ოპოზიციური პარტიების აკრძალვის თაობაზე მომზადებული საკონსტიტუციო სარჩელის განხილვა 21 ოქტომბრიდან დაიწყება

ოპოზიციური პარტიების აკრძალვის თაობაზე მომზადებული საკონსტიტუციო სარჩელის განხილვა 21 ოქტომბრიდან დაიწყება. პროცესები საკონსტიტუციო სასამართლოში 21-22-23 ოქტომბერს ჩაინიშნა.

საქმეს პლენუმი, შვიდი მოსამართლის შემადგენლობით განიხილავს. მათ შორის არ იქნება მანანა კობახიძე, რომელსაც მოსამართლის უფლებამოსილება ვადაზე ადრე შეუწყდა. მანამდე საკონსტიტუციო სასამართლომ არ დააკმაყოფილა კობახიძის შუამდგომლობა პარტიების აკრძალვასთან დაკავშირებული კონსტიტუციური სარჩელის განხილვიდან თვითგანრიდების შესახებ.

დასაბუთებული უარის მიღების შემდეგ კი მანანა კობახიძემ უკვე პირადი განცხადებით მოითხოვა საკონსტიტუციო სასამართლოს მოსამართლის უფლებამოსილების შეწყვეტა, რაც დაკმაყოფილდა.