აშშ-მა და ისრაელმა იმოქმედეს მოკავშირეებთან კონსულტაციების გარეშე, მიმდინარე კონფლიქტი საერთაშორისო წესრიგის მარცხის კიდევ ერთი მაგალითია - მარკ კარნი

 აშშ-სა და ისრაელის ირანთან ომი საერთაშორისო წესრიგის მარცხია, – ამის შესახებ კანადის პრემიერ-მინისტრმა, მარკ კარნიმ განაცხადა.

კარნიმ ორივე ქვეყანა მოკავშირეებთან კონსულტაციების არარსებობის გამო გააკრიტიკა.

კანადის პრემიერ-მინისტრის თქმით, მიუხედავად იმისა, რომ კანადა ირანის ბირთვულ პროგრამას „სერიოზულ გლობალურ საფრთხედ“ მიიჩნევს, მოუწოდებს „საომარი მოქმედებების სწრაფი დეესკალაციისკენ“ და „მზად არის, დაეხმაროს ამ მიზნის მიღწევაში“.

„კანადა დიდი ხანია, ირანს ახლო აღმოსავლეთში არასტაბილურობისა და ტერორის მთავარ წყაროდ მიიჩნევს. რეჟიმმა და მისმა მოკავშირეებმა ასობით ადამიანი მოკლეს, მათ შორის კანადელი მშვიდობიანი მოქალაქეები, ახლო აღმოსავლეთსა და მის ფარგლებს გარეთ მილიონობით ადამიანს აღუწერელი ტანჯვა მიაყენეს. ორ ათწლეულზე მეტი ხნის მოლაპარაკებებისა და დიპლომატიური ძალისხმევის მიუხედავად, ირანმა არც ბირთვული პროგრამა დაშალა და არც გამდიდრების საქმიანობა შეაჩერა. კანადა დიდი ხანია, მხარს უჭერს ამ სერიოზული გლობალური საფრთხის ნეიტრალიზაციის აუცილებლობას. კანადა ირანელი ხალხის გვერდით დგას რეჟიმის ჩაგვრის წინააღმდეგ მათ ხანგრძლივ და გაბედულ ბრძოლაში, სწორედ ამიტომ ჩვენ მხარს ვუჭერთ ძალისხმევას, რათა ხელი შევუშალოთ ირანს ბირთვული იარაღის მოპოვებაში. თუმცა, ჩვენ ამ პოზიციას სინანულით ვიკავებთ, რადგან მიმდინარე კონფლიქტი საერთაშორისო წესრიგის მარცხის კიდევ ერთი მაგალითია. გაერო-ს უშიშროების საბჭოს ათწლეულების განმავლობაში მიღებული რეზოლუციების, საერთაშორისო ატომური ენერგიის სააგენტოს დაუღალავი მუშაობისა და სანქციებისა და დიპლომატიური ჩარჩოების სერიის მიუხედავად, ირანის ბირთვული საფრთხე კვლავ არსებობს. ახლა კი შეერთებულმა შტატებმა და ისრაელმა იმოქმედეს გაერო-სთან ჩართულობის ან მოკავშირეებთან, მათ შორის კანადასთან კონსულტაციების გარეშე. ჩვენ ვგმობთ ირანის მიერ ახლო აღმოსავლეთში მშვიდობიან მოსახლეობასა და სამოქალაქო ინფრასტრუქტურაზე განხორციელებულ დარტყმებს. ჩვენ მოვუწოდებთ ყველა მხარეს, მათ შორის შეერთებულ შტატებსა და ისრაელს, პატივი სცენ საერთაშორისო ჩართულობის წესებს. ამ კრიზისის მოგვარება მოითხოვს უფრო ფართო პოლიტიკური გადაწყვეტისადმი ერთგულებას და დიპლომატიური ჩართულობა აუცილებელია უფრო ფართო და ღრმა კონფლიქტის თავიდან ასაცილებლად. უდანაშაულო მშვიდობიანი მოსახლეობა უნდა იყოს დაცული და ყველა მხარემ უნდა აიღოს ვალდებულება, იპოვოს მდგრადი შეთანხმებები როგორც ბირთვული გავრცელების, ასევე ტერორისტული ექსტრემიზმის დასასრულებლად. კანადა ამ მიდგომას გააგრძელებს მსგავსი შეხედულებების მქონე ქვეყნებთან და კონფლიქტის მონაწილეებთან“, – განაცხადა კარნიმ.