ევროკავშირის წევრი ქვეყნების კვალიფიციურმა უმრავლესობამ მხარი დაუჭირა სავაჭრო შეთანხმებას „მერკოსურის“ ბლოკთან

ევროკავშირის წევრი ქვეყნების კვალიფიციურმა უმრავლესობამ პარასკევს მხარი დაუჭირა სავაჭრო შეთანხმებას „მერკოსურის“ ბლოკთან - სამხრეთ ამერიკის ქვეყნების - არგენტინა, ბრაზილია, პარაგვაი და ურუგვაი - ეკონომიკური და პოლიტიკური გაერთიანება.

საფრანგეთმა, პოლონეთმა, ავსტრიამ, ირლანდიამ და უნგრეთმა წინააღმდეგობა გამოხატეს, ხოლო ბელგიამ თავი შეიკავა.

იტალიამ მხარი დაუჭირა შეთანხმებას მას შემდეგ, რაც გასულ თვეში პროცესის გადავადებას მიაღწია.

„ჩვენი გზავნილი მსოფლიოსთვის ასეთია: პარტნიორობა ქმნის კეთილდღეობას, ხოლო ღიაობა განაპირობებს პროგრესს“, - განაცხადა ევროკომისიის პრეზიდენტმა, ურსულა ფონ დერ ლაიენმა.

მან მიანიშნა, რომ ხელშეკრულებას პარაგვაიში „მალე“ მოეწერება ხელი, თუმცა არ დაუკონკრეტებია, მოხდება თუ არა ეს უკვე ორშაბათს ან სამშაბათს. მომავალი კვირის ბოლოს იგი კომისართა კოლეგიასთან ერთად კვიპროსში მიემგზავრება.

სოფლის მეურნეობის ბაზრის დამატებითმა დამცავმა მექანიზმებმა, რომლებიც ბრაზილიიდან, არგენტინიდან, პარაგვაიდან და ურუგვაიდან იმპორტის მკვეთრი ზრდის შემთხვევაში ამოქმედდება, ასევე მიიღო ევროკავშირის ქვეყნების მხარდაჭერა.

„ჩვენ მოვისმინეთ ჩვენი ფერმერებისა და სოფლის მეურნეობის სექტორის წუხილი და შესაბამისად ვიმოქმედეთ. ეს შეთანხმება შეიცავს მყარ დამცავ მექანიზმებს მათი საარსებო წყაროს დასაცავად“, - განაცხადა ფონ დერ ლაიენმა.

ევროკავშირსა და „მერკოსურს“ შორის დადებული გარიგება მიზნად ისახავს მსოფლიოში უმსხვილესი თავისუფალი ვაჭრობის ზონის შექმნას, რომელიც დაახლოებით 700 მილიონ ადამიანს მოიცავს. ბრიუსელის პერსპექტივიდან, ეს შეთანხმება მნიშვნელოვანი გეოპოლიტიკური გამარჯვებაა, ლათინურ ამერიკაში ჩინეთის მზარდი სავაჭრო წილისა და გავლენის ფონზე.