მაკა ბოჭორიშვილი: მედიის თავისუფლების საკითხებში ეუთო-ს წარმომადგენელთან აღვნიშნეთ ის კამპანიები, რაც მიმდინარეობს, როდესაც საქმე ეხება დეზინფორმაციას, საქართველოსთვის ეს მტკივნეული საკითხია

მედიის თავისუფლების საკითხებში ეუთო-ს წარმომადგენელთან კონსტრუქციული საუბარი მქონდა. ჩვენ ვისაუბრეთ ეუთო-ს სივრცეში არსებულ გამოწვევებზე, რაც შეეხება როგორც მედიის თავისუფლებას, ისე მის დამოუკიდებლობას, – განაცხადა საქართველოს საგარეო საქმეთა მინისტრმა, მაკა ბოჭორიშვილმა ეუთო-ს მინისტერიალის ფარგლებში მედიის თავისუფლების საკითხებში ეუთო-ს წარმომადგენელთან გამართული შეხვედრის შეფასებისას.

მაკა ბოჭორიშვილის თქმით, საუბრისას განიხილეს დეზინფორმაციის გამოწვევები.

„ჩვენ ასევე აღვნიშნეთ ის კამპანიები, რაც მიმდინარეობს, როდესაც საქმე ეხება დეზინფორმაციასა და დეზინფორმაციასთან გამკლავებას. საქართველოსთვის ეს განსაკუთრებით მტკივნეული საკითხია, რადგან ხშირად დაუსაბუთებელი ინფორმაციის საფუძველზე, სწორედ მედიის მეშვეობით, ხდება კონკრეტული კამპანიების წარმოება საქართველოს წინააღმდეგ“, – აღნიშნა მაკა ბოჭორიშვილმა.

შეხვედრაზე საუბარი ასევე შეეხო მედიის როლს ქვეყნის პოლიტიკურ პროცესებსა და საზოგადოებრივ ცხოვრებაში.

„ჩვენ ასევე ვისაუბრეთ მედიის როლზე პოლიტიკურ ცხოვრებაში, მედიის თავისუფლების საკითხებზე, ზოგადად ეუთო-ს სივრცეში და ასევე ვისაუბრეთ თანამშრომლობის მიმართულებებზე. საქართველო არის ეუთო-ს მონაწილე ქვეყანა და, რა თქმა უნდა, ეუთო-ს ინსტიტუტების ფარგლებში თანამშრომლობა ჩვენთვის მნიშვნელოვანია. გავაგრძელებთ კონსულტაციებს და მუშაობას ჩვენს პარტნიორებთან“, – დასძინა მინისტრმა.