უკრაინა

კიტ კელოგთან შეხვედრაზე განვიხილეთ, როგორ შეგვიძლია, გავლენა მოვახდინოთ რუსებზე, ვაიძულოთ, რეალურ მოლაპარაკებებში ჩაერთონ და დავასრულოთ ომი - ზელენსკი

უკრაინის პრეზიდენტი ვოლოდიმირ ზელენსკი აშშ-ის პრეზიდენტის სპეციალურ წარმომადგენელს, კიტ კელოგს შეხვდა.ზელენსკის თქმით, მადლობელია აშშ-ის მხარდაჭერისთვის და ძალიან აფასებს შეერთებული შტატების მზადყოფნას, იყოს უკრაინის უსაფრთხოების გარანტიის ნაწილი.„ძალიან მნიშვნელოვანია ვაშინგტონში ევროპელ ლიდერებთან ჩვენი შეხვედრის დროს მიღწეული ყველა შედეგის – პოლიტიკური, თავდაცვისა და ეკონომიკური – რეალიზება. უდავოა, რომ ეს იყო წარმატებული სამიტი, ევროპისა და აშშ-ის ნამდვილი ერთიანობის დემონსტრირება. უკრაინა, როგორც ყოველთვის, აერთიანებს მსოფლიოს. ჩვენ ვაფასებთ შეერთებული შტატების მზადყოფნას, იყოს უკრაინის უსაფრთხოების გარანტიების ნაწილი და ჩვენი გუნდები აქტიურად მუშაობენ მის ჩამოყალიბებაზე. ჩვენ ველოდებით, რომ უსაფრთხოების ძირითადი საფუძვლები მალე განისაზღვრება. ჩვენ განვიხილეთ, თუ როგორ შეგვიძლია, გავლენა მოვახდინოთ რუსებზე, ვაიძულოთ ისინი, რეალურ მოლაპარაკებებში ჩაერთონ და დავასრულოთ ომი. სანქციები, ტარიფები – ყველაფერი დღის წესრიგში უნდა დარჩეს. ჩვენ მზად ვართ, ლიდერების ფორმატში ჩავერთოთ. ეს არის ფორმატი, რომელიც საჭიროა ძირითადი საკითხების გადასაჭრელად. ახლა იგივე მზადყოფნაა საჭირო მოსკოვისგანაც“, – წერს ზელენსკი.ამასთან, უკრაინის პრეზიდენტმა ჰუმანიტარულ საკითხზე ისაუბრა და იმედი გამოთქვა, რომ უკრაინა შეძლებს ყველა გატაცებული ბავშვის დაბრუნებას.„ჩვენ იმედი გვაქვს, რომ აშშ, აშშ-ის პრეზიდენტი და პირველი ლედი გააგრძელებენ პირად ძალისხმევას რუსეთის მიერ უკანონოდ გატაცებული ყველა ბავშვის დასაბრუნებლად“, – წერს ზელენსკი.

მსოფლიო • 25 აგვ 18:38

ტრამპმა გააფრთხილა რუსეთი, რომ შესაძლოა ძალიან დიდი შედეგები დადგეს, თუ უკრაინაში ომს არ შეაჩერებს

აშშ-ის პრეზიდენტმა, დონალდ ტრამპმა გააფრთხილა რუსეთი, რომ შესაძლოა „ძალიან დიდი შედეგები“ დადგეს, თუ უკრაინაში ომს არ შეაჩერებს.მისი თქმით, „ძალიან მკაცრად ჩაერევა“, თუ ბრძოლის დასასრულებლად შეთანხმება უახლოესი ორი კვირის განმავლობაში არ შედგება.„შესაძლოა, ძალიან დიდი შედეგები დადგეს, მაგრამ ვნახოთ, რა მოხდება. შესაძლოა, ძალიან დიდი შედეგები იყოს, რადგან ეს ისეთი რამეა, რაც უნდა დასრულდეს“, - აღნიშნა აშშ-ის პრეზიდენტმა.„ვნახავთ, რა მოხდება მომდევნო ერთი-ორი კვირის განმავლობაში, რის შემდეგაც მე ძალიან მკაცრად ჩავერევი. თუ ჩემი იქ ყოფნა საჭირო იქნება, მე იქ ვიქნები და ან შეთანხმებას მივაღწევთ, ან არა“, - დასძინა მან.

მსოფლიო • 25 აგვ 17:40

აშშ უკრაინის უსაფრთხოების გარანტიებს ზურგს გაუმაგრებს, თუმცა დეტალებზე ჯერ არ გვიმსჯელია - დონალდ ტრამპი

აშშ უკრაინის უსაფრთხოების გარანტიებს ზურგს გაუმაგრებს, თუმცა დეტალებზე ჯერ არ გვიმსჯელია, – ამის შესახებ აშშ-ის პრეზიდენტმა, დონალდ ტრამპმა ჟურნალისტებთან საუბრისას განაცხადა.„ჩვენ ჯერ არ ვიცით, როგორი იქნება უკრაინის უსაფრთხოების გარანტიები, რადგანაც ამ დეტალებზე დისკუსია არ გვქონია. ვნახოთ, რა მოხდება. უპირველესი ისაა, რომ ევროპა უკრაინას მისცემს უსაფრთხოების მნიშვნელოვან გარანტიებს და ეს ასეც უნდა იყოს, რადგანაც ისინი იქვე არიან, მაგრამ ჩვენც ვიქნებით ჩართულები. ჩვენ ვიქნებით ზურგის გამაგრების თვალსაზრისით, ჩვენ მათ დავეხმარებით. მე ვფიქრობ, რომ თუ ჩვენ მივაღწევთ შეთანხმებას და მგონია, რომ მივაღწევთ, მაშინ ჩვენ არ გვექნება პრობლემა, ჩვენ ამას ზურგს გავუმაგრებთ, რადგანც მე მინდა, ვიხილო, რომ ადამიანების მკვლელობები შეწყდა“, – აღნიშნა ტრამპმა.მისივე თქმით, როდესაც ჯო ბაიდენი იყო თეთრ სახლში, მან უკრაინაზე გასცა 350 მილიარდი დოლარი.„350 მილიარდი დოლარი უკრაინას. მე მაშინ ვთქვი, რომ ზელენსკი ყველაზე მაგარი ვაჭარია, რადგანაც ის ჩამოდიოდა აქ და სამშობლოში 50 მილიარდი დოლარით ბრუნდებოდა. ერთხელ 100 მილიარდიც კი წაიღო ერთ ჩამოსვლაზე. მე კი მივიღე ტრილიონი დოლარის ღირებულების იშვიათი მეტალები, რადგანაც მე ძალიან ცუდად ვგრძნობდი თავს ამერიკელი გადასახადების გადამხდელების გამო. მე ასევე სხვა რაღაც გავაკეთე NATO-ს სამიტზეც. NATO-ს წევრები მდიდარი ქვეყნები არიან, მაგრამ ისინი არ იხდიდნენ. ახლა ჩვენ უკრაინას ფულს საერთოდ არ ვუხდით, იცით? სინამდვილში, ახლა პირიქითაა. ისინი NATO-ს გავლით ითხოვენ, ჩვენ საქმე გვაქვს NATO-სთან და არა უკრაინასთან. NATO ითხოვს რაკეტებს, მათ უნდათ ჰაერსაწინააღმდეგო სისტემები, „პეტრიოტების“ რაკეტები. ჩვენ მათ ვაძლევთ რაკეტებს, ნატო წინსწრებით გვიხდის ფულს და აკეთებს იმას, რაც სურს. რომ დავუბრუნდეთ 350 მილიარდი დოლარის საკითხს, რომელიც ჩვენ უკრაინას მივეცით. ეს ფული რომ არ მიგვეცა, და ასევე მე ვიყავი, ვინც უკრაინას გადასცა „ჯაველინები“, რომლებიც ძალიან ეფექტური იყო. ისინი ასე ამბობენ, ობამამ მოგვცა ზეწრები და ტრამპმა „ჯაველინები“. იმის თქმა მინდა, რომ მე რომ ვყოფილიყავი პრეზიდენტი, ომი არ იქნებოდა“, – განაცხადა ტრამპმა.

მსოფლიო • 25 აგვ 16:49

კიტ კელოგი აცხადებს, რომ უკრაინის უსაფრთხოების გარანტიებთან დაკავშირებით მოლაპარაკებები რთულად მიმდინარეობს

აშშ-ის პრეზიდენტის სპეციალური წარმომადგენლის, კიტ კელოგის თქმით, უკრაინის უსაფრთხოების გარანტიებთან დაკავშირებით მოლაპარაკებები რთულად მიმდინარეობს.ამის შესახებ კელოგმა კიევში უკრაინელ ჟურნალისტებთან საუბრისას განაცხადა.მისი თქმით, დიპლომატიურ ფრონტზე ძალიან რთული სამუშაო მიმდინარეობს. ამ კუთხით კელოგმა ისაუბრა როგორც ალიასკაზე დონალდ ტრამპისა და ვლადიმერ პუტინის მოლაპარაკებების მნიშვნელობაზე, ასევე ამავე კონტექსტში ევროპელი ლიდერებისა და ვოლოდიმირ ზელენსკის აშშ-ის პრეზიდენტთან შეხვედრაზე.„თქვენ ხედავთ, როგორ სწრაფად მიიწევს წინ პროცესი, რომელზეც ჩვენ ვმუშაობთ. იმედი გვაქვს, მივაღწევთ ისეთ მდგომარეობას, როდესაც მივიღებთ უსაფრთხოების გარანტიებს. ეს სამუშაო ახლაც გრძელდება“, – განაცხადა კელოგმა.კიტ კელოგმა კიდევ ერთხელ ისაუბრა ომის დასრულების აუცილებლობაზე.„თქვენ გსურთ, ეს ბოლომდე მიიყვანოთ, სამართლიან და გონივრულ დასასრულამდე. მომავალ წელს, უკრაინის დამოუკიდებლობის დღეს, სავარაუდოდ, ეს უკვე იქნება მიღწეული, ყველაფერი იქნება სხვაგვარად, უკრაინა იქნება სხვა ქვეყანა. და ნებისმიერი როლი, რომელიც ჩვენ, ყველას შეგვიძლია, შევასრულოთ, ვფიქრობ, ძალიან მნიშვნელოვანია“, – განაცხადა კელოგმა.

მსოფლიო • 25 აგვ 16:32

დონალდ ტრამპი: ჩვენ უკრაინას ფულს აღარ ვაძლევთ

აშშ-ის პრეზიდენტმა, დონალდ ტრამპმა რუსეთ-უკრაინის ომზე განცხადება გააკეთა. მან აღნიშნა, რომ ომის შეჩერება, როგორც ეგონა, მარტივი არ აღმოჩნდა, რადგან „სერიოზული პიროვნული კონფლიქტი არსებობს“.ტრამპის თქმით, ომი საბოლოოდ შეჩერდება, თუმცა უსაფრთხოების გარანტიების დეტალები ჯერ არ განხილულა.„ევროპის ქვეყნები აპირებენ, უკრაინას უსაფრთხოების მნიშვნელოვანი გარანტიები მისცენ, და მათ ეს უნდა გააკეთონ, რადგან ეს მათი კონტინენტია. ჩვენ ამაში მხარდაჭერის კუთხით მივიღებთ მონაწილეობას, დავეხმარებით მათ. ვფიქრობ, თუ შეთანხმებას მივაღწევთ, მშვიდობას მხარს დავუჭერთ, რადგან მინდა, რომ ადამიანები აღარ იხოცებოდნენ“, - განაცხადა ამერიკის ლიდერმა.მან ასევე გაიხსენა ბაიდენის ადმინისტრაციის მიერ უკრაინისთვის გაწეული დახმარება და აღნიშნა, რომ საუბარი „350 მილიარდ დოლარზე“ იყო.„მე ვთქვი, რომ ზელენსკი ყველაზე დიდი კომივოიაჟერია, რომელიც ოდესმე შემხვედრია, რადგან ის ჩამოდის ქვეყანაში და ყოველ ჯერზე 50 მილიარდი დოლარით ბრუნდება. მაგრამ ჩვენ უკრაინას ფულს აღარ ვაძლევთ. რეალურად, პირიქით ხდება: ისინი ნატოს საშუალებით მოგვმართავენ, ითხოვენ რაკეტებს, ჩვენ კი ნატოს ვყიდით. ნატო სრულად გვიხდის თანხას და მერე რაკეტებს, რაც უნდა, იმას უშვრება“, - განაცხადა მან.ჟურნალისტის შეკითხვაზე, თუ რატომ არ სურს ვლადიმირ პუტინს ვოლოდიმირ ზელენსკისთან შეხვედრა, ტრამპმა შემდეგნაირად უპასუხა:იმიტომ, რომ ის არ მოსწონს. მეც მყავს ადამიანები, რომლებიც არ მომწონს. არ მომწონს მათთან შეხვედრა. მათ მართლაც არ მოსწონთ ერთმანეთი.

მსოფლიო • 25 აგვ 16:23

ტრამპი: ევროპა უკრაინას უსაფრთხოების მნიშვნელოვან გარანტიებს მისცემს

აშშ-ის პრეზიდენტმა, დონალდ ტრამპმა უკრაინასთან დაკავშირებით ევროპის როლზე ისაუბრა და განაცხადა, რომ კონტინენტი კიევს უსაფრთხოების მნიშვნელოვან გარანტიებს მიანიჭებს.„ევროპა მათ უსაფრთხოების მნიშვნელოვან გარანტიებს მისცემს. ჩვენ მხარდამჭერის პოზიციაში ვიქნებით“, - განაცხადა ტრამპმა.პრეზიდენტმა ასევე გამოთქვა იმედი, რომ შეთანხმების მიღწევის შემთხვევაში, სირთულეები არ წარმოიშობა.„ვფიქრობ, დიდი პრობლემა არ გვექნება, თუ შეთანხმებას მივაღწევთ“, - დასძინა მან.

მსოფლიო • 25 აგვ 16:06

ჩინეთი უარყოფს, რომ უკრაინაში მშვიდობისმყოფელების გაგზავნას აპირებს

ჩინეთის ხელისუფლებამ უარყო გერმანული მედიის მიერ გავრცელებული ინფორმაცია, რომ გარკვეულ პირობებში მზადაა, მონაწილეობა მიიღოს უკრაინაში სამშვიდობო კონტინგენტის განთავსებაში. ამის შესახებ განცხადება ჩინეთის საგარეო საქმეთა სამინისტროში გააკეთეს.„ეს ინფორმაცია არ შეესაბამება სიმართლეს. ჩინეთის პოზიცია უკრაინის კრიზისთან დაკავშირებით არის თანმიმდევრული და მკაფიო“, – განაცხადეს ჩინეთის საგარეო უწყებაში.მანამდე გერმანულმა მედიამ ევროპელ დიპლომატებზე დაყრდნობით გაავრცელა ინფორმაცია, რომ ჩინეთის მთავრობაში მზადყოფნა გამოხატეს, მონაწილეობა მიიღონ უკრაინის ტერიტორიაზე სამშვიდობო კონტინგენტის განლაგებაში. ამასთან, წყარო აცხადებდა, რომ ჩინეთი ამ ნაბიჯს იმ შემთხვევაში გადადგამს, თუ მისიას ექნება გაეროს მანდატი. მედიის ცნობით, რუსეთის პრეზიდენტმა, ვლადიმერ პუტინმა ალასკაზე აშშ-ის ლიდერთან, დონალდ ტრამპთან შეხვედრაზე განაცხადა, რომ უკრაინის უსაფრთხოების გარანტიების წინააღმდეგი არაა და ჩინეთი დაასახელა ერთ-ერთ სახელმწიფოდ, რომელსაც შეუძლია, ეს გარანტიები გასცეს. უკრაინის პრეზიდენტი კი აცხადებდა, რომ ჩინეთს უკრაინის უსაფრთხოების გარანტორებს შორის არ განიხილავს.

პოლიტიკა • 25 აგვ 14:27

დავით ქართველიშვილი: უკრაინელ ხალხს უნდა მიეცეს შესაძლებლობა, საარჩევნო პროცესი ჩაატაროს მეტ-ნაკლებად სამშვიდობო პირობებში

უკრაინელ ხალხს უნდა მიეცეს შესაძლებლობა, საარჩევნო პროცესი ჩაატაროს მეტ-ნაკლებად სამშვიდობო პირობებში, - განაცხადა გადაცემაში „დღის ქრონიკა“ „ხალხის ძალის“ წევრმა დავით ქართველიშვილმა უკრაინაში გასამართ არჩევნებთან დაკავშირებით.მისივე თქმით, გამომდინარე იქიდან, რომ თქმის 15 მლნ ამომრჩეველი ქვეყანაში არ იმყოფება, არჩევნების ჩატარება ტექნიკურადაც რთული იქნება.„ახალი არჩევნების პროცესი უკრაინაში შეიძლება უახლოეს პერიოდში განვითარდეს ჩვენს თვალწინ. ამ პერიოდში უკვე რა სამხედრო თვალსაზრისის შეზღუდვებზე წავა კრემლი, ეს ძალიან საინტერესოა. ალასკაზე პუტინის რუსეთის პოზიცია გაჟღერდა, რომ ისინი არ ითვალისწინებენ სამხედრო მოქმედებების შეჩერების საკითხს და მუშაობენ მხოლოდ შეწყვეტაზე. უკრაინელ ხალხს უნდა მიეცეს შესაძლებლობა საარჩევნო პროცესი ჩაატაროს მეტ-ნაკლებად სამშვიდობო პირობებში, მითუმეტეს იმ ფაქტორის გათვალისწინებით, რომ 12 თუ 15 მლნ ამომრჩეველი გასულია ქვეყნის გარეთ და ამიტომ, ამ არჩევნების ჩატარება წმინდა ტექნიკური კუთხითაც ძალიან დიდ პრობლემებთან იქნება დაკავშირებული“, - განაცხადა ქართველიშვილმა.მან ასევე ისაუბრა ვალერი ზალუჟნის კანდიდატურაზეც.„ვალერი ზალუჟნის კანდიდატურა არახალი თემაა. ის თავის დროზე დროულად განარიდეს სამხედრო თეატრს უკრაინაში. რა თქმა უნდა ის იქნება ერთ-ერთი ძალიან სერიოზული კანდიდატი უკრაინის პრეზიდენტის როლზე. თუმცა, დღეს ზელენსკიმ არ გამორიცხა, რომ მან კიდევ ერთხელ სცადოს ბედი და იყაროს კენჭი, თუმცა მე ეჭვი მეპარება, რომ უკრაინელი ამომრჩეველი მის ამ გადაწყვეტილებას დიდი ენთუზიაზმით შეხვდება“, - აღნიშნა ქართველიშვილმა.

პოლიტიკა • 25 აგვ 14:20

გია აბაშიძე: ევროკომისიამ კარგად ფუნქციონირებადი მთავრობის ინდექსი გამოაქვეყნა, საქართველოს მთავრობა მსოფლიოს 40 საუკეთესოს შორის მოხვდა - ვერანაირ ლოგიკაში ჯდება ის მოცემულობა, რომ წონად ინდექსებში საქართველოს წინსვლა ვითომ შეუმჩნეველია ცალკეული ევროჩინოსნებისთვის და გრძელდება უსინდისო კრიტიკა

საერთაშორისო ინდექსებში საქართველოს შედეგები შეესაბამება სიტყვას საქმიანს და საქმეს სიტყვიანს, ევროკრატიის თავდასხმები ჩვენს ხელისუფლებაზე კი შეესაბამება სიტყვებს უარგუმენტოსა და უტიფარს, - წერს ანალიტიკოსი გია აბაშიძე სოციალურ ქსელში.როგორც ის აღნიშნავს, ევროკომისიის მიერ გამოქვეყნებულ პოზიტიური მშვიდობის 2024 წლის ანგარიშში, კარგად ფუნქციონირებადი მთავრობის ინდექსით, საქართველოს მთავრობა მსოფლიოს 40 საუკეთესო ქვეყანას შორის მოხვდა, შესაბამისად, ლოგიკაში ვერ ჯდება ის მრავალწლიანი მოცემულობა, რომლის მიხედვით, კონკრეტული ევროპელი ჩინოსნები საქართველოს ამგვარ წარმატებას არ იმჩნევენ."საერთაშორისო ინდექსებში საქართველოს შედეგები შეესაბამება სიტყვას საქმიანს და საქმეს სიტყვიანს, ევროკრატიის თავდასხმები ჩვენს ხელისუფლებაზე კი შეესაბამება სიტყვებს უარგუმენტოსა და უტიფარს. ვერანაირ ლოგიკაში ჯდება ის მრავალწლიანი მოცემულობა, რომ წონად ინდექსებში საქართველოს წინსვლა ვითომ შეუმჩნეველია ცალკეული ევროჩინოსნების მხრიდან და გრძელდება უსინდისო კრიტიკა. მრავალგზის დემოკრატიულად არჩეული "ქართული ოცნების" ხელისუფლება თვითმყოფადობას არავის და არანაირი შანტაჟის პირობებში დაუთმობს. ევროკომისიამ პოზიტიური მშვიდობის 2024 წლის ანგარიშის ფარგლებში, კარგად ფუნქციონირებადი მთავრობის ინდექსი გამოაქვეყნა. საქართველოს მთავრობა მსოფლიოს 40 საუკეთესოს შორის მოხვდა და 38-ე ადგილზე გავიდა. რეიტინგში საქართველო პირველ ადგილზეა კავკასიასა და შავიზღვისპირეთში, უსწრებს ევროკავშირის ყველა კანდიდატ ქვეყანას, ევროკავშირის და ნატოს წევრ 10 სახელმწიფოს: იტალიას, რუმინეთს, უნგრეთს, საბერძნეთს, პოლონეთს, ბულგარეთს, ჩრდილოეთ მაკედონიას, ალბანეთს, მონტენეგროს და თურქეთს. კარგად ფუნქციონირებადი მთავრობის რეიტინგით ევროპაში ფინეთი, დანია, შვეიცარია, ნორვეგია და შვედეთი ლიდერობს, ევროპის უკანასკნელ ხუთეულში კი ბელარუსი, რუსეთი, ბოსნია-ჰერცეგოვინა, უკრაინა და მოლდოვა არიან გამწესებულნი. ევროკომისიის მიერ გამოქვეყნებულ ამ კვლევას ეკონომიკის და მშვიდობის ინსტიტუტი აწარმოებს. ანგარიში ეყრდნობა გაეროს, მსოფლიო ბანკის, სავალუტო ფონდის, სხვა საერთაშორისოდ აღიარებული სუბიექტების, გლობალური შემფასებელი ორგანიზაციების პროფილურ კვლევებს და ანგარიშგებებს." - წერს გია აბაშიძე.

პოლიტიკა • 25 აგვ 14:19

დავით ქართველიშვილი ვაშინგტონის შეხვედრაზე: ვერ შედგა პრეზიდენტ ზელენსკის დაყოლიება იმაზე, რომ მას მოუწევდა ტერიტორიული დათმობები რუსეთის წინაშე, რადგან ამის უკან იდგა დანარჩენი უკრაინის უსაფრთხოების გარანტიები

ძალიან ბევრი რამ იქნებოდა განხილული ალიასკას შეხვედრაზე, მაგრამ პუტინის წითელი ხაზები უკრაინასთან ომთან და კონფლიქტთან დაკავშირებით გადის, რა თქმა უნდა, ყირიმზე და იმ ოთხ ანექსირებულ, უკრაინულ რეგიონზე, რომელიც საკონსტიტუციო დონეზე რუსეთმა შეიყვანა საკუთარი ტერიტორიის ფარგლებში, - განაცხადა „დღის ქრონიკაში“ „ხალხის ძალის“ წევრმა, დავით ქართველიშვილმა, რომელმაც ალიასკასა და ვაშინგტონის შეხვედრები შეაჯამა.მისივე თქმით, ზემოთ აღნიშნულის გამო, მოსალოდნელი იყო, რომ ჩიხში შევიდოდა ალიასკას სამიტის შეხვედრის სწორედ ეს ნაწილი.„ძალიან ბევრი რამ იქნებოდა განხილული შეხვედრაზე, მაგრამ პუტინის წითელი ხაზები უკრაინასთან ომთან და ამ კონფლიქტთან დაკავშირებით გადის, რა თქმა უნდა, ყირიმზე და იმ ოთხ ანექსირებულ, უკრაინულ რეგიონზე, რომელიც საკონსტიტუციო დონეზე რუსეთმა შეიყვანა საკუთარი ტერიტორიის ფარგლებში და რაც, გასაგები მიზეზების გამო, მიუღებელია ვლადიმერ ზელენსკისთვის. ამიტომ, ჩიხში შევიდოდა ალიასკას სამიტის ზუსტად ეს ნაწილი - ვაშინგტონის სამიტის დროს, როდესაც დონალდ ტრამპი ზელენსკის და ევროპელ ლიდერებს შეხვდა.ვერ შედგა პრეზიდენტ ზელენსკის დაყოლიება იმაზე, რომ მას მოუწევდა ტერიტორიული დათმობები რუსეთის წინაშე, რადგან ამის უკან იდგა დანარჩენი უკრაინის უსაფრთხოების გარანტიები, ძალიან საინტერესო ფორმით, საინტერესო კომპონენტით, რომელსაც უზრუნველყოფდნენ დიდი ბრიტანეთის, საფრანგეთის, გერმანიის შეიარაღებული ძალები და თქვენ წარმოიდგინეთ, ძალიან საინტერესო რეაქცია ჰქონდა ამაზე პრეზიდენტ პუტინს, რომელიც ფაქტობრივად, ნატოს შეიარაღებული საერთაშორისო კონტიგენტის განლაგებას დათანხმდა უკრაინის უსაფრთხოების უზრუნველყოფის თვალსაზრისით. თუმცა, იყო მნიშვნელოვანი დათქმა, რომ ამ სამეულს შეუერთდებოდა ჩინეთის სამხედრო კომპონენტი - ქვეყნის, რომელიც ინარჩუნებდა თითქმის, მთელი ამ ოთხი წლის განმავლობაში ნეიტრალურ პოზიციას; რომელიც ცდილობდა შუამდგომლის როლი ეთამაშა უკრაინასა და რუსეთს შორის, მაგრამ იგნორირებული იყო მისი ყოველი ეს მცდელობა და ახლა იქნებოდა ძალიან კარგი, ხელსაყრელი მომენტი, როდესაც ჩინეთი ფაქტობრივად, დააბალანსებდა ნატოს იმ კონტიგენტს, რომლის ჩინეთის გარეშე განლაგება უკრაინაში, რა თქმა უნდა, პუტინისთვის მიუღებელი იქნებოდა“, - განაცხადა ქართველიშვილმა.

პოლიტიკა • 25 აგვ 14:08

მაია ბითაძე: რადიკალური ოპოზიცია, კარდაკარ სიარულის პარალელურად ოცნებობს, რომ ვიზალიბერალიზაცია ჩამოერთვას საქართველოს მოსახლეობას, რას ფიქრობენ, რომ ამის გამო მისცემენ ადამიანები ხმას?!

გასულ წელს და წინა წლებში, მიუხედავად „ქართული ოცნების“ მიერ გადადგმული ნაბიჯებისა ევროკავშირში გაწევრიანებისთვის, მიუხედავად იმისა, რომ დადებითი შეფასებები გვქონდა უკრაინა-მოლდოვასთან და სხვა კანდიდატ სახელმწიფოებთან შედარებით, „ქართული ოცნების“ ამომრჩეველმა ძალიან კარგად დაინახა, რომ ჩვენ გვაშანტაჟებდნენ და ახალ-ახალ რესურსს იყენებდნენ ამ მიზნით, - განაცხადა „დღის ქრონიკაში“ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ.მისი თქმით, ამ შანტაჟს „ქართული ოცნების“ ამომრჩეველზე ნულოვანი გავლენა ექნება.„მიკვირს, ევროკავშირის ის წარმომადგენლები, რომლებიც ამ შანტაჟს ახორციელებენ ჩვენს ქვეყანაზე, რატომ ვერ აცნობიერებენ, რომ ერთი და იგივე წყალში ერთი და იგივე სცენარით შესვლა არის აბსოლუტურად ფუჭი. გახსოვთ ჩვენმა რადიკალურმა ოპოზიციამ კანდიდატის სტატუსის მინიჭებამდე რამდენი იწვალა, კარდაკარ იარეს, რომ კანდიდატის სტატუსი არ მიგვეღო, შემდეგ კანდიდატის სტატუსი მივიღეთ, შემდეგ იყო მოლაპარაკებების გახსნა-არ გახსნა; გახსოვთ რაზე იყო საუბარი, რომ უკრაინა-მოლდოვა აშენდებოდა ამ მოლაპარაკების გახსნის შემდგომ, რეალურად კი, გული მტკივა, როდესაც წარმოვიდგენ რა მდგომარეობაშია უკრაინელი ერი. არც მოლდოვას აქვს დალხენილი მდგომარეობა, მათ შორის ეკონომიკურად, ხოლო საქართველო ამ ძალიან რთულ გეოპოლიტიკურ ვითარებაში ინარჩუნებს სიმშვიდეს, ეკონომიკურ წინსვლას, მილიონი შესაძლებლობა იკვეთება ლოგისტიკური, სატრანსპორტო და ენერგეტიკული მიმართულებით ჩვენი ქვეყნის მომავლისთვის.ჩვენი რადიკალური ოპოზიცია კარდაკარ სიარულის პარალელურად ოცნებობს, რომ ვიზალიბერალიზაცია ჩამოერთვას საქართველოს მოსახლეობას და რას ფიქრობენ, რომ ამის გამო მისცემენ ადამიანები ხმას? საქართველოს მოსახლეობის აბსოლუტური უმრავლესობის აზრია, რომ საინტერესოც აღარ არის ის განცხადებები, რასაც ჩვენ ვისმენთ, არა მხოლოდ რადიკალური ოპოზიციის მხრიდან, არამედ ევრობიუროკრატების მხრიდანაც, რადგან ეს კინო ჩვენ უკვე ნანახი გვაქვს და ძალიან დიდი იმედი გვაქვს, რომ საბოლოო ჯამში ევრობიუროკრატები გონიერებას შეინარჩუნებენ და ზიანს არ მიაყენებენ თვითონ ევროკავშირს, როგორც ორგანიზაციას, იმიტომ რომ აქ არ არის საუბარი მხოლოდ საქართველოსა და ევროკავშირის ურთიერთობაზე, აქ საუბარია ბევრად მასშტაბურ, ფართო მოცემულობაზე, რომელიც ევროკავშირის, როგორც ორგანიზაციული წარმონაქმნის სტატუსს, ნდობას და მის შემდგომ განვითარებას და გაძლიერების პერსპექტივას ეხება. სწორედ ამ საკითხს აყენებენ ევროკავშირის ის წარმომადგენლები კითხვის ნიშნის ქვეშ, რომლებიც ვიზალიბერალიზაციას, როგორც ბოლო ინსტრუმენტს იყენებენ საქართველოს მოსახლეობის დასაშანტაჟებლად. მათ ძალიან კარგად იციან, რომ საპარლამენტო არჩევნებში „ქართულ ოცნებას“ საქართველოს მოსახლეობის აბსოლუტურმა უმრავლესობამ მისცა ხმა. შესაბამისად, ადგილობრივ თვითმმართველობაზე რომ „ქართული ოცნება“ აბსოლუტურად გაიმარჯვებს ყველა მუნიციპალიტეტში, ამას წყალი არ გაუვა“, - აღნიშნა ბითაძემ.

პოლიტიკა • 25 აგვ 12:45

კახა კალაძე: სხვისი ინტერესების გატარება, რომელსაც შეეწირება ეს ქვეყანა, წარმოუდგენელია - „ქართული ოცნება“ ამაზე წამსვლელი არაა და ხელს არ მოაწერს მსგავს გადაწყვეტილებებზე

თბილისის მერი კახა კალაძე მიიჩნევს, რომ ევროინტეგრაციის გზაზე საქართველოს აქვს კონკრეტული წინგადადგმული ნაბიჯები და ახორციელებს შესაბამის რეფორმებს, რომელთაც ევროკავშირის ზოგიერთი წარმომადგენლის მხრიდან არასამართლიანი შეფასებები მოჰყვება.ამის შესახებ მან ევროკომისიის მიერ გამოქვეყნებულ იმ ინდექსთან დაკავშირებით განაცხადა, რომლის თანახმადაც, კარგად ფუნქციონირებად მთავრობებს შორის საქართველო მოწინავე ქვეყნებს შორისაა.„როდესაც არის სამართლიანი დამოკიდებულება და შეფასება, რა თქმა უნდა, ყველაფერი ხელისგულზეა - საქართველო არის წინ, დგამს კონკრეტულ ნაბიჯებს, ახორციელებს რეფორმებს და შედეგებიც ვნახეთ. ევროკავშირის წევრ ბევრ ქვეყანაზე წინ ვართ, კანდიდატ ქვეყნებზე ხომ საუბარიც ზედმეტია. რა თქმა უნდა, ეს პროცესი შეუქცევადია, მაგრამ როგორც კი შემოდის პოლიტიკური ნარატივი ზოგიერთი ევრობიუროკრატის მხრიდან, მაშინვე არის არასამართლიანი შეფასება. ზოგადად, მათი შეფასებები დაფუძნებულია ტყუილზე, ცილისწამებაზე, არასწორი ინფორმაციების გავრცელებაზე. ეს არის სამწუხარო რეალობა, ორმაგი სტანდარტი, ძალიან ხშირ და ბევრ შემთხვევაში. ამის მთავარი გამომწვევი მიზეზი ორი რამაა: ერთი, რომ საქართველო არ ჩაერთო ომში, არ დაემორჩილა მათ ბრძანებებს, რომ უკრაინას შეხიდებოდა და ქვეყანაში მეორე ფრონტი გახსნილიყო. მეორე: ის, რომ ქვეყანა არ მიუერთდა იმ ფინანსურ სანქციებს, რომლებიც დამღუპველი, დამანგრეველი და დამაზიანებელი იქნებოდა ქართული ეკონომიკისთვის“, - განაცხადა კახა კალაძემ.მისი განმარტებით, ქვეყანაში მშვიდობის შენარჩუნებას ალტერნატივა არ აქვს, რისთვისაც საქართველოს ხელისუფლება პრაგმატულ ნაბიჯებს დგამს.„ომი რას მოუტანდა ჩვენს ქვეყანას, ამის ახსნა-განმარტებას არ დავიწყებ. უკრაინა არის ამის „კარგი“ მაგალითი. ვინმეს როგორ შეიძლება მოეწონოს ის უბედურება, რაც უკრაინაში ტრიალებს? მშვიდობა მინდა ვუსურვო უკრაინას და უკრაინელ ხალხს. სრული კატასტროფა მიიღო ქვეყანამ - დაკარგული ტერიტორიები, განადგურებული, გაუბედურებული სოფლები, ქალაქები, ინფრასტრუქტურა; დაღუპული ადამიანები. უმძიმესია ეს ყველაფერი. მშვიდობას, მიუხედავად იმისა, რომ ჯერ კიდევ გრძელდება შემოტევები, თავდასხმები, მუქარები, რა თქმა უნდა, არ აქვს ალტერნატივა. ჩვენ, ჩვენი პოლიტიკით აუცილებლად შევინარჩუნებთ მშვიდობას“, - აღნიშნა დედაქალაქის მერმა.კახა კალაძემ ევროკავშირთან უვიზო რეჟიმის შესაძლო გაუქმებასთან დაკავშირებით დასმულ შეკითხვასაც უპასუხა და აღნიშნა, რომ ვიზალიბერალიზაციაში ქართული სახელმწიფოს ინტერესი არ გაიცვლება.„მიზეზები ავხსენი, თუ რა არის მათი მთავარი მოტივაცია. შემოტევა, ქართველი ხალხისა და სახელმწიფოს დასჯის მცდელობა გრძელდება. ვიზალიბერალიზაციაში ქართული სახელმწიფოს და ქართველი ხალხის ინტერესი არ და ვერ გაიცვლება. ეს არის ჩემი და „ქართული ოცნების“ დამოკიდებულება. პასუხისმგებლობა, რა თქმა უნდა, ეკისრებათ ევროპელ ბიუროკრატებს იმ ცილისმწამებლური განცხადებებიდან, რომელთაც ამდენი ხნის განმავლობაში ვისმენთ. თითქოს, დღე და ღამე არ სძინავთ ქართველ ხალხზე და საქართველოსთან დაკავშირებით ფიქრში. ეს არის აბსოლუტურად ყალბი დამოკიდებულება.რეალურად, ამის უკან დგას ის, რომ ქვეყანაში მეორე ფრონტი გაიხსნას, შეუერთდეს სანქციებს, რომელიც დამანგრეველი იქნება ჩვენი ეკონომიკისთვის. ვერც ამერიკელი, ვერც ევროპელი და ვერც რუსი ჩვენს გასაკეთებელ საქმეს ვერ და არ გააკეთებს. მათ აქვთ ინტერესი საქართველოსთან მიმართებით, მაგრამ აქვთ საკუთარი ინტერესი. შესაბამისად, ჩვენ უნდა მივხედოთ ჩვენს ქვეყანას, უნდა გავაკეთოთ ჩვენი გასაკეთებელი, იმიტომ, რომ საქართველო ჩვენი სამშობლოა. გარედან ვიღაცების დავალებების შესრულება, თან ისეთი დავალებების, რომლებიც იცი, რომ დამანგრეველი და დამღუპველი იქნება ამ ქვეყნისთვის, ასევე, მათი ინტერესების გატარება, რომელსაც შეეწირება ეს ქვეყანა და მისი ინტერესები, წარმოუდგენელია. „ქართული ოცნება - დემოკრატიული საქართველო“ ამაზე წამსვლელი არაა და ხელს არ მოაწერს მსგავს გადაწყვეტილებებზე“, - განაცხადა კახა კალაძემ.რაც შეეხება ევროკომისიის მიერ წამოყენებული მოთხოვნების შესრულებას, თბილისის მერი მიიჩნევს, რომ მათი მოთხოვნები ხშირ შემთხვევაში, უსამართლობასა და ტყუილზეა დაფუძნებული.„შინაარსი ხომ აქვს მოთხოვნებს? ეს მოთხოვნები დაფუძნებულია ტყუილზე, უსამართლობაზე. რომელ პოლიტიკურ პატიმრებზე მესაუბრებით, „მოლოტოვის კოქტეილებს“ რომ ესროდნენ პოლიციელებს?! ცოცხლად რომ წვავდნენ, ქვებს რომ ესროდნენ?! მოძალადეს ასაკი არ აქვს. როდესაც ხარ დამნაშავე, ისვრი ქვას, ხელკეტს, „მოლოტოვის კოქტეილებს“, შეურაცხყოფას აყენებ და შემდეგ გაქვთ მცდელობა, ასეთი ადამიანი გმირად გამოიყვანოთ, ეს არის რეალობა. ვერ ხვდებით რა ვითარებაა ზოგადად ქვეყანაში და მსოფლიოში. ამიტომ ხართ იმ მდგომარეობაში, რა მდგომარეობაშიც ხართ და ამიტომაც გაქვთ საზოგადოების მინიმალური მხარდაჭერა, ხართ უმცირესობაში. თუ გააკეთებთ სწორ ანალიზს და შეფასებებს, მიიღებთ პასუხს“, - აღნიშნა კახა კალაძემ.