ზელენსკი აცხადებს, რომ რუსეთთან ომის შედეგს „ცაში ბრძოლა“ გადაწყვეტს

უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთის ომი უკრაინის წინააღმდეგ სახმელეთო და საზღვაო სივრციდან საჰაერო სივრცეში გადავიდა და აღნიშნა, რომ სწორედ „ცაში ბრძოლა“ განსაზღვრავს კონფლიქტის შედეგს.

Financial Times-თან ინტერვიუში უკრაინის პრეზიდენტმა განაცხადა, რომ მისმა ქვეყანამ უკვე შეძლო რუსეთისთვის ბრძოლის ველზე გამარჯვების შესაძლებლობის წართმევა და მისი ფლოტის განდევნა შავი ზღვის დასავლეთი ნაწილის დიდი ნაწილიდან, რის გამოც საჰაერო სივრცე გადამწყვეტ ასპარეზად დარჩა.

„დღეს მიმაჩნია, რომ გამარჯვება ამ ომში იმას ერგება, ვინც უფრო ჭკვიანია“, - თქვა ზელენსკიმ. „თუ მტერს ბრძოლის ველზე შეაჩერებ, თუ ომს ხმელეთზე შეაჩერებ და თუ მას ზღვაზე უპირატესობას წაართმევ - ისე, როგორც ჩვენ გავაკეთეთ ჩვენი საზღვაო დრონებით, რითაც რუსული ფლოტი განვდევნეთ - მაშინ მომდევნო ბრძოლის ველი ცა ხდება“.

„და გულწრფელად რომ ვთქვათ, ამ შეჯიბრში გაცილებით ნაკლებად მნიშვნელოვანია, ვისი ტერიტორიაა უფრო დიდი“, - თქვა მან და რუსეთის გეოგრაფიულ და ადამიანური რესურსების უპირატესობას გაუსვა ხაზი. „ჩვენ საჰაერო სფეროში გადავედით. და ცაში ჩვენ უკვე კონკურენტუნარიანები ვართ“.

ზელენსკიმ განაცხადა, რომ აშშ-ის პრეზიდენტმა, დონალდ ტრამპმა შაბათს სატელეფონო საუბრისას უთხრა, რომ უკრაინა „ძალიან კარგად მოქმედებს“ თავისი შორ მანძილზე მოქმედი დრონების კამპანიით. კითხვაზე, საკმარისი იყო თუ არა ეს იმისთვის, რომ ტრამპი უკრაინის მხარეს მყარად დამდგარიყო, ზელენსკიმ უპასუხა, რომ მას აქვს განცდა, რომ ამერიკელი ლიდერი ომს ახალი კუთხით უყურებს.

„პრეზიდენტს ტრამპს სურს იყოს იქ, სადაც წარმატებაა“, - განაცხადა ზელენსკიმ. „ეს ბევრ რამეს უკავშირდება - არა მხოლოდ მის პიროვნებას, არამედ მოახლოებულ არჩევნებს, მის სტატუსს და მის რწმენას იმასთან დაკავშირებით, თუ როგორ შეიძლება ამ ომის დასრულება“.