უკრაინა ყოველთვის მხარს უჭერს დიპლომატიას, მზად ვარ, თურქეთში ჩავიდე, რუსეთს მოუწევს ამ ომის დასრულება, და უმჯობესი იქნება, ეს მალე გააკეთოს - ზელენსკი

უკვე მეორე დღეა, მსოფლიო პუტინის პასუხს ელოდება. ამ დრომდე უცნობია, ჩავა თუ არა კრემლის ლიდერი 15 მაისს სტამბოლში და შეხვდება თუ არა ზელენსკის.

მოსკოვს ოფიციალური პოზიცია ამ დრომდე არ დაუფიქსირებია, თუმცა ცნობილი გახდა, რომ შედგა სატელეფონო საუბარი ლავროვსა და მის თურქ კოლეგას შორის.

განცხადება გააკეთა ტრამპმაც, რომელიც იმედოვნებს, რომ შეხვედრა შედგება და შესაძლოა ის ამ მოლაპარაკებას თავადაც დაესწროს.

პარალელურად, უკრაინის საკითხზე ევროპელმა დიპლომატებმა ერთობლივი განცხადება მიიღეს. "ვაიმარი +"-ის ფორმატის ფარგლებში გავრცელებულ დოკუმენტში ისინი მოუწოდებენ რუსეთს, ცეცხლი შეწყვიტოს.

ვოლოდიმირ ზელენსკის განცხადებით, რუსეთს მაინც მოუწევს ამ ომის დასრულება, და უმჯობესია ეს მალევე გააკეთოს, მკვლელობების გაგრძელებას აზრი არ აქვს.

"უკრაინა ყოველთვის მხარს უჭერს დიპლომატიას. მზად ვარ, თურქეთში ჩავიდე. სამწუხაროდ, ცეცხლის შეწყვეტის მრავალ წინადადებასთან დაკავშირებით მსოფლიოს რუსეთისგან მკაფიო პასუხი ჯერ კიდევ არ მიუღია. რუსული დაბომბვები და თავდასხმები გრძელდება. მოსკოვი მთელი დღის განმავლობაში დუმდა პირდაპირი შეხვედრის შეთავაზებასთან დაკავშირებით. ძალიან უცნაურია ეს დუმილი. თუმცა რუსეთს მოუწევს ამ ომის დასრულება, და უმჯობესი იქნება, ეს მალე გააკეთოს. არ აქვს აზრი მკვლელობების გაგრძელებას. პრეზიდენტმა ერდოღანმა გამოხატა სრული და მზადყოფნა, უმასპინძლოს შეხვედრას. მნიშვნელოვანია, რომ პრეზიდენტი ტრამპი სრულად უჭერს მხარს ამ შეხვედრას, და ჩვენ გვსურს, რომ მან გამონახოს შესაძლებლობა და თურქეთში იყოს", - აცხადებს ვოლოდიმირ ზელენსკი.