მძიმე დიაგნოზი, ბავშვობის სიყვარული და გზა მწვერვალამდე - ლიონელ მესის პორტრეტი | ბიჭი, რომელმაც შეუძლებელი შეძლო

როცა ფეხბურთის ისტორიას წლების შემდეგ კიდევ ერთხელ გადაშლიან, ერთ-ერთ პირველ სახელად აუცილებლად ლიონელ მესი დარჩება. ლიონელ მესის ამბავი ციფრებით არ იწყება და არც მთავრდება.

პატარა ბიჭი, რომელსაც ბურთი სამყაროზე მეტად უყვარდა, დღეს თანამედროვე ფეხბურთის ეპოქის განუყოფელი ნაწილია. „მესი“ უბრალოდ სახელი არ არის, ის ამ ეპოქის სიმბოლოა, რომელსაც ჩვენ მოვესწარით და რომელზეც ჩვენი შვილები და შვილიშვილები მოჰყვებიან.

ბიჭი, რომელსაც ბავშვობაში ექიმებმა ზრდის ჰორმონის დეფიციტის გამო დიდი გამოწვევები უწინასწარმეტყველეს, საბოლოოდ იმ ადამიანად იქცა, რომელმაც შეუძლებელი შესაძლებლად აქცია.

ლიონელ ანდრეს მესი 1987 წლის 24 ივნისს, არგენტინის ქალაქ როსარიოში დაიბადა. პირველ ვარჯიშებზე კი ჯერ კიდევ ხუთი წლის ასაკში მივიდა.

მისი ნიჭი არ დარჩენილა შეუმჩნეველი მწვრთნელებისთვის. მაგრამ არსებობდა ერთი მაგრამ...

ვერავინ იძლეოდა საიმედო პასუხს იმასთან დაკავშირებით, შეძლებდა თუ არა მესი დიდი ფეხბურთის თამაშს. რადგან ზრდის ჰორმონის დეფიციტის დიაგნოზის ბიჭუნას ფიზიკური განვითარება მნიშვნელოვნად შეფერხდებოდა მკურნალობის გარეშე. 11 წლის მესისთვის მკურნალობა საკმაოდ ძვირად ღირებული იყო. ოჯახს კი შესაძლებლობა არ ჰქონდა.

მიუხედავად იმისა, რომ არგენტინულ კლუბებში თამაშობდა, ფინანსური დახმარება ვერ მიიღო. სწორედ მაშინ გამოჩნდა კლუბი, რომელმაც არა მხოლოდ ფეხბურთელი, არამედ მომავალი ლეგენდა დაინახა.

ქაღალდის ხელსახოცზე გაფორმებული კონტრაქტი

ამბავი, რომელიც დღეს უკვე ლეგენდად ითვლება – „ბარსელონას“ წარმომადგენლებმა იმდენად სწრაფად გადაწყვიტეს ახალგაზრდა მესის გაფორმება, რომ პირველი შეთანხმება უბრალო ქაღალდის ხელსახოცზეც კი ჩაიწერა.

კლუბმა მას მკურნალობა სრულად დაუფინანსა, ხოლო 13 წლის მესი ოჯახთან ერთად ესპანეთში გადავიდა. სწორედ აქ დაიწყო ისტორია, რომელმაც მსოფლიო ფეხბურთი შეცვალა.

ბიჭი, რომელმაც ყველა რეკორდი გადაწერა

წლების განმავლობაში მესი „ბარსელონას“ სიმბოლოდ იქცა. მან კლუბთან ერთად ათობით ტიტული მოიგო, არაერთხელ გახდა მსოფლიოს საუკეთესო ფეხბურთელი და დაამყარა რეკორდები, რომელთა გაუმჯობესებაც დღესაც ურთულეს ამოცანად ითვლება. მისი თამაში ფეხბურთის მოყვარულებისთვის ნამდვილ ხელოვნებად იქცა.

გამარჯვება, რომელსაც მთელი არგენტინა ელოდა

მიუხედავად საკლუბო წარმატებებისა, მესის ყველაზე დიდი ოცნება მსოფლიო ჩემპიონობა იყო. წაგებული ფინალები, კრიტიკა და იმედგაცრუება მის კარიერას არაერთხელ დაჰყვა, თუმცა დანებება არასოდეს უფიქრია.

2021 წელს მან არგენტინასთან ერთად კოპა ამერიკა მოიგო, ხოლო 2022 წელს ყატარში მსოფლიო ჩემპიონატის თასი აღმართა – მომენტი, რომელსაც გულშემატკივრები ათწლეულების განმავლობაში ელოდნენ.

ბავშვობის სიყვარული, რომელიც ზღაპრად იქცა

მესის პირადი ცხოვრებაც განსაკუთრებული ისტორიაა. მისი მეუღლე, ანტონელა როკუცო, ბავშვობის მეგობარია. ისინი ერთმანეთს ჯერ კიდევ პატარაობაში შეხვდნენ. მიუხედავად იმისა, რომ ცხოვრებამ ისინი სხვადასხვა გზით წაიყვანა, სიყვარული წლების შემდეგ ისევ გაერთიანდა.

დღეს წყვილი სამი ვაჟის – ტიაგოს, მატეოსა და ჩიროს – მშობლები არიან და სპორტის სამყაროში ერთ-ერთ ყველაზე მტკიცე ოჯახად მიიჩნევა.

თავმდაბლობა, რომელმაც მსოფლიო მოხიბლა

მიუხედავად უდიდესი პოპულარობისა, მესი ყოველთვის გამოირჩეოდა სიმშვიდითა და მოკრძალებით. სკანდალების ნაცვლად, ის ოჯახს, ფეხბურთსა და საქველმოქმედო საქმიანობას უთმობს დროს.

მისი ისტორია კიდევ ერთხელ გვახსენებს, რომ ყველაზე დიდი გამარჯვებები ხშირად ყველაზე მძიმე ბრძოლების შემდეგ მოდის.

ერთ დროს ბიჭი, რომელსაც ექიმები მძიმე დიაგნოზს უსვამდნენ და რომლის მომავალიც კითხვის ნიშნის ქვეშ იდგა, დღეს მსოფლიოს ფეხბურთის ისტორიაში ერთ-ერთ ყველაზე დიდ ლეგენდად არის აღიარებული.