გამოვლინდა ერთ-ერთი ყველაზე საშიში კიბოს უჩვეულო ნიშანი

ბარეტის საყლაპავის სახელით ცნობილი კიბოსწინარე მდგომარეობა, საყლაპავის კიბოს ყველაზე გავრცელებული ტიპის განვითარების, აუცილებელი სტადია აღმოჩნდა.

ამ დასკვნამდე მივიდნენ კემბრიჯის უნივერსიტეტის მეცნიერები. კვლევის შედეგები გამოქვეყნდა ჟურნალ Nature Medicine-ში.

საყლაპავის კიბო ერთ-ერთ ყველაზე სასიკვდილო ფორმის კიბოდ ითვლება, ძირითადად იმიტომ, რომ მას ხშირად ძალიან გვიან აღმოაჩენენ ხოლმე. დიდი ხანია ცნობილია, რომ ის ასოცირდება ბარეტის საყლაპავთან – საყლაპავის ლორწოვანი გარსის ცვლილებასთან, რომელიც სამედიცინო გამოკვლევის დროს ჩანს. თუმცა, ბევრ პაციენტს ეს ნიშანი არ აღმოაჩნდა, რაც მის როლთან დაკავშირებით ეჭვებს ბადებს.

ახალ კვლევაში მეცნიერებმა გააანალიზეს 3000-ზე მეტი პაციენტის მონაცემები და ჩაატარეს სიმსივნეების გენეტიკური კვლევა. აღმოჩნდა, რომ მიუხედავად იმისა, იყო თუ არა ბარეტის საყლაპავი დიაგნოზის დროს ხილული, ყველა სიმსივნეს ერთი და იგივე მოლეკულური ხელმოწერა ჰქონდა.

ეს იმაზე მიუთითებს, რომ კიბოსწინარე სტადია ყოველთვის არსებობს, მაგრამ შეიძლება გაქრეს დაავადების პროგრესირებასთან ერთად. გარდა ამისა, მკვლევარებმა აღმოაჩინეს ბიომარკერები – სპეციფიკური ცილები, რომლებსაც შეუძლიათ ამ ლატენტური სტადიის აღმოჩენა მაშინაც კი, როდესაც ის რუტინული გამოკვლევების დროს არ ჩანს. მათი თქმით, ეს ხსნის შესაძლებლობებს კიბოს ადრეული დიაგნოზისა და პრევენციისთვის, როდესაც მკურნალობა შეიძლება მნიშვნელოვნად უფრო ეფექტური იყოს.