დაღესტანში გაუჩინარებული ტაქსის მძღოლის მკვლელობისთვის ყოფილი ქმარი და მისი მეგობარი დააკავეს - ქალს ოთხი წლის შვილი დარჩა

რუსეთის დაღესტნის რესპუბლიკაში გაუჩინარებული 34 წლის ტაქსის მძღოლი დინარა ა. გარდაცვლილი იპოვეს. მედიის ცნობით, ქალის მკვლელობაში ეჭვმიტანილები მისი ყოფილი ქმარი, 39 წლის აკიფ გასანოვი და მამაკაცი, სახელად ბაგა არიან. წინასწარი ინფორმაციით, მათ შესაძლოა ქალი მოკლეს, ცხედარი კი მთიან ტერიტორიაზე დამარხეს.

ინფორმაციას ტელეგრამარხი SHOT ავრცელებს.

გამოცემის ცნობით, სავარაუდო თავდამსხმელები ქალს თავს დაესხნენ, შემდეგ კი მისი ცხედარი დაღესტნის მთებში დამალეს. ორივე მამაკაცი დაკავებულია. სამართალდამცველები მომხდარის გარემოებებს იკვლევენ და თითოეული დაკავებულის შესაძლო მონაწილეობას ადგენენ.

გაუჩინარებული ქალის ცხედარი მთებში იპოვეს
დინარა ა. მანამდე უგზო-უკვლოდ დაკარგულად ითვლებოდა. მოგვიანებით მისი ცხედარი მთიან ტერიტორიაზე, მიწაში დამარხული აღმოაჩინეს.

SHOT-ის ინფორმაციით, შეტყობინების გავრცელების მომენტისთვის ცხედარი ორმოდან ჯერ კიდევ არ ამოეყვანათ. ადგილზე საგამოძიებო და სხვა აუცილებელი ღონისძიებები მიმდინარეობდა.

ჟურნალისტების ინფორმაციით, გარდაცვლილი ქალის ყოფილი მეუღლეც ტაქსის სფეროში მუშაობს და ავტომობილებს გასაქირავებლადაც გასცემს.

დინარასა და აკიფ გასანოვს ოთხი წლის ვაჟი დარჩათ.

მომხდართან დაკავშირებით რუსეთის სისხლის სამართლის კოდექსის 105-ე მუხლით, რომელიც განზრახ მკვლელობას ეხება, სისხლის სამართლის საქმე აღიძრა.

გამოძიებამ უნდა დაადგინოს ქალის გარდაცვალების ზუსტი გარემოებები და დაკავებულთა შესაძლო როლი დანაშაულში. ამ ეტაპზე მათი ბრალეულობა სასამართლოს მიერ დადგენილი არ არის.