით იმ ომში, რომელიც ჩვენი საომარი არ იყო, - განაცხადა „დღის ქრონიკასთან“ საპარლამენტო ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.მისი თქმით, საქართველო უკრაინის მხარდამჭერ ათასობით რეზოლუციას შეუერთდა და ერთადერთი რაზეც უარი თქვა, თავისი მოქალაქეების სიცოცხლის გაღება იყო, რაც ევრობიუროკრატიამ ქვეყანას არ აპატია.„ძალიან სამწუხაროა, რომ ჩვენ ერთი მადლობაც არ მოგვისმენია უკრაინის ამჟამინდელი ხელისუფლების მხრიდან იმ დახმარებისთვის, რა დახმარებაც ჩვენ უკრაინისთვის გვაქვს გაწეული. პირიქით, მუდმივად ცრუ ბრალდებები, მცდელობები, რომ ჩვენს საზოგადოებაში აჟიოტაჟი შემოეტანათ, რაღაცნაირად ომში ჩავერთეთ. თუმცა ეს ქვეყანა ომშია და ჩვენ ვაჟკაცურად ვიქცევით, პრაგმატულ პოლიტიკას ვატარებთ და ის კითხვები, რა კითხვებიც დასასმელი იქნება ამ აქტორებთან და რაზეც პასუხები უნდა მოვთხოვოთ მაგისი დროც დადგება. მაგრამ რაც შეეხება მხარდაჭერას, ათასობით რეზოლუციაა საერთაშორისო არენაზე, რასაც „ქართულმა ოცნებამ“ მხარი დაუჭირა და ათობით ქვეყანა იკავებდა ამისგან თავს, ვინაიდან არ სურდათ რუსეთის გაღიზიანება.ჩვენ მხარი ყველაფერში დაჭერილი გვაქვს. 30 ათასამდე უკრაინელი გვყავს შეფარებული, სოციალური დახმარებები დანიშნული, ბავშვებისთვის სასწავლებლები გვაქვს გახსნილი. ჰუმანიტარული დახმარებით ერთ-ერთ მოწინავე პოზიციას ვიკავებთ მსოფლიოში. მიუხედავად ამ ყველაფრისა, ევრობიუროკრატების მხრიდან, ზუსტად იმ დღიდან, როდესაც დაიწყო რუსეთის აგრესია უკრაინაში, ჩვენ გვესმის მუდმივად, რომ თითქოს რუსეთის მხარეს ვიჭერთ და ა.შ. რაც აბსურდია.მე ჩამოვთვალე რამდენ რამეში დავუდექით გვერდში, ერთადერთი არ შევეხიდეთ ჩვენი მოქალაქეებით და ჩვენ არ აღმოვჩნდით იმ ომში, რომელიც ჩვენი საომარი არ იყო და რა თქმა უნდა ეს იყო სწორი გადაწყვეტილება ჩვენი ხელისუფლების მხრიდან“, - განაცხადა ლევან მაჭავარიანმა.მისი თქმით, საქართველოს ხელისუფლება 4 წლის განმავლობაში ხაზს უსვამს იმ ფაქტს, რომ უკრაინა იქნა გამოყენებული „პროქსი ომში“ და რეალურად ეს არის ომი რუსეთსა და დასავლეთს შორის.

პოლიტიკა • 1766153847

მიხეილ ყაველაშვილი ბორის ჯონსონის განცხადებაზე: ჩვენ ხომ ვსაუბრობდით, რომ ეს არის ორმაგი სტანდარტი. ზურგს უკან ისინი მოქმედებენ სხვანაირად - ჩვენთან მიმართებაშიც. იძულებული ვიყავით, კულუარული ინფორმაციები ზედაპირზე გამოგვეტანა

ჩვენ ხომ ვსაუბრობდით, რომ ეს არის ორმაგი სტანდარტი. ზურგს უკან ისინი მოქმედებენ სხვანაირად - ჩვენთან მიმართებაშიც. იძულებული ვიყავით, კულუარული ინფორმაციები ზედაპირზე გამოგვეტანა, - განაცხადა საქართველოს პრეზიდენტმა, მიხეილ ყაველაშვილმა სერბეთში, ჟურნალისტებთან საუბრისას.მან კომენტარი ბორის ჯონსონის განცხადებაზე გააკეთა, რომ უკრაინას ნატო-ში გაწევრიანების შანსი არც არასდროს ჰქონია.ყაველაშვილის თქმით, საქართველოს ხელისუფლებისთვის მსგავსი განცხადებები გასაკვირი არ არის და ასევე იმ ადამიანებისთვის, რომლებიც ხელისუფლებას მაშინ გვერდით დაუდგნენ.„ჩვენ ხომ ვსაუბრობდით, რომ ეს არის ორმაგი სტანდარტი. ზურგს უკან ისინი მოქმედებენ სხვანაირად - ჩვენთან მიმართებაშიც, კულუარულად. იძულებული ვიყავით, ინფორმაციები ზედაპირზე გამოგვეტანა და ჩვენი საზოგადოებისთვის გვეთქვა სიმართლე, თუ რას ითხოვდნენ ჩვენგან. ანალოგიური მოთხოვნა იყო უკრაინასთან მიმართებაში. გახსოვთ, პირველი ეტაპი, როდესაც სამშვიდობო მოლაპარაკებასთან იყო ახლოს მისული ეს ყველაფერი. შემდეგ, თუ არ ვცდები, არახამია იყო, ვინც გათქვა ეს საიდუმლო საუბარი, რომ ჯონსონი იყო ჩასული უკრაინაში და მან კატეგორიულად მოსთხოვა მათ, რომ არ დათანხმებოდნენ სამშვიდობო ხელშეკრულებას. ჩვენ ეს ყველაფერი შემდეგ გავიგეთ. ანალოგიური დამოკიდებულებით ხდება ყველაფერი - ერთია, საჯაროდ რას საუბრობენ ისინი და მეორეა, რას ახორციელებენ და რას ითხოვენ კულუარულად. ასევე ნიშანდობლივია, რომ ეს ყველაფერი ზედაპირზე ამერიკის ახალმა ადმინისტრაციამ ამოიტანა“, - აღნიშნა ყაველაშვილმა.ცნობისთვის, დიდი ბრიტანეთის ყოფილმა პრემიერ-მინისტრმა, ბორის ჯონსონმა განაცხადა: „არ არსებობდა უმცირესი შანსიც კი, რომ უკრაინა ნატოს წევრი გამხდარიყო. ნებისმიერ ასეთ წინადადებას დაუყოვნებლივ ვეტოს დაადებდა საფრანგეთი, გერმანია, აშშ და მრავალი სხვა ქვეყანა“.

პოლიტიკა • 1766153580

ლევან მაჭავარიანი ბორის ჯონსონის განცხადებაზე: ეს სერიალები ნანახი გვაქვს, იგივე 2008 წელი და ძალიან კარგად ვაანალიზებთ, რომ ცივსისხლიანი პრაგმატიზმის ეპოქაში ვცხოვრობთ, არ უნდა ამჩატდე და რაღაც დაპირებებს არ უნდა აჰყვე

ეს სერიალები ნანახი გვაქვს, იგივე 2008 წელი და ძალიან კარგად ვაანალიზებთ, რომ ცივსისხლიანი პრაგმატიზმის ეპოქაში ვცხოვრობთ, არ უნდა ამჩატდე და რაღაც დაპირებებს არ უნდა აჰყვე, - განაცხადა ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა „დღის ქრონიკაში“.დეპუტატი დიდი ბრიტანეთის ყოფილი პრემიერ-მინისტრის ბორის ჯონსონის განცხადებას გამოეხაურა.„მოვისმინეთ ბატონი ჯონსონის განცხადება, ამაზე კომენტარიც გავაკეთე. ეს არის ერთ-ერთი ყველაზე უპასუხისმგებლო პოლიტიკოსი პოლიტიკის ისტორიაში. კარგად გვახსოვს 2022 წელს როდესაც ბატონმა ბორის ჯონსონმა პირდაპირ ჩაშალა ის მიღწეული შეთანხმება, რაც 2022 წლის აპრილში იყო მიღწეული რუსეთსა და უკრაინას შორის და ომი სრულდებოდა უკვე დაწყებიდან სულ რაღაც ორ თვეში. უკრაინა იყო მილიონჯერ უკეთეს სიტუაციაში, ვიდრე დღეს არის. 2023 წელს ბატონი ჯონსონი ატყუებდა უკრაინას და უკრაინელ ხალხს, რომ დრო იყო უკრაინის გაწევრების პროცესი დაწყებულიყო ნატო-ში. გუშინ იყო თუ გუშინწინ მისი განცხადება სადაც პირდაპირ ამხილა თავი და განაცხადა, რომ ესწრებოდა ნატო-ს გაფართოების შესახებ ყველა შეხვედრას და არცერთ შეხვედრაზე დღის წესრიგში არ იდგა უკრაინის ნატოში გაწევრიანება და პირიქით, დაადასტურა, რომ ეს იყო ცრუ დაპირება.ეს სერიალები ნანახი გვაქვს, იგივე 2008 წელი და ძალიან კარგად ვაანალიზებთ, რომ ცივსისხლიანი პრაგმატიზმის ეპოქაში ვცხოვრობთ, არ უნდა ამჩატდე და რაღაც დაპირებებს არ უნდა აჰყვე. სულ რომ ბატონ ბორის ჯონსონს ეს ყველაფერი თავისი პირით არ დაედასტურებინა, ვნახეთ აშშ-ის ეროვნული უსაფრთხოების სტრატეგია, სადაც ხაზგასმულია, რომ ნატო-ს გაფართოება არ იგეგმება“, - აღნიშნა მაჭავარიანმა.დიდი ბრიტანეთის ყოფილმა პრემიერ-მინისტრმა, ბორის ჯონსონმა განაცხადა: „არ არსებობდა უმცირესი შანსიც კი, რომ უკრაინა ნატოს წევრი გამხდარიყო. ნებისმიერ ასეთ წინადადებას დაუყოვნებლივ ვეტოს დაადებდა საფრანგეთი, გერმანია, აშშ და მრავალი სხვა ქვეყანა“.

პოლიტიკა • 1766152860

პოლიტიკა • 1766152830

მიხეილ ყაველაშვილი: მკაფიოა ჩვენი ხაზი, რას აკეთებს საქართველოს ხელისუფლება. პირნათელი არის, როგორც უკრაინასთან, ისე ყველა ქვეყნებთან მიმართებაში

მკაფიოა ჩვენი ხაზი, რას აკეთებს საქართველოს ხელისუფლება. პირნათელი არის, როგორც უკრაინასთან, ისე ყველა ქვეყნებთან მიმართებაში, - განაცხადა საქართველოს პრეზიდენტმა, მიხეილ ყაველაშვილმა უკრაინის შესახებ გაერო-ს რეზოლუციასთან დაკავშირებით, რომელსაც საქართველომ მხარი დაუჭირა.მისი თქმით, საქართველოს ხელისუფლება მოქმედებდა და მოქმედებს ეროვნული ინტერესებიდან გამომდინარე და ყოველთვის მხარს უჭერდა სამართლიან მიდგომებს მათ შორის უკრაინასთან მიმართებით. ზოგიერთ ქვეყანას კი, იმის გამო, რომ პოზიციებს ხშირად იცვლის ახლა თავის მართლება უწევს საკუთარ ხალხთან.„ჩვენ ვიცავთ სამართლიანობის პრინციპებს, ეროვნულ ინტერესებს. ჩვენი ხალხის წინაშე ვართ პირველ რიგში პასუხისმგებლები და ეს უჭირთ ამ ქვეყნებს, რომ საკუთარ ხალხს თვალებში ვერ უყურებენ, რადგან ამ ყველაფერზე განსხვავებულ შეხედულებებს ყოველ დღე ცვლიდნენ“, - განაცხადა პრეზიდენტმა.

პოლიტიკა • 1766152778

მიხეილ ყაველაშვილი: მაკრონის განცხადება იმას ნიშნავს, რომ სხვა გამოსავალი არ აქვთ, გზებს ეძებენ, როგორ უნდა დამთავრდეს უკრაინის ომი

საქართველოს პრეზიდენტი, მიხეილ ყაველაშვილი მედიასთან საფრანგეთის პრეზიდენტის, ემანუელ მაკრონის განცხადებას ეხმაურება. როგორც ყაველაშვილმა აღნიშნა, განცხადებიდან ჩანს, რომ მათ გამოსავალი აღარ აქვთ და გზებს ეძებენ, როგორ დამთავრდეს უკრაინის ომი.„მაკრონის ეს განცხადება იმას ნიშნავს, რომ მათ სხვა გამოსავალი არ აქვთ, გზებს ეძებენ როგორ უნდა დამთავრდეს უკრაინის ომი. სამშვიდობო პოლიტიკა, რომელიც ჩვენ ავირჩიეთ არ იყო მარტო სურვილი, ეს არის გრძელვადიანი ხედვა და გამოწვევების აღქმა. ის პრიოცესი რაც დღეს გრძელდება და პოზიცია, რომელიც საქართველოს აქვს დღეს ბევრ ქვეყანას უნდა, რომ იგივე პოზიციაში იყო. ამიტომ არის, რომ ჩვენ გვაქებენ“, - აღნიშნა მიხეილ ყაველაშვილმა.ემანუელ მაკრონმა განაცხადა, რომ „ვლადიმერ პუტინთან საუბარი სასარგებლო იქნება“.