რა კავშირი აქვს ყოველდღიურ კვებას ფილტვის კიბოსთან - მეცნიერების ახალი აღმოჩენა

ფილტვის კიბო მსოფლიოში ონკოლოგიური დაავადებებით გამოწვეული სიკვდილიანობის წამყვან მიზეზად რჩება. აშშ-ში ამ დაავადების დიაგნოზის დასმიდან ხუთწლიანი გადარჩენის მაჩვენებელი დაახლოებით 25%-ს შეადგენს.

მიუხედავად იმისა, რომ მოწევა ფილტვის კიბოს განვითარების მთავარი რისკფაქტორია, დაავადება არამწეველ ადამიანებშიც გვხვდება. ამასთან, მწეველებსა და ყოფილ მწეველებს შორის რისკის განსხვავებული დონე მიუთითებს სხვა, პოტენციურად კონტროლირებადი ფაქტორების გამოვლენის მნიშვნელობაზე.

ერთ-ერთი ასეთი ფაქტორი ყოველდღიური კვების რაციონია. 

წინამდებარე კვლევებმა, რომლებიც პროსტატის, ფილტვის, მსხვილი ნაწლავისა და საკვერცხეების კიბოს სკრინინგის პროგრამის (PLCO) ფარგლებში ჩატარდა, აჩვენა, რომ ჯანსაღი კვება ფილტვის კიბოს განვითარების შემცირებულ რისკთან არის დაკავშირებული.

აქამდე მეცნიერებს დეტალურად არ შეუსწავლიათ, როგორ შეიძლება უკავშირდებოდეს ფილტვის კიბოს განვითარებას კვება და მისი გავლენა ნაწლავებში არსებულ ბაქტერიებზე.

როგორც ცნობილია, საკვები, რომელსაც ყოველდღიურად მივირთმევთ, გავლენას ახდენს ნაწლავებში მცხოვრებ მიკროორგანიზმებზე. მეცნიერები ვარაუდობენ, რომ ამ ბაქტერიებმა შესაძლოა გავლენა მოახდინონ არა მხოლოდ საჭმლის მომნელებელ სისტემაზე, არამედ ფილტვების ჯანმრთელობაზეც.

საქმე ისაა, რომ ნაწლავებში არსებული ბაქტერიები მონაწილეობენ ისეთ პროცესებში, რომლებიც ორგანიზმის იმუნურ სისტემასა და ანთებით რეაქციებზე მოქმედებს. შესაბამისად, მეცნიერები იკვლევენ, შეიძლება თუ არა ამ ცვლილებებმა ფილტვის კიბოს განვითარების რისკზეც იმოქმედოს.

განსაკუთრებული ყურადღება ეთმობა ბაქტერიების გარკვეულ ჯგუფს, რომლებიც საკვებში არსებულ გოგირდშემცველ ნივთიერებებს წყალბადის სულფიდად გარდაქმნიან. ამ ნივთიერების მაღალი კონცენტრაცია შესაძლოა საზიანო იყოს ორგანიზმისთვის, რადგან შეუძლია უჯრედების დაზიანება, დნმ-ის სტრუქტურის დარღვევა და ანთებითი პროცესების გაძლიერება.

მეცნიერებმა 95 612 ადამიანის მონაცემები შეისწავლეს და დაადგინეს, რომ მათ, ვინც უფრო ხშირად მიირთმევდა წითელ და გადამუშავებულ ხორცს, კარტოფილ ფრისა და ცხიმიან რძის პროდუქტებს, ხოლო ნაკლებ ხილს, ბოსტნეულსა და სრულმარცვლოვან პროდუქტებს, ფილტვის კიბოს განვითარების 23%-ით, ხოლო ამ დაავადებით გარდაცვალების 19%-ით მაღალი რისკი ჰქონდათ, შედარებით განსხვავებული კვების მქონე ჯგუფთან.

მკვლევრების განმარტებით, ეს კავშირი განსაკუთრებით შესამჩნევი იყო ხანგრძლივი მოწევის ისტორიის მქონე ადამიანებში. თუმცა კვლევა არ ადასტურებს, რომ აღნიშნული პროდუქტები უშუალოდ იწვევს ფილტვის კიბოს. შედეგებზე შესაძლოა გავლენა ჰქონოდა მოწევას და ცხოვრების წესთან დაკავშირებულ სხვა ფაქტორებსაც.