1681329503
მადრიდის „რეალისა“ და იტალიის ეროვნული ნაკრების ყოფილი თავდამსხმელის, ანტონიო კასანოს განცხადებით, სერია A-ს მიმდინარე სეზონის საუკეთესო მოთამაშე ხვიჩა კვარაცხელიაა.
„ეს იყო გმირობა, რომელიც იტალიური ფეხბურთის ისტორიაში დარჩება. „ნაპოლიმ“ სეზონი შემადგენლობის რადიკალური ცვლილებით და ბევრი კითხვის ნიშნით დაიწყო. ჯუნტოლიმ მოულოდნელი კონტრაქტები გააფორმა. ბედნიერი ვარ სპალეტის გამო, ის დიდი გულის მქონე ადამიანია.
არავის უქვამს, რომ „ნაპოლი“ ჩემპიონობას არ იმსახურებდა, რეალურად სპალეტის გუნდმა ჩემპიონატი თებერვალში დაასრულა. მათი თამაშით ყველა დიდ სიამოვნებას იღებდა. ამავე დროს სკუდეტო გაიფორმა უდინეში, სადაც ვიცით, რომ გამარჯვება ძალიან რთულია.
ცალკე ვიტყვი კვარაცხელიას შესახებ, რომელმაც სერია A-ში პირველი სეზონი ჩაატარა. კაკას შემდეგ იტალიაში ახალ ფეხბურთელზე ასეთი კარგი შთაბეჭდილება პირველად დამრჩა. გამონაკლისი რონალდოა, რომელიც 1997 წელს გადავიდა „ინტერში“, ის ფენომენია. თუმცა, მის შესახებ მანამდეც ცნობილი იყო.
კვარაცხელიას პირველ თვეებში ისეთივე დამანგრეველი ეფექტი ჰქონდა, როგორიც კაკას. მასში თავმდაბლობა და თავგანწირვისთვის მზადყოფნა დავინახე.
კვარაცხელია საქართველოდან ჩამოვიდა, მას მაღალ დონეზე მანამდე არ უთამაშია. ეს ტრანსფერი ჯუნტოლის შედევრია, ისევე როგორც კიმის დამატება, თუმცა კვარა კორეელზე დიდი ძალა აღმოჩნდა „ნაპოლისთვის“.
წარმოუდგენელია, რომ ხვიჩამ არა მხოლოდ ინსინიეს ჩანაცვლება მოახერხა, არამედ „ნაპოლის“ ჩემპიონობაში გადამწყვეტი როლი ითამაშა. ქულებით რომ ვისაუბროთ, მას 9.5 ქულას (10-დან) დავუწერ”, – განაცხადა კასანომ.
წყარო: 1tv.ge
