არ აღიარებენ კონსტიტუციურ წესწყობილებას, იმყოფებიან დესტრუქციულ რეჟიმში - აკაკი ალადაშვილი ოპოზიციაზე

"2028 წლამდე გარე ძალები კიდევ შემოგვთავაზებენ გადალაგების ახალ სქემებს, თუმცა ნუ დაავიწყდებათ, რომ წინ აქვთ სასამართლო პროცესი აგენტურული პარტიების აკრძალვასთან დაკავშირებით", - წერს სოციალურ ქსელში ფრაქცია "ქართული ოცნების" თავმჯდომარის მოადგილე.

ლევან მაჭავარიანი ვრცელ წერილს ავრცელებს და საუბრობს გარე ძალების მიერ, ყოველი არჩევნების წინ ოპოზიციური პარტიების სხვადასხვა კონფიგურაციით გადალაგების მცდელობებზე, ამ პროცესში NGO-ბის როლზე და ახალი პარტიების, მათ შორის გახარიას პარტიის ხელოვნურად გაჩენაზე.

მისი თქმით, ეს ძალები ერთიანი ვერტიკალით იმართებიან და მიზნად ანტისახელმწიფოებრივ ქმედებებს ისახავენ.

როგორც მაჭავარიანი აღნიშნავს, გარე ძალების და მათი გეგმების ლუსტრაცია ორ ფუნდამენტურმა საკითხს, გამჭვირვალობის და ანტი-LGBT პროპაგანდის წინააღმდეგ მიმართულ კანონებს მოჰყვა.

ლევან მაჭავარიანის პოსტს პარლამენტის საპროცედურო საკითხთა კომიტეტის თავმჯდომარის პირველი მოადგილე გამოეხმაურა. აკაკი ალადაშვილის განცხადებით, კონკრეტული ძალები იმყოფებიან დესტრუქციულ რეჟიმში.

"დაიწყო უკრაინა-რუსეთის ომი. 2021 წელს ეს გაკეთდა იმიტომ, რომ წაერთმიათ "ქართული ოცნებისთვის" ხმები, მოეყვანათ ხელისუფლებაში აგენტურა და არ ყოფილიყო ომის დაწყების დროს "ქართული ოცნება" ხელისუფლებაში, ჰყოლოდათ ხელისუფლებაში აგენტურა, რათა საქართველო მზად ყოფილიყო მეორე ფრონტის გასახსნელად და ომში ჩასართველად.

ისინი არ აღიარებენ კონსტიტუციურ წესწყობილებას, იმყოფებიან დესტრუქციულ რეჟიმში და ეს არის ერთ-ერთი მთავარი მიზეზი, რატომ დაემატნენ ისინი კონსტიტუციურ სარჩელს", - განაცხადა აკაკი ალადაშვილმა.