დავით ჩიხელიძე

პოლიტიკა • 1794848970

ჩიხელიძე: სასამართლოში გვარამიას გამოსვლა იყო მორალისა და სინდისისგან დაცლილი ადამიანის პასუხები - იგი საკუთარ თავს, წარსულ განცხადებებსა და პოზიციებს ეწინააღმდეგებოდა

სასამართლოში, გვარამიას უსაზღვრო ფანტაზიით სავსე გამოსვლას მოვუსმინე. ეს იყო მორალისა და სინდისისგან დაცლილი ადამიანის პასუხები, რომლებიც იმდენად არათანმიმდევრული იყო, რომ გვარამია  საკუთარ თავს, საკუთარ წარსულ განცხადებებსა და პოზიციებს ეწინააღმდეგებოდა, - წერს ექსპერტი დავით ჩიხელიძე სოციალურ ქსელში.მისი თქმით, გვარამიას თითოეული განცხადება აჩენს განცდას, რომ ის ან  რეალობას სრულად არის მოწყვეტილი, ან შეგნებულად ცდილობს საზოგადოების შეცდომაში შეყვანას.ექსპერტი აცხადებს, რომ დღევანდელმა სასამართლო პროცესმა კიდევ ერთხელ დაარწმუნა,  საქართველოში ოპოზიციური პოლიტიკური ველის  ძირეული გაჯანსაღების აუცილებლობაში.„არ მეგულება მეორე ადამიანი, რომელსაც თეთრზე, შავის მტკიცება,  საკუთარი სიტყვების ასე მარტივად უარყოფა და წარსული განცხადებების დავიწყება  ასეთი ჭკვიანური გამომეტყველებით შეეძლოს.  მისი თითოეული განცხადება აჩენს განცდას, რომ ის ან  რეალობას სრულად არის მოწყვეტილი, ან შეგნებულად ცდილობს საზოგადოების შეცდომაში შეყვანას.განსაკუთრებით ცინიკური მისი ცალკეული  განცხადებები იყო, გვარამიას მტკიცებით,  რუსეთის წინააღმდეგ სანქციების დაწესება არასდროს მოუთხოვია და საქართველოს რუსეთთან ვაჭრობა უნდა ჰქონდეს, რადგან, როგორც თავად ამბობს, ვაჭრობა თავისით ვითარდება. საინტერესოა,  სად და როდის გაქრა  პოლიტიკური პოზიცია, რომელსაც წლების განმავლობაში კოლექტიური ოპოზიცია ქადაგებდა, მათი მოთხოვნა იყო (ღია წყაროებში არაერთი განცხადება იძებნება)  რომ საქართველოს რუსეთისთვის სანქციებიუნდა დაეწესებინა.  დღეს  სხვა რეალობაა? თუ უბრალოდ, როდესაც საკუთარ სიტყვებზე პასუხისგება უწევთ, პრინციპებიც და პოლიტიკური პოზიციებიც  ეცვლებათ?არანაკლებ აღმაშფოთებელია მისი შეფასება, თითქოს „ნაციონალური მოძრაობა“ საქართველოს ისტორიაში საუკეთესო ხელისუფლება იყო. ეს უბრალოდ მიკერძოებული  პოლიტიკური შეფასება კი არ არის, არამედ არის საზოგადოების შეურაცხყოფა, იმ საზოგადოების შეურაცხყოფა, რომელსაც ძალიან კარგად ახსოვს ნაცების  მმართველობის წლები, ძალადობა, წამება, ღირსების შელახვა და უსამართლობა.გვარამია ასევე ამტკიცებს, თითქოს შეუძლებელია  ზურა გირჩი ჯაფარიძეს  სცოდნოდა, რომ ციხეში პატიმრებს აწამებდნენ. როდესაც ასეთი პოზიცია გესმის, ბუნებრივად ჩნდება კითხვა: გამოდის, წამება არსებობდა, მაგრამ იმდენად ეფექტიანად მალავდნენ, რომ პარტიის წარმომადგენელს შეუძლებელია ეს სცოდნოდა. ეს თავის გამართლება კი არა არის, არამედ  კიდევ უფრო მძიმე კითხვების საფუძველია.ასევე, გვარამიას განცხადებით, აქციის მონაწილეების მხრიდან პიროტექნიკის გამოყენება ძალადობად არ უნდა შეფასდეს. საინტერესოა, როგორ უნდა შევაფასოთ ქმედება, რომლის დროსაც პიროტექნიკა პოლიციელების წინააღმდეგ გამოიყენება და ადამიანების ჯანმრთელობასა და სიცოცხლეს რეალურ საფრთხეს უქმნის? საფრანგეთის მაგალითიც აჩვენებს, რომ სახელმწიფოს შეუძლია საზოგადოებრივი უსაფრთხოების დაცვის მიზნით პიროტექნიკის გამოყენებაზე შეზღუდვები დააწესოს, რადგან ის ძალადობრივი გამოხატვის ინსტრუმენტია, რაც მშვიდობიან პროტესტის ფარგლებს სცდება. პროტესტის უფლება არ ნიშნავს ძალადობისა და სხვისი სიცოცხლისთვის საფრთხის შექმნის უფლებას.საერთო ჯამში, დღევანდელმა სასამართლო პროცესმა კიდევ ერთხელ დამარწმუნა, რომ  საქართველოში ოპოზიციური პოლიტიკური ველის  ძირეული გაჯანსაღება აუცილებელია, ქვეყანას სჭირდება პასუხისმგებლობიანი პოლიტიკური ალტერნატივა და არა პოლიტიკოსთა ჯგუფი, რომლის წარსული და აწმყო უამრავი დანაშაულით და კითხვებით არის სავსე,” - წერს ჩიხელიძე.

პრემიერ-მინისტრი

სამართალი • 1794848475

პროკურატურა ირაკლი ღარიბაშვილის საქმეზე განცხადებას ავრცელებს

საქართველოს გენერალური პროკურატურა ირაკლი ღარიბაშვილის საქმეზე განცხადებას ავრცელებს.„ირაკლი ღარიბაშვილის ადვოკატმა განმარტა, რომ სისხლის სამართლის საპროცესო კოდექსი არ ითვალისწინებს პირთან გასაუბრებას და ამიტომ არ მიაწოდა ირაკლი ღარიბაშვილმა პროკურატურის გამომძიებელს გასაუბრების ფორმატში ინფორმაცია.აღნიშნულ მოსაზრებას პროკურატურა არ იზიარებს. კერძოდ, საქართველოს სისხლის სამართლის საპროცესო კოდექსის 101-ე მუხლის შესაბამისად, გამოძიების დაწყების საფუძველია ინფორმაცია კონკრეტული დანაშაულის ჩადენის შესახებ, მათ შორის მასმედიაში გამოქვეყნებული.ამავდროულად, გამოძიების დაწყებისათვის აუცილებელია, საგამოძიებო ორგანოში წარმოდგენილი ინფორმაცია მკაფიოდ შეიცავდეს დანაშაულის ნიშნებს და არა, პირადი მოსაზრებით ასეთად აღიქვამდეს მას განმცხადებელი. თუ ინფორმაცია ბუნდოვანია, ან საჭიროებს დამატებით გარემოებების დაზუსტებას, ამ შემთხვევაში ბუნებრივად, საქართველოში ფართოდ გავრცელებული პრაქტიკის შესაბამისად, საგამოძიებო დანაყოფი განმცხადებელთან გასაუბრების გზით ცდილობს არსებულ ინფორმაციასთან დაკავშირებული ბუნდევანების აღმოფხვრას, რაც სავსებით კანონიერია და სამართალწარმოებისას არასდროს დავის საგანი არ გამხდარა.მოცემულ შემთხვევაშიც, მსჯავრდებულ ირაკლი ღარიბაშვილისა და მისი კანონიერი ინტერესების დამცველი ადვოკატის საჯარო განცხადებებში მოყვანილი გარემოებები იყო ზოგადი და ბუნდოვანი. რაც მთავარია, იგი არ შეიცავდა კონკრეტული დანაშაულის ნიშნებს. ამიტომ, საგამოძიებო ორგანომ განახორციელდა ირაკლი ღარიბაშილთან შეხვედრა, დამატებითი ინფორმაციის მიღებისა და საჯაროდ გაკეთებული განცხადებაში მითითებული გარემოებების დეტალების დაზუსტების მიზნით.საზოაგადოებას შევახსენებთ, რომ მსჯავრდებულმა ირაკლი ღარიბაშვილმა უარი განაცხადა დამატებითი ინფორმაციის მოწოდებაზე. ამავდროულად, საგამოძიებო დანაყოფის ხელთ არსებული ინფორმაცია, როგორც აღინიშნა არ შეიცავს დანაშაულის ნიშნებს. ამიტომ, აღნიშნულის საფუძველზე გამოძიების დაწყება ყოველგვარ სამართლებრივ საფუძვლებს მოკლებულია“, - აღნიშნულია უწყების მიერ გავრცელებულ განცხადებაში.

სლოვენია

მსოფლიო • 1794847800

სლოვენია უცხოური გავლენის გამჭვირვალობის კანონს იღებს - ქვეყნის მმართველმა კოალიციამ წარადგინა კანონპროექტი, რომლის თანახმადაც საარჩევნო კამპანიის წარმართვა აეკრძალებათ იმ იურიდიულ პირებს, რომლებსაც არჩევნებამდე ბოლო ხუთი წლის განმავლობაში საზღვარგარეთიდან რაიმე სახის დაფინანსება აქვთ მიღებული

სლოვენიის მმართველმა კოალიციამ ქვეყნის პარლამენტში დაჩქარებული წესით წარადგინა საკანონმდებლო ცვლილებების პროექტი „საარჩევნო და სარეფერენდუმო კამპანიის შესახებ“ კანონში. ინიციატივის თანახმად, იმ იურიდიულ პირებს, რომლებსაც არჩევნების ან რეფერენდუმის დღემდე ბოლო ხუთი წლის განმავლობაში საზღვარგარეთიდან რაიმე სახის დაფინანსება აქვთ მიღებული, საარჩევნო ან სარეფერენდუმო კამპანიების ორგანიზება და წარმართვა ეკრძალებათ.გარდა ამისა, კანონპროექტი ავალდებულებს ე.წ. მესამე მხარეებს, დარეგისტრირდნენ კამპანიის ოფიციალურ ორგანიზატორებად, უწესებს მათ დაფინანსების ზედა ზღვარს 10 000 ევროს ოდენობით, აძლიერებს აუდიტის სამსახურის მხრიდან ფინანსური კონტროლის მექანიზმებს და 350-800 ევროდან 7 000-10 000 ევრომდე ზრდის ჯარიმებს რეგისტრაციისა და ანგარიშგების წესების დარღვევისთვის.კანონპროექტის ინიციატორები ცვლილებებს ამომრჩეველთა ინტერესების დაცვის, გამჭვირვალობის გაზრდისა და დემოკრატიულ პროცესებში არაპირდაპირი უცხოური გავლენის აღკვეთის აუცილებლობით ხსნიან.მათი განმარტებით, საარჩევნო და სარეფერენდუმო რბოლაში თანაბარი პირობები უნდა მოქმედებდეს ყველა მონაწილისთვის, ხოლო ვინაიდან პოლიტიკურ პარტიებს უცხოური დაფინანსება უკვე 25 წელია აკრძალული აქვთ, დაუშვებელია, რომ არასამთავრობო ორგანიზაციები უცხოური ფინანსებით ახდენდნენ გავლენას ქვეყნის შიდა პოლიტიკაზე.ინიციატივის მომხრეები ასევე ეყრდნობიან ეუთოს რეკომენდაციებს მესამე მხარეების საქმიანობის რეგულირების შესახებ და აცხადებენ, რომ შეზღუდვა შეეხება ნებისმიერ იურიდიულ პირს, მათ შორის ბიზნესასოციაციებსა და იმ ორგანიზაციებსაც, რომლებსაც წარსულში ევროკავშირის ფონდებიდან აქვთ მიღებული საპროექტო დაფინანსება.საკანონმდებლო ინიციატივამ მწვავე კრიტიკა გამოიწვია სლოვენიის სამოქალაქო სექტორში, აკადემიურ წრეებსა და ოპოზიციურ პარტიებში. არასამთავრობო ორგანიზაციების ქსელის (CNVOS), „8 მარტის ინსტიტუტის“ და სხვა ორგანიზაციების წარმომადგენლები მიიჩნევენ, რომ კანონმდებლობა ისედაც კრძალავს უშუალოდ კამპანიების უცხოეთიდან დაფინანსებას, შესაბამისად, ახალი ცვლილებების რეალური მიზანი კრიტიკული სამოქალაქო საზოგადოების გაჩუმება და მომავალი არჩევნებიდან მათი ჩამოშორებაა.ოპოზიციონერი პოლიტიკოსები ინიციატივას პოლიტიკურ ანგარიშსწორებად და ავტორიტარულ მიდგომად აფასებენ და თავად მმართველ პარტიას ახსენებენ წარსულში უნგრეთიდან და სხვა უცხოური წყაროებიდან მიღებულ დაფინანსებას.წარმოდგენილ დისკუსიაში კანონპროექტის ოპონენტებმა სლოვენიის ხელისუფლების ინიციატივა რამდენჯერმე შეადარეს საქართველოში დანერგილ საკანონმდებლო პრაქტიკას. კერძოდ, „8 მარტის ინსტიტუტის“ დირექტორმა, ნიკა კოვაჩმა აღნიშნა, რომ რეფერენდუმის წინა პერიოდში სამოქალაქო აქტივობის აკრძალვის მსგავსი მეთოდები დამახასიათებელია ისეთი ავტორიტარული ქვეყნებისთვის, როგორებიცაა რუსეთი, საქართველო და ბელარუსი.ანალოგიური პარალელი გაავლო საერთაშორისო ურთიერთობების ექსპერტმა და ევროპის საბჭოს ყოფილმა დირექტორმა დემოკრატიის საკითხებში, მატიაჟ გრუდენმა, რომელმაც განაცხადა, რომ არალეგალური დაფინანსების მტკიცებულებების გარეშე დაწესებული ზოგადი აკრძალვა მოგვაგონებს პუტინის რუსეთის კანონმდებლობას „უცხოური აგენტებისა“ და „მტრული ორგანიზაციების“ შესახებ, რომელიც შემდგომში მსგავსი იდეოლოგიური საფუძვლის მქონე ქვეყნებმა, მათ შორის საქართველომაც გადმოიღო.გარდა ამისა, ინსტიტუტის, „Danes je nov dan“-ის წარმომადგენელმა, მაია ციმერმანმაც ხაზი გაუსვა, რომ მსგავსი საკანონმდებლო გადაწყვეტილებები სწორედ რუსეთის, საქართველოსა და ყირგიზეთის მსგავსი ავტორიტარული სახელმწიფოებისთვის არის დამახასიათებელი.

მამუკა ხაზარაძე

პოლიტიკა • 1794847221

საქართველოს დაცვის აქტი - მამუკა ხაზარაძემ 9 პუნქტიანი გეგმა წარადგინა

"ლელო - საქართველოსთვის" საქართველოს დაცვის აქტს ასაჯაროებს. აქტის შინაარსზე მამუკა ხაზარაძემ საგანგებო ბრიფინგზე ისაუბრა.საქმე ეხება საქართველოში რუსეთის მოქალაქეების უკონტროლო შემოდინების შეჩერებას, საქართველოში ქართველი ხალხის უფლებების დაცვას და ცხოვრების ხარისხის გაუმჯობესებას.ოპოზიციური პარტიის ლიდერმა საზოგადოებას 9 პუნქტიანი სამოქმედო გეგმა გააცნო.  ლელო 9-პუნქტიან გეგმას  ხვალ პარლამენტში დაარეგისტრირებს.ოპოზიციური პარტიის ლიდერმა საზოგადოებას 9 პუნქტიანი სამოქმედო გეგმა გააცნო.დღეს საქართველოში კრიზისია.  ჩვენ ვკარგავთ ჩვენს ქვეყანას, რადგან ჩვენი ქვეყნის მოქალაქეები მაღალი ფასების გამო ვეღარ ინახავენ საკუთარ ოჯახებს, ვერ შოულობენ სამუშაო ადგილებს და ამის გამო ტოვებენ ქვეყანას. მაგრამ უმთავრესად ჩვენ ვკარგავთ ჩვენს ქვეყანას, რადგან საქართველოს ხელისუფლება კომფორტს უქმნის ოკუპანტი ქვეყნის მოქალაქეებს და ემსახურება რუსეთს, ნაცვლად იმისა, რომ ემსახუროს საქართველოს და ქართველ ხალხს.  „ქართული ოცნების“ მთავრობა მუდმივად წინ აყენებს რუსეთს. სწორედ  საქართველოს მთავრობამ დასვა პარლამენტის სპიკერის სავარძელში ოკუპანტი ქვეყნის წარმომადგენელი. სწორედ საქართველოს ხელისუფლება ცდილობდა გაეტანა „რუსული კანონი“, რომ ჩვენი ხალხი დაედუმებინა. მათ გააუქმეს სავიზო რეჟიმი და აღადგინეს პირდაპირი ფრენები რუსეთთან, რითაც ხელი შეუწყვეს რუსების შემოსევას საქართველოში.რუსები დღეს თავისუფლად ყიდულობენ ჩვენს მიწას, იტაცებენ სამუშაო ადგილებს, ავითარებენ რუსულ ბიზნესებს, ხელს უწყობენ ფასების ზრდას.„ქართული ოცნება“ აკეთებს ფულს მოსკოვში, იღებს რჩევებს პუტინისგან და ემსახურება რუსეთს, ნაცვლად იმისა, რომ მოემსახუროს ქართველ ხალხს. „ლელოში“ ჩვენ გვჯერა, რომ დროა მოვიდეს ხელისუფლება, რომლის ერთადერთი პრიორიტეტი იქნება საქართველოს და მისი ხალხის მსახურება.დღეს „ლელო“ აცხადებს ცხრაპუნქტიან გეგმას, რათა წამოიწყოს ჩვენი ქვეყნის უკან დაბრუნების პროცესი - საქართველოში რუსეთისა და რუსების გავლენის დასრულების მიზნით, იმისათვის რომ საქართველოს ხალხის ხმა და საჭიროებები იქნას გაგონილი.ხვალ „ლელოს“ საპარლამენტო ფრაქცია პარლამენტში განსახილველად შეიტანს „საქართველოს დაცვის აქტს“, ცხრაპუნქტიან გეგმას, რომელიც უზრუნველყოფს ჩვენი ქვეყნის და  მოქალაქეების ინტერესების დაცვას და შეზღუდავს რუსულ შემოსევას საქართველოში.   საქართველოს დაცვის აქტი“ მოიცავს 9 მთავარ ნაბიჯს. „EU სანქციებთან სრულად შერთება  1. სავიზო რეგულაციის დაწესება რუსეთის მოქალაქეებისათვის - საქართველო ერთადერთი ოკუპირებული ქვეყანაა მსოფლიოში, სადაც ოკუპანტებმა პრაქტიკულად იგივე უფლებებით სარგებლობენ რითაც ჩვენი მოქალაქეები. უვიზო რეჟიმის დასრულებით „ქართულმა  ოცნებამ“ გამოიწვია რუსეთის მოქალაქეების შემოსევა საქართველოში. ჩვენ გვინდა, რომ საქართველო იყოს ღია ტურისტებისთვის და არა  ოკუპანტებისთვის.2. დასაქმების ბაზრის დაცვა. დღეს საქართველოში უმუშევრობა მთავარი პრობლემაა. ამის ერთერთი მთავარი მიზეზი სწორედ რუსების შემოსევაა, რომლებმაც ქართველები ჩვენსავე ქვეყანაში შემოსავლიან სამსახურებში ჩაანაცვლეს. შესაბამისად, „საქართველოს დაცვის აქტის“ მეორე პუქტი ზღუდავს რუსეთის მოქალაქეებისათვის მუშაობის უფლების მიცემას.3. მიწის გაყიდვის შეზღუდვა. არაფერი ისე არ გამოხატავს ქვეყნის სუვერენიტეტს, როგორც ჩვენი მიწა. მიწა ჩვენი ხალხის საკუთრებაა და არა ოკუპანტის. დაუშვებელია, ოკუპანტს უფლება ჰქონდეს შემოვიდეს და თავისუფლად იყიდოს ჩვენი მიწები. შესაბამისად, „საქართვეკის დაცვის აქტის“ მესამე პუნქტი მიწის გაყიდვის სრულ აკრძალვას ეხება.4. რუსული სანომრე ნიშნიანი მანქანების აკრძალვა.  „საქართველოს დაცვის აქტი“ აკრძალავს ჩვენი ქვეყნის ტერიტორიაზე რუსული სანომრე ნიშნიანი მანქანების შემოსვლას. ასეთი კანონმდებლობა უკვე მოქმედებს ევროკავშირის ქვეყნებში.5. რუსული კომპანიებისთვის სახელმწიფო ტენდერებში მონაწილეობის აკრძალვა. ქართველი გადასახადის გადამხდელების მიერ გადახდილი ფული არ უნდა აღმოჩნდეს რუსების ჯიბეში. შესაბამისად,  „საქართველოს დაცვის აქტი“ რუსეთის მოქალაქეებსა და კომპანიებს სახელმწიფო ტენდერებში მონაწილეობას აუკრძალავს. დროა შეწყდეს „ქართული ოცნების“ მიერ რუსების გამდიდრება. ლელოს უნდა, რომ საქართველოს ფული ქართველების ჯიბეში მიდიოდეს.6. რუსული ბიზნესისთვის საოკუპაციო მოსაკრებლის დაწესება. ჩვენ გვსურს  ყველა მუნიციპალიტეტში დავაწესოთ “საოკუპაციო მოსაკრებელი“ ეს იქნება მოსაკრებელი, რომლის გადახდაც რუსეთის მოქალაქეების მფლობელობაში არსებულ რუსულ ბიზნესს მოუწევს, მოსაკრებლიდან შემოსული თანხები კი ოკუპირებული ტერიტორიებიდან იძულებით გადაადგილებულ პირებს მოხმარდება7. ფრენების აკრძალვა. ჩვენ ვითხოვთ რუსეთის ფედერაციასთან პირდაპირი ფრენების აკრძალვას, რადგან ეს ფრენები ემსახურება რუსეთის მოქალაქეების კომფორტს და არანაირი კავშირი არ აქვს  საქართველოს მოქალაქეების კეთილდღეობასთან.8. რუსული სატელევიზიო არხების მაუწყებლობის აკრძალვა. აიკრძალოს რუსული პროპაგანდისტული სატელევიზიო არხების უკონტროლოდ მაუწყებლობა საქართველოში.9. რუსული ფონდების აკრძალვა. აიკრძალოს რუსული ფონდების  საქმიანობა საქართველოში, რომლებიც კრემლის საოკუპაციო პოლიტიკას ემსახურებიან.„საქართველოს დაცვის აქტი“ სწორედ იმის მაჩვენებელია, თუ როგორ ემსახურება ლელო საქართველოს და როგორ უნდა დასრულდეს სამარცხვინო და საშიში პრორუსული ხელისუფლება!კმარა პუტინის ჯიბის მთავრობა! დროა მოვიდეს ეროვნული ხელისუფლება! , - განაცხადა ხაზარაძემ.       

საკრებულო

საზოგადოება • 1794845100

თბილისის საკრებულოში ტოლერანტობის საერთაშორისო დღე აღინიშნა

თბილისის საკრებულოში ტოლერანტობის საერთაშორისო დღისადმი მიძღვნილი ღონისძიება გაიმართა. საღამო საკრებულოსთან არსებული ეთნიკურ უმცირესობათა საკოორდინაციო საბჭოს ინიციატივით შედგა.თამარ მეფის სახელობის დარბაზში შეკრებილ საზოგადოებას თბილისის საკრებულოს თავმჯდომარემ, ზურაბ აბაშიძემ, მიმართა და  ტოლერანტობის დღე მიულოცა.როგორც საკრებულოს თავმჯდომარემ  განაცხადა, თბილისი საუკუნეების განმავლობაში იყო სხვადასხვა კულტურის შეხვედრის ადგილი, ქალაქი, რომელმაც ბევრი რამ მიიღო განსხვავებული ტრადიციებისგან და თავადაც ბევრი რამ შესძინა მათ. მისივე თქმით, სწორედ ამ მრავალფეროვნებამ შექმნა თბილისის განსაკუთრებული ხასიათი და იდენტობა.„საქართველოში და განსაკუთრებით თბილისში ტოლერანტობის ტრადიციას მრავალსაუკუნოვანი ისტორია აქვს. ჩვენი ქალაქის წარსული სხვადასხვა კულტურის, ეთნოსისა და რელიგიის მშვიდობიანი თანაცხოვრების ისტორიაა. თბილისი ყოველთვის იყო ადგილი, სადაც განსხვავებული წარმომავლობის, სარწმუნოებისა და ტრადიციების ადამიანები არა მხოლოდ ცხოვრობდნენ ერთმანეთის გვერდით, არამედ ერთად ქმნიდნენ ქალაქის კულტურულ, ეკონომიკურ და საზოგადოებრივ ცხოვრებას.  ჩვენი ვალია, ეს ტრადიცია შევინარჩუნოთ და განვავითაროთ.სწორედ ამ უმნიშვნელოვანეს მიზანს ემსახურება თბილისის საკრებულოსთან არსებული ეთნიკური უმცირესობების საბჭო, რომელიც ფრაქციის „ქართული ოცნება  დემოკრატიული საქართველოსთვის“ ინიციატივით შეიქმნა და დღემდე წარმატებით ფუნქციონირებს. განსაკუთრებული მადლობა მინდა გადავუხადო ყველა ადამიანს, ვინც  თავისი ყოველდღიური საქმიანობით ამ ღირებულებების დაცვასა და გამდიდრებას ემსახურება.  გილოცავთ ტოლერანტობის დღეს, ეს დღე კიდევ ერთხელ გვახსენებს, რომ ჩვენი ძალა მრავალფეროვნებასა და განსხვავებულობაშია“, - განაცხადა ზურაბ აბაშიძემ.ღონისძიებაზე საკრებულოსთან არსებული ეთნიკური უმცირესობების საბჭოს თავმჯდომარემ რიტა ხიდირბეგიშვილმა დედაქალაქის საკრებულოს თავმჯდომარეს ზურაბ აბაშიძეს  თბილისის მრავალეთნიკური სათემო საზოგადოების თანადგომისა და მის განვითარებაში შეტანილი წვლილისთვის „ტოლერანტობის ამაგდარის“ საპატიო სიგელი გადასცა.საკრებულოს თამარ მეფის სახელობის დარბაზში საქართველოში მცხოვრები ეთნიკურ უმცირესობათა წარმომადგენლების კუთხეები  მოეწყო, სადაც თითოეული ეთნოსისთვის დამახასიათებელი ყოფისა და ისტორიულ-მატერიალური კულტურის ნიმუშები იყო წარმოდგენილი.როგორც ღონისძიებაზე საკრებულოს თავმჯდომარის მოადგილემ, თინათინ ნიბლოშვილმა,  განაცხადა, ტოლერანტობის დღის აღნიშვნა საკრებულოში უკვე ტრადიციად იქცა.„უკვე  11 წელია ერთად აღვნიშნავთ ტოლერანტობის დღეს თბილისის საკრებულოში. ეს დღე ყველას კიდევ ერთხელ გვახსენებს, თუ რამდენად მნიშვნელოვანია ერთმანეთის პატივისცემა, სიყვარული და თანადგომა. თბილისი მხოლოდ ქალაქი არ არის - ეს არის ჩვენი მეხსიერება, ჩვენი ცნობიერება, ჩვენი იდენტობა. თბილისი არის სხვადასხვა კულტურის, რელიგიის, ეთნოსის თანაცხოვრების საუკეთესო მაგალითი.ჩვენს სივრცეში მუშაობს ეთნიკური უმცირესობის საბჭო, რომელიც ღირებულებების ერთობის, ურთიერთპატივისცემის, თანამშრომლობისა და ერთმანეთის გვერდში დგომის სივრცეა.მინდა მადლობა გადაგიხადოთ იმისთვის, რომ ინარჩუნებთ თქვენს კულტურასა და ტრადიციებს, უფრთხილდებით და ამავდროულად პატივს სცემთ სხვათა ტრადიციებსა და კულტურას - სწორედ ესაა ნამდვილი თანაცხოვრება, მეგობრობა და ტოლერანტობა.მჯერა, რომ ჩვენი მრავალფეროვნება  უფრო მეტად გვაახლოებს, გვაძლიერებს და გვასწავლის, რომ ადამიანებს შორის ყველაზე მნიშვნელოვანი საერთო ღირებულებებია“, - განაცხადა თინათინ ნიბლოშვილმა.დამსწრეთ  სიტყვით ასევე მიმართა საკრებულოს განათლებისა და კულტურის კომისიის თავმჯდომარემ, ბექა ოდიშარიამ.ღონისძიებას თბილისის ვიცე-მერი გიორგი ტყემალაძე, დედაქალაქის საკრებულოს თავმჯდომარის პირველი მოადგილე ბექა დავითულიანი, საკრებულოს ფრაქციის „ქართული ოცნება - დემოკრატიული საქართველო“ თავმჯდომარე ზურაბ ჩიკვილაძე, საკრებულოს წევრები, სხვადასხვა ეთნიკური უმცირესობისა და სათვისტომოების წარმომადგენლები და  მოწვეული სტუმრები ესწრებოდნენ.ღონისძიება ანსამბლ „ნერგების“ ქართული ცეკვის მუსიკალური ნომრით გაიხსნა და ამავე ანსამბლის შესრულებული სიმღერით „თბილისო“ დასრულდა.16 ნოემბერს ტოლერანტობის საერთაშორისო დღე გაეროს ინიციატივით 1996 წლიდან აღინიშნება.

მაკა ბოჭორიშვილი

პოლიტიკა • 1794844952

მაკა ბოჭორიშვილი კატარის საგარეო საქმეთა სახელმწიფო მინისტრს, სულთან ბინ საად ალ-მურაიხის შეხვდა

საქართველოს ვიცე-პრემიერი, საგარეო საქმეთა მინისტრი მაკა ბოჭორიშვილი, კატარის სახელმწიფოში ოფიციალური ვიზიტის ფარგლებში, კატარის საგარეო საქმეთა სახელმწიფო მინისტრს, სულთან ბინ საად ალ-მურაიხის შეხვდა.შეხვედრაზე მხარეებმა განიხილეს საქართველოსა და კატარს შორის ორმხრივი ურთიერთობების აქტუალური საკითხები, საერთაშორისო ფორმატებში თანამშრომლობა და პარტნიორობის შემდგომი გაღრმავების პერსპექტივები.განსაკუთრებული ყურადღება გამახვილდა პოლიტიკური დიალოგის გაძლიერებასა და მაღალი დონის ვიზიტების ურთიერთგაცვლის მნიშვნელობაზე. ამ კონტექსტში საუბარი შეეხო კატარის სახელმწიფოს ემირის საქართველოში ვიზიტის შესაძლებლობებს.მხარეებმა ასევე განიხილეს სავაჭრო-ეკონომიკური კავშირების გაფართოებისა და კულტურისა და განათლების სფეროებში თანამშრომლობის განვითარების პერსპექტივები.ასევე გაიცვალა მოსაზრებები რეგიონში მიმდინარე პროცესებზე და დადასტურდა ორმხრივი თანამშრომლობის შემდგომი გაღრმავების მზადყოფნა.ინფორმაციას საქართველოს საგარეო საქმეთა სამინისტრო ავრცელებს.

დავით ჩიხელიძე

პოლიტიკა • 1794840225

დავით ჩიხელიძე: ეკონომიკაზე მსჯელობა, მხოლოდ ტერმინების დაზეპირება არ არის, აუცილებელია შინაარსის ცოდნა, თუ რა ფუნქციები აქვს ქვეყნის მთავარ მონეტარულ ინსტიტუტს, მაგრამ ზურა გირჩი ჯაფარიძე აკაცუკების იმ ჯგუფს ეკუთვნის, რომლისთვის შინაარსში შესვლა აკრძალულია

ექსპერტი დავით ჩიხელიძე ზურაბ გირჩი ჯაფარიძის განცხადებას  სოციალურ ქსელში ეხმიანება და აღნიშნავს, რომ ეროვნული ბანკის ფუნქციების შესახებ მისი მსჯელობა კომპეტენციის ნაკლებობაზე მიუთითებს. ჩიხელიძის განმარტებით, ეროვნული ბანკის ერთ-ერთი მნიშვნელოვანი ფუნქცია ფულად-საკრედიტო და სავალუტო პოლიტიკის შემუშავება და განხორციელებაა, შესაბამისად, ლარის კურსის სტაბილურობა მის საქმიანობასთან პირდაპირ კავშირშია.მისი თქმით, მცურავი გაცვლითი კურსის რეჟიმი არ ნიშნავს, რომ ეროვნული ბანკი სავალუტო ბაზარზე მიმდინარე პროცესებში არ უნდა მონაწილეობდეს. ექსპერტის შეფასებით, ჯაფარიძის მტკიცება, თითქოს ლარის კურსთან ეროვნულ ბანკს კვეთა არ აქვს, დემაგოგია და უვიცობაა.„გირჩი ჯაფარიძეს ვურჩევ, სანამ სხვებს ფინანსებზე ლექციებს წაუკითხავს და ქვეყნის ეკონომიკაზე მსჯელობას დაიწყებს, ელემენტარულ საკითხებში გაერკვეს. ეროვნული ბანკის ფუნქცია მხოლოდ ფასების სტაბილურობის უზრუნველყოფით არ შემოიფარგლება. საქართველოს ორგანული კანონის მე-3 მუხლის თანახმად, მის ერთ-ერთ მნიშვნელოვან ფუნქციას ფულად-საკრედიტო და სავალუტო პოლიტიკის შემუშავება და განხორციელება წარმოადგენს. შესაბამისად, ლარის გაცვლითი კურსის სტაბილურობა ეროვნული ბანკის საქმიანობის მნიშვნელოვანი მიმართულებაა და იმის მტკიცება, რომ ლარის კურსთან ეროვნულ ბანკს კვეთა არ აქვს, დემაგოგიას და კომპეტენციის ნაკლებობას (უვიცობას)  ნიშნავს. მართალია, საქართველოში გაცვლითი მცურავი  კურსის რეჟიმი მოქმედებს, მაგრამ მცურავი კურსი არ ნიშნავს, რომ ეროვნული ბანკი სავალუტო ბაზარზე მიმდინარე პროცესებისგან დისტანცირებული უნდა იყოს ან კურსის მკვეთრი მერყეობის შესარბილებლად არაფერი გააკეთოს. პირიქით ლარის კურსის სტაბილურობა ეროვნული ბანკის ვალდებულება არის,  რისთვისაც ბანკს  კონკრეტული მონეტარული და სავალუტო ინსტრუმენტები აქვს, მათ შორის საერთაშორისო სავალუტო რეზერვები, რომლებსაც საჭიროების შემთხვევაში აქტიურად იყენებს სავალუტო ბაზარზე არსებული გამოწვევების საპასუხოდ და ლარის კურსის სტაბილურობისთვის. ეკონომიკაზე მსჯელობა, მხოლოდ ტერმინების დაზეპირება არ არის, აუცილებელია შინაარსის ცოდნა, თუ რა ფუნქციები აქვს ქვეყნის მთავარ მონეტარულ ინსტიტუტს, მაგრამ ზურა გირჩი ჯაფარიძე აკაცუკების იმ ჯგუფს ეკუთვნის, რომლისთვის შინაარსში შესვლა აკრძალულია!“ - წერს ჩიხელიძე.

ოქრო

საზოგადოება • 1794838717

ოქრო იაფდება - რა ღირს გრამი საქართველოში

 მსოფლიოში ოქრო კვლავ იაფდება.  ამ დროისთვის, 1 უნციის ფასი 3 855 დოლარს შეადგენს. რაც შეეხება საქართველოს, ამ დროისთვის, 999 სინჯის მქონე 1 გრამი ოქრო 334 ლარი ღირს, 750-სინჯიანი 250, ხოლო 585 სინჯის მქონე გრამი ოქროს ფასი 195 ლარია.

ჯანდაცვა

ჯანდაცვა • 1794838667

მიხეილ სარჯველაძე: ჯანდაცვის სფეროში სახელმწიფოსა და ბიზნესის თანამშრომლობის მთავარი პრინციპი პაციენტის ინტერესების დაცვაა

ჯანდაცვის მინისტრმა მიხეილ სარჯველაძემ ბიზნესასოციაციის კონფერენციის  - „ბიზნესგარემო საქართველოში, დიალოგი მთავრობასა და ბიზნესს შორის“ ფარგლებში, პანელურ დისკუსიაში მიიღო მონაწილეობა.მინისტრმა ჯანდაცვის სფეროში სახელმწიფოსა და კერძო სექტორს შორის მჭიდრო თანამშრომლობის მნიშვნელობაზე, გამოწვევებსა და სამომავლო გეგმებზე ისაუბრა.უწყების ხელმძღვანელის განცხადებით, ჯანდაცვის სფეროში ბიზნესთან თანამშრომლობა განსაკუთრებულ მიდგომას საჭიროებს. მისივე თქმით, ჯანდაცვის სისტემაში ჩართული ყველა მხარე პაციენტის საუკეთესო ინტერესებით უნდა ხელმძღვანელობდეს.მიხეილ სარჯველაძემ დისკუსიისას განსაკუთრებული ყურადღება ფარმაცევტული პროდუქტების ფასწარმოქმნის საკითხს დაუთმო და აღნიშნა, რომ ამ მიმართულებით მნიშვნელოვანია სახელმწიფოსა და ბიზნესს შორის აქტიური თანამშრომლობა და მუდმივი კომუნიკაცია, რათა ფასებთან დაკავშირებული საკითხები სათანადოდ იყოს შესწავლილი და გათვალისწინებული.შეხვედრაზე ხაზი გაესვა სახელმწიფოსა და ბიზნესს შორის უწყვეტი დიალოგის მნიშვნელობას ასევე - შრომის ინსპექციის სამსახურის საქმიანობის შედეგად სამუშაო ადგილებზე შრომის უსაფრთხოების სტანდარტების გაუმჯობესებასა და უსაფრთხო სამუშაო გარემოს უზრუნველყოფის მიმართულებით მიღწეულ პროგრესს.ღონისძიებას, რომელიც პრემიერ-მინისტრმა ირაკლი კობახიძემ გახსნა, საქართველოს მთავრობის, პარლამენტის წევრები და ბიზნესსექტორის წარმომადგენლები დაესწრნენ.

ალუდა ღუდუშაური

პოლიტიკა • 1794838140

ალუდა ღუდუშაური ბრიუსელში დაგეგმილ ღონისძიებებზე: როგორ შეიძლება დაკავშირებადობაზე ვსაუბრობდეთ საქართველოს რეგიონში და საქართველო არ იყოს ჩართული შესაბამის დონეზე ამ დისკუსიაში

როგორ შეიძლება დაკავშირებადობაზე ვსაუბრობდეთ საქართველოს რეგიონში და საქართველო არ იყოს ჩართული შესაბამის დონეზე ამ დისკუსიაში, - განაცხადა გადაცემაში „დღის ქრონიკა“ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველმა მოადგილემ, ალუდა ღუდუშაურმა ბრიუსელში დაგეგმილ ღონისძიებებზე საუბრისას.მისივე თქმით, ეს ყველაფერი არის ფარსი და არაგულწრფელი საუბარი.„სინამდვილეში მათი მიზანი იყო ის, რომ საქართველოში იყოს მორჩილი ხელისუფლება და არა ისეთი, რომელიც პრეტენზიას გამოთქვამს სუვერენიტეტზე ან სახელმწიფო ინტერესზე. ჩვენ ამჯერადაც არ მივეცით შესაძლებლობა, რომ ერთგვარად დაეკნინებინათ საქართველო, დაეტუქსათ და ეჩვენებინათ, რომ ყველა სათანადო დონეზეა წარმოდგენილი ჩვენს გარდა. საქართველოსთან მიმართებით მათ ჰქონდათ სურვილი, რომ ჩვენი ქვეყანა კუთხეში დაეყენებინათ. ჩვენ ამის საშუალებას არ ვაძლევთ და არც მომავალში მივცემთ. ჩვენ ვართ მზად ნებისმიერი დისკუსიისთვის“, - აღნიშნა ალუდა ღუდუშაურმა.

ნათია თურნავა

ეკონომიკა • 1794835814

ნათია თურნავა: ბოლო 10 წლის განმავლობაში სესხებისა და დეპოზიტების დოლარიზაცია განახევრდა

„საქართველოს ეროვნული ბანკი დედოლარიზაციის პოლიტიკას კვლავაც პრიორიტეტულ მიმართულებად განიხილავს. ბოლო ათი წლის განმავლობაში სესხებისა და დეპოზიტების დოლარიზაცია მნიშვნელოვნად შემცირდა და დღეს მათი დაახლოებით 60% ეროვნულ ვალუტაშია დენომინირებული“ -  ამის შესახებ ეროვნული ბანკის პრეზიდენტმა ნათია თურნავამ საქართველოს ბიზნეს ასოციაციის კონფერენციაზე – „ბიზნესგარემო საქართველოში, დიალოგი მთავრობასა და ბიზნესს შორის“ ისაუბრა.როგორც ნათია თურნავამ აღნიშნა, დედოლარიზაციის პოლიტიკა ეროვნული ბანკის გრძელვადიანი სტრატეგიის ნაწილია.„თუ 10 წლის წინ სესხებისა და დეპოზიტების დაახლოებით 80% უცხოურ ვალუტაში იყო დენომინირებული - უპირატესად დოლარსა და ევროში, დღეს ეს მაჩვენებელი განახევრდა და სესხების დაახლოებით 60%, ასევე დაახლოებით ამდენივე დეპოზიტი უკვე ეროვნულ ვალუტაშია. ეს ეროვნული ვალუტის მიმართ გაზრდილ ნდობას ასახავს. ჩვენ ამ მიმართულებით ნაბიჯების გადადგმას ვაგრძელებთ და მადლობა მინდა გადავუხადო საბანკო სექტორს აქტიური თანამშრომლობისა და ჩართულობისთვის“,  - განაცხადა მან.ნათია თურნავამ ხაზი გაუსვა, რომ ბიზნესისთვის მნიშვნელოვანია არა მხოლოდ ლარის მკვეთრი გაუფასურების, არამედ მისი მყისიერი გამყარების თავიდან აცილებაც, რადგან გაცვლითი კურსის არაპროგნოზირებადი ცვლილებები ბიზნესსაქმიანობას ართულებს.„ამ თვალსაზრისით, დედოლარიზაცია და ეროვნული ვალუტის მიმართ ნდობის ზრდა ეკონომიკური სტაბილურობის მნიშვნელოვანი წინაპირობაა - მცურავი გაცვლითი კურსის რეჟიმის პირობებში სავალუტო ბაზარი სტაბილურობას ინარჩუნებს“, - აღნიშნა ეროვნული ბანკის პრეზიდენტმა.

ნათია თურნავა

ეკონომიკა • 1794835691

ნათია თურნავამ საქართველოს ბიზნეს ასოციაციის კონფერენციაში „ბიზნესგარემო საქართველოში, დიალოგი მთავრობასა და ბიზნესს შორის“ მიიღო მონაწილეობა

საქართველოს ეროვნული ბანკის პრეზიდენტმა ნათია თურნავამ საქართველოს ბიზნეს ასოციაციის (BAG) კონფერენციაში „ბიზნესგარემო საქართველოში, დიალოგი მთავრობასა და ბიზნესს შორის“ მიიღო მონაწილეობა.კონფერენცია საქართველოს პრემიერ მინისტრმა ირაკლი კობახიძემ გახსნა. ღონისძიებაში მონაწილეობდნენ საქართველოს მთავრობისა და კერძო სექტორის წარმომადგენლები. შეხვედრის ფარგლებში მონაწილეებმა იმსჯელეს ქვეყანაში არსებულ ბიზნესგარემოზე, ეკონომიკურ ტენდენციებზე, კერძო სექტორის წინაშე არსებულ გამოწვევებსა და სახელმწიფოსა და ბიზნესს შორის თანამშრომლობის გაღრმავების შესაძლებლობებზე.ნათია თურნავამ კონფერენციის ფარგლებში, მონაწილეობა მიიღო პანელურ დისკუსიაში „საქართველოს ეკონომიკური გარემო, გამოწვევები, პრიორიტეტები და განვითარების პერსპექტივები“. სებ-ის პრეზიდენტმა ბიზნესის წარმომადგენლებს ქვეყნის მაკროეკონომიკური მდგომარეობა, ეკონომიკური მედეგობა და ფინანსური სექტორის განვითარების ძირითადი მიმართულებები გააცნო.ნათია თურნავამ ყურადღება გაამახვილა ინფლაციის მიმდინარე დინამიკაზე და აღნიშნა, რომ ინფლაციური ზეწოლის ერთ-ერთი მთავარი წყარო საგარეო ფაქტორებია, მათ შორის ნავთობპროდუქტების საერთაშორისო ფასები. მისი განმარტებით, ეროვნული ბანკის მონეტარული პოლიტიკა მიმართულია იქითკენ, რომ საგარეო შოკების გავლენა გრძელვადიან შიდა ინფლაციურ პროცესებში არ გადაიზარდოს.მან ასევე ისაუბრა ქვეყნის ეკონომიკური მედეგობის განმაპირობებელ ფაქტორებზე. მისი განცხადებით, საერთაშორისო რეზერვებმა ისტორიულ მაქსიმუმს – 8.3 მილიარდ დოლარს მიაღწია, ხოლო რეზერვების ადეკვატურობის მაჩვენებელი 130%-ს შეადგენს. ეკონომიკური მედეგობის მნიშვნელოვან საფუძვლად მან ასევე ძლიერი და მდგრადი საბანკო სისტემა დაასახელა.პანელურ დისკუსიაში საუბარი შეეხო დედოლარიზაციის პოლიტიკასაც. სებ-ის პრეზიდენტმა ხაზი გაუსვა,  რომ ბოლო ათი წლის განმავლობაში სესხებისა და დეპოზიტების დოლარიზაცია მნიშვნელოვნად შემცირდა და დღეს მათი დაახლოებით 60% ეროვნულ ვალუტაშია დენომინირებული.პანელურ დისკუსიაში „საქართველოს ეკონომიკური გარემო, გამოწვევები, პრიორიტეტები, და განვითარების პერსპექტივები“ ასევე მონაწილეობდნენ ვიცე პრემიერი, ეკონომიკისა და მდგრადი განვითარების მინისტრი მარიამ ქვრივიშვილი, ფინანსთა მინისტრი ლაშა ხუციშვილი, გარემოს დაცვისა და სოფლის მეურნეობის მინისტრი დავით სონღულაშვილი, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე, ინფრასტრუქტურის მინისტრი რევაზ სოხაძე და იუსტიციის მინისტრი პაატა სალია, პანელს მოდერატორობას უწევდა BAG-ის აღმასრულებელი დირექტორი ლევან ვეფხვაძე.საქართველოს ბიზნეს ასოციაციის ყოველწლიური კონფერენცია - „ბიზნესგარემო საქართველოში, დიალოგი მთავრობასა და ბიზნესს შორის“,  უკვე მეოთხე წელია იმართება და მისი მიზანია მთავრობასა და კერძო სექტორს შორის ღია დიალოგის ხელშეწყობა, ბიზნესგარემოსა და ეკონომიკური ტენდენციების შეფასება, კერძო სექტორის გამოწვევების განხილვა და ქვეყნის ეკონომიკური განვითარების ხელშეწყობის მიზნით თანამშრომლობის გაძლიერება.

✕