მსოფლიო • 1770120854

Reuters: რუსული გაზის ექსპორტი ევროპაში იანვარში 10%-ით გაიზარდა

რუსულმა ენერგოგიგანტმა „გაზპრომმა“ “თურქული ნაკადის“ მეშვეობით მიმდინარე წლის იანვარში ევროპაში გაზის ექსპორტი წინა წლის ანალოგიურ პერიოდთან შედარებით 10,3%-ით გაზარდა. ინფორმაციას Reuters-ი ავრცელებს.სააგენტოს ცნობით, „თურქული ნაკადი“ გახდა ერთადერთი მარშრუტი, რომლითაც რუსეთი ევროპას გაზს აწვდის, მას შემდეგ, რაც უკრაინამ ხუთწლიანი ტრანზიტული შეთანხმება, რომელსაც ვადა 2025 წელს ამოეწურა, აღარ გააგრძელა.როგორც Reuters-ი აღნიშნავს, ევროპაში „თურქული ნაკადის“ მეშვეობით რუსული გაზის ექსპორტმა იანვარში 1,73 მილიარდი კუბური მეტრი შეადგინა. გასულ წელს ეს მაჩვენებელი 1,57 კუბურ მეტრს შეადგენდა.ზოგადად, 2025 წელს უკრაინული მარშრუტის დახურვის შემდეგ „გაზპრომმა“ ევროპაში რუსული გაზის ექსპორტი 44%-ით შეამცირა, რაც 1970-იანი წლების შემდეგ ყველაზე დაბალი მაჩვენებელია. გასულ წელს ექსპორტირებული გაზის მოცულობამ 18 მილიარდი კუბური მეტრი შეადგინა.

მსოფლიო • 1770120300

ელინა ვალტონენი არ ეთანხმება მოსაზრებას, რომ ევროპელმა ლიდერებმა რუსეთთან მოლაპარაკება უნდა გამართონ - „ევროპელებსა და პუტინს შორის სატელეფონო საუბარი არასწორ სიგნალს გააგზავნიდა“

ფინეთის საგარეო საქმეთა მინისტრი ელინა ვალტონენი არ ეთანხმება მოსაზრებას, რომ ევროპელმა ლიდერებმა რუსეთის ხელმძღვანელობასთან მოლაპარაკება უნდა გამართონ.„ევროპელებსა და პუტინს შორის ამ დროს სატელეფონო საუბარი სრულიად არასწორ სიგნალს გააგზავნიდა“, – აღნიშნა ვალტონენმა.მანამდე საფრანგეთისა და იტალიის ლიდერებმა განაცხადეს, რომ ემხრობიან რუსეთთან საუბრის დაწყებას.ფინეთის საგარეო საქმეთა მინისტრი აშშ-ის პრეზიდენტს, დონალდ ტრამპს მოუწოდებს, მნიშვნელოვნად გააძლიეროს ზეწოლა რუსეთზე.„მოსკოვს შეუძლია, ეს ომი ნებისმიერ დროს დაასრულოს, მაგრამ შეგნებულად ირჩევს, ეს არ გააკეთოს. ამიტომ ჩემი გზავნილი ჩვენი ამერიკელი მეგობრებისთვის ასეთია: შეხედეთ უფრო ფართო სურათს. უკრაინა მზად არის მშვიდობისთვის, რუსეთი კი – არა. ახლა აშშ-მა გადამწყვეტი ზეწოლა უნდა მოახდინოს რუსეთზე, რათა ეს ომი დასრულდეს“, – აღნიშნა ვალტონენმა.

პოლიტიკა • 1770118020

აჩიკო ბერიძე: საქართველოს ხელისუფლებამ ყველაფერი გააკეთა იმისთვის, რომ ჩვენი ცა ყოფილიყო მშვიდი, რომ ქვეყანა არ აჰყოლოდა იმ პროვოკაციებს, რომლებიც მოდიოდა როგორც ზოგიერთი ევრობიუროკრატისგან, ასევე შიდა ძალებისგან

საქართველოს ხელისუფლებამ ყველაფერი გააკეთა იმისთვის, რომ ჩვენი ცა ყოფილიყო მშვიდი, რომ ქვეყანა არ აჰყოლოდა იმ პროვოკაციებს, რომლებიც მოდიოდა როგორც ზოგიერთი ევრობიუროკრატისგან, ასევე შიდა ძალებისგან, რომელთაც სურდათ საქართველო ჩართულიყო რუსეთ–უკრაინის კონფლიქტში, - განაცხადა საპარლამენტო უმრავლესობის წევრმა, აჩიკო ბერიძემ პარლამენტის საგაზაფხულო სესიის პირველ სხდომაზე.მისივე თქმით, დღეს, კიდევ უფრო ნათელია თუ როგორი დამანგრეველი შედეგი შეიძლებოდა მოჰყოლოდა „მოხალისეების ჩარტერული რეისით გაგზავნას“ და სხვა მსგავს პროვოკაციულ ქმედებებს.„ჩვენ ხშირად ვსვამთ კითხვას — თუ, რამ გადაარჩინა საქართველო? რამ მოგვიყვანა დღემდე? როგორ გაუძლო ამ პატარა ერმა საუკუნეების განმავლობაში ამდენ ქარტეხილს, შემოტევას, ომსა და ზეწოლას? როგორ მოახერხა საქართველომ, რომ 21-ე საუკუნეში, მაშინ როდესაც რუკებიდან გაქრა მრავალი, დიდი თუ პატარა, სახელმწიფო, ჩვენ კვლავ ვაგრძელებთ ჩვენი ისტორიის წერას. ამ კითხვაზე პასუხი არის ჩვენს იდენტობაში, სარწმუნოებაში. ჩვენს დედა ეკლესიაში, რომელიც საუკუნეების განმავლობაში აერთიანებდა და აერთიანებს ქართველ ერს. პასუხი არის იმ სახელმწიფოებრივ სიბრძნეში, რომლის საფუძველზეც ჩვენი მეფეები და ხელისუფალნი, ქართველი ხალხის თანადგომით, ყველაზე მძიმე პერიოდებში ირჩევდნენ ეროვნულ ინტერესებზე დაფუძნებულ, ხშირად მტკივნეულ, თუმცა ერთადერთ სწორ გზას.სწორედ, ამ ისტორიული გამოცდილების გაგრძელებაა ის პოლიტიკა, რომელსაც დღეს ჩვენი გუნდი ახორციელებს მაშინ, როდესაც მსოფლიო დგას უმძიმესი გეოპოლიტიკური რყევების წინაშე, როდესაც საერთაშორისო სამართალი ფაქტობრივად გაუქმებულია, როდესაც დემოკრატიის იდეა ჩანაცვლებულია ძალის პრინციპით — ვისაც მეტი ძალა აქვს, ის წყვეტს ყველაფერს — ჩვენმა ქვეყანამ შეძლო ყველაზე მთავარი: შეინარჩუნა მშვიდობა!საქართველოს ხელისუფლებამ ყველაფერი გააკეთა იმისთვის, რომ ჩვენი ცა ყოფილიყო მშვიდი, რომ ქვეყანა არ აჰყოლოდა იმ პროვოკაციებს, რომლებიც მოდიოდა როგორც ზოგიერთი ევრობიუროკრატისგან, ასევე შიდა ძალებისგან, რომელთაც სურდათ საქართველო ჩართულიყო რუსეთ–უკრაინის კონფლიქტში. ყველას კარგად გვესმის, თუ რამდენად ძვირი შეიძლებოდა დაჯდომოდა ჩვენს ქვეყანას ერთი უპასუხისმგებლო გადაწყვეტილება, ერთი არასწორი ნაბიჯიც კი.დღეს, კიდევ უფრო ნათელია თუ როგორი დამანგრეველი შედეგი შეიძლებოდა მოჰყოლოდა „მოხალისეების ჩარტერული რეისით გაგზავნას“ და სხვა მსგავს პროვოკაციულ ქმედებებს, განსაკუთრებით იმის ფონზე თუ როგორ გაწირეს უკრაინა და უკრაინელი ხალხი. და ამ დროს, როდესაც მსოფლიო ფაქტობრივად მესამე მსოფლიო ომის ზღვარზე დგას, როდესაც ნატოს წევრი ქვეყანა ნატოს წევრ ქვეყანას ტერიტორიული ანექსიით ემუქრება, — ჩვენთან რადიკალური ძალები ქვეყნის შიგნით და მათი დამკვეთები ქვეყნის გარედან კვლავ აქტიურად ცდილობენ, რამენაირად შემოიტანონ დესტაბილიზაცია, ქაოსი, დააზიანონ ჩვენი ქვეყნის ინტერესები და საქართველო, დაუნდობელი, გეოპოლიტიკური დაპირისპირების თანამონაწილედ აქციონ.ჩვენნაირ პატარა სახელმწიფოს, რომელსაც გეოპოლიტიკურ პროცესებზე გავლენის მოხდენა არ შეუძლია, ამ დროს ყველაზე მეტად სჭირდება შიდა ერთიანობა და პასუხისმგებლობა, განსაკუთრებით საგარეო პოლიტიკაში.მადლობა ღმერთს, რომ ამ ისტორიულ ეტაპზე ქართველ ხალხს ჰყავს ეროვნული ხელისუფლება ბატონი ირაკლი კობახიძის ხელმძღვანელობით, და ჰყავს ბატონი ბიძინა ივანიშვილი, რომლის უდიდესი წვლილია იმაში, რომ საქართველო დღეს ამ ბეწვის ხიდს მშვიდობით გადის. ივანიშვილი, რომლის უდიდესი წვლილია იმაში, რომ საქართველო დღეს ამ ბეწვის ხიდს მშვიდობით გადის. ომის ნაცვლად — ინვესტიციები. ქაოსის ნაცვლად — სტაბილურობა. ნგრევის ნაცვლად — განვითარება. დღეს საქართველო ირჩევს მშვიდობას — ეს არის სიძლიერე და არა სისუსტე.დღეს საქართველო ირჩევს განვითარებას —ეს არის გონიერება და არა შიში. დღეს საქართველო ირჩევს საკუთარ ინტერესს — და არა სხვის დაკვეთას. დღეს საქართველო ირჩევს სიცოცხლეს — და არა მსხვერპლად შეწირვას.დღეს, ქვეყანაში, წამყვანი საერთაშორისო კომპანიების მხრიდან ხორციელდება უპრეცედენტო ინვესტიციები, მიმდინარეობს აქტიური ბრძოლა კორუფციისა და ნარკოდანაშაულის წინააღმდეგ, აქტიურ ეტაპზეა განათლების რეფორმა, მუდმივად იზრდება ხელფასები, იხვეწება და ძლიერდება სოციალური პოლიტიკა, დაწყებულია საკვებ პროდუქტებზე, მედიკამენტებსა და საწვავზე ფასების რეგულირების აქტიური ეტაპი. არ უნდა დაგვავიწყდეს, რომ ამ ყვეალფერს ვახორციელებთ მუდმივი თავდასხმების ფონზე. მჯერა, რომ ჩვენი სწორი, თანმიმდევრული პოლიტიკის წყალობით ჩვენ შევძლებთ საქართველოს, როგორც აბრეშუმის გზის განუყოფელი ნაწილის, ისტორიული როლის დაბრუნებას, და ჩვენი ქვეყნის ერთიანობის აღდგენას. მჯერა, რომ ეს პროცესი იქნება ჩვენი ქვეყნის საბოლოოდ გაბრწყინების დასაწყისი — ძლიერი, თანამედროვე, მშვიდობიანი საქართველოსი, ისეთი, როგორიც არასდროს ყოფილა“, - განაცხადა აჩიკო ბერიძემ.

პოლიტიკა • 1770117065

ლევან მახაშვილი: ვინც არ უნდა გაგვაკრიტიკოს, ვინც არ უნდა უსამართლოდ მოგვექცეს, მთავარია გვახსოვდეს და დავიცვათ ჩვენი ორი უმთავრესი ეროვნული ინტერესი - მოსახლეობის კეთილდღეობის ზრდა და ქვეყნის გაერთიანება

ევროპასთან ინტეგრაციის კომიტეტის თავმჯდომარემ ლევან მახაშვილმა პარლამენტის პლენარულ სხდომაზე 4 წლის წინ, საქართველოს პარლამენტის მიერ მიღებული უკრაინის მხარდამჭერი რეზოლუციიდან ნაწყვეტი წაიკითხა და აღნიშნა, რომ რეზოლუციის მიღების მიზანს სისხლიანი ომის არდაშვება წარმოადგენდა.„ვციტირებ - „მიიჩნევს, რომ უკრაინაში ომის არდაშვება უნდა იყოს საერთაშორისო თანამეგობრობის უმთავრესი საზრუნავი. სოლიდარობას უცხადებს მეგობარ უკრაინელ ხალხს, რომელსაც ყოველგვარი შესაძლო სამხედრო ესკალაციით მძიმე ზიანი შეიძლება მიადგეს“.მაშინ დარბაზში მყოფმა არც ერთმა ოპოზიციურმა პარტიამ ამ რეზოლუციას მხარი არ დაუჭირა, უფრო მეტიც, მას რუსული რეზოლუცია უწოდეს. არადა, ამ რეზოლუციის ერთადერთი მიზანი 21-ე საუკუნის ყველაზე სისხლიანი ომის არდაშვება იყო. მაშინ ხელისგულზე იდო ის ზიანი, რაც უკრაინას და არა მხოლოდ უკრაინელებს მიადგებოდათ. და ვინ აღმოჩნდა მაშინ მართალი? გავიდა ოთხი წელი და ამ დებულებებს ამერიკის პრეზიდენტი ყოველდღიურად იმეორებს. გავიდა ოთხი წელი და თითოეული დებულება, რომელიც ამ რეზოლუციაში ეწერა სიტყვა-სიტყვით ახდა და რეალობად იქცა. გავიდა ოთხი წელი და აღმოჩნდა, რომ საქართველოს ხელისუფლების დაბალანსებულმა, პასუხისმგებლობიანმა პოლიტიკამ გადაარჩინა ეს ქვეყანა ნაკუწებად დაშლას. და სად არის ეს ხალხი, ვინც მაშინ ამას ხელი არ მოაწერა? სად არიან ისინი, ვინც მაშინ ამ ომს აქეზებდა? და ვისაც ომის დაშვება არ უნდოდა, მათ პრორუსებად ნათლავდნენ“, - განაცხადა პარლამენტის პლენარულ სხდომაზე ლევან მახაშვილმა.მისივე თქმით, დღეს ყველა ქვეყანა თავის პოლიტიკას ატარებს - ზოგი რუსეთს უფრთხის, ზოგი - ჩინეთს და ზოგი კიდევ ამერიკას. ზოგმა კი საერთოდ გადაწყვიტა საქართველოს კანონმდებლობის გვერდის ავლით საქართველოს შიდა პოლიტიკაზე გავლენის მოხდენა და ქართველი ხალხის სახელით საუბარი.„დიდ ძალებს შორის დაპირისპირებამ დღეს სრულიად ახალი რეალობა შექმნა, სადაც თითოეული ქვეყანა თავის პოლიტიკას წინა ხაზზე აყენებს და სწორედ აქ ჩნდება მთავარი კითხვა - რატომ ეწოდება ერთ შემთხვევაში ამას პრაგმატიზმი და ეროვნული ინტერესების დაცვა, და როცა მიუღებელია, მეორე შემთხვევაში - დასავლური კურსიდან გადახვევა? გეოპოლიტიკური პროცესები ყველა ფლანგზე მიმდინარეობს, მაგრამ მთავარია, ჩვენ ვიცოდეთ რა გვინდა, რისთვის ვიბრძვით და რა არის ჩვენი ეროვნული ინტერესები? თავის დროზე, როდესაც ჩვენ ვიცოდით თუ რა იყო ჩვენი ეროვნული ინტერესები და გვქონდა პასუხისმგებლობიანი სახელმწიფოებრივი პოლიტიკა, ამან აგვარიდა ყველაზე მძიმე სცენარებს.დღეს ვინც არ უნდა გაგვაკრიტიკოს, ვინც არ უნდა უსამართლოდ მოგვექცეს, ვინც არ უნდა აბსურდული, უშინაარსო რეზოლუციები მიიღოს, ჩვენთვის მთავარია გვახსოვდეს და დავიცვათ ჩვენი ორი უმთავრესი ეროვნული ინტერესი - მოსახლეობის კეთილდღეობის ზრდა და ქვეყნის გაერთიანება. ასეთ შემთხვევაში არ არსებობს დაბრკოლება, რომელსაც ჩვენი ქვეყანა ვერ გადალახავს და სწორედ ასე შევძლებთ ერთობით სამშვიდობოს გასვლას“, - განაცხადა ლევან მახაშვილმა.

პოლიტიკა • 1770116738

პრემიერი: ბოლო ხუთი წლის განმავლობაში საქართველო ყველაზე სწრაფად მზარდი ქვეყანაა ევროპაში. მსოფლიო მრავალი გამოწვევის წინაშეა, კონტექსტი საქართველოსთვისაც რთულია, მაგრამ წარმატებით ვახერხებთ სწრაფი ეკონომიკური ზრდის უზრუნველყოფას

ბოლო ხუთი წლის განმავლობაში საქართველო ყველაზე სწრაფად მზარდი ქვეყანაა ევროპაში - 2021 წლიდან 2025 წლამდე ჩვენი საშუალო წლიური ეკონომიკური ზრდა 9.3% იყო, - განაცხადა საქართველოს პრემიერ-მინისტრმა ირაკლი კობახიძემ 2026 წლის მსოფლიო მთავრობათა სამიტის ფარგლებში გამართულ მრგვალი მაგიდის ფორმატის შეხვედრაზე „ინვესტიციების მომავალი“ სიტყვით გამოსვლისას.პრემიერის თქმით, ქვეყნის პოლიტიკური კონტექსტი საკმაოდ რთულია რეგიონში, თუმცა ამ სირთულეების მიუხედავად, პოლიტიკური სტაბილურობა და უწყვეტი მშვიდობა გვაქვს.„მსოფლიო ამჟამად მრავალი გამოწვევის წინაშე იმყოფება, მათ შორის ეკონომიკური განვითარების სფეროში. ამგვარ სიტუაციაში, კონტექსტი საქართველოსთვისაც საკმაოდ რთულია, მაგრამ აქამდე წარმატებით ვახერხებთ სწრაფი ეკონომიკური ზრდის უზრუნველყოფას. ბოლო ხუთი წლის განმავლობაში, თუ მაჩვენებლებით ვიმსჯელებთ, საქართველო ყველაზე სწრაფად მზარდი ქვეყანაა ევროპაში. 2021 წლიდან 2025 წლამდე ჩვენი საშუალო წლიური ეკონომიკური ზრდა 9.3% იყო.ასევე, საერთაშორისო სავალუტო ფონდის პროგნოზით, საქართველო მსოფლიოს პირველ ათეულშია ეკონომიკური ზრდის მიხედვით. ამას რამდენიმე მიზეზი ამყარებს - პირველია პოლიტიკური სტაბილურობა. ვიტყოდი, რომ ქვეყნის პოლიტიკური კონტექსტი საკმაოდ რთულია რეგიონში - უკრაინაში ომი მიმდინარეობს და ჩვენს ირგვლივ არსებული სიტუაცია საერთო ჯამში არ არის მარტივი. თუმცა, ამ სირთულეების მიუხედავად, პოლიტიკური სტაბილურობა და უწყვეტი მშვიდობა გვაქვს“, - განაცხადა პრემიერმა.

მსოფლიო • 1770114884

მარკ რუტე კიევში ჩავიდა

ნატო-ს გენერალური მდივან მარკ რუტე უკრაინაში იმყოფება. ის უკრაინის პრეზიდენტ ვოლოდიმირ ზელენსკისთან ერთად კიევში ეროვნული ხსოვნის სახალხო მემორიალს ეწვია.როგორც ზელენსკი სოციალურ ქსელში წერს, მათ პატივი მიაგეს იმ გმირების ხსოვნას, რომლებმაც ქვეყნის დასაცავად თავი გაწირეს.„დამოუკიდებლობის მოედანი. ეროვნული ხსოვნის სახალხო მემორიალი. მემორიალი, რომელიც პატივს მიაგებს ჩვენს გმირებს, მეომრებს, ჩვენს ხალხს, რომლებმაც დაიცვეს უკრაინა მტრისგან, იბრძოდნენ და უდიდესი მსხვერპლი გაიღეს ამ ომში. ნატო-ს გენერალურ მდივან მარკ რუტესთან ერთად დღეს პატივი მივაგე დაღუპული უკრაინელი დამცველების ხსოვნას. მარადიული პატივი ჩვენს მეომრებს. მარადიული მადლიერება მათი თავგანწირვისა და ქვეყნის დაცვისთვის. ჩვენი მოვალეობაა, შევინარჩუნოთ ჩვენი დაღუპული გმირების ხსოვნა“, – წერს ის.

მსოფლიო • 1770111939

უკრაინამ „ისლამური რევოლუციის გუშაგთა კორპუსი“ ტერორისტულ ორგანიზაციად გამოაცხადა

უკრაინამ „ისლამური რევოლუციის გუშაგთა კორპუსი“ ტერორისტულ ორგანიზაციად გამოაცხადა, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.ზელენსკის თქმით, უკრაინა მხარს უჭერს იმ ხალხს, ვინც აფასებს თავისუფლებას და ნამდვილად მზად არიან მისთვის იბრძოლონ.„მთელი მსოფლიო ხედავს, თუ რა ხდება ირანში, მკვლელობების რაოდენობას და როგორ შეუწყო ხელი ირანის რეჟიმმა ომისა და ძალადობის გავრცელებას რეგიონში და მთელ მსოფლიოში. უკრაინა არ დაივიწყებს ათასობით „შაჰედს“, რომლებიც თავს ესხმიან ჩვენს ქალაქებსა და სოფლებს, ჩვენს ხალხს. ჩვენ, უკრაინაში, უკვე მივიღეთ ეს გადაწყვეტილება და ეს ორგანიზაცია ტერორისტულად გამოვაცხადეთ, ჩვენთვის ეს საკითხი დახურულია. მსოფლიოში ყველა ტერორისტი იმსახურებს თანაბარ მოპყრობას და დაგმობას – ვერცერთი არ უნდა გაიმარჯვოს“, – განაცხადა ვოლოდიმირ ზელენსკიმ.

პოლიტიკა • 1770106010

პრემიერი: შევდივართ ფაზაში, სადაც გეოგრაფია კვლავ მნიშვნელოვანია, სადაც სტაბილურობა კონკურენტულ უპირატესობად იქცევა და სადაც ურთიერთობების შენარჩუნების უნარი დიპლომატიური ხიბლი კი არა, ეკონომიკური აუცილებლობაა

შევდივართ პირველ ფაზაში, სადაც გეოგრაფია კვლავ მნიშვნელოვანია, სადაც სტაბილურობა კონკურენტულ უპირატესობად იქცევა და სადაც ურთიერთობების შენარჩუნების უნარი, დიპლომატიური ხიბლი კი არა, ეკონომიკური აუცილებლობაა, - განაცხადა საქართველოს პრემიერ-მინისტრმა ირაკლი კობახიძემ 2026 წლის მსოფლიო მთავრობათა სამიტზე სიტყვით გამოსვლისას.მისივე თქმით, დღეს, მსოფლიოს კომერციული მარშრუტები არა საბაზრო ეკონომიკის უხილავი ხელით, არამედ გეოპოლიტიკის ძალიან მკაფიო მუშტით იცვლება.„გავიაზროთ, რა დაემართა გლობალურ ვაჭრობას ბოლო რამდენიმე წლის განმავლობაში. ჩრდილოეთის დერეფნები, რომლებიც ოდესღაც ეფექტურად ახორციელებდნენ საქონლის გადაზიდვას ევროპასა და აზიას შორის, მნიშვნელოვნად დაზარალდა უკრაინაში მიმდინარე ომის გამო; მიწოდების ჯაჭვები, რომელთა შენებას ათწლეულები სჭირდებოდა, ერთ დღეში ჩამოიშალა; ბიზნესები, რომლებიც ეფექტურობის გაზრდას გეგმავდნენ, მოულოდნელად აღმოჩნდნენ გადარჩენისთვის ბრძოლის რეჟიმში.აღმოსავლეთით თუ გავიხედავთ, დავინახავთ, რომ წყნარი ოკეანის სავაჭრო მარშრუტები სულ უფრო პოლიტიზებულია დიდი სახელმწიფოების დაძაბულობის გამო. ტარიფებმა, სანქციებმა და სტრატეგიულმა გამიჯვნებმა ის, რაც ოდესღაც მსოფლიოში ყველაზე დინამიკური კომერციული ურთიერთობა იყო, რთულ გეოპოლიტიკურ დაპირისპირებად აქცია. ყველაზე ტრადიციული პარტნიორობებიც კი უპრეცედენტო უთანხმოების წინაშე დგანან. სავაჭრო დავებმა და პოლიტიკურმა უთანხმოებებმა ოდესღაც სტაბილურ ურთიერთობებში გაურკვევლობა შეიტანა.ეს არ არის ის ეკონომიკური გლობალიზაცია, რომელიც ადრე გვესმოდა. ახლა შევდივართ პირველ ფაზაში, სადაც გეოგრაფია კვლავ მნიშვნელოვანია, სადაც სტაბილურობა კონკურენტულ უპირატესობად იქცევა და სადაც ურთიერთობების შენარჩუნების უნარი დიპლომატიური ხიბლი კი არა, ეკონომიკური აუცილებლობაა,“- აღნიშნა პრემიერმა.

ომი უკრაინაში • 1770095656

უკრაინული დელეგაცია აბუ-დაბიში გაემგზავრა, სადაც 4-5 თებერვალს რუსეთთან მოლაპარაკებებს გამართავს

 უკრაინის დელეგაციის წევრები არაბთა გაერთიანებული საამიროების დედაქალაქ აბუ-დაბიში გაემგზავრნენ, სადაც 4-5 თებერვალს უკრაინა-აშშ-რუსეთის სამშვიდობო მოლაპარაკებები გაიმართება. ინფორმაცია უკრაინის პრეზიდენტმა, ვოლოდიმირ ზელენსკიმ გაავრცელა.„დღეს ჩვენს დელეგაციასთან თათბირი გავმართეთ. ბიჭები უკვე გზაში არიან. შეხვედრები [აშშ-თან და რუსეთთან] ოთხშაბათს და ხუთშაბათს გაიმართება“, - განაცხადა ზელენსკიმ საღამოს ტრადიციული ვიდეომიმართვის დროს.მან აგრეთვე დასძინა, რომ სამმხრივი ფორმატის გარდა უკრაინული დელეგაცია ორმხრივ რეჟიმში გამართავს მოლაპარაკებებს ამერიკულ მხარესთან.

მსოფლიო • 1770060277

ზელენსკი: მივიჩნევთ, რომ ღირსეული და მდგრადი მშვიდობის მიღწევა რეალისტურია - ომი უნდა დასრულდეს

ჩვენ მივიჩნევთ, რომ ღირსეული და მდგრადი მშვიდობის მიღწევა რეალისტურია, - განაცხადა უკრაინის პრეზიდენტმა, ვოლოდიმირ ზელენსკიმ.„სამმხრივი მოლაპარაკებების ახალი რაუნდის წინ შევხვდი ჩვენს მომლაპარაკებელთა გუნდს. ველოდებით, რომ შეხვედრები უახლოეს დღეებში, შესაძლოა უკვე ამ ოთხშაბათსა და ხუთშაბათს გაიმართოს.დღევანდელ შეხვედრას მომლაპარაკებელი გუნდის თითქმის ყველა წევრი ესწრებოდა, კერძოდ: რუსტემ უმეროვი, კირილო ბუდანოვი, სერგი კისლიცია, ანდრიი ჰნატოვი და ალექსანდრე ბევზი. მოლაპარაკებებში ასევე მიიღებს მონაწილეობას დავით არახამია. მე დავამტკიცე მოლაპარაკებების ჩარჩოები და განვსაზღვრე კონკრეტული ამოცანები.უკრაინული დელეგაცია ასევე გამართავს ორმხრივ შეხვედრებს ამერიკულ მხარესთან. უკრაინა მზად არის რეალური ნაბიჯებისთვის. ჩვენ მივიჩნევთ, რომ ღირსეული და მდგრადი მშვიდობის მიღწევა რეალისტურია. მივიჩნევთ, რომ ამერიკის შეერთებულ შტატებთან ორმხრივი უსაფრთხოების გარანტიების დოკუმენტი დასრულებულია და ველით შემდგომ შინაარსობრივ მუშაობას დოკუმენტებზე, რომლებიც ეხება აღდგენასა და ეკონომიკურ განვითარებას.ასევე მოველით, რომ ამერიკული მხარე კვლავინდებურად გადამწყვეტ როლს შეასრულებს დიალოგისთვის აუცილებელი პირობების უზრუნველყოფაში. დეესკალაციის ზომები, რომლებიც ძალაში გასულ ხუთშაბათს, გვიან ღამით შევიდა, ხელს უწყობს მოლაპარაკებების პროცესისა და მისი შესაძლო შედეგებისადმი საზოგადოებრივი ნდობის ჩამოყალიბებას. ომი უნდა დასრულდეს. მადლობა ყველას მსოფლიოში, ვინც გვეხმარება. დიდება უკრაინას!“ - დასძინა ზელენსკიმ.  I met with our negotiating team ahead of the new round of trilateral talks. We expect the meetings to take place in the coming days, as early as this Wednesday and Thursday.Nearly all members of the negotiating team attended today’s meeting, namely Rustem Umerov, Kyrylo… pic.twitter.com/OPhK6wyWlN — Volodymyr Zelenskyy / Володимир Зеленський (@ZelenskyyUa) February 2, 2026

მსოფლიო • 1770050497

Agence France-Presse: იანვრის განმავლობაში რუსულმა ჯარებმა უკრაინაში წინსვლა დააჩქარეს და წინა თვესთან შედარებით თითქმის ორჯერ მეტი ტერიტორია დაიკავეს

იანვარში რუსეთის არმიამ უკრაინაში 481 კვ.კმ ტერიტორია დაიკავა, რაც თითქმის ორჯერ მეტია დეკემბრის მაჩვენებელზე. წინსვლა ძირითადად დონბასშია კონცენტრირებული, რომელიც მიმდინარე მოლაპარაკებების ცენტრალურ საკითხს წარმოადგენს.იანვრის განმავლობაში რუსულმა ჯარებმა უკრაინაში წინსვლა დააჩქარეს და წინა თვესთან შედარებით თითქმის ორჯერ მეტი ტერიტორია დაიკავეს. აღნიშნული მონაცემები ეყრდნობა AFP-ის ანალიზს, რომელიც მომზადებულია ომის შესწავლის ინსტიტუტისა (ISW) და Critical Threats Project-ის მონაცემებზე დაყრდნობით.იანვარში რუსეთმა 481 კვადრატული კილომეტრი დაიკავა, მაშინ როცა 2025 წლის დეკემბერში ეს მაჩვენებელი 244 კვადრატულ კილომეტრს შეადგენდა. ეს არის ზამთრის თვეებში დაფიქსირებული ერთ-ერთი ყველაზე მნიშვნელოვანი წინსვლა 2022 წელს რუსეთის სრულმასშტაბური შეჭრის დაწყების შემდეგ. ეს წინსვლა იმ ფონზე ხდება, როდესაც უკრაინაში ექსტრემალურად დაბალი ტემპერატურაა, რაც მნიშვნელოვნად ართულებს შეტევითი ოპერაციების განხორციელებას.„რუსეთის არმია ამჟამად ლუგანსკის ოლქის თითქმის მთელ ნაწილსა და დონეცკის ოლქის ტერიტორიის 83%-ს აკონტროლებს“, - ნათქვამია სტატიაში.მიმდინარე დიპლომატიური მოლაპარაკებების ფარგლებში, რუსეთი ითხოვს, რომ უკრაინულმა ძალებმა დატოვონ დონეცკის ოლქის ის ნაწილები, რომლებიც ჯერ კიდევ მათ კონტროლქვეშაა, რაზეც კიევი ამ დრომდე უარს აცხადებს.

მსოფლიო • 1770048660

AXIOS: უკრაინისა და რუსეთის მოლაპარაკებებს, რომელიც უახლოეს დღეებში აბუ-დაბიში უნდა გაიმართოს, სტივ უიტკოფი დაესწრება

უკრაინისა და რუსეთის მოლაპარაკებებს, რომელიც უახლოეს დღეებში აბუ-დაბიში უნდა გაიმართოს, აშშ-ის პრეზიდენტის სპეციალური წარმომადგენელი, სტივ უიტკოფი დაესწრება. ამის შესახებ ამერიკელ მაღალჩინოსანზე დაყრდნობით AXIOS-ის ჟურნალისტმა, ბარაკ რავიდმა განაცხადა.მაღალჩინოსანმა განაცხადა, რომ უიტკოფი სამშაბათს ისრაელში ჩავა, სადაც ქვეყნის პრემიერ-მინისტრ ბენიამინ ნეთანიაჰუსა და სხვა მაღალი რანგის ოფიციალურ პირებს შეხვდება.რავიდი წერს, რომ ისრაელის შემდეგ ტრამპის სპეციალური წარმომადგენელი აბუ-დაბიში გაემგზავრება, სადაც უკრაინასა და რუსეთთან მოლაპარაკებების მორიგ რაუნდს გამართავს.