თუ გვინდა, შევინარჩუნოთ კარგი ეპიდსიტუაცია, უნდა ვიყოთ ფხიზლად - ცერცვაძე

თუ გვინდა, შევინარჩუნოთ კარგი ეპიდსიტუაცია, უნდა ვიყოთ ფხიზლად, გავაგრძელოთ აქტიური ვაქცინაცია, გამოვიყენოთ პირბადე საზოგადოებრივ ტრანსპორტსა და სამედიცინო დაწესებულებებში და რაც ძალიან მნიშვნელოვანია – „კოვიდის“ პირველივე სიმპტომების გაჩენისთანავე, ჩავიტაროთ კოვიდტესტირება და ზედმიწევნით შევასრულოთ ექიმის რეკომენდაციები, – ამის შესახებ თბილისის ინფექციური საავადმყოფოს დირექტორის, თენგიზ ცერცვაძის განცხადებაშია ნათქვამი.

თენგიზ ცერცვაძის განცხადებაში მიმოხილულია საქართველოსა და მსოფლიოში არსებული ეპიდსიტუაცია, ასევე საუბარია, როგორ ავიცილოთ „კოვიდის“ ახალი ტალღა.

„ბოლო თვეების განმავლობაში შეიმჩნევა კოვიდსიტუაციის სტაბილიზაცია მთელ მსოფლიოში, მაგრამ პანდემია არ დამთავრებულა. მსოფლიოში ყოველდღიურად აღინიშნება კორონავირუსის 500-დან 700 ათასამდე ახალი შემთხვევა და 1 000-დან 2 000-მდე კოვიდგარდაცვალება. ამ ფონზე გამორჩეულად კარგი მდგომარეობაა საქართველოში, სადაც დღეში ფიქსირდება საშუალოდ 100-მდე ახალი კოვიდშემთხვევა, ხოლო გარდაცვალების შემთხვევები ან საერთოდ არ არის (0), ან ერთეული შემთხვევაა (1, 2). ბოლო ორი თვის განმავლობაში საქართველოში ვაქცინაციით დაბალი მოცვის მიუხედავად, ყოველ ერთ მილიონ მოსახლეზე გადაანგარიშებით როგორც კორონავირუსის ახალი შემთხვევების რაოდენობა (2411), ისე განსაკუთრებით კოვიდგარდაცვალების შემთხვევები (19) ბევრად, შეუდარებლად ნაკლებია, ვიდრე ამერიკაში (66), კანადაში (87), პრაქტიკულად მთელ ევროპაში ერთეული გამონაკლისების გარდა და ასე განსაჯეთ, იმ ქვეყნებშიც კი, რომლებიც ტრადიციულად გამოირჩეოდნენ კოვიდშემთხვევებისა და გარდაცვალების დაბალი მაჩვენებლებით – სამხრეთ კორეა (122), ავსტრალია (88), ახალი ზელანდია (156), ჰონგ კონგი (120), იაპონია (20), ისრაელი (33) და ა.შ. გარდა ამისა, ქვეყანას აქვს კოვიდდადასტურებელ შემთხვევებს შორის გარდაცვალების პროცენტის ე.წ. CFR-ის (case fatality rate) მსოფლიოს 113 ქვეყანაზე დაბალი მაჩვენებელი (1,02%). ყველაფერი ეს, უპირველეს ყოვლისა, განპირობებულია საქართველოში კოვიდპანდემიის კარგი მართვით, მათ შორის კარგი კლინიკური მართვით. საქართველოში კარგადაა ორგანიზებული კოვიდდიაგნოსტიკა და კოვიდპაციენტთა ნაკადების მართვა, კერძოდ, როგორც ბინაზე დარჩენილი (ამბულატორიული), ისე ჰოსპიტალიზებული პაციენტების კლინიკური მართვა. საქართველომ პირველმა რეგიონში და ერთ-ერთმა პირველმა მსოფლიოში შემოიტანა და პრაქტიკაში დანერგა უახლესი და სადღეისოდ ყველაზე ეფექტიანი ანტივირუსული მედიკამენტი პაქსლოვიდი. ექიმების არსენალშია და ყველა კოვიდავადმყოფისთვის ხელმისაწვდომია ე.წ. სიცოცხლის გადამრჩენი მედიკამენტები: რემდესივირი, მონოკლონური ანტისხეულები (ვირუსის შესაბამისი შტამის დროს), ტოცილიზუმაბი, ბარიციტინიბი და სხვ. ჩვენ წარმატებით ვიყენებთ კოვიდპაციენტების – როგორც ბინაზე დარჩენილის (პაქსლოვიდით), ისე ჰოსპიტალიზებული პაციენტების ე.წ. პროაქტიურ მკურნალობას, რამაც საშუალება მოგვცა, მინიმუმამდე დაგვეყვანა კოვიდპაციენტების დამძიმების, რეანიმაციაში მოხვედრისა და გარდაცვალების შემთხვევები.

მოსახლეობას აინტერესებს, კოვიდპანდემია დამთავრდა და შეუძლიათ, მშვიდად იყვნენ, თუ მოსალოდნელია კორონავირუსის ახალი შემთხვევების მატება და ახალი ტალღების გაჩენა. მოსახლეობას შეუძლია, მშვიდად იყოს იმიტომ, რომ მათ უსაფრთხოებაზე სახელმწიფო ზრუნავს. მაგრამ უნდა გვახსოვდეს, რომ პანდემია არ დამთავრებულა, რასაც მოწმობს ახალი შემთხვევებისა და გარდაცვალების საკმაოდ მაღალი რიცხვები ევროპისა და ამერიკის ქვეყნებში. აგრეთვე ის, რომ დაფიქსირებულია SARS-CoV-2-ის რამოდენიმე ახალი შტამი. თუმცა, მათი ფართედ გავრცელება არ მომხდარა. გასათვალისწინებელია ისიც, რომ წინაა ზაფხული და აქტიური ტურისტული სეზონი, რაც დაკავშირებულია მობილობის ზრდასთან და შესაბამისად, გაზრდილ რისკებთან. ამიტომ თუ გვინდა, რომ შევინარჩუნოთ დღევანდელი კარგი „კოვიდ“ ეპიდსიტუაცია, უნდა ვიყოთ ფხიზლად, გავაგრძელოთ აქტიური კოვიდვაქცინაცია ბუსტერდოზების ჩათვლით, ვიხმაროთ პირბადე საზოგადოებრივ ტრანსპორტში და სამედიცინო დაწესებულებებში და რაც ძალიან მნიშვნელოვანია – „კოვიდის“ პირველივე სიმპტომების გაჩენისთანავე, ჩავიტაროთ კოვიდტესტირება და ზედმიწევნით შევასრულოთ ექიმის რეკომენდაციები. ყველამ გაითვალისწინოს, რომ დროული მიმართვის შემთხვევაში, პრაქტიკულად გარანტირებულია, რომ არ მოხდება პაციენტის დამძიმება და მით უმეტეს, არ დადგება ლეტალური შედეგი. ყველამ აუცილებლად უნდა ვისწავლოთ „კოვიდის“ პირობებში უსაფრთხოდ ცხოვრება და საქმიანობა“, – ნათქვამია თენგიზ ცერცვაძის განცხადებაში.