ჭურჭლის სარეცხი მანქანა ჭურჭელს კარგად ვეღარ რეცხავს - მიზეზი შესაძლოა ერთ პატარა დეტალში იმალებოდეს

თუ ჭურჭლის სარეცხი მანქანიდან ამოღებულ თეფშებს საკვების ნარჩენები რჩება, ჭიქები კი დაბინდული და ნაკლებად სუფთაა, შესაძლოა პრობლემა თავად მოწყობილობის დაზიანებაში კი არა, წყლის გამფრქვევი მკლავების დაბინძურებაში იყოს.

ხორვატიაში მცხოვრებმა ერთმა ქალმა ამ პრობლემის მოგვარება მარტივი მეთოდით შეძლო. მან წყლის გამფრქვევი მოხსნა და მისი პატარა ხვრელები ჩვეულებრივი კბილის საჩიჩქნით გაწმინდა. ამის შემდეგ მანქანამ ჭურჭლის რეცხვა კვლავ ეფექტურად დაიწყო.

რატომ ბინძურდება ჭურჭელი?

ჭურჭლის სარეცხ მანქანაში არსებული მბრუნავი გამფრქვევები პატარა ხვრელებიდან წყალს ჭურჭლის მიმართულებით ასხურებს. დროთა განმავლობაში ეს ხვრელები შესაძლოა საკვების ნარჩენებით ან კირის ნადებით დაიხშოს. შედეგად, წყალი ჭურჭლის ყველა ნაწილამდე სათანადოდ ვეღარ აღწევს.

როგორ გავწმინდოთ გამფრქვევები?

გამორთეთ ჭურჭლის სარეცხი მანქანა და გამოაერთეთ დენის წყაროდან.

ამოიღეთ ქვედა კალათა და მოხსენით გამფრქვევი თქვენი მოდელის ინსტრუქციის შესაბამისად. გარეცხეთ დეტალი თბილი წყლით.

კბილის საჩიჩქნით ფრთხილად გაწმინდეთ პატარა ხვრელები. არ დააწვეთ ძლიერად და არ შეეცადოთ მათი გაფართოება.

საჭიროების შემთხვევაში, კირის ნადების მოსაშორებლად გამოიყენეთ ძმრიანი წყალი, თუ ამას მოწყობილობის მწარმოებლის ინსტრუქცია უშვებს.

კარგად გაავლეთ წყალი, დააბრუნეთ დეტალი ადგილზე და შეამოწმეთ, თავისუფლად ტრიალებს თუ არა.

სპეციალისტები ასევე გვირჩევენ ფილტრის რეგულარულ გაწმენდას. მისი დაბინძურება რეცხვის ხარისხზე უარყოფითად მოქმედებს. ფილტრის გაწმენდა სასურველია თვეში ერთხელ ან უფრო ხშირად, საჭიროების მიხედვით.

მარტივი მოვლა შესაძლოა საკმარისი აღმოჩნდეს იმისთვის, რომ ჭურჭლის სარეცხმა მანქანამ კვლავ ეფექტურად იმუშაოს და ზედმეტი ხარჯის გაწევა არ დაგჭირდეთ.