„არც მე და არც ჩემი მეუღლე არ ვართ მთავრობის წარმომადგენლები... ვერ გავიგე, რატომ არ გვიხარია ის, რაც საქართველომ შეძლო“ - სალომე ღვინიაშვილი

სალომე ღვინიაშვილი მედიასთან გაკეთებულ კომენტარზე, რასაც სოციალურ ქსელში უამრავი გამოხმაურება მოჰყვა, განმარტებას აკეთებს.

„გულწრფელად ვერ გავიგე, რატომ არ გვიხარია ის, რაც საქართველომ შეძლო მაშინ, როცა ბევრმა ქვეყანამ ვერ მოახერხა. როცა რაღაც კარგი ხდება, რატომ, არის ასე რთული აღიარება? ვფიქრობ, სრულიად ბუნებრივია, როცა კარგს ვაფასებთ და ვამბობთ, რომ ეს კარგია. ისევე როგორც ბუნებრივია, როცა კრიტიკასაც გამოვთქვამთ ან პროტესტსაც ვაფიქსირებთ. თუ რამე არ მოგვწონს, ეს პოლიტიკურ მხარეებზე არ უნდა გადიოდეს, საბოლოოდ ეს ჩვენი საერთო ქვეყანაა.

ასევე, მინდა მივმართო იმ ადამიანებსაც, ვინც უკვე მეორე დღეა ჩემი ლანძღვით არის დაკავებული. მეგობრებთან ერთად ვიყავი დასასვენებლად. არც მე და არც ჩემი მეურლე არ ვართ მთავრობის წარმომადგენლები, არც სახელმწიფო სამსახურში ვმუშობთ და არც ვინმესგან რამეს ვიღებთ. ვშრომობთ და ვცხოვრობთ ჩვენი შრომით. შესაბამისად, როცა მომინდება, ჩემი შემოსავლით წავალ იქ, სადაც მინდა. რაც შეეხება ე.წ „მთავრობის სიებს“, ვფიქრობ, ყველამ კარგად იცის, რამდენად არ შეესაბამება სიმართლეს, ამიტომ ამ თემას აღარ გავაგრძელებ.

და ბოლოს, მადლობა ყველას, ვისაც უბრალოდ გაუხარდა ჩემი მშვიდობით დაბრუნება ქვეყანაში,“ – წერს სალომე ღვინიაშვილი.

ცნობისთვის, მოდელი სალომე ღვინიაშვილი აბუ-დაბიდან საქართველოში დაბრუნდა. ღვინიაშვილი ომანიდან თბილისში მეგობრებთან ერთად სპეციალური რეისით ჩამოფრინდა.