პოლიტიკა • 1779192866

ზელენსკი: ანდრეი სიბიგამ საქართველოს საგარეო საქმეთა მინისტრთან გამართული კომუნიკაციის შესახებ მომახსენა. ურთიერთობების ნორმალიზებისა და თანამშრომლობისკენ ვისწრაფვით

უკრაინის პრეზიდენტის ვოლოდიმირ ზელენსკის განცხადებით, ქვეყნის საგარეო საქმეთა მინისტრმა ანდრეი სიბიგამ თათბირზე მას ქართველ კოლეგასთან მაკა ბოჭორიშვილთან გამართული მოლაპარაკებების შესახებ მოახსენა.როგორც ზელენსკიმ აღნიშნა, უკრაინული მხარე ურთიერთობების ნორმალიზებისა და თანამშრომლობისკენ ისწრაფვის, რომელიც დაფუძნებული იქნება ურთიერთპატივისცემასა და ურთიერთგაძლიერებაზე.ზელენსკის თქმით, უკრაინა ამ მიმართულებით ნაბიჯების გადასადგმელად მზად არის.„ანდრეი სიბიგამ საქართველოს საგარეო საქმეთა მინისტრთან გამართული კომუნიკაციის შესახებ მომახსენა. ურთიერთობების ნორმალიზებისა და თანამშრომლობისკენ ვისწრაფვით, რომელიც დაფუძნებული იქნება ურთიერთპატივისცემასა და ურთიერთგაძლიერებაზე და მზად ვართ გადავდგათ ნაბიჯები ამ მიმართულებით“, - დაწერა ზელენსკიმ.ცნობისთვის, სიბიგამ და ბოჭორიშვილმა შეხვედრა კიშინეუში გამართული ევროპის საბჭოს მინისტრთა კომიტეტის 135-ე სესიის ფარგლებში გამართეს.

მსოფლიო • 1779184203

უკრაინის ანტიკორუფციული ბიურო კორუფციის საქმის ფარგლებში უზენაეს სასამართლოში ჩხრეკას ატარებს

უკრაინის ეროვნული ანტიკორუფციული ბიურო სპეციალურ ანტიკორუფციულ პროკურატურასთან ერთად ქვეყნის უზენაესი სასამართლოს შენობაში ჩხრეკას ატარებს.როგორც ანტიკორუფციული ბიუროს მიერ გავრცელებულ ინფორმაციაშია აღნიშნული, ჩხრეკა აგრეთვე ტარდება უზენაესი სასამართლოს მოქმედი და ყოფილი მოსამართლეების სამუშაო ადგილებზე, საცხოვრებელ სახლებში, ავტომობილებში.საუბარია კორუფციასთან დაკავშირებულ სისხლის სამართლის ერთ-ერთ საქმეზე.საქმის დეტალები უცნობია. უცნობია ისიც, კონკრეტულად ვისთან ტარდება ჩხრეკა და წაუყენეს თუ არა ბრალი რომელიმე მოსამართლეს.

მსოფლიო • 1779176146

ფრიდრიხ მერცი: ევროპა მზადაა, უკრაინასთან, რუსეთთან და აშშ-სთან ერთად, მოლაპარაკებების მაგიდასთან დაჯდეს

კიევს შეუძლია, ევროპის ურყევ მხარდაჭერას დაეყრდნოს, ევროპა მზადაა, რუსეთთან მოლაპარაკებების მაგიდასთან დაჯდეს – ამის შესახებ გერმანიის კანცლერმა, ფრიდრიხ მერცმა განაცხადა.„ევროპაში მჭიდრო კოორდინაცია არასდროს ყოფილა ისეთი მნიშვნელოვანი, როგორც დღეს. ჩვენ არ შევამცირებთ ჩვენს ძალისხმევას უკრაინაში მდგრადი და სამართლიანი მშვიდობის მისაღწევად. ჩვენ ვაგრძელებთ მოსკოვზე ზეწოლის გაზრდას. კიევს შეუძლია დაეყრდნოს ევროპის ურყევ მხარდაჭერას. ევროპა მზადაა, უკრაინასთან, რუსეთთან და შეერთებულ შტატებთან ერთად მოლაპარაკებების მაგიდასთან დაჯდეს“, – განაცხადა მერცმა.ჟურნალისტის კითხვაზე, რას ფიქრობს ყოფილი კანცლერის, ანგელა მერკელის შესაძლო მონაწილეობაზე რუსეთთან მოლაპარაკებების პროცესში, მერცმა პირდაპირი პასუხისგან თავი შეიკავა და აღნიშნა, რომ, უპირველესად, რუსეთმა უნდა აჩვენოს მოლაპარაკებებისთვის მზადყოფნა, მხოლოდ ამის შემდეგ იქნება შესაძლებელი შუამავლის დანიშვნა.„ჯერჯერობით რუსეთი ყველა სამშვიდობო ინიციატივას უფრო სასტიკი თავდასხმებით პასუხობს, მათ შორის სამოქალაქო ინფრასტრუქტურაზე დარტყმებით“, – განაცხადა გერმანიის კანცლერმა.მანამდე მედიაში გავრცელდა ინფორმაცია, რომ რუსეთისა და უკრაინის ომთან დაკავშირებულ მოლაპარაკებების პროცესში გერმანიის ყოფილი კანცლერი, ანგელა მერკელი განიხილებოდა ევროკავშირის სპეციალურ წარმომადგენლად. თავად მერკელმა მოლაპარაკებების შუამავლის როლზე უარი თქვა და აღნიშნა, რომ ასეთ მიდგომას მართებულად არ მიიჩნევს. მისი თქმით, მსგავსი საკითხები პირდაპირი გზით უნდა გადაწყდეს.

მსოფლიო • 1779172217

Financial Times: სი ძინპინმა ტრამპს უთხრა, რომ პუტინმა უკრაინაში შეჭრა, შესაძლოა, „ინანოს

ჩინეთის პრეზიდენტმა, სი ძინპინმა გასულ კვირას აშშ-ის ლიდერთან, დონალდ ტრამპთან პეკინში გამართული მოლაპარაკებების დროს განაცხადა, რომ რუსეთის პრეზიდენტმა, ვლადიმერ პუტინმა საბოლოო ჯამში, შესაძლოა, უკრაინაში შეჭრა ინანოს. ინფორმაციას Financial Times-ი ავრცელებს.გამოცემას რამდენიმე წყარომ განუცხადა, რომ ჩინეთის ლიდერმა აღნიშნული განცხადება გაფართოებულ ფორმატში მიმდინარე მოლაპარაკებების დროს გააკეთა, როცა უკრაინის საკითხი განიხილებოდა.ტრამპმა, თავის მხრივ, სი ძინპინს განუცხადა, რომ პუტინთან ერთად მათ სამივემ სისხლის სამართლის საერთაშორისო სასამართლოს წინააღმდეგ უნდა ითანამშრომლონ.როგორც Financial Times-ი წერს, სი ძინპინის განცხადება პუტინის სინანულთან დაკავშირებით უფრო მკაფიოდ ჟღერდა, ვიდრე ადრე გაკეთებული განცხადებები.

მსოფლიო • 1779163076

პენტაგონის გენერალური ინსპექტორის ანგარიში: აშშ-ის მთავრობა აგრძელებს უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის საქმიანობის მხარდაჭერას მაღალი დონის კორუფციის გამოძიების მიმართულებით

 აშშ-ის მთავრობა აგრძელებს უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის საქმიანობის მხარდაჭერას მაღალი დონის კორუფციის გამოძიების მიმართულებით.ამის შესახებ ნათქვამია პენტაგონის გენერალური ინსპექტორის ახალ ანგარიშში, რომელიც კონგრესს 2026 წლის პირველი კვარტლის შედეგების მიხედვით წარედგინა.„ეს ხელს უწყობს იმის უზრუნველყოფას, რომ სამთავრობო და დონორთა სახსრები მიზნობრივად დაიხარჯოს, და ქმნის პროგნოზირებად და ხელსაყრელ ბიზნესგარემოს უკრაინაში მოქმედი საერთაშორისო კომპანიებისთვის“, - აღნიშნულია ანგარიშში.თანამშრომლობის მაგალითად დოკუმენტში მოყვანილია აშშ-ის ტერიტორიაზე, ნიუ-ჯერსის შტატში, მიმალვაში მყოფი უკრაინელი კორუფციონერის დაკავება და 120 მილიონი დოლარის ღირებულების უპილოტო საფრენი აპარატების შესყიდვისას არსებული კორუფციული სქემის ერთობლივი გამოვლენა.

მსოფლიო • 1779162943

აშშ-ის ხელისუფლება იძიებს თაღლითობისა და კორუფციის, სულ მცირე, 56 სავარაუდო შემთხვევას, რომლებიც დაკავშირებულია უკრაინისთვის გადაცემულ ფინანსურ დახმარებასთან

აშშ-ის ხელისუფლება იძიებს თაღლითობისა და კორუფციის, სულ მცირე, 56 სავარაუდო შემთხვევას, რომლებიც დაკავშირებულია უკრაინისთვის გადაცემულ ფინანსურ დახმარებასთან, ისევე როგორც უკრაინისთვის მიწოდებული შეიარაღების მესამე მხარეებისთვის გადაცემასთან.ამის შესახებ ნათქვამია ახალ ანგარიშში, რომელიც მომზადებულია პენტაგონის, სახელმწიფო დეპარტამენტისა და ფაქტობრივად ლიკვიდირებული აშშ-ის საერთაშორისო განვითარების სააგენტოს გენერალური ინსპექტორების მიერ.როგორც ანგარიშიდან ირკვევა, 31 მარტის მდგომარეობით, გენერალურმა ინსპექტორებმა და მათმა პარტნიორებმა „წარადგინეს ანგარიში 56 მიმდინარე და 13 დასრულებული გამოძიების შესახებ“. ოთხი საქმე გადაეცა აშშ-ის იუსტიციის დეპარტამენტს, ხოლო კიდევ ერთი საქმე გადაეგზავნა „საგამოძიებო მოქმედებებით დაკავებულ სხვა ორგანოს“.ანგარიშში ასევე აღნიშნულია, რომ ამერიკის ხელისუფლებამ, უკრაინის ეროვნულ ანტიკორუფციულ ბიუროსთან თანამშრომლობით, დააკავა აშშ-ში მიმალული უკრაინელი კორუფციონერი, „რომელსაც უკრაინაში ბრალად ედება სამსახურებრივი უფლებამოსილების გადამეტება და დოკუმენტების გაყალბება“.ანგარიშში მისი ვინაობა დასახელებული არ არის. გარდა ამისა, მასში ხაზგასმულია, რომ აშშ-ის საიმიგრაციო ხელისუფლებამ დააკავა უკრაინის სამი მოქალაქე, რომლებსაც სამშობლოში სისხლის სამართლის ბრალდებები აქვთ წარდგენილი. მათი სახელები ანგარიშში ასევე არ სახელდება.

მსოფლიო • 1779132143

რუსული ნავთობკომპანიები იძულებულნი არიან, ჭაბურღილები გააჩერონ, პუტინს რუსეთი გაკოტრებისკენ მიჰყავს - ზელენსკი

რუსული ნავთობკომპანიები იძულებულნი არიან, ჭაბურღილები გააჩერონ, რეგიონების მნიშვნელოვანი ნაწილი გაკოტრების ზღვარზეა, პუტინს რუსეთი გაკოტრებისკენ მიჰყავს, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.როგორც უკრაინის პრეზიდენტმა ყოველდღიური მიმართვისას აღნიშნა, უკრაინის შორ მანძილზე განხორციელებულმა დარტყმებმა რუსეთის ნავთობგადამმუშავებელი ქარხნების სიმძლავრე ათი პროცენტით შეამცირა.ამასთან, ზელენსკის თქმით, უკრაინულმა დაზვერვამ რუსეთის ეკონომიკური დანაკარგების შესახებ ანგარიში წარუდგინა.„მხოლოდ ამ თვეებში რუსეთის ნავთობგადამმუშავებელი ქარხნების სიმძლავრე ათი პროცენტით შემცირდა. მნიშვნელოვანია ისიც, რომ რუსული ნავთობკომპანიები იძულებულები არიან, ჭაბურღილები გააჩერონ. ეს მათთვის კიდევ უფრო მტკივნეულია. რუსეთის ნავთობის მოპოვების ბუნება ისეთია, რომ სწორედ ეს არის მათთვის ყველაზე არასასიამოვნო“, – განაცხადა ზელენსკიმ.ზელენსკის თქმით, რუსეთის პრეზიდენტმა, ვლადიმერ პუტინმა ომისთვის გარკვეული ფინანსური რესურსები გადადო, თუმცა არა იმდენი, რომ ომი უსასრულოდ გააგრძელოს.„ყოველი ჩვენი საპასუხო დარტყმა, ყოველი ჩვენი და პარტნიორების ერთობლივი ნაბიჯი, ზეწოლის თითოეული მექანიზმი რუსეთს ომის დასრულებისკენ უბიძგებს“, – განაცხადა ზელენსკიმ.უკრაინის პრეზიდენტის თქმით,  რუსეთში უკვე ბევრი რეგიონი ფინანსური კრიზისის ზღვარზეა.„ახლა რეგიონების მნიშვნელოვანი ნაწილი გაკოტრების ზღვარზეა, პუტინს რუსეთი გაკოტრებისკენ მიჰყავს. სხვადასხვა სქემა, რომლებსაც ისინი ფულის საშოვნელად იგონებენ, ვერ დაეხმარებათ. ჩვენ ამ რუსულ სქემებს ვხედავთ, ვაფიქსირებთ და მათ დავანგრევთ“, – აღნიშნა უკრაინის პრეზიდენტმა.

მსოფლიო • 1779119099

სლოვაკეთის ხელისუფლება აზერბაიჯანიდან ბუნებრივი აირის მიღების შესახებ გრძელვადიანი კონტრაქტის გაფორმებას გეგმავს

სლოვაკეთის ხელისუფლება ბუნებრივი აირის მიღების შესახებ, სულ მცირე, 10 წლის ვადით, აზერბაიჯანთან გრძელვადიანი კონტრაქტის გაფორმებას გეგმავს, – ამის შესახებ აზერბაიჯანულ სააგენტოსთან ინტერვიუში სლოვაკეთის ვიცე-პრემიერმა, ტომაშ ტარაბამ განაცხადა.„სლოვაკეთს სურს ენერგომომარაგების დივერსიფიკაცია და აზერბაიჯანი ჩვენთვის ძალიან სანდო პარტნიორია“, – აღნიშნა სლოვაკეთის ვიცე-პრემიერმა.ტარაბამ ასევე ისაუბრა აზერბაიჯანის მიერ სლოვაკეთისთვის ენერგომატარებლების მიწოდებაში გაწეულ დახმარებაზე უკრაინის გავლით ტრანზიტის გარშემო კრიზისის დროს.ამავდროულად, სლოვაკეთის ვიცე-პრემიერის თქმით, კვლავ ღია რჩება საკითხი, რა გზით უნდა მივიდეს აზერბაიჯანული გაზი ცენტრალურ ევროპაში. მხარეები ამჟამად განიხილავენ, რომელი მილსადენები შეიძლება იყოს გამოყენებული და რა მოცულობებით.მანამდე, სლოვაკეთის უმსხვილესი ენერგოოპერატორის, Slovenský plynárenský priemysel-ის (SPP) ხელმძღვანელმა განაცხადა, რომ კომპანია ახალ მომწოდებლებს ეძებს, რადგან ევროკავშირი 2027 წელს რუსულ გაზზე უარის თქმას გეგმავს. მისივე თქმით, აზერბაიჯანულ კომპანია SOCAR-თან გრძელვადიანი მიწოდების შესახებ მოლაპარაკებები მიმდინარეობს.ცნობისთვის, 2024 წელს აზერბაიჯანმა უკვე დაიწყო სლოვაკეთისთვის გაზის მიწოდება საპილოტე კონტრაქტის ფარგლებში.შეგახსენებთ, ევროკავშირმა მიიღო გადაწყვეტილება, 2027 წლის პირველ ნოემბრამდე სრულად შეწყვიტოს რუსეთიდან გაზის იმპორტი. გათხევადებული ბუნებრივი აირის იმპორტი უნდა შეწყდეს 2026 წლის ბოლომდე, ხოლო მილსადენებით მიწოდება – 2027 წლის 30 სექტემბრამდე. თუმცა ვადამ, შეიძლება, გადაიწიოს 2027 წლის პირველ ნოემბრამდე, წევრი ქვეყნები გაზსაცავების შევსების სირთულეებს თუ შეხვდებიან. გარდა ამისა, აიკრძალება ახალი გაზის კონტრაქტების დადება რუსეთთან და ეს რეგულაცია ძალაში შევა ახალი კანონის ამოქმედებიდან ექვსი კვირის შემდეგ. სლოვაკეთმა და უნგრეთმა, რომლებიც პირდაპირ ყიდულობდნენ რუსულ გაზს, განაცხადეს, რომ ამ აკრძალვას სასამართლოში გაასაჩივრებენ. 2025 წლის სექტემბერში სლოვაკეთის პრემიერ-მინისტრმა, რობერტ ფიცომ განაცხადა, რომ სლოვაკეთი რუსეთიდან წელიწადში დაახლოებით 3.5 მილიარდ კუბურ მეტრ გაზს ყიდულობს.

მსოფლიო • 1779119009

შეერთებული შტატები უკვე პრეზიდენტ დონალდ ტრამპის ადმინისტრაციის დროს აწესებს რუსეთის წინააღმდეგ ახალ სანქციებს - სერგეი ლავროვი

შეერთებული შტატები უკვე პრეზიდენტ დონალდ ტრამპის ადმინისტრაციის დროს აწესებს რუსეთის წინააღმდეგ ახალ სანქციებს, – ამის შესახებ რუსეთის საგარეო საქმეთა მინისტრმა, სერგეი ლავროვმა განაცხადა.„უკვე ტრამპის ადმინისტრაციის დროს ხდება სულ უფრო და უფრო დამოუკიდებელი, ასე ვთქვათ, ახალი სანქციები მიიღება, გარდა იმისა, რომ ბაიდენის ყველა სანქცია რეგულარულად გრძელდება“, – აღნიშნა ლავროვმა.რუსეთის საგარეო უწყების ხელმძღვანელმა უკრაინის ომზეც ისაუბრა და თქვა, რომ ევროპელ რადიკალებს არ სურთ უკრაინაში აშშ-ის მიერ შემოთავაზებული დარეგულირების დაშვება.„გულწრფელად რომ ვთქვათ, ევროპელი რადიკალები, ნეოლიბერალები და ნეონაცისტები ზელენსკის რეჟიმთან ერთად იმყოფებიან იმ მდგომარეობაში, რომ ხელი შეუშალონ შეერთებული შტატების მიერ შემუშავებული დარეგულირების გეგმების განხორციელებას“, – განაცხადა სერგეი ლავროვმა.

პოლიტიკა • 1779118900

მიხეილ ყაველაშვილმა მისი უწმინდესობის აღსაყდრებასთან დაკავშირებით საქართველოში ჩამოსულ სტუმრებს პრეზიდენტის სასახლეში უმასპინძლა

საქართველოს პრეზიდენტმა, მიხეილ ყაველაშვილმა მისი უწმინდესობის აღსაყდრებასთან დაკავშირებით საქართველოში ჩამოსულ სტუმრებს პრეზიდენტის სასახლეში უმასპინძლა.შეხვედრას ჩეხეთისა და სლოვაკეთის მიტროპოლიტი, უნეტარესი როსტისლავი, ალექსანდრიის, რუსეთის, სერბეთის, ბულგარეთის, ელადის, ალბანეთის, პოლონეთისა და უკრაინის მართლმადიდებელი ეკლესიების წარმომადგენლები დაესწრნენ.პრეზიდენტის სასახლეში იმყოფებოდა სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, უწმინდესი და უნეტარესი შიო III, ახალციხისა და ტაო-კლარჯეთის მიტროპოლიტი თეოდორე, ფოთისა და ხობის მიტროპოლიტი გრიგოლი, ზუგდიდისა და ცაიშის მიტროპოლიტი გერასიმე, გორის და ატენის მიტროპოლიტი ანდრია, მარგვეთისა და უბისის ეპისკოპოსი მელქისედეკი, ნიკორწმინდელი ეპისკოპოსი ვახტანგი, ბოლნელი მთავარეპისკოპოსი ეფრემი, დეკანოზი ანდრია ჯაღმაიძე და საქართველოს ეკლესიის პროტოპრესვიტერი მამა გიორგი ზვიადაძე.შეხვედრაზე აქცენტი გაკეთდა მართლმადიდებლური ფასეულობების როლზე და აღინიშნა, რომ თანამედროვე გამოწვევებით სავსე სამყაროში მართლმადიდებელი ეკლესიების როლი მშვიდობის, ჰუმანიზმის, ტრადიციული ფასეულობების დაცვაში კიდევ უფრო დიდ მნიშვნელობას იძენს.შეხვედრაზე საქართველოს პრეზიდენტმა სტუმრებს უწმინდესისა და უნეტარესის, ილია II-ის გარდაცვალებასთან დაკავშირებით გამოხატული გულწრფელი სამძიმრისა და თანაგრძნობისათვის მადლობა კიდევ ერთხელ გადაუხადა.

მსოფლიო • 1779115560

POLITICO: მერკელი ევროკავშირს რუსეთთან დიალოგის არქონის გამო აკრიტიკებს

გერმანიის ყოფილმა კანცლერმა, ანგელა მერკელმა გააკრიტიკა ევროკავშირი იმის გამო, რომ მან თავისი დიპლომატიური გავლენა უკრაინაში რუსეთის სრულმასშტაბური შეჭრის დასასრულებლად არ გამოიყენა, - წერს გამოცემა POLITICO სტატიაში სათაურით „მერკელი ევროკავშირს რუსეთთან დიალოგის არქონის გამო აკრიტიკებს“.„მიმაჩნია, რომ სამხედრო მხარდაჭერა, რომელსაც ჩვენ აქამდე ვუწევდით, აბსოლუტურად სწორი ნაბიჯია. ასევე მიმაჩნია, რომ მართებულია ბევრად მეტი გავაკეთოთ შემაკავებელი ეფექტის შესაქმნელად, უკრაინის მხარდაჭერის მიღმაც. მე ვნანობ იმას, რომ, ჩემი აზრით, ევროპა საკმარისად არ იყენებს თავის დიპლომატიურ პოტენციალს“, - განაცხადა მერკელმა საზოგადოებრივ მაუწყებელ WDR-თან ინტერვიუში.„მხოლოდ ის არ არის საკმარისი, რომ ტრამპი ინარჩუნებს კონტაქტს რუსეთთან“, - დასძინა მან.მერკელმა, რომელიც გერმანიის კანცლერის თანამდებობას 2005-დან 2021 წლამდე იკავებდა, განაცხადა, რომ 2021 წლის ოქტომბერში, მისი უფლებამოსილების მიწურულს, ევროპული საბჭოს ბოლო სხდომაზე, მან ევროკავშირსა და რუსეთს შორის დიპლომატიური ფორმატის შექმნის ინიციატივა წამოაყენა - რუსეთის მიერ სრულმასშტაბური ომის დაწყებამდე ოთხი თვით ადრე. თუმცა, მან დასძინა, რომ ეს მცდელობა ჩავარდა ბლოკის შიგნით არსებული აზრთა სხვადასხვაობის გამო იმის თაობაზე, თუ როგორ ჯობდა მოსკოვთან ურთიერთობა.„ამ საკითხზე მუშაობა მანამ უნდა გააგრძელო, სანამ საერთო პოზიციას არ მიაღწევ“, - განაცხადა მან ბლოკის შიგნით არსებულ აზრთა სხვადასხვაობაზე საუბრისას. „დიპლომატია ყოველთვის მედლის მეორე მხარე იყო, მათ შორის ცივი ომის დროსაც“.

მსოფლიო • 1779105330

რუსეთთან მოლაპარაკებების პროცესში ევროკავშირის წარმომადგენლად ბრიუსელში ანგელა მერკელის, მარიო დრაგისა და ალექსანდრ სტუბის კანდიდატურები განიხილება - POLITICO

ბრიუსელში რუსეთისა და უკრაინის ომთან დაკავშირებულ მოლაპარაკებების პროცესში ევროკავშირის წარმომადგენლად გერმანიის ყოფილი კანცლერის, ანგელა მერკელის, იტალიის ყოფილი პრემიერ-მინისტრის, მარიო დრაგისა და ფინეთის პრეზიდენტის, ალექსანდრ სტუბის კანდიდატურებს განიხილავენ. ინფორმაციას „პოლიტიკო“ ავრცელებს.გარდა ამისა, გამოცემა ამ პოზიციაზე ევროკავშირის საგარეო პოლიტიკური უწყების ხელმძღვანელს, კაია კალასსაც მოიხსენიებს.კალასი დიდი ხნის განმავლობაში ეწინააღმდეგებოდა რუსეთთან პირდაპირ მოლაპარაკებებს, თუმცა მოგვიანებით სპეციალური წარმომადგენლის დანიშვნის შესაძლებლობა არ გამორიცხა და განაცხადა, რომ ევროკავშირის საგარეო საქმეთა მინისტრები ამ საკითხს თვის ბოლოს განიხილავენ.„პოლიტიკოს“ ცნობით, გასულ კვირას კალასმა, ფაქტობრივად, საკუთარი კანდიდატურა თავად წამოაყენა და ჟურნალისტებს განუცხადა, რომ „შეუძლია, ამოიცნოს ის ხაფანგები, რომლებსაც რუსეთი აწყობს“.როგორც „პოლიტიკოს“ სტატიაშია აღნიშნული, ევროკავშირის სამი დიპლომატი აცხადებს, რომ კალასის მკაცრად ანტირუსული პოზიცია ვლადიმერ პუტინისთვის მის კანდიდატურას, პრაქტიკულად, გამორიცხავს.მერკელის კანდიდატურასთან დაკავშირებით გამოცემა აღნიშნავს, რომ მას ამ პოზიციის დაკავება შეუძლია და უშუალოდ ჰქონია ურთიერთობა როგორც ვოლოდიმირ ზელენსკისთან, ისე ვლადიმერ პუტინთან. ამავდროულად, ბევრი ევროპელი მიიჩნევს, რომ მისი წარსული წარუმატებელი შუამავლობის მცდელობები საკმარისია მისი კანდიდატურის გამოსარიცხად.სტატიის მიხედვით, სტუბის კანდიდატურასთან დაკავშირებით აღნიშნავენ გამოცდილებას შუამავლობაში საკუთარ ქვეყანაში და იმ ფაქტს, რომ ადრე თავად გამოხატა დაინტერესება. სტატიის თანახმად, მას ევროკავშირის ფართო მხარდაჭერა დასჭირდება, ხოლო ფინეთის ნატო-ში წევრობამ შესაძლოა, შანსები შეამციროს.რაც შეეხება მარიო დრაგის, როგორც გამოცემა წერს, ის ევროპაში ფართო პატივისცემით სარგებლობს და არც ზედმეტად ხისტ, არც კრემლისადმი სიმპათიების მქონედ არ მიიჩნევა. „პოლიტიკოს“ ცნობით, ამ ეტაპზე არ არსებობს საჯარო სიგნალები, რომ ეკონომიკაზე ორიენტირებულ დრაგის სურს ამ როლის შესრულება.„პოლიტიკოს“ ცნობით, ის ადამიანები, რომლებიც იცნობენ კიევის პოზიციას, აცხადებენ, რომ ევროკავშირის სპეციალურ წარმომადგენელს უნდა ჰქონდეს ბრიუსელის ძლიერი მხარდაჭერა, მაგრამ ამასთანავე, არ უნდა იყოს ევროკავშირის ინსტიტუტების წარმომადგენელი.სტატიის მიხედვით, ეს შეიძლება მიანიშნებდეს ისეთ ფიგურებზე, როგორიცაა ნორვეგიის საგარეო საქმეთა მინისტრი ესპენ ბარტ ეიდე, ან თუნდაც ინდოეთის საგარეო საქმეთა მინისტრი ჯაიშანკარი, რომელიც ორივე მხარესთან ინარჩუნებს ურთიერთობებს.გამოცემის შეფასებით, „რუსეთთან მომლაპარაკებლის შერჩევაში ყველაზე დიდი დაბრკოლება არ არის პუტინი ან ზელენსკი, არამედ ევროპელების უუნარობა, შეთანხმდნენ“.ამავდროულად, მედია იუწყება, რომ გერმანიაში ამ პოზიციაზე მოქმედი პრეზიდენტის, ფრანკ-ვალტერ შტაინმაიერის კანდიდატურის განხილვას გეგმავენ.