მისი ფასი 3000 დოლარია - როგორ გამოიყურება მსოფლიოში ყველაზე ძვირად ღირებული ქათამი (ფოტო)

ქათამი შეიძლება  ავტომობილივით ძვირი ღირდეს, ხოლო მისი ექვსი კვერცხი – თითქმის 100 დოლარი. საუბარია აიამ ჩემანის ჯიშზე, რომელიც ინდონეზიის კუნძულ იავადან იღებს სათავეს და მსოფლიოში ქათმის ერთ-ერთ ყველაზე ძვირად ღირებულ ჯიშად ითვლება, წერს The Takeout.

ეს ფრინველები ცნობილი არიან არა მხოლოდ მაღალი ფასით, არამედ უჩვეულო გარეგნობითაც. ისინი თითქმის სრულიად შავები არიან – ბუმბულიდან, კანითა და ფეხებით დაწყებული, თავით, ენითა და ბრჭყალებით დამთავრებული. მუქი ფერისაა მათი შინაგანი ორგანოები და ხორციც.

რა ღირს შავი ქათამი?
აიამ ჩემანის ფასი ფრინველის ასაკსა და დანიშნულებაზეა დამოკიდებული. ექვსი კვერცხი შეიძლება დაახლოებით 100 დოლარი ღირდეს, ხოლო წიწილა – დაახლოებით 300 დოლარი. ზრდასრული ფრინველი, რომელიც ძირითადად გამრავლებისთვისაა განკუთვნილი, შესაძლოა 3 000 დოლარამდეც კი ღირდეს.

მაღალ ფასს ხორცის საგემოვნო თვისებებით კი არ ხსნიან, არამედ ჯიშის იშვიათობითა და მისი უჩვეულო გარეგნობით. დამახასიათებელი შავი ფერი უკავშირდება გენეტიკურ თავისებურებას, რომელსაც იაველი სელექციონერები მრავალი თაობის განმავლობაში ინარჩუნებდნენ.

ზოგიერთი შეფასებით, აიამ ჩემანის მსოფლიო პოპულაცია სულ რაღაც 3 500-მდე ფრინველს შეადგენს. ამის გამო ეს ჯიში ბევრად ნაკლებად ხელმისაწვდომი რჩება, ვიდრე ცხოველური წარმოშობის სხვა ძვირად ღირებული პროდუქტები. 

სანაცვლოდ, The Takeout-ის მონაცემებით, აიამ ჩემანის ხორცის პოვნა ვერც აშშ-ის მსხვილ სურსათის ქსელებში მოხერხდა და ვერც იმ რესტორნებში, სადაც ჩვეულებრივ ეგზოტიკური პროდუქტები იყიდება.

სამშობლოშიც კი იშვიათად ჭამენ;
მიუხედავად იმისა, რომ აიამ ჩემანი წარმოშობით იავადანაა, ადგილობრივები ამ ფრინველს უშუალოდ საკვებად გამოსაყენებლად იშვიათად ამრავლებენ. ჯიშს სხვა კულტურული მნიშვნელობაც აქვს, ხოლო მის სისხლს ზოგიერთ ტრადიციულ რიტუალში იყენებენ.

მათ, ვისაც მაინც სურს ამ უჩვეულო ხორცის გასინჯვა, სპეციალიზებული მაღაზიების მოძიება უწევთ, რომლებიც ეგზოტიკური ინგრედიენტებით ვაჭრობენ.