1795088178
უახლესი ინფორმაცია ფონიჭალიდან - აფეთქების ადგილზე სამაშველო ოპერაცია გრძელდება
ფონიჭალაში მომხდარი აფეთქების ფაქტზე გამოძიება დაიწყო. აღნიშნულის შესახებ ჟურნალისტებს შემთხვევის ადგილზე მისულმა პროკურორმა, ლევან ვეფხვაძემ განუცხადა.
როგორც ვეფხვაძე განმარტავს, სამაშველო ღონისძიებების პარალელურად, გამომძიებლებიც მუშაობენ და შესაბამის მოქმედებებს ახორციელებენ.
„სამაშველო სამსახური აქტიურად მუშაობს, პარალელურად დაწყებულია გამოძიება სისხლის სამართლის კოდექსის 240-ე მუხლის პრიმა ნაწილით, რაც უსაფრთხოების წესის დარღვევით განვითარებულ მოვლენებს გულისხმობს. მაშველებთან ერთად ვათვალიერებთ შემთხვევის ადგილს, იმის შესაძლებლობის ფარგლებში, რასაც მოცემულობა გვაძლევს, რადგან სხვანაირად წარმოუდგენელია, გამომძიებლებმა იმუშაონ. მათ შორის, ვადგენთ ყველა პირის მონაცემებს, რომლებიც კორპუსის მაცხოვრებლები არიან და სხვადასხვა ინფორმაციებს ვაგროვებთ.
ექსპერტ-კრიმინალისტებიც აქტიურად არიან ჩართულები, მათ შორის, გამოყენებულია არაერთი დრონი, ტარდება ყველა საგამოძიებო მოქმედება. თავის მხრივ, სამაშველო სამსახური მუშაობს და ეძებს აქტიურად იმ პიროვნებებს“, - განაცხადა ვეფხვაძემ.
ცნობისთვის, დღეს დილით, ფონიჭალაში სავარაუდოდ, ბუნებრივი აირის დაგროვების შედეგად აფეთქება მოხდა.
არსებული ინფორმაციით, ამ დროისთვის 7 ადამიანის, მათ შორის 3 ბავშვის ძებნა-შველის სამუშაოები მიმდინარეობს. ადგილზე არიან დაზარალებულების ახლობლებიც.
„რუსთავში ვცხოვრობ და იქიდან ჩამოვედი. ბიჭს დავურეკე, ვრეკავ და რატომ არ მპასუხობს ლალი მეთქი. დედა, უბედურება შეგვემთხვაო. ავდექი და წამოვედი… რძალი საძინებელში ყოფილა, უკანა მხარეს, ბავშვები კი წინ, ფანჯრიდან გადმომხტარან და გამოიქცნენ. არ ვიცი, ჩემი რძალი ცოცხალია თუ არა“, - ამბობს მოქალაქე.
აფეთქების შედეგად დაშავებულებიდან ორი, დედა და 11 წლის შვილი ინგოროყვას კლინიკაშია გადაყვანილი.
რაც შეეხებათ დაშავებულებს, ბოლო ინფორმაციით კლინიკაში 4 ადამიანია გადაყვანილი, მათგან ერთი მცირეწლოვანია.












