ილჰამ ალიევი: აზერბაიჯანი გააგრძელებს ძალისხმევას რეგიონში მშვიდობის დღის წესრიგის წინსვლისთვის

აზერბაიჯანი გააგრძელებს ძალისხმევას რეგიონში მშვიდობის დღის წესრიგის წინსვლისთვის, – ამის შესახებ აზერბაიჯანის პრეზიდენტმა, ილჰამ ალიევმა, გაფართოების საკითხებში ევროკომისართან, მარტა კოსთან შეხვედრის დროს განაცხადა.

რეგიონში სატრანსპორტო კავშირების დამყარების კარგი შესაძლებლობების აღნიშვნისას, ილჰამ ალიევმა განაცხადა, რომ აზერბაიჯანი ინტენსიურად მუშაობს ოკუპაციისგან გათავისუფლებულ ტერიტორიებზე საგზაო ტრანსპორტის ინფრასტრუქტურის შესაქმნელად. ამ მხრივ, აზერბაიჯანის პრეზიდენტმა ზანგილანამდე მიმავალი გზისა და რკინიგზის ხაზების მნიშვნელობაზე ისაუბრა.

ევროპის ენერგეტიკული უსაფრთხოების უზრუნველყოფაში აზერბაიჯანის წვლილზე საუბრისას, ილჰამ ალიევმა აღნიშნა, რომ ამჟამად აზერბაიჯანული გაზი ევროპის ათ ქვეყანაში გადის ექსპორტზე, მათ შორის ევროკავშირის რვა წევრ სახელმწიფოში და ექსპორტის გეოგრაფია ფართოვდება.

თავის მხრივ, მარტა კოსმა სახელმწიფოს მეთაურს მიულოცა სომხეთსა და აზერბაიჯანს შორის ურთიერთობების ნორმალიზებისა და სამშვიდობო დღის წესრიგის წინსვლის საქმეში მიღწეული წარმატებები. ევროკომისარმა განაცხადა, რომ ევროკავშირი გააგრძელებს რეგიონში მდგრადი მშვიდობის უზრუნველყოფისკენ მიმართული ძალისხმევის მხარდაჭერას, ასევე მხარს დაუჭერს აზერბაიჯანის საქმიანობას ჰუმანიტარული განაღმვის სფეროში.

როგორც მარტა კოსმა აღნიშნა, ევროკავშირმა და აზერბაიჯანმა ენერგეტიკის სექტორში წარმატებული თანამშრომლობა დაამყარეს. მან ასევე ტრანსპორტის სექტორში თანამშრომლობის შემდგომი განვითარების მნიშვნელოვან პერსპექტივებზე ისაუბრა.