„როიტერი“: აშშ ევროპელებს NATO-ს ორი სამეთაურო პუნქტის მართვას გადააბარებს

აშშ ევროპელებს ნატო-ს ორი სამეთაურო პუნქტის მართვას გადააბარებს. ინფორმაციას ამის შესახებ „როიტერი“ ანონიმურ წყაროზე დაყრდნობით ავრცელებს.

როგორც მედია წერს, ნატო-ს სარდლობის საკადრო ცვლილებების ფარგლებში ევროპელი ოფიცრები ნეაპოლში მდებარე ნატო-ს მოკავშირეთა გაერთიანებული ძალების სარდლობას და ნორფოლკში მდებარე გაერთიანებული ძალების სარდლობას გადაიბარებენ, რომლებსაც ახლა ამერიკელი ადმირალები მართავენ.

სააგენტოს ცნობით, ეს ნაბიჯი შეესაბამება აშშ-ის პრეზიდენტის, დონალდ ტრამპის მოთხოვნებს, რომ ევროპულმა ქვეყნებმა უფრო მეტი პასუხისმგებლობა აიღონ საკუთარი უსაფრთხოების უზრუნველყოფაზე.

„მოკავშირეები ნატო-ს სარდლობის სტრუქტურის ფარგლებში ოფიცრების პასუხისმგებლობის გადანაწილებაზე შეთანხმდნენ და ევროპელი მოკავშირეები ალიანსის სამხედრო ხელმძღვანელობაში უფრო მნიშვნელოვან როლს შეასრულებენ“, – განუცხადა „როიტერს“ ნატო-ს ოფიციალურმა პირმა.