კიბოს მეტასტაზები უხილავი ბუშტუკებით ვრცელდება - მკვლევრებმა მათი შეჩერების შესაძლო მეთოდს მიაგნეს

ერთი ორგანოდან მეორეში კიბო უხილავი ბუშტუკების საშუალებით გადადის. ამ მიკროსკოპული შიკრიკების უკეთესად შესწავლამ შეიძლება შეცვალოს მეტასტაზებთან ბრძოლა. 

მონრეალის უმაღლესი ტექნოლოგიების სკოლის (ÉTS) ელექტროინჟინერიის დეპარტამენტის მკვლევართა ჯგუფის მიზანი იყო სხეულში კიბოს გავრცელების შეჩერება. ჯგუფს ამავე უნივერსიტეტის პროფესორი ვაჰე ნერგიზიანი ხელმძღვანელობდა.

მაკგილის უნივერსიტეტის ჯანდაცვის ცენტრის პროფესორ ჯულია ბარნიესთან და ბიოლოგიის სპეციალისტებთან თანამშრომლობით, ისინი იკვლევენ, როგორ გადაიქცევა კიბო მეტასტაზებად, ანუ, როგორ იჭრება სხვა ორგანოებში.

ნერგიზიანის ჯგუფი რვა წლის განმავლობაში სწავლობდა ლიპიდურ ნანონაწილაკებს, რომელთა ზომა 100 ნანომეტრი ძლივს არის და შეუიარაღებელი თვალით უხილავია. მათი პირველი ამოცანა მეტასტაზების გზის დადგენა იყო. შემდეგ სცადეს სხეულში პრეპარატების შეყვანის სხვადასხვა გზის განსაზღვრა.

ისეთი ლიპიდური ნანონაწილაკები, როგორიცაა ლიპოსომები, განსხვავდება კიბოს მკურნალობის ტრადიციული მიდგომებისგან, რადგან მათ პრეპარატი პირდაპირ სიმსივნურ უჯრედებში მიაქვთ. ეს კი ზრდის მათ ეფექტიანობას და ამცირებს ტოქსიკურობას ტრადიციულ ქიმიოთერაპიასთან შედარებით.

მკვლევრებმა აჩვენეს, რომ ლიპოსომები სიმსივნეებს უფრო ეფექტიანად იღებენ მიზანში და ამცირებენ გვერდით ეფექტებს; სხვა მკვლევრებმა კი ასევე აჩვენეს, რომ ეს ნანონაწილაკები აუმჯობესებენ პრეპარარის შეღწევადობას და სპეციფიკურობას, განსაკუთრებით მეტასტაზების შემთხვევაში. 

ასეთი შედეგები ადასტურებს, რომ ნანოპრეპარატები კიბოს მკურნალობას უფრო მიზანმიმართულს და ეფექტიანს ხდის და აუმჯობესებს მათ ტოლერანტულობას.