დიმიტრი პესკოვი აცხადებს, რომ აშშ-მ რუსეთს „სამშვიდობო გეგმის“ პარამეტრები გაუგზავნა

კრემლის პრესსპიკერის, დიმიტრი პესკოვის განცხადებით, აშშ-მ რუსეთს „სამშვიდობო გეგმის“ პარამეტრები გაუგზავნა.

საუბარია იმ „სამშვიდობო გეგმაზე“, რომლის პუნქტებიც ჟენევაში ამერიკულ და უკრაინულ დელეგაციებს შორის კონსულტაციებისას შეიცვალა.

„ძირითადი პარამეტრები უკვე შეთანხმებულია და მომავალ კვირას მოსკოვში განიხილება“, – აღნიშნა პესკოვმა.

მანამდე, შეერთებული შტატების პრეზიდენტმა, დონალდ ტრამპმა განაცხადა, რომ თავის სპეციალურ წარმომადგენლებს, სტივ უიტკოფსა და დენ დრისკოლს დაავალა „სამშვიდობო შეთანხმების“ პროექტის პირობების შედგენა. ამისთვის უიტკოფი მომავალ კვირას მოსკოვში გაემგზავრება.