პოლიტიკა • 1770130380

ბერეკაშვილი: ყველაზე დიდი გამოწვევა პირველადი მოხმარების საგნებსა და საკვებ პროდუქტებზე გვაქვს. ვფიქრობ, რესურსი არსებობს, რომ მნიშვნელოვან შედეგზე გავიდეთ. მთავარია, ეს პროცესი იყოს გამჭვირვალე, ინკლუზიური, კომპანიები ჩაერთონ

ყველაზე დიდი გამოწვევა პირველადი მოხმარების საგნებსა და საკვებ პროდუქტებზე გვაქვს. ვფიქრობ, მნიშვნელოვანი რესურსი არსებობს, რომ მნიშვნელოვან შედეგზე გავიდეთ. მთავარია, რომ ეს პროცესი იყოს გამჭვირვალე, ინკლუზიური, კომპანიები ჩაერთონ, - განაცხადა გადაცემაში „დღის ქრონიკა“ ეკონომიკური პოლიტიკის საპარლამენტო კომიტეტის თავმჯდომარემ შოთა ბერეკაშვილმა ფასების რეგულირებაზე საუბრისას.მან ასევე აღნიშნა, რომ მუშაობის პროცესში საკანონმდებლო ინიციატივებიც განიხილება.„როდესაც ვსაუბრობთ სისტემის გაჯანსაღებაზე, კონკურენტუნარიანობის გაზრდაზე და კომპლექსურ მიდგომაზე, რა თქმა უნდა, იგულისხმება სწორი საკანონმდებლო ჩარჩოთი დახმარება, რათა ბიზნესპროცესები გახდეს უფრო გამჭვირვალე, ინკლუზიური, კონკურენციის ხარისხი გაუმჯობესდეს. ეს ყოველივე შემდეგ აისახება ფასების დინამიკის კლებაზე და უფრო რეალურ შედეგებზე.სამივე მიმართულება მნიშვნელოვანია, თუმცა, ჩემი აზრით, ყველაზე დიდი გამოწვევა პირველადი მოხმარების საგნებსა და საკვებ პროდუქტებზე გვაქვს. ვფიქრობ, მნიშვნელოვანი რესურსი არსებობს, რომ მნიშვნელოვან შედეგზე გავიდეთ. მთავარია, რომ ეს პროცესი იყოს გამჭვირვალე, ინკლუზიური, კომპანიები ჩაერთონ”, - განაცხადა შოთა ბერეკაშვილმა.დეპუტატმა კომპანიებსაც მიმართა.„მინდა, მივმართო კომპანიებს, რომლებიც სექტორში მონაწილეობენ - ჩვენი მიზანია, მათ დავეხმაროთ, მათი საოპერაციო ბიზნესპროცესები გავხადოთ უფრო ეფექტური, რაც შედეგობრივად მოგვიტანს, რომ ისინი გახდებიან უფრო კონკურენტუნარიანი. ეს საბოლოო ჯამში დადებითად აისახება როგორც ქვეყნის ეკონომიკაზე, ჩვენს მოქალაქეებზე და ვფიქრობ, ხელშესახებ შედეგებს მივიღებთ”, - აღნიშნა ბერეკაშვილმა.პარლამენტმა დღეს სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი დროებითი კომისიის შექმნას მხარი დაუჭირა.

ტაბლოიდი • 1770130320

აშშ-ში ცხენმა სტაფილოს დახმარებით ხატვა ისწავლა - პატრონმა ცხოველის 12 ნამუშევარი უკვე გადაყიდა

 ამერიკელმა ერიკა ტალიმ თავის ცხენს ხატვა ასწავლა. ამის შესახებ ჟურნალი People წერს.გამოცემის ინფორმაციით, ერიკამ ცხენი სახელად ბლიუ 3 წლის წინ გადაარჩინა. ცხოველი მაშინ 21 წლის იყო. ქალმა შეამჩნია, რომ ბლიუს ძალიან უყვარდა პირით სხვადასხვა საგნის აღება.„ცხენები ჩვეულებრივ არ იკბინებიან, მაგრამ ასე იღებენ ხოლმე სხვადასხვა საგანს. მაგალითად, თუ გვერდით ცოცხით ჩაუვლით, ბლიუ აუცილებლად შეეცდება მის აღებას“, - განმარტავს ქალი.ერიკა მხატვარია, ამიტომ გადაწყვიტა გაერკვია იზიარებს თუ არა ბლიუ მის გატაცებებს. ქალმა ფუნჯს სტაფილო მიამაგრა და ცხენის წინ ტილო და საღებავები დააწყო. მისი თქმით, ცხენმა იცოდა რასაც აკეთებდა - ფუნჯი აიღო და ტილოზე ხატვა დაიწყო. პერიოდულად ერიკა სტაფილოს ნაწილს ტეხდა, რომ ცხენს წაესუსნა, თვითონ კი ამ დროს საღებავის ფერს ცვლიდა.

მსოფლიო • 1770125149

ვიქტორ ორბანის პრესსპიკერის განცხადებით, ევროკომისია უნგრეთს არასამთავრობო ორგანიზაციების დახმარებით უტევს

უნგრეთის სახელმწიფო მდივანი საერთაშორისო კომუნიკაციების საკითხებში, ზოლტან კოვაჩი აცხადებს, რომ ევროკომისია უნგრეთს არასამთავრობო ორგანიზაციების დახმარებით უტევს.კოვაჩის თქმით, ევროკომისია თავადვე აფინანსებს იმ ორგანიზაციებს, რომლებიც უნგრეთის კანონის უზენაესობის შესახებ ანგარიშებს წერენ.პრემიერ-მინისტრ, ვიქტორ ორბანის პრესსპიკერის თქმით, ეს ევროკომისიის მხრიდან, არასამთავრობოების გზით, უნგრეთის არჩევნებში ჩარევის მცდელობაა.ამ მოსაზრებას იზიარებს, უნგრელი ევროპარლამენტარი ანდრაშ ლასლოც. ლასლო სოციალურ ქსელ X-ში წერს, რომ ევროკავშირის მიერ 2019-2023 წლებში არასამთავრობო ორგანიზაციებზე 17 მილიარდი ევრო დაიხარჯა და მწირი ინფორმაციაა გასაჯაროებული იმაზე, თუ რას მოხმარდა ოცდაათი ათასზე მეტი გრანტი.

მსოფლიო • 1770124678

ეპშტეინის საქმესთან დაკავშირებით ახალი ფაილების გამოქვეყნების შემდეგ, ლიეტუვის გენერალურმა პროკურატურამ ქვეყანაში შესაძლო ადამიანებით ვაჭრობის შესახებ გამოძიება დაიწყო

ჯეფრი ეპშტეინის საქმესთან დაკავშირებით ახალი ფაილების გამოქვეყნების შემდეგ, ლიეტუვის გენერალურმა პროკურატურამ ქვეყანაში შესაძლო ადამიანებით ვაჭრობის შესახებ წინასწარი გამოძიება დაიწყო. ამის შესახებ ლიეტუვის საზოგადოებრივი მაუწყებელი LRT ავრცელებს ინფორმაციას.მედიის ინფორმაციით, გენერალურმა პროკურატურამ აღნიშნული გადაწყვეტილება ახალი მონაცემების უფრო დეტალური შეფასების შემდეგ მიიღო.გავრცელებული ცნობით, სამართალდამცავი ორგანოების თანამშრომლები ამჟამად ეძებენ იმ პირებს, რომლებსაც რაიმე ინფორმაცია აქვთ ან თავად გახდნენ ეპშტეინის საქმესთან დაკავშირებული შესაძლო დანაშაულების მსხვერპლი.მიმდინარე გამოძიების ფონზე, ლიეტუვის პრეზიდენტმა, გიტანას ნაუსედამ სამართალდამცავ ორგანოებს მოუწოდა, საჭიროების შემთხვევაში, დახმარებისთვის აშშ-ის სასამართლო სისტემას მიმართონ.„ვიმედოვნებ, ხელისუფლება მიღებულ ინფორმაციას ფუნდამენტურად შეაფასებს. დიახ, ინფორმაცია ძირითადად ანონიმური და რედაქტირებულია, მაგრამ ჩვენ გვაქვს იურიდიული დახმარების შესახებ შეთანხმება ამერიკის შეერთებულ შტატებთან და მჯერა, ყველაფერი უნდა გავაკეთოთ, რათა ეჭვებით ცხოვრება თავიდან ავიცილოთ“, – განაცხადა ლიეტუვის პრეზიდენტმა.ცნობისთვის, აშშ-ის იუსტიციის დეპარტამენტმა ე.წ. ეპშტეინის ფაილებიდან სამ მილიონზე მეტი გვერდი გამოაქვეყნა, მათ შორის ორი ათასი ვიდეო და 180 ათასი ფოტო. ახალმა დოკუმენტებმა გამოავლინა ეპშტეინის კავშირები რამდენიმე ლიეტუველ მხატვართან და მოდელთან, ასევე პეტრეიკისების ოჯახთან, რომელთა კულტურულმა ორგანიზაციებმა ეპშტეინის ფონდიდან ათიათასობით ევრო მიიღეს. ასევე, ფაილების მიხედვით ირკვევა, რომ ჯეფრი ეპშტეინმა ბიზნესმენ ვალდას პეტრეიკისის მეუღლეს, სიმონეს ანდერძით 3 მილიონი დოლარი დაუტოვა. ოჯახი დანაშაულებში რაიმე სახის მონაწილეობას უარყოფს და ამტკიცებს, რომ მათ გარდაცვლილ ფინანსისტთან მხოლოდ პროფესიული კუთხით კომუნიკაცია ჰქონდათ.

შემთხვევა • 1770115617

„ცეცხლი ბაზრის ტერიტორიაზე ვრცელდება“ - მასშტაბური ხანძარი თეირანში

ირანის დედაქალაქში მასშტაბური ხანძარია - ცეცხლი თეირანის ცენტრალურ ნაწილში მდებარე ბაზრის ტერიტორიაზე ვრცელდება.მედიის ცნობით, ტერიტორია, სადაც ხანძარი გაჩნდა, სავსეა დახლებითა და მაღაზიებით. ხანძრის გამომწვევი მიზეზი ჯერჯერობით უცნობია."ხანძარი იმდენად მასშტაბურია, რომ თეირანის სხვადასხვა კუთხიდანაც კი ჩანს", - ამბობს ერთ-ერთი ადგილობრივი.ადგილზე მეხანძრეები და სასწრაფო დახმარების მანქანებია მობილიზებული.

პოლიტიკა • 1770111982

შალვა კერესელიძე: ძალის გამოყენებით ფასების რეგულირება მოკლებულია რაციონალურ გადაწყვეტილებას, გთავაზობთ გეგმას, რომლის მიზანია სოციალური სიმძიმის და ინფლაციური წნეხის შემსუბუქება

საქართველოს სასურსათო ბაზარზე გამეფებულია მონოპოლია, რომელიც შერწყმულია სისტემურ კურუფციასთან და მხოლოდ კლანის წარმომადგენლებს აქვთ განსაკუთრებული უფლება, ექსკლუზიურად შემოიტანონ სასურსათო პროდუქტები და ხელოვნურად დააწესონ მაღალი ფასები, – ამის შესახებ პარტია „გახარია საქართველოსთვის“ საპარლამენტო ფრაქციის თავმჯდომარემ, შალვა კერესელიძემ განაცხადა.როგორც კერესელიძემ აღნიშნა, ფასების რეგულირება ძალის გამოყენებით მოკლებულია ეკონომიკურად რაციონალურ გადაწყვეტილებებს.„საქართველოს ხელისუფლებისთვის რომ გეკითხა, ხსენებული ყველა ვალდებულება იდიალურად სრულდებოდა და უფრო მეტიც, საერთაშორისო რეიტინგებით ბევრ ევროპულ სახელმწიფოებსაც კი ვუსწრებდით, თუმცა ხალხისთვის გასაგებ ენაზე ვერავინ ვერ ხსნიდა, რას ნიშნავს მყარდებოდეს ლარის კურსი და ამავე დროს ბაზარზე კატასტროფულად ძვირდებოდეს სურსათი, იზრდებოდეს ეკონომიკა, იქმნებოდეს დამატებითი სამუშაო ადგილები და უმუშევრობის გამო, სამუშაოს საძიებლად ჩვენი მოქალაქეები გარბოდნენ საზღვარგარეთ და ამ ყველაფრის პარალელურად ქვეყანაში ოფიციალურად რეგისტრირებული გყავდეს 708 ათასი „ღატაკი ოჯახი“, რომელიც მოსახლეობის 26%-ია.ბუნებრივია, ისმის კითხვა, რა აძვირებს ფასებს სასურსათო მოხმარების პროდუქტებზე და როგორ ჩნდება 85%-იანი მარჟები? ნუთუ, არ გამოჩნდნენ ბაზარზე ახალი ბიზნესოპერატორები, რომლებიც 85%-იანი ფასნამატის ნაცვლად, თანახმა იქნებოდნენ 50% ან თუნდაც კიდევ უფრო ნაკლები ფასნამატით? სამწუხაროდ, ეს ვერ ხდება, რადგან საქართველოს სასურსათო ბაზარზე გამეფებულია მონოპოლია, რომელიც შერწყმულია სისტემურ კურუფციასთან და მხოლოდ კლანის წარმომადგენლებს აქვთ განსაკუთრებული უფლება,  ექსკლუზიურად შემოიტანონ სასურსათო პროდუქტები და ხელოვნურად დააწესონ მაღალი ფასები.ფასების რეგულირება საბოტაჟზე საუბრით, კომისიების შექმნით, ძალის გამოყენებით და ა.შ. სრულიად მოკლებულია ეკონომიკურად რაციონალურ გადაწყვეტილებებს. ასეთმა უხეშმა ჩარევებმა შესაძლოა, გამოიწვიოს „ზამბარის ეფექტი“, ფასები დროებით შემცირება, მაგრამ შემდეგ კიდევ უფრო მკვეთრი გაზრდა, ინვესტიციების გადინება, სამუშაო ადგილების კიდევ უფრო შემცირება და ა.შ. პრობლემების მოგვარება მხოლოდ სამთავრობო და საპარლამენტო კომისიების შექმნით ერთ თვეში და ერთი ხელის მოსმით შეუძლებელია, გადაწყდეს“, – აღნიშნა კერესელიძემ.მისივე თქმით, პარტია „გახარია საქართველო“ მზად არის, კონკურენციის გაჯანსაღების რეალურ პროცესებში ჩაერთოს.„ჩვენ გთავაზობთ გეგმას, რომლის მიზანია, სწრაფი ეფექტის მიღებით, საზოგადოებისთვის სოციალური სიმძიმის და ინფლაციური წნეხის შემსუბუქება, დაბალშემოსავლიანი მოსახლეობის დაცვა და მსყიდველუნარიანობის გაუმჯობესება: ქვეყანაში დაწესდეს მინიმალური სახელფასო ზღვარი 1000 ლ. ოდენობით. ამ ცვლილებით 350 ათასზე მეტ ადამიანს გაეზრდება შემოსავალი. რეალურად ეს არის გზა, მშრომელი ადამიანის მდგომარეობა მცირედით მაინც გავაუმჯობესოთ; სამწუხაროდ ამ ქვეყანაში მოსაპარი ფული სულ არის, პენსიების გასაზრდელი კი არა. სწორედ ამიტომ განხორციელდეს ყველა კატეგორიის  პენსიონერთათვის საბაზისო პენსიის ზრდა 200 ლ; მოხდეს  სოციალური შემწეობის ინდექსაცია ინფლაციის შესაბამისად. რათა დახმარება სრულად აღარ „შეჭამოს“ ფასების ზრდამ; სამართლიანი გადასახადების შემოღებით, მოხდეს საშემოსავლო გადასახადის დიფერენცირება. სადაც დაბალშემოსავლიანი მოსახლეობისთვის საშემოსავლო გადასახადის განაკვეთი იქნება 12%, საშუალოშემოსავლიანი მოსახლეობისთვის 20% და მაღალშემოსავლიანისთვის 25%. ეს გახლავთ, სოციალური სამართლიანობის პრინციპი. დაბალშემოსავლიან მოსახლეობას უნდა დავუტოვოთ მეტი ფული, ხოლო მაღალშემოსავლიანმა მოსახლეობამ, მათ შორის ხელისუფლების მილიონერმა ჩინოვნიკებმა, მეტი პასუხისმგებლობა უნდა აიღონ ქვეყნის სოციალურ უზრუნველყოფაზე.დაბოლოს, ჩვენ მზად ვართ, ამ ცვლილებების დასაწყებად, ასევე მზად ვართ ჩავერთოთ კონკურენციის გაჯანსაღების რეალურ პროცესებში, როგორებიცაა: კორუფციის წინააღმდეგ ბრძოლა; ადგილობრივ ბაზარზე ჯანსაღი კონკურენციის ხელშეწყობა;  გამართული ანტიმონოპოლიური საქმიანობა; ინფლაციის  შემცირება; ეროვნული ვალუტის გამყარება; ადგილობრივი წარმოების მხარდაჭერა; სწორი ფისკალური პოლიტიკის შემუშავება და ა.შ. ეს უნდა იყოს რეალური ცვლილებები და არა მორიგი პიარკამპანია, რომელიც ჩვენ არაერთხელ გვინახავს“, – განაცხადა კერესელიძემ.

სამართალი • 1770103515

პოლიციამ „ქურდულ სამყაროსთან“ კავშირში მყოფი 45 პირი დააკავა, ხოლო 15 პირს ბრალი წარედგინება, მათ შორის სამი ე.წ. კანონიერი ქურდია

საქართველოს შინაგან საქმეთა სამინისტროს თანამშრომლებმა, ბოლო 24 საათის განმავლობაში, თბილისსა და რეგიონებში ჩატარებული საპოლიციო ღონისძიებების შედეგად, „ქურდულ სამყაროსთან“ კავშირში მყოფი 45 პირი დააკავეს. ასევე კიდევ 15 პირს ბრალი წარედგინება, ნაწილს პენიტენციურ დაწესებულებაში, ნაწილს კი დაუსწრებლად, მათ შორის სამი ე.წ. კანონიერი ქურდია, – ამის შესახებ თბილისის პოლიციის დეპარტამენტის დირექტორმა, ვაჟა სირაძემ ბრიფინგზე განაცხადა.როგორც ვაჟა სირაძემ აღნიშნა, მათ ბრალად ედებათ „ქურდული სამყაროს წევრობა“, „ქურდული სამყაროს საქმიანობის მხარდაჭერა“, „ქურდული სამყაროს წევრისთვის მიმართვა“ და „კანონიერი ქურდობა“.„სამართალდამცველების მიერ, მოსამართლის განჩინების საფუძველზე, ინტენსიურ რეჟიმში ჩატარებული ფარული საგამოძიებო მოქმედებების შედეგად დადგინდა, რომ სისხლის სამართლის დანაშაულში ბრალდებული პირებისა და მოდავე მხარეების მონაწილეობით,  ე.წ. ქურდული გარჩევები ეწყობოდა, რომლებშიც საზღვარგარეთ მყოფი „კანონიერი ქურდები“ – სულხან ჯაფარიძე (თვალჭრელიძე) მეტსახელად „სუხო“ და პეტრე ბაქრაძე მეტსახელად „პაატა ტბილისკი“ მონაწილეობდნენ. ისინი ერთვებოდნენ მოქალაქეებს შორის არსებული ფინანსური დავების მოგვარებაში და ერთ-ერთი მხარის სასარგებლოდ, ე.წ. ქურდული ტრადიციების შესაბამისად იღებდნენ გადაწყვეტილებებს.გამოძიებით, ასევე, დგინდება, რომ ე.წ. კანონიერი ქურდი რევაზ უბილავა მეტსახელად „ჯვარსკი“ მისი ოჯახის წევრების – დედისა და ძმის დახმარებით, აწყობდა ქურდულ გარჩევებს და გამოჰქონდა ე.წ.„ქურდული გადაწყვეტილებები. პოლიციამ ორივე მათგანი სხვა პირებთან ერთად დააკავა.სამართალდამცველებმა, ბრალდებულების პირადი და საცხოვრებელი სახლების ჩხრეკის შედეგად, ნივთმტკიცებად ამოიღეს კომპიუტერული ტექნიკა და მობილური ტელეფონები, რომელთა საშუალებითაც ისინი ერთმანეთს და საზღვარგარეთ მყოფ კრიმინალურ ავტორიტეტებსა და ე.წ. კანონიერ ქურდებს უკავშირდებოდნენ. პოლიციის მიერ ასევე ამოღებულია სხვადასხვა სახის ნარკოტიკული საშუალება.გამოძიება საქართველოს სისხლის სამართლის კოდექსის 223-ე პრიმა მუხლის პირველი და მეორე ნაწილებით, 223-ე ტერცია მუხლის მეორე ნაწილით და 223-ე კვარტა მუხლის პირველი ნაწილით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.საქართველოს შინაგან საქმეთა სამინისტროსთვის მთავარ პრიორიტეტს წარმოადგენს ორგანიზებულ დანაშაულთან, განსაკუთრებით კი ე.წ. ქურდულ სამყაროსთან დაკავშირებული დანაშაულებრივი საქმიანობის წინააღმდეგ სისტემური ბრძოლა. საზოგადოებრივი წესრიგისა და უსაფრთხოების მაქსიმალურად დაცვის მიზნით, კანონის სრული სიმკაცრით დაისჯება ყველა ის პირი, ვინც ჩაიდენს დანაშაულებრივ ქმედებას. ჩვენი მთავარი ამოცანაა დავიცვათ ჩვენი თითოეული მოქალაქის უსაფრთხოება“, – აღნიშნა ვაჟა სირაძემ.

ტექნოლოგიები • 1770101505

YouTube-მა ხელოვნური ინტელექტის დახმარებით შექმნილი კონტენტის წაშლა დაიწყო

YouTube-მა ხელოვნური ინტელექტის მიერ შექმნილი დაბალხარისხიანი კონტენტის წაშლა დაიწყო.The Verge-ის ინფორმაციით, პლატფორმიდან ორი მსხვილი არხი უკვე გაქრა. ვიდეომონტაჟის სერვისის, Kapwing-ის ანგარიშის თანახმად, YouTube-იდან წაიშალა არხი CuentosFacianantes, რომელსაც 5,9 მილიონი გამომწერი ჰყავდა, მისი ჯამური ნახვები კი 1,2 მილიარდს აღწევდა. ასევე, პლატფორმიდან გაქრა ანგარიში Imperio de Jesus, რომლის აუდიტორიაც 5,8 მილიონს აჭარბებდა.არხების წაშლა მას შემდეგ დაიწყო, რაც YouTube-ის გენერალურმა დირექტორმა, ნილ მოჰანმა, დაბალხარისხიანი AI-კონტენტის გავრცელების პრობლემაზე ისაუბრა. მომხმარებლებისადმი მიწერილ წერილში მან აღნიშნა, რომ ვიდეოჰოსტინგი გეგმავს შეამციროს ე.წ. AI-სლოპის (ხელოვნური ინტელექტის მიერ შექმნილი დაბალხარისხიანი კონტენტი) გავრცელება სპამთან და ქლიქბეითთან ბრძოლის სისტემის გაუმჯობესების გზით.მანამდე Kapwing-მა განაცხადა, რომ YouTube-ზე ვიდეოების 20%-ზე მეტი „AI-ნაგავს“ წარმოადგენს. ასეთ არხებს ჯამში 220 მილიონზე მეტი გამომწერი ჰყავთ, ნახვებმა კი 63 მილიარდს მიაღწია.

ომი უკრაინაში • 1770091310

რუსეთმა კიევსა და ხარკოვს რაკეტებითა და დრონებით დაარტყა, არიან დაშავებულები

 რუსული ძალების მიერ უკრაინის დედაქალაქ კიევზე ბალისტიკური რაკეტებით და დრონებით განხორციელებული თავდასხმის შედეგად რამდენიმე მაღალსართულიანი შენობა დაზიანდა და საბავშვო ბაღში ხანძარი გაჩნდა, - ინფორმაციას უკრაინული მედია ავრცელებს.„დარნიცკის რაიონში ხანძარი არასაცხოვრებელ შენობას მოედო. დნეპროვსკში ხანძარი საბავშვო ბაღში გაჩნდა“, - განაცხადა კიევის მერმა, ვიტალი კლიჩკომ.რუსებმა დრონებითა და ბალისტიკური რაკეტებით შეუტიეს ხარკოვსაც, რის შედეგადაც ქალაქში ორი ადამიანი დაშავდა.„ხარკოვში მტრის მიერ განხორციელებული დაბომბვის შედეგად ორი ადამიანი დაშავდა. 27 წლის და 58 წლის მამაკაცებს ამჟამად სამედიცინო დახმარება უტარდებათ,“ - განაცხადა ხარკოვის რეგიონალური სახელმწიფო ადმინისტრაციის ხელმძღვანელმა ოლეგ სინეგუბოვმა.მისივე ინფორმაციით, ქალაქ დერგაჩში კიდევ ორი ​​ადამიანი დაშავდა.

მსოფლიო • 1770042900

აშშ-ის იუსტიციის დეპარტამენტის მიერ გამოქვეყნებულ ჯეფრი ეპშტეინის ფაილებში მიხეილ სააკაშვილიც არის ნახსენები

აშშ-ის იუსტიციის დეპარტამენტის მიერ გამოქვეყნებულ ჯეფრი ეპშტეინის ფაილებში საქართველოს ყოფილი პრეზიდენტის, მიხეილ სააკაშვილის სახელი იძებნება.კერძოდ, ერთ-ერთი დოკუმენტის მიხედვით, ილუზიონისტი დევიდ ბლეინი ქალისთვის, რომლის სახელი და გვარი დაფარულია, სავიზო აპლიკაციასთან დაკავშირებით დახმარებას ითხოვს.ბლეინი საკუთარი თავის წარდგენისას კი აცხადებს, რომ ცნობილი ილუზიონისტია და საქართველოს პრეზიდენტისთვის, მიხეილ სააკაშვილისთვის აქვს წარმოდგენა გამართული.„გამოსვლები მქონდა მთელ მსოფლიოში და დავამყარე თუ მოვხსენი არაერთი მსოფლიო რეკორდი, მათ შორის: სუნთქვის შეკავება 17 წუთზე მეტხანს, 35 საათის გატარება დაახლოებით 32 მეტრის სიმაღლის ბოძზე და ერთი კვირის განმავლობაში კუბოში დამარხული ყოფნა. საერთაშორისო მოგზაურობებისას კერძო მაგიურ ნომრებს ვასრულებდი პრეზიდენტ ბილ კლინტონისა და სახელმწიფო მდივან ჰილარი კლინტონისთვის, პრეზიდენტ ჯორჯ ბუშისთვის, თავდაცვის მდივან დონალდ რამსფელდისთვის პენტაგონში, გუბერნატორ არნოლდ შვარცენეგერისთვის, ჰენრი კისინჯერისთვის, ბილ გეითსისა და მერ მაიკლ ბლუმბერგისთვის. ასევე, მაგიური ნომრები შევასრულე რუსეთის პრეზიდენტ დიმიტრი მედვედევისთვის, საქართველოს პრეზიდენტ მიხეილ სააკაშვილისთვის, უკრაინის პრეზიდენტ ვიქტორ იანუკოვიჩისა და ყაზახეთის პრეზიდენტ ნურსულთან ნაზარბაევისთვის“, - წერს ბლეინი წერილში.

ტაბლოიდი • 1770038940

VIDEO: როგორ გახდა მაკა ზამბახიძის ქმარი მისი პროდიუსერი

„რუსთავი 2“-ის ეთერში, გადაცემაში „ასე მღერიან საქართველოში“ მაკა ზამბახიძემ და მისმა მეუღლემ, მიხეილ ჩოხელმა, ასევე რატი დურგლიშვილმა ისაუბრეს იმის შესახებ, თუ როგორ გახდა მიხეილი მაკას და დუეტ „ჯორჯიას“ პროდიუსერი.რატი დურგლიშვილი:ამას წინათ გავხსენით სოციალური ქსელების ანგარიშები. მე 90 000 ნახვა მქონდა კვირაში, მაკას – 300 000, უცებ მიხეილმა გახსნა და სამი მილიონი ნახვა აქვს კვირაში. თავისი ინიციატივა იყო, რომ პროდიუსერი გამხდარიყო.მიხეილ ჩოხელი:პროდიუსერი რომ ვუწოდო ჩემს თავს, მეუხერხულება, რადგან დუეტ „ჯორჯიას“ გვერდით უამრავი პროფესიონალი დგას, მათ შორის ვაჟა დურგლიშვილი. ჩემი სურვილით გადავწყვიტე მათი დახმარება, დავიწყე სოციალურ ქსელში ვიდეოების დადება და მოტანა მაყურებლის ინტერესი. მაყურებელს მოსწონს დუეტისგან უშუალობა და უბრალოება, ყველა მსმენელს ეფერებიან და ფოტოებს იღებენ. ზოგჯერ რატის ავიწყდება, რომ სამღერი აქვს, ესაუბრება ხოლმე გულშემატკივარს და ფოტოს იღებს.

პოლიტიკა • 1770038157

იურიდიულ საკითხთა კომიტეტმა „გრანტების შესახებ“ კანონში ცვლილებას მხარი დაუჭირა

იურიდიულ საკითხთა კომიტეტმა პირველი მოსმენით განიხილა და მხარი დაუჭირა ფრაქცია „ქართული ოცნების“ მიერ საკანონმდებლო ინიციატივის წესით წარდგენილ „გრანტების შესახებ“ კანონში ცვლილებასა და საკანონმდებლო ცვლილებების პაკეტში შემავალ სხვა კანონპროექტებს.საკანონმდებლო ცვლილებებით, ზუსტდება გრანტის ცნება და განისაზღვრება, რომ მათ შორის, გრანტად მიიჩნევა ის ფულადი ან ნატურალური ფორმით გადაცემული სახსრები, რომელიც ხმარდება ან შეიძლება მოხმარდეს საქართველოს ხელისუფლებაზე, სახელმწიფო დაწესებულებაზე ან საზოგადოების ნებისმიერ ნაწილზე რაიმე გავლენის მოხდენის რწმენით ან განზრახვით განხორციელებულ, ან განსახორციელებელ ისეთ საქმიანობას, რომელიც მიმართულია საქართველოს საშინაო ან საგარეო პოლიტიკის ჩამოყალიბებისკენ, გატარებისკენ ან შეცვლისკენ, აგრეთვე, ხმარდება ან შეიძლება, მოხმარდეს ისეთ საქმიანობას, რომელიც უცხო ქვეყნის ხელისუფლების ან უცხოური პოლიტიკური პარტიის პოლიტიკური ან საჯარო ინტერესებიდან გამომდინარეობს.როგორც მომხსენებელმა, იურიდიულ საკითხთა კომიტეტის თავმჯდომარემ არჩილ გორდულაძემ განაცხადა, ორგანიზაცია, რომელიც რეგისტრირებულია უცხოეთში, მაგრამ მისი საქმიანობის არსებითი ნაწილი მოიცავს საქართველოს და საქართველოსთან დაკავშირებულ საკითხებს, ვალდებული იქნება „გრანტების შესახებ“ კანონით გათვალისწინებული წესით, გრანტის მიღებამდე შესაბამისი თანხმობა მთავრობისგან მიიღოს.ცვლილებებით განისაზღვრება, რომ გრანტად აგრეთვე მიიჩნევა ფულადი ან ნატურალური ფორმით გადაცემული სახსრები, რომლის სანაცვლოდ გრანტის მიმღები ტექნიკურ დახმარებას ახორციელებს ტექნოლოგიების, სპეციალიზებული ცოდნის, უნარების, ექსპერტიზის გაზიარების, მომსახურების ან/და სხვა სახის დახმარების ფორმით.არჩილ გორდულაძის განცხადებით, „სისხლის სამართლის კოდექსს“ ემატება ნორმა, რომლის თანახმად, უცხოეთში ლობისტურ - პოლიტიკური საქმიანობისათვის გადახდილი თანხა გამოიწვევს სისხლის სამართლებრივ პასუხისმგებლობას.„საქართველოს სახელით საქართველოსთან დაკავშირებულ საკითხებზე საუბარი მხოლოდ და მხოლოდ საქართველოს მთავრობის უფლებამოსილება და პრეროგატივაა. საქართველოს პრეზიდენტსაც კი, საქართველოს მთავრობის თანხმობა სჭირდება, როდესაც იგი საერთაშორისო ასპარეზზე გამოდის“, - განაცხადა კომიტეტის თავმჯდომარემ.საკანონმდებლი ცვლილებების პაკეტის თანახმად, ზუსტდება პარტიულ-პოლიტიკური მიზანი და ის ფიზიკური თუ იურიდიული პირები, რომლებსაც პარტიულ-პოლიტიკური მიზანი გააჩნიათ, თანაც გაცხადებული, ვალდებული იქნებიან ზუსტად იგივე რეგულაციას დაექვემდებარონ, რასაც პოლიტიკური პარტიები ექვემდებარებიან. რაც გულისხმობს: უცხოეთიდან შემოსავლის აკრძალვას, იურიდიული პირისგან შემოწირულობების აკრძალვას და ამავდროულად, კანონით გათვალისწინებულ ვადაში თავისი შემოსულობების დეკლარირებას.„მოქალაქეთა პოლიტიკური გაერთიანებების შესახებ“ ორგანულ კანონში დაგეგმილი ცვლილების თანახმად, პირს, რომელიც შრომითი ხელშეკრულებითაა დასაქმებული იმ ორგანიზაციაში, რომლის წლის განმავლობაში მიღებული შემოსავლის 20%-ზე მეტი მიღებულია უცხოური ძალისგან, ეკრძალება პოლიტიკური პარტიის წევრობა 8 წლის განმავლობაში.საკანონმდებლო პაკეტი ასევე ითვალისწინებს ცვლილებას „ადმინისტრაციულ სამართალდარღვევათა კოდექსში“, რომლითაც დგინდება ახალი ადმინისტრაციული სამართალდარღვევა მეწარმე სუბიექტის მიერ ისეთი საჯარო პოლიტიკური აქტივობის განხორციელებისთვის, რომელიც არ არის დაკავშირებული მის ძირითად სამეწარმეო საქმიანობასთან.აღნიშნული სამართალდარღვევის ჩადენის შემთხვევაში მეწარმე სუბიექტი დაჯარიმდება 20 000 ლარის ოდენობით, ხოლო ქმედების განმეორებით და ყოველი შემდგომი ჩადენის შემთხვევაში - 40 000 ლარის ოდენობით.კომიტეტმა გაითვალისწინა არჩილ გორდულაძის წინადადება იმის თაობაზე, რომ კანონპროექტის მეორე მოსმენით განხილვის დროს ცვლილება შევიდეს.კერძოდ, მეწარმე სუბიექტის მიერ პირველ ჯერზე ისეთი საჯარო პოლიტიკური აქტივობის განხორციელება, რომელიც არ არის დაკავშირებული მის ძირითად სამეწარმეო საქმიანობასთან, გამოიწვევს ადმინისტრაციულ პასუხისმგებლობას, ხოლო ქმედების განმეორებითი და ყოველი შემდგომი ჩადენა - სისხლის სამართლებრივ პასუხისმგებლობას.