გარკვეული საკვები და სასმელი შეიძლება თმის ცვენას უწყობდეს ხელს - კვლევა

ახალი კვლევა ვარაუდობს, რომ გარკვეული საკვები ხელს უწყობს თმის ცვენას, ზოგი კი ხელს უწყობს თმის ზრდას, წერს MedicalXpress .

ჟურნალ „Nutrition and Health“- ში გამოქვეყნებულმა კვლევამ აჩვენა, რომ ალკოჰოლური და შაქრის მაღალი შემცველობის მქონე სასმელები თმის ცვენის გაზრდილ რისკთან ასოცირდება. აღსანიშნავია, რომ მკვლევრებმა გააანალიზეს დიეტასა და თმაზე ჩატარებული 17 კვლევა.

„როდესაც დიდი რაოდენობით შაქარს ვხმარობთ, ინსულინის დონე მკვეთრად იმატებს, რაც ანთებას უწყობს ხელს და თმის ზრდის ბუნებრივი ციკლის დარღვევას იწვევს“, - განმარტა ლორა აკოსტამ, ფლორიდის უნივერსიტეტის რეგისტრირებულმა დიეტოლოგმა.

რაც შეეხება სასმელებს, ალკოჰოლი თმის ცვენაზე პირდაპირ გავლენას არ ახდენს.

„ალკოჰოლი თმის ცვენის პირდაპირი მიზეზი არ არის, თუმცა ის ხელს უწყობს საკვები ნივთიერებების დეფიციტს, შეწოვის დარღვევას, ღვიძლის სტრესს, ძილის დარღვევას და სისტემურ ანთებას, რამაც შეიძლება უარყოფითად იმოქმედოს თმის ზრდაზე“, - დასძინა აკოსტამ.

გარდა ამისა, თმის ცვენა შეიძლება გამოწვეული იყოს ცილის არასაკმარისი მიღებითაც. აკოსტამ აღნიშნა, რომ ადამიანმა ყოველდღიურად უნდა მიიღოს ნახევარი გრამი ცილა სხეულის წონის ყოველ კილოგრამზე.

აკოსტა ასევე გვირჩევს, რომ თუთიასთან და ბიოტინთან (ვიტამინი B7) ერთად შევამოწმოთ რკინის დონე, რადგან მისმა დეფიციტმა შეიძლება თმის ცვენა ან გათხელება გამოიწვიოს. ზრდასრულებს დღეში 30 მიკროგრამი ბიოტინი სჭირდებათ. ის გვხვდება ისეთ საკვებში, როგორიცაა ხორცი, კვერცხი, თევზი, თესლი, თხილი და ბოსტნეული, როგორიცაა ტკბილი კარტოფილი.