პოლიტიკა • 1746529567

თინა ბოკუჩავა - მომდევნო კვირას „ნაციონალური მოძრაობა” გეგმავს ვიზიტს აშშ-ში, რომ ვიმუშაოთ განსაკუთრებით ინტენსივობით ზედა პალატასთან, რათა იქაც იყოს „მეგობარი აქტის“ ორპარტიული მხარდაჭერა

„მეგობარი აქტის“ მიღება არის ძალიან მკაცრი გაფრთხილება ივანიშვილისთვის – ის ან დათმობს ხელისუფლებას, ან მიიღებს უმძიმეს სანქციებს დონალდ ტრამპის ადმინისტრაციისგან. ფინანსური სანქციის ქვეშ ასევე მოჰყვებიან მისი გარემოცვის წევრები, პროპაგანდისტები და კორუმპირებული ბიზნესი, ე.წ. ფინანსური ელიტა, რომელზეც დგას მისი რუსული დანაშაულებრივი რეჟიმი. კიდევ ერთხელ დამტკიცდა, რომ ივანიშვილის რეჟიმის პირობებში არანაირი რესტარტი აშშ-თან არ მოხდება, – განაცხადა „ერთიანობა ნაციონალური მოძრაობის” თავმჯდომარემ, თინა ბოკუჩავამ.თინა ბოკუჩავას განცხადებით, „მეგობარი აქტის“ მიღება კიდევ ერთხელ ცხადყოფს, რომ აშშ-ში არის ორპარტიული მხარდაჭერა ქართველი ხალხის ევროატლანტიკური არჩევანის მიმართ და სწორედ ეს გახდება განმსაზღვრელი აშშ-ის პოლიტიკის საქართველოსთან მიმართებით.„გუშინ აშშ-ის კონგრესის ქვედა პალატამ უდიდესი უმრავლესობით მიიღო „მეგობარი აქტი“, რაც არის ქართველი ხალხის უდიდესი მიღწევა და მე მინდა, მივულოცო საქართველოს თითოეულ მოქალაქეს, რომელიც იბრძვის ჩვენი ქვეყნის ევროპული მომავლისთვის, ევროატლანტიკური მომავლისთვის, აშშ-ის ასეთი მხარდაჭერა. მნიშვნელოვანია, რომ საქართველოს მოქალაქეებმა იცოდნენ, რომ იმ 349 კონგრესმენისგან, რომლებმაც გუშინ მხარი დაუჭირეს მეგობარ აქტს, 168 კონგრესმენი რესპუბლიკელია, ხოლო 181 არის დემოკრატი. ეს კიდევ ერთხელ ცხადყოფს იმას, რასაც ჩვენ მრავალი თვის განმავლობაში ვამტკიცებდით, რომ აშშ-ში არის ორპარტიული მხარდაჭერა ქართველი ხალხის ევროატლანტიკური არჩევანის და სწორედ ეს გახდება განმსაზღვრელი აშშ-ის პოლიტიკის საქართველოსთან მიმართებით.იცით, რომ „მეგობარი აქტის“ ინიციატორი საქართველოს ძალიან კარგი მეგობარი, რესპუბლიკელი კონგრესმენი ჯო უილსონია, რომელიც ბოლოს ეუთო-ს საპარლამენტო ასამბლეაზე ვნახე, სადაც ის საქართველოსა და აშშ-ის ბროშებს არიგებდა მსოფლიო ლიდერებისთვის, რომელთაგან ერთ-ერთი მეც მისახსოვრა, იმისთვის, რომ მოიპოვოს მხარდაჭერა საქართველოს და ამერიკის ორმხრივი ურთიერთობისთვის.„მეგობარი აქტის“ მიღება ასევე არის ძალიან მკაფიო და მკაცრი გაფრთხილება ივანიშვილისთვის, ის ან დათმობს ხელისუფლებას, რომელიც მიტაცებული აქვს ქართველი ხალხისგან 26 ოქტომბრის არჩევნებზე სპეცოპერაციის შედეგად, ან მიიღებს დამატებით და უმძიმეს სანქციებს დონალდ ტრამპის ადმინისტრაციისგან. ფინანსური სანქციის ქვეშ ასევე მოჰყვებიან მისი გარემოცვის წევრები, მისი პროპაგანდისტები და კორუმპირებული ბიზნესი, ე.წ. ფინანსური ელიტა, რომელზეც დგას მისი რუსული დანაშაულებრივი რეჟიმი.გუშინდელი მიღებული აქტი ქვედა პალატის მხრიდან, ახლა გადაეცემა ზედა პალატას ანუ სენატს, სადაც დარწმუნებული ვარ, რომ „მეგობარი აქტი“ ასევე მიიღებს ძალიან დიდ მხარდაჭერას“, – განაცხადა ბოკუჩავამ.მისივე თქმით, მომდევნო კვირას „ერთიანობა ნაციონალური მოძრაობა” გეგმავს ვიზიტს აშშ-ში, მათ შორის იმისთვის, რომ იმუშაონ სენატის ზედა პალატასთან, რათა იქაც იყოს „მეგობარი აქტის“ ორპარტიული მხარდაჭერა.„მინდა, გაცნობოთ, რომ „ერთიანობა ნაციონალური მოძრაობა” გეგმავს ვიზიტს აშშ-ში მომავალ კვირას სწორედ იმისთვის მათ შორის, რომ ვიმუშაოთ განსაკუთრებით ინტენსივობით სენატთან, ზედა პალატასთან, რომ იქაც იყოს ასეთი ორპარტიული მხარდაჭერა. ჩვენი მოლოდინი ქვედა პალატაზე გამართლდა და გვჯეროდა, რომ „მეგობარი აქტი“ მოიპოვებდა უდიდეს მხარდაჭერას და ეს ასეც მოხდა.კიდევ ერთხელ მინდა, საზოგადოებას შევახსენო თუ რა იყო ივანიშვილის წინა საარჩევნო დაპირება, ეს იყო მშვიდობა და არჩევნების შემდეგ, სპეცოპერაციის შემდეგ, რომელიც მან ჩაატარა, ხედავთ რომ აშშ-მა ივანიშვილს გამოუცხადა ომი. ივანიშვილი ევროპულ მშვიდობას ჰპირდებოდა ქართველ ხალხს და მიიღო ცივი ომი როგორც აშშ-თან, ისე ევროკავშირთან. ივანიშვილი მშვიდობას ჰპირდებოდა ქართველ ხალხს და ძალადობრივი ომი გამოუცხადა ქართველ ხალხს და განსაკუთრებული რეპრესიებით დაუპირისპირდა ახალგაზრდობას. დროა, გააცნობიეროს ივანიშვილმა და „მეგობარი აქტი“ არის სწორედ გაფრთხილება, რომ მისი დრო ამოიწურა და რომ ერთადერთი ხსნა ქვეყნისთვის და ერთადერთი გადარჩენა მათ შორის მისთვის არის ძალაუფლების დათმობა და ქვეყანაში ახალი არჩევნების ჩანიშვნა. გუშინ დამტკიცდა, რომ ივანიშვილის პროპაგანდა ხალხს ატყუებს და რომ ვერანაირი რესტარტი და გადატვირთვა აშშ-თან ვერ მოხდება ივანიშვილის რეჟიმის პირობებში, ერთადერთი გამოსავალი არის ახალი, თავისუფალი, სამართლიანი არჩევნები და პოლიტპატიმრების გათავისუფლება და ამ ყველაფერს ჩვენ მივაღწევთ ერთიანი ძალებით“, – განაცხადა თინა ბოკუჩავამ.

პოლიტიკა • 1746452221

ედიშერ გვენეტაძე: „მგელი არ მოიშლის მგლობას“ - ამას ადასტურებს კოლექტიური ნაცმოძრაობის მიერ სიცრუეზე აგებული პროპაგანდა ციხეში პატიმრის თითქოსდა ცემით გარდაცვალების შესახებ. სააკაშვილის რეჟიმის ხელწერა იყო ცილისწამება, ტერორი

აი ეს იყო ნაცმოძრაობის რეალური სახე. ასე აწამებდნენ და არ ინდობდნენ ადამიანებს. სააკაშვილის შექმნილ რეჟიმის ხელწერა იყო ცილისწამება, ტერორი და მოქალაქეების თვითნებურად მოგონილი, შუასაკუნეობრივი მეთოდებით დასჯა. „მგელი არ მოიშლის მგლობას“, - ამას ადასტურებს დღევანდელი კოლექტიური ნაცმოძრაობის მიერ სიცრუეზე აგებული პროპაგანდა ციხეში პატიმრის(უფალმა აცხონოს) თითქოსდა ცემით გარდაცვალების შესახებ, - წერს ექსპერტი, ედიშერ გვენეტაძე და პოსტს ურთავს „ნაცმოძრაობის“ რეჟიმის მსხვერპლის, გოჩა კაკოიშვილის, განცხადებას, რომლითაც ის აღწერს სისხლიანი რეჟიმის სასტიკ სახეს.ედიშერ გვენეტაძის განცხადებით, სინამდვილეში პატიმრის საკითხი პირად კონტროლზე ჰყავდა აყვანილი ობუცმენს და მსგავსი ოდნავი რამ, რომ გამოკვეთილიყო ის დაუყოვნებლივი სახალხო დამცველის აპარატის რეაგირების საგანი იქნებოდა.„აი ეს იყო ნაცმოძრაობის რეალური სახე. ასე აწამებდნენ და არ ინდობდნენ ადამიანებს. სააკაშვილის შექმნილ რეჟიმის ხელწერა იყო ცილისწამება, ტერორი და მოქალაქეების თვითნებურად მოგონილი, შუასაკუნეობრივი მეთოდებით დასჯა. „მგელი არ მოიშლის მგლობას“ - ამას ადასტურებს დღევანდელი კოლექტიური ნაცმოძრაობის მიერ სიცრუეზე აგებული პროპაგანდა ციხეში პატიმრის(უფალმა აცხონოს) თითქოსდა ცემით გარდაცვალების შესახებ. არადა სინამდვილეში ეს საკითხი პირად კონტროლზე ჰყავდა აყვანილი ობუცმენს და მსგავსი ოდნავი რამ, რომ გამოკვეთილიყო ის დაუყოვნებლივი რეაგირების საგანი იქნებოდა სახალხო დამცველის აპარატის.რატომ აკეთებს ამას კოლექტიური ნაცმოძრაობა? მხოლოდ და მხოლოდ საკუთარი ბუნებიდან ანუ ცნობილი პრინციპიდან: „კოკასა შინა რაცა დგას, იგივე წარმოდინდების“ გამომდინარე.დასკვნა ერთია: „არ გათეთრდების ყორანი, რაც უნდა ხეხო ქვიშითა“, - წერს ედიშერ გვენეტაძე.

მსოფლიო • 1746429993

დონალდ ტრამპმა განაცხადა, რომ აშშ-ის გარეთ წარმოებულ ყველა ფილმზე 100%-იანი ტარიფი დაწესდება

აშშ-ის პრეზიდენტმა დონალდ ტრამპმა განაცხადა, რომ შეერთებული შტატების გარეთ წარმოებულ ყველა ფილმზე 100%-იანი ტარიფი დაწესდება.დონალდ ტრამპის თქმით, მან აშშ-ის სავაჭრო წარმომადგენელს მიანიჭა უფლებამოსილება, რომ დაიწყოს ტარიფების დაწესების პროცესი, რადგან შეერთებული შტატების კინოინდუსტრია „ძალიან სწრაფი სიკვდილით კვდება“.„სხვა ქვეყნები ყველანაირ სტიმულს სთავაზობენ, რათა ჩვენი კინემატოგრაფისტები და სტუდიები შეერთებული შტატებიდან გაიყვანონ. ჰოლივუდი და შეერთებული შტატების ბევრი სხვა ტერიტორია განადგურებულია. ეს სხვა ქვეყნების კოორდინირებული ძალისხმევაა და, შესაბამისად, ეროვნული უსაფრთხოების საფრთხე. ეს, ყველაფერთან ერთად, არის გზავნილი და პროპაგანდა! ამიტომ ვავალებ ვაჭრობის დეპარტამენტსა და შეერთებული შტატების სავაჭრო წარმომადგენელს, დაუყოვნებლივ დაიწყონ 100%-იანი ტარიფის დაწესების პროცესი ყველა იმ ფილმზე, რომელიც ჩვენს ქვეყანაში უცხო მიწებზე წარმოებული შემოდის. გვსურს, ფილმები კვლავ ამერიკაში იქმნებოდეს“, – წერს ტრამპი სოციალურ ქსელ Truth Social-ზე.

პოლიტიკა • 1746184802

პარტია, რომელიც თვითმმართველობის არჩევნებში შესვლის გადაწყვეტილებას მიიღებს ფუნდამენტური მოთხოვნის დაკმაყოფილების გარეშე, ქართველი ხალხისგან მძიმე განაჩენს მიიღებს - თინა ბოკუჩავა

ძალიან დიდი იმედი მაქვს, რომ თვითმმართველობის არჩევნებთან დაკავშირებით ოპოზიცია ერთიან გადაწყვეტილებას მიიღებს, – ამის შესახებ „ერთიანობა – ნაციონალური მოძრაობის“ ლიდერმა, თინა ბოკუჩავამ განაცხადა.მისი თქმით, ნებისმიერი პარტია, რომელიც ადგილობრივი თვითმმართველობის არჩევნებში შესვლის გადაწყვეტილებას მიიღებს ორი ფუნდამენტური მოთხოვნის დაკმაყოფილების გარეშე, ძალიან მძიმე განაჩენს მიიღებს ქართველი ხალხისგან.„დაპირისპირება რუსულ ოცნებაშია, ძალიან გრძელია იმ ადამიანების სია, რომლებიც ცდილობენ, თავი დააღწიონ ამ ბოროტებას, რომელსაც წარმოადგენს ივანიშვილი, რის გამოც ისინი და მათი ოჯახის წევრები დგებიან საფრთხის ქვეშ, რომ ვეღარასოდეს შედგან ფეხი თავისუფალ სამყაროში, ამერიკის შეერთებულ შტატებში თუ ევროკავშირის ქვეყნებში, არამცთუ ის, რომ მათმა შვილებმა ისწავლონ პენსილვანიის უნივერსიტეტში, კალიფორნიაში თუ ევროკავშირის წევრ ქვეყნებში. ეს არის ის საფრთხე, რომელიც მათ რეალურად ყველაზე მეტად აღელვებთ. ეს იწვევს ძალიან სერიოზულ განხეთქილებას რუსულ ოცნებაში და ამის ფონზე, პროპაგანდა, რომელიც ყოველთვის ცდილობს ტყუილ-მართლის აღრევას და სიმართლის ინვერსიას, ანუ შემოტრიალებას და ტყუილის სიმართლედ გაყიდვას, ცდილობს, აქაც შეაბრუნოს სიმართლე და „ოცნებაში“ არსებული რღვევის ნაცვლად ისრები გადაიტანოს არარსებულ დაპირისპირებაზე ოპოზიციაში. ძალიან დიდი იმედი მაქვს, რომ ოპოზიცია, საბოლოო ჯამში, ერთიან გადაწყვეტილებას მიიღებს თვითმმართველობის არჩევნებთან დაკავშირებით. მჯერა, თუ ეს ასე არ იქნება, ნებისმიერი პარტია, რომელიც ქართველი ხალხის ინტერესის წინააღმდეგ და ფუნდამენტური მოთხოვნების დაუკმაყოფილებლობის შემთხვევაში, როგორიც არის ყველა პოლიტიპატიმრის გათავისუფლება და ახალი, თავისუფალი, დემოკრატიული საპარლამენტო არჩევნების ჩანიშვნა, ამ ორი ფუნდამენტური მოთხოვნის გარეშე ადგილობრივი თვითმმართველობის არჩევნებში შესვლის გადაწყვეტილებას, ძალიან მძიმე განაჩენი მოჰყვება ქართველი ხალხისგან, რომელიც ამდენი თვეა ასე თავდაუზოგავად იბრძვის ჩვენი ქვეყნის ევროპული მომავლისთვის“, – განაცხადა თინა ბოკუჩავამ.

მსოფლიო • 1746171837

დონალდ ტრამპმა საზოგადოებრივ რადიო NPR-ს და საზოგადოებრივ მაუწყებელ PBS-ს სახელმწიფო დაფინანსება შეუჩერა

დონალდ ტრამპმა საზოგადოებრივ რადიო NPR-ს და საზოგადოებრივ მაუწყებელ PBS-ს სახელმწიფო დაფინანსება შეუჩერა. ინფორმაციას ამის შესახებ თეთრი სახლი ავრცელებს.აშშ-ის პრეზიდენტის ადმინისტრაციის ინფორმაციით, საზოგადოებრივი მაუწყებლების დაფინანსება მიკერძოებული გაშუქების გამო შეწყდა. დონალდ ტრამპის აღმასრულებელი ბრძანება ასევე წყვეტს PBS-ისა და NPR-ის არაპირდაპირ დაფინანსებას. ბრძანების თანახმად, ადგილობრივ საზოგადოებრივ რადიოსა და ტელევიზიის სადგურებსა და „საზოგადოებრივი მაუწყებლობის კორპორაციის“, იგივე CPB-ის დაფინანსების სხვა მიმღებებს ამ ორგანიზაციების მხარდასაჭერად გადასახადის გადამხდელების დოლარის გამოყენებას უკრძალავს.ბრძანება ავალდებულებს CPB-ს გადახედოს თავის 2025 წლის ზოგად დებულებებს, რათა ცალსახად აკრძალოს NPR-ისა და PBS-ის პირდაპირი ან ირიბი დაფინანსება. თეთრი სახლის განცხადების თანახმად, NPR-მა და PBS-მა გადასახადის გადამხდელების ფულით პარტიულობა და მემარცხენე პროპაგანდა გააღვივეს, რაც უკიდურესად შეუფერებელია და გადასახადის გადამხდელების ფულის არასათანადო გამოყენებას წარმოადგენს.„პარტიული მიტაცების საილუსტრაციოდ, NPR-ის მენეჯმენტმა რედაქტორებს სთხოვა, ტრანსგენდერთა საკითხებზე საუბრისას თავი აერიდებინათ ტერმინისგან „ბიოლოგიური სქესი“. NPR-მა გამოაქვეყნა სიუჟეტები, სადაც იცავდა ძარცვას და მიუთითებდა, რომ დანაშაულის შიში რასისტულია და მისი მრავალფეროვნების, თანასწორობისა და ინკლუზიურობის (DEI) პრაქტიკა მისი შინაარსისგან „განუყოფელ“ პრაქტიკად შეაფასა. NPR-მა უარი თქვა ჰანთერ ბაიდენის ლეპტოპთან დაკავშირებული ისტორიის გაშუქებაზე და მას დროის კარგვა და ყურადღების გაფანტვა უწოდა, მიუხედავად იმისა, რომ ის ძალიან აქტუალური იყო საპრეზიდენტო არჩევნებისთვის. NPR-მა არაერთხელ განაცხადა, რომ COVID-19 ლაბორატორიაში არ წარმოიშვა და უარი თქვა თეორიის შესწავლაზე. შემდეგ კი FBI-მ, CIA-მ და ენერგეტიკის დეპარტამენტმა ლაბორატორიაში გაჟონვის თეორია სავარაუდო მიზეზად მიიჩნიეს.კვლევები აჩვენებს, რომ PBS-ის მთავარ საინფორმაციო პროგრამაში „კონგრესის რესპუბლიკელებს უარყოფითი გაშუქების 85 პროცენტი ჰქონდათ, კონგრესის დემოკრატების კი – 54 პროცენტი დადებითი გაშუქების. ექვსი თვის განმავლობაში PBS News Hour-მა ტერმინი „ულტრამემარჯვენე“ 162-ჯერ გამოიყენა, ხოლო „ულტრამემარცხენე“ – მხოლოდ 6-ჯერ. PBS-მა გადაიღო ფილმი სახელწოდებით „ნამდვილი ბიჭი“, რომელიც ტრანსგენდერი მოზარდის ტრანზიციას ეძღვნება. PBS-ის მიერ 2024 წლის რესპუბლიკური პარტიის ეროვნული კონვენციის გაშუქების 72 პროცენტი უარყოფითი იყო, ხოლო 2024 წლის დემოკრატიული პარტიის ეროვნული კონვენციის გაშუქების 88 პროცენტი დადებითი. ძალიან შეუფერებელია, რომ გადასახადის გადამხდელები იძულებულნი იყვნენ, სუბსიდირება გაეწიათ მიკერძოებული, პარტიულ შინაარსისთვის“, – აღნიშნულია თეთრი სახლის განცხადებაში

მსოფლიო • 1746132103

ზელენსკიმ განმარტა, რატომ დაწესდა სანქციები არესტოვიჩისა და კიდევ 75 პირის მიმართ

უკრაინის პრეზიდენტმა, ვოლოდიმირ ზელენსკიმ განმარტა, რატომ დაწესდა სანქციები ალექსეი არესტოვიჩისა და კიდევ 75 პირის წინააღმდეგ.მისივე თქმით, სანქციების მესამე პაკეტი მოიცავს ცხრა შემზღუდველ ზომას ფიზიკური პირების წინააღმდეგ.„მათგან, სამწუხაროდ, შვიდს აქვს უკრაინის მოქალაქეობა, რომლებმაც თავიანთი ბედი დაუკავშირეს რუსეთის სახელმწიფოს ინტერესების პროპაგანდას და ამართლებენ ომს, ომში უკრაინისა და ჩვენი თავდაცვის საზიანოდ აქტიურ საინფორმაციო ოპერაციებს ატარებენ. ჩვენ ვმუშაობთ იმის უზრუნველსაყოფად, რომ ამ და სხვა სანქცირებული პირებისთვის დაწესებული შეზღუდვები მხარდაჭერილი იყოს პარტნიორ იურისდიქციებში“, – აღნიშნა ვოლოდიმირ ზელენსკიმ.უკრაინის პრეზიდენტმა, ვოლოდიმირ ზელენსკიმ ხელი მოაწერა ბრძანებას, რომლის მიხედვითაც, ძალაში შედის ქვეყნის ეროვნული უსაფრთხოებისა და თავდაცვის საბჭოს გადაწყვეტილება პერსონალური სანქციების დაწესების შესახებ. სულ შეზღუდვები დაუწესდა 76 პირსა და 81 კომპანიას, მათ შორის „შავ სიაში“ შეიყვანეს პრეზიდენტის ადმინისტრაციის ყოფილი მრჩეველი ალექსეი არესტოვიჩი, რომელიც უკრაინაში არ იმყოფება.

პოლიტიკა • 1746095747

რეზოლუციით დასტურდება, რომ „ევროპის სახალხო პარტია“ და კონკრეტული ევროპარლამენტარები მტრობენ საქართველოს, მის ევროპულ მომავალს - კახა კალაძე

საქართველოსთან დაკავშირებით რეზოლუციის მიღებით დასტურდება, რომ „ევროპის სახალხო პარტია“ და კონკრეტული ევროპარლამენტარები მტრობენ საქართველოს და მის ევროპულ მომავალს, – ამის შესახებ დედაქალაქის მერმა, კახა კალაძემ განაცხადა.კალაძის თქმით, საქართველოს ინტერესები არ და ვერ დაითმობა.„ამ ტიპის რეზოლუციები ბევრი გვინახავს. ეს არის ქვეყნის შიდა პოლიტიკურ საქმეებში ჩარევა. სააკაშვილის ხელისუფლებაში ყოფნის დროიდან შექმნილი ჰქონდათ ილუზია, რომ საქართველო მათი უკანა ეზო იყო. დღეს საქართველოს ჰყავს ხელისუფლება, რომელიც ჩვენი ქვეყნის მოსახლეობის უმრავლესობამ აირჩია. „ქართული ოცნება-დემოკრატიული საქართველო“ ატარებს ქვეყნის და ქართველი ხალხის ინტერესს. არაერთი შანტაჟის, შემოტევის, შეურაცხყოფის მიუხედავად, არ მივეცით შესაძლებლობა, ქვეყანა თავიანთი ინტერესებისთვის გამოეყენებინათ. ამ რეზოლუციის მიღებით კიდევ ერთხელ დასტურდება, რომ „ევროპის სახალხო პარტია“ და კონკრეტული ევროპარლამენტარები, რომლებიც ამ გაერთიანებაში არიან, მტრობენ საქართველოს, ქვეყნის ევროპულ მომავალს. ჩვენ გვახსოვს მათი განცხადებები, პირდაპირი მოწოდებები სააკაშვილის გათავისუფლებაზე, როცა თითქოს ცუდად იყო. ისიც გვახსოვს, რეზოლუციით სანქციებზე შეერთებისკენ რომ მოგვიწოდეს. წარმოიდგინეთ, ეს გადაწყვეტილება რომ მიგვეღო, დღეს ქვეყანაში როგორი ეკონომიკური მდგომარეობა გვექნებოდა. საქართველოს ინტერესები არ და ვერ დაითმობა. ჩვენ დავიცავთ ჩვენს ქვეყანას, ჩვენი ქვეყნის მომავალს და ხელს შევუწყობთ ქვეყანაში მშვიდობას, ეკონომიკურ განვითარებას. ამ ტიპის ბიუროკრატები ქვეყნის წინსვლას, განვითარებას და მშვიდობის შენარჩუნებას ხელს ვერ შეუშლიან“, – აღნიშნა თბილისის მერმა.ასევე, კახა კალაძემ კომენტარი გააკეთა ევროპარლამენტარ რასა იუკნევიჩიენეს მიერ საქართველოს ხელისუფლების მისამართით გაკეთებულ განცხადებაზე და აღნიშნა, რომ „ყველაზე დიდი უბედურება თავად ეს ბიუროკრატები არიან“.„ეს ადამიანები საქართველოში ვერაფერს გახდნენ. ისინი დამარცხდნენ. ქართველმა ხალხმა ბოროტება დაამარცხა. ყველაზე დიდი უბედურება თავად ეს ბიუროკრატები არიან. ჩვეულებრივ დღის წესრიგად იქცა სიცრუეზე დაფუძნებული განცხადებები მას შემდეგ, რაც ჩვენ გავაკეთეთ განაცხადი ევროპულ მომავალზე. ამის მთავარი მიზეზი იყო ის ძირითადი ფუნდამენტები, რაზეც ევროპა და ევროპული ღირებულებებია დაფუძნებული. ახლა ეს ყველაფერი მოშლილია. მხოლოდ და მხოლოდ სიცრუის პროპაგანდას, სიძულვილის ენას ვხედავთ, თეთრზე გვეუბნებიან, რომ შავია. ამ კონკრეტულ ბიუროკრატებს სურვილი ჰქონდათ, ქვეყანაში სახელმწიფო გადატრიალება მოეწყოთ, ხელში ჩაეგდოთ საქართველო და შემდეგ გამოეყენებინათ თავიანთი ინტერესების გასატარებლად. ისინი ქვეყანაში დამარცხდნენ. საქართველოსთან მიმართებით ყველა მტერი იქნება დამარცხებული“, – განაცხადა კახა კალაძემ.„ევროპის სახალხო პარტიამ“ ვალენსიაში, ყრილობაზე საქართველოს შესახებ რეზოლუცია მიიღო.

პოლიტიკა • 1746013290

რიცხვებით სპეკულაცია როგორ უნდა მოახდინოს, სახაზინო მონაცემებია და საჯარო სამსახურებიდან მიღებული ინფორმაციაა - თაზო დათუნაშვილი "ეისითის" ეკონომიკურ კვლევაზე

მმართველ გუნდი "ეისითის" ეკონომიკურ კვლევაზე საუბრობს. ორგანიზაციამ გამოაქვეყნა საზოგადოებრივი აზრის კვლევა, რომლის მიხედვითაც, მოსახლეობის ნახევარზე მეტი თვლის, რომ ქვეყანაში ან უკვე დაწყებულია, ან უახლოეს 6 თვეში ფინანსური კრიზისი დაიწყება."ეისითი"არის "ეისითი გლობალში" შემავალი ორგანიზაცია, რომლის ერთ-ერთი დამფუძნებელი თინათინ რუხაძეა."ქართულ ოცნებაში" დღეს რუხაძის აქტიურობა გაიხსენეს და თქვეს, რომკვლევა პოლიტიკურ მიზნებს ატარებს, რომლის მიზანიც, ქვეყანაში არასწორი განწყობების შექმნაა.ოპოზიციაში კი აცხადებენ, რომ ეს სახაზინო მონაცემებია, რომელიც საჯარო სამსახურებიდან მიღებული ინფორმაციაა:"რიცხვებით სპეკულაცია როგორ უნდა მოახდინოს, სახაზინო მონაცემებია და საჯარო სამსახურებიდან მიღებული ინფორმაციაა," - აღნიშნავს პარტია ”ლელო - ძლიერი საქართველოს” პოლიტიკური საბჭოს წევრი თაზო დათუნაშვილი."ნაციონალურ მოძრაობაში" კი მმართველ გუნდს პასუხობენ, და აცხადებენ, რომ ადამიანს, რომელსაც საჭმლის ფული არ აქვს, ოპოზიციის რიტორიკა არაფერში სჭირდება:"ადამიანს, როდესაც საჭმლისა და წამლის ფული არ აქვს და შენ ეუბნები, რომ თურმე ყველაზე მეტად განვვითარდით ბოლო წლების განმავლობაში, ეს იწვევს ხალხის გაღიზიანებას. ოპოზიციის რიტორიკა და ოპოზიციის პროპაგანდა ადამიანს, რომელსაც საჭმლის ფული არ აქვს, რაში სჭირდება," - აცხადებს პარტია ”ერთიანობა - ნაციონალური მოძრაობის” გენერალური მდივნის მოადგილე ირაკლი ფავლენიშვილი.

საზოგადოება • 1746003117

ინტერვიუ საქართველოს მეცნიერებათა ეროვნული აკადემიის წევრ-კორესპონდენტ მიხეილ ოკუჯავასთან

საქართველოს მეცნიერებათა ეროვნული აკადემიის ფიზიოლოგიისა და მედიცინის განყოფილების წევრ-კორესპონდენტი მიხეილ ოკუჯავა „პრაიმტაიმთან“ ინტერვიუში საუბრობს მედიცინაში აკადემიის როლზე და იმ პრობლემებზე, რომელსაც ფინანსური რესურსის ნაკლებობა იწვევს. მისი თქმით, ქვეყნისთვის სასიცოცხლოდ მნიშვნელოვანია, რომ აკადემიამ ექსპერტული სამუშაოები მეტად გააძლიეროს.მიხეილ ოკუჯავა მიიჩნევს, რომ დაფინანსება ის ბერკეტია, რაც სპეციალისტებს სამშობლოში დარჩენის სურვილს გაუჩენს და შესაბამისად, კადრების გადინებაც შემცირდება. გარდა ამისა, ქვეყანა სხვადასხვა გამოწვევისთვის მეტად მომზადებული და მობილიზებული იქნება.- მედიცინის სფეროში მრავალი რეფორმა ჩატარდა, შეიცვალა ზოგადად ჯანდაცვის სისტემა და ხშირ შემთხვევაში, სამედიცინო დაწესებულებების სტრუქტურა და დანიშნულებაც. როგორ იმოქმედა ყოველივემ საქართველოში მედიცინის დარგში სამეცნიერო-კვლევით საქმიანობაზე?- ნამდვილად, უკანასკნელი ათწლეულების განმავლობაში, საქართველოს ჯანდაცვაში და მედიცინაში რევოლუციური ცვლილებები მოხდა. ეს გარკვეული ობიექტური მიზეზებით იყო განპირობებული: მოგეხსნებათ, შეიცვალა ზოგადად სისტემა და ადრე არსებული, ჩამოყალიბებული საბჭოთა ჯანდაცვის მოდელი, რა თქმა უნდა, ვერანაირად მოერგებოდა იმ რეალობას, რომელიც დადგა.ერთის მხრივ, ნამდვილად პოზიტიური ძვრები მოხდა. ჯანდაცვის სფეროში პრივატიზაციის პროცესის დაშვებამ საკმაოდ სწრაფად გამოიღო შედეგები - მოხდა ინვესტორების დაინტერესება, მოძველებული საავადმყოფოების და ამბულატორიების ნაცვლად ჩამოყალიბდა ახალი თანამედროვე ტიპის სამედიცინო დაწესებულებები, რომლებიც, დღესდღეობით, საქართველოს მოსახლეობას ემსახურება.მაგრამ, სისტემურმა ცვლილებებმა, ამავდროულად გარკვეულწილად თავისი უარყოფითი მხარეებიც გამოავლინა. მედიცინა განსაკუთრებული სფეროა და თუკი ზოგიერთები მიიჩნევენ, რომ ეს ჩვეულებრივი ბიზნესია, ასეთი მიდგომა დაუშვებელია. ჩვენ საქმე გვაქვს ადამიანთან და მის ჯანმრთელობასთან, ამიტომ მიდგომაც განსხვავებული უნდა იყოს. სამედიცინო სერვისების ორიენტირება მომგებიანობაზე განაპირობებს ხელოვნურ არჩევითობას და ხშირად ზოგიერთი ისეთი მიმართულების დაკნინებას, რასაც შეიძლება დღეს მყისიერი ფინანსური შედეგი არ მოჰქონდეს, სინამდვილეში კი უდიდეს მნიშვნელობას ატარებდეს დარგის განვითარებისთვის და საბოლოოდ პაციენტების ჯანმრთელობისათვის.მოგეხსენებათ ადრე, სამეცნიერო-კვლევითი ინსტიტუტების სისტემა არსებობდა, რომელსაც გარკვეული პრობლემური მიმართულებები ჰქონდა. საკმაოდ მნიშვნელოვან სამუშაოებს ასრულებდნენ, იყო ჩამოყალიბებული ფუნდამენტური სამეცნიერო სკოლები და ნამდვილად შეიძლება ითქვას, რომ საქართველოს მედიკოსები თავიანთ დარგებში სათანადო სიმაღლეზე იყვნენ და საერთაშორისო დონის კვლევებს ატარებდნენ. იქნებოდა ეს ნევროლოგია, კარდიოლოგია, რეპროდუქტოლოგია, ქირურგია თუ სხვა მიმართულება, საქართველოს სამედიცინო კვლევით ინსტიტუტებში მუშაობა მოიცავდა როგორც სამკურნალო საქმეს, ასევე, სამეცნიერო მოღვაწეობას. მნიშვნელოვანია, რომ ზოგიერთი დაწესებულება საბჭოთა კავშირის მასშტაბით წამყვან როლს ასრულებდა. მაგალითად, ნევროლოგიის ინსტიტუტს, ეპილეპტოლოგიაში წამყვანი სათაო დაწესებულების როლი ჰქონდა მინიჭებული და ამ მიმართულებით მთელი ქვეყნის  მოსახლეობის დიდ ნაწილს ემსახურებოდა. ზოგადად უცხოეთშიც ამგავრი ტიპის ინსტიტუტები, რომლებიც სპეციალიზებული არის ამა თუ იმ სამედიცინო პრობლემაზე და იქ შესაბამისი სიღრმისეულ სამეცნიერო კვლევაც ტარდება, მიჩნეულია ყველაზე მაღალი დონის, ე.წ. მესამეულ ცენტრებად, სადაც კონკრეტული მიმართულებით საუკეთესო სამედიცინო სერვისის მიღება შეიძლება.სამწუხაროდ, ჩვენთან ეს სისტემა შექმნილ თანამედროვე მოდელს ვერ მოერგო. რადგან, როგორც ვთქვით, პრივატიზაცია მოხდა. ბევრმა ადრე არსებულმა სამეცნიერო-კვლევითმა ინსტიტუტმა სახე იცვალა, შეიკვეცა ან გარდაიქმნა ჩვეულებრივ საავადმყოფოდ. ახალ პირობებში კვლევითი კომპონენტი ინვესტორს თუ მფლობელს შედარებით ნაკლებად აინტერესებს. ინვესტორისთვის პირველ რიგში მნიშვნელოვანია დაწესებულება ორიენტირებული იყოს კონიუნქტურული ძირითადი სამედიცინო სერვისების აწყობაზე, მაგრამ ამავე დროს, ეკონომიკურად წამგებიანი არ იყოს.ჩემი აზრით, ამან რამდენიმე ძალიან მნიშვნელოვანი ძვრა გამოიწვია. ერთისმხრივ სამეცნიერო კომპონენტის მოშორებამ განაპირობა ამა თუ იმ პრობლემის შესწავლასა და გადაჭრისადმი სიღრმისეული მიდგომის დაკნინება, ბევრ შემთხვევაში აღარ არსებობს სპეციალიზებული ჯგუფები, ლაბორატორიები, კლინიკური და ექსპერიმენტული მიმართულებების თანამშრომლობის მაგალითები. მეორეს მხრივ, პრივატიზაციის შედეგად შექმნილი მოდელით, გარკვეულწილად მედიცინის სხვადასხვა სპეციალობას  შორის კავშირი მოიშალა. მედიცინაში ძალიან ფასეულია აზრთა გაცვლა-გამოცვლა, იქნება ეს პრაქტიკული, თუ სამეცნიერო. მოგეხსენებათ, კონსილიუმი მედიცინის შემადგენელი ნაწილია, ამის გარეშე სწორი დიაგნოზი არ არსებობს, არც სწორი მკურნალობა და, სამწუხაროდ კომერციალიზაციამ, მედიცინის დარგებისა და სპეციალისტების დაქსაქსვა გამოიწვია. ახლა ხშირ შემთხვევაში გვაქვს დაწესებულებები, რომლებიც ორიენტირებულია კონკრეტული სპეციალობის მიმართულებით, მოიცავს გარკვეულ სამედიცინო სერვისებს, მაგრამ, აი ეს კონსილიუმის მოდელი, სადაც მულტიდისციპლინური გარჩევა ხდებოდა ამა თუ იმ პრობლემის, იქნებოდა ეს პრაქტიკული, თუ სამეცნიერო, მოიშალა. თუმცა, არის ურთიერთთანამშრომლობის განვითარების მაგალითებიც, მაგალითად, თოდუას კლინიკაში, დამკვიდრებული გვაქვს ე.წ. ონკოლოგიური საბჭოები - როდესაც სხვადასხვა დარგის სპეციალისტების მიერ ხდება კლინიკური შემთხვევის მრავალმხრივი განხილვა.დღეს უპირატესად ასეთი სიტუაციაა, პრაქტიკულ სამედიცინო საქმიანობაში გარკვეულწილად გვაქვს წარმატებები, მაგრამ ჩვენს სამეცნიერო პოტენციალს ვერ ვიყენებთ. ამ დისბალანსის გამოსწორებაში სახელმწიფოს ნამდვილად შეუძლია დადებითი ცვლილებების შეტანა. ავიღოთ თუნდაც სამედიცინო დაწესებულებების აკრედიტაციის საკითხი, სადაც მოწმდება ინფრასტრუქტურა, ტექნიკური ნორმები, ექიმების მომზადების დონე და ა.შ., შესაძლებელია აქ სამედიცინო პერსონალის კვალიფიკაციის და დაწესებულების შეფასებისას პრიორიტეტი მიეცეს სამეცნიერო-კვლევით სამუშაოში ჩართულობას. იგივე მიდგომები შესაძლებელია გამოყენებული იქნას ე.წ. უწყვეტი სამედიცინო განათლების მოთხოვნებშიც. აღნიშნული არ უნდა მოიცავდეს მხოლოდ შესაბამისი სასწავლო კურსების აუცილებელ გავლას, არამედ ასევე განსაკუთრებულად მაღალ ქულებს უნდა ანიჭებდეს ექიმებს, რომლებიც სამეცნიერო პუბლიკაციებს აქვეყნებენ, გამოდიან მოხსენებებით საერთაშორისო სამეცნიერო ფორუმეზე. ეს სწრაფად მოახდენს კვლევითი სამუშაოს მნიშვნელობის ზრდას.აშკარაა ჰოსპიტალურ სექტორში სახელმწიფოს  მეტად აქტიურად ჩართვის აუცილებლობა. დღეს, სამედიცინო დაწესებულებების 95% კერძოა, შესაბამისად სახელმწიფო არ ფლობს ისეთ ძლიერ ინსტრუმენტებს, როგორიც საჭიროა სამედიცინო მეცნიერებების განვითარებისთვის. ალბათ, საჭიროა, სახელმწიფოს დაქვემდებარებაში ჰქონდეს რამდენიმე დაწესებულება, სადაც გათვალისწინებული იქნება ის პრობლემები, რომლებიც ჩვენი ქვეყნისთვის აქტუალურია - იქნება ეს კონკრეტული დაავადებების ეტიო-პათოგენეზის შესწავლა, თუ ახალი მკურნალობის მეთოდების დანერგვა. ცოტა ხნის წინ, პანდემიის დროს, ჩვენ ასეთი პრობლემის წინ დავდექით - სახელმწიფო იძულებული გახდა, გამოეყენებინა პრივატული სექტორი იმისათვის, რომ პანდემიას გამკლავებოდა, შექმნილ პირობებში ეს ბუნებრივიც და გარდაუვალიც იყო. მაგრამ ძლიერი კვლევითი ბაზის არსებობა ალბათ დაგვეხმარებოდა ბევრი შეცდომა აგვეცილებინა თავიდან რაც დაავადების მართვისას ხდებოდა. აღნიშნული ძალიან მნიშვნელოვანი იქნება, რომ გარკვეული საფუძველი შეიქმნას როგორც სამედიცინო სერვისების სრულყოფისათვის, ასევე ექიმების კვალიფიკაციის ამაღლებისთვის.შეუძლებელია, მედიცინა მეცნიერების გარეშე არსებობდეს. არ შეიძლება ჩვენ  მხოლოდ უცხოეთიდან შემოსული მზა პროდუქტის მომხმარებელი ვიყოთ, იქნება ეს მკურნალობის და დიაგნოსტიკური მეთოდი, სამკურნალწამლო საშუალება, ტექნოლოგია და ა.შ. ჩვენ თუ ამ მიმართულებით რაღაც არ განვავითარეთ, თუ არ ვიმუშავეთ, საბოლოო ჯამში მაღალი დონის მედიცინას ვერ მივიღებთ.- რა როლი შეიძლება ჰქონდეს საქართველოს მეცნიერებათა ეროვნულ აკადემიას ჩვენს ქვეყანაში სამედიცინო მეცნიერებების განვითარებაში და სამეცნიერო კვლევების ხელშეწყობაში?- მოგეხსენებათ, რომ მეცნიერებათა აკადემია ერთი მხრივ, მეცნიერების დარგში სხვადასხვა მიმართულებით არის მთავრობისა და სახელმწიფოს მრჩეველი და მეორე მხრივ, აკადემიას აქვს საექსპერტო როლი. ის აფასებს სახელმწიფოში მიმდინარე კვლევების (იქნება ეს უმაღლესი სასწავლებლებში, თუ დამოუკიდებელ სამეცნიერო კვლევითი ცენტრებში მიმდებარე სამუშაოს) სამეცნიერო ღირებულებას, ხდება ყოველწლიური ანგარიშების ანალიზი და შესაბამისი დასკვნების გამოტანა.ადრე არსებული აკადემიის კვლევითი ინსტიტუტების სისტემა, რა თქმა უნდა, დღევანდელობას ვერ მოერგება, ამას სულ სხვა ფინანსური საფუძველი სჭირდება, რაც მაშინ საბჭოთა კავშირში სხვაგვარად იყო ორგანიზებული. ჩემი აზრით, დღეს საქართველოს მეცნიერებათა ეროვნულმა აკადემიამ კიდევ მეტად უნდა გააძლიეროს ექსპერტული სამუშაო, სხვადასხვა დაწესებულების, მკლევართა ჯგუფების ან კონკრეტული მეცნიერების სამეცნიერო საქმნიანობის შეფასება. სამწუხაროდ, მეცნიერებათა აკადემიას არ აქვს დიდი ფინანსური რესურსები, მაგრამ ძალიან მნიშვნელოვანია დაფასებული იყოს ექსპერტთა აზრით საყურადღებო სამუშაო. აკადემიაში არის შესაბამისი სახელობითი პრემიები: მაგ. ივანე თარხნიშვილის სახელობის, ან ივანე ბერიტაშვილის სახელობის, რაც გამოარჩევს ამა თუ იმ მკვლევრის ნამუშევარს და ამ თვალსაზრისით, ეს ჩვენი მეცნიერებისთვის ძალზე საპატიო აღიარებაა. ასევე მნიშვნელოვანი იქნება, თუკი მეცნიერებათა აკადემია საექსპერტო შეფასებების საფუძველზე ყოველწლიურად დაასახელებს ყველაზე წარმატებულ სამეცნიერო ცენტრს ან ჯგუფს მეცნიერების სხვადასხვა მიმართულებით. ეს რა თქმა უნდა ძალიან მაღალი შეფასება და წახალისება იქნება მკვლევართათვის.ძალიან მნიშვნელოვანია, რომ საქართველოს მეცნიერებათა ეროვნულ აკადემიაში არსებობს პრობლემური საბჭოები, მუდმივმოქმედი კომისიები, ასეთივე არის სამედიცინო-ბიოლოგიურ მეცნიერებათა საკოორდინაციო მეთოდოლოგიური საბჭო, სადაც დარგის ესა თუ ის აქტუალური საკითხი განიხილება. იქნება ეს, დაწყებული ტრანსპლანტოლოგიიდან, დამთავრებული ონკოლოგიის, თუ კარდიოლოგიის საკითხებით. ეს არის მაღალი დონის ასპარეზი, სადაც საქართველოში მიმდინარე კვლევები და სამედიცინო მიღწევები წარმოჩნდება სხვადასხვა მიმართულების პროფესიონალთა წინაშე. სწორედ ამგვარ შეკრებებს აქვს სამეცნიერო კონსილიუმის სახე. ჩემი აზრით, უაღრესად მნიშვნელოვანია, რომ აკადემიამ ეს საქმიანობა კიდევ უფრო გააძლიეროს და შემდგომ უკვე, მთავრობას უშუამდგომლოს და გამოარჩიოს ის კვლევები, რომელიც აკადემიის ექსპერტთა და საბჭოს წევრთა აზრით, საქართველოსთვის მეტად ღირებულია.თუკი, სამომავლო პერსპექტივებზე ვისაუბრებთ, ალბათ მაინც გარკვეული სამუშაოა ჩასატარებელი, რომ გაძლიერდეს და განვითარდეს სახელმწიფოს დაქვემდებარებაში არსებული სამეცნიერო ცენტრები. უნდა ითქვას, რომ რეფორმების შედეგად მეცნიერების გადანაწილებამ უნივერსიტეტების წიაღში სამეცნიერო პოტენციალის გაძლიერება არ გამოიწვია. აშკარაა, რომ  ქვეყანას სჭირდება ძირითად მიმართულბებში: საინჟინრო-ტექნოლოგიურ, საბუნებისმეტყველო და ჰუმანიტარული მეცნიერებების სახელმწიფო ცენტრების არსებობა. აღიშნულში მეცნიერებათა აკადემია აქტიურად უნდა იყოს ჩართული და როგორც მთავრობის მრჩეველმა უნდა ხელი შეუწყოს პერსპექტიული მიმართულებების დასახვას და შემდგომი სამუშაოს შეფასებას. მოგეხსენებათ, უმაღლეს სასწავლებლებთან არსებულ სამეცნიერო ერთეულებთან ერთად დღეისათვის მედიკობიოლოგიურ დარგში ორი სამეცნიერო დამოუკიდებელი ცენტრია: ი. ბერიტაშვილის ბიომედიცინის ექსპერიმენტული ცენტრი და გ. ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტი. ნამდვილად საამაყოა, რომ საქართველო ამგვარი მდიდარი ტრადიციების მქონე, მსოფლიოში აღიარებული სამეცნიერო სკოლების სამშობლოა. ეს პოტენციალი მაქსიმალურადაა გამოსაყენებელი და მეტად განსავითარებელი. გასაძლიერებელია კლინიკების თანამშრომლობა ფუნდამენტური მეცნიერებების ცენტრებთან და ერთობლივი ე.წ. ტრანსლაციური კვლევების დანერგვა. მეცნიერებათა აკადემიის მხრიდან ექსპერტულ შეფასებასთან ერთად მნიშვნელოვანი იქნება, თუკი სამომავლოდ ფინანსური რესურსები იმის საშუალებას მოგვცემს, რომ შესაძლებელი გახდეს, გამორჩეული კვლევების აკადემიის მხრიდან პრემიის სახით წახალისება.ყოველ ჩვენგანს გათავისებული უნდა ჰქონდეს, რომ ადგილობრივი სამეცნიერო კვლევები ქვეყნის არსებობის, უსაფრთხოების და კეთილდღეობის საფუძველია. მაგ. ქვეყანაში არ შეიძლება არ წარმოებდეს კვლევები სხვადასხვა დაავადებასთან ასოცირებული გენოტიპების შესწავლაზე, აქტუალური ინფექციების, არაგადამდები დაავადებების გავრცელების და პრევენციის, ადგილობრივი ანტიბიოტიკორეზოსტენტობის და სხვა მრავალი მიმართულებებით. ამგვარი სამუშაო ქართველ მეცნიერთა პრეროგატივაა. ამავდროულად სხვადასხვა მიმართულების ტრადიციული ძლიერი სამეცნიერო სკოლების (მაგ. ნეიროფიზიოლოგიის, მორფოლოგიის, ფსიქოლოგიის და სხვ.) შენარჩუნება,  ხელშეწყობა და განვითარება ჭეშმარიტად ეროვნული საქმეა. თითოეული მიმართულებით აღმშენებლობა ათწლეულების განმავლობაში ჩვენი სახელოვანი მეცნიერების დაუღალავი შრომის და მრავალი წარმატების შედეგია. უნდა ვიცოდეთ, რომ არის მარტივი კავშირი ცოდნის და მეცნიერების სხვადასხვა საფეხურს შორის, თუკი ჩვენ არ ვიღვწით მეცნიერების უმაღლესი მწვერვალებისკენ, ამით ვაკნინებთ ზოგადად მიმართულებას და ბოლოს ვასრულებთ იმით, რომ დარგის სპეციალისტი საერთად აღარ გვყავს.შეიძლება ითქვას, რომ მეცნიერებათა აკადემიას ძალუძს და მუშაობს, რომ გამოარჩიოს საქართველოსთვის აქტუალური კვლევითი მიმართულებები. მისი კომპეტენციაა შემდგომ, ეს განსახილველად გადასცეს მთავრობას, რომ ამაზე შესაბამისი ქმედითი რეაგირება მოხდეს. ამიტომ აკადემიის როლი ძალიან მნიშვნელოვანია.- ახალგაზრდა სპეციალისტთა მომზადება, მათ შორის მედიცინაში, ერთ-ერთი უმნიშვნელოვანესი საკითხია. არც თუ იშვიათად, კვლევითი სამუშაოთი დაინტერესებული პირები კარიერის გაგრძელებას საზღვარგარეთ ცდილობენ. რა გზებითაა შესაძლებელი, სამეცნიერო კადრების გადინების პრობლემის მოგვარება?- ეს ძალზედ საყურადღებო თემაა, მით უმეტეს, მედიცინაში. სამწუხაროდ, ძალიან კარგი კადრები გაედინებიან. ეს განსაკუთრებით მტკივნეულად თეორიულ დისციპლინებში ხდება. იმიტომ, რომ აქ ძალიან მწირი დაფინანსებაა.თეორიული დარგებიდან (ფუნდამენტური ნეირომეცნიერება, ნეიორობიოლოგია) ბევრი ჩვენი თანამემამულეა წასული და დასავლეთის საუკეთესო ცენტრებში წარმატებული სპეციალისტები არიან.რა თქმა უნდა, პირველი პრობლემა არის დაფინანსება. გარკვეული საბაზისო ფინანსური საფუძველი უნდა იყოს იმისათვის, რომ ახალგაზრდა პირმა ამ დარგში მუშაობის ინტერესი არ დაკარგოს. ამ მიმართულებით, ძალიან მნიშვნელოვანია მეცნიერებათა აკადემიის დაწესებული სტიპენდიები, მოგეხსენებათ, რომ სტიპენდიატი სხვადასხვა დარგში შესაბამისი კონკურსის გავლით შეირჩევა. ამგვარი სასტიპენდიო პროგრამა მნიშვნელოვანია იმისათვის, რომ ახალგაზრდა დაინტერესებული იყოს, დარჩეს საქართველოში და აქ გააგრძელოს მუშაობა თავის სფეროში. არსებობს გარკვეული დაფინანსების საშუალებები რუსთაველის ფონდის მხრიდანაც, ახალგაზრდა მეცნიერების საგრანტო კონკურსი, ასევე, არის დოქტორანტებისთვის შესაბამისი პროგრამა, რაც ახალგაზრდა მკვლევრების დახმარებას მოიცავს, თუმცა, რა თქმა უნდა, ყოველივე ეს საკმარისი არ არის. გარდა ასეთი საკონკურსო პროგრამებისა, უნდა იყოს საბაზისო ფინანსური საფუძველი იმისთვის, რომ ახალგაზრდა თეორიულ დარგში მუშაობით დაინტერესდეს.გარკვეულ მაგალითად შეგვიძლია ავიღოთ ჩვენს მეზობელ ქვეყნებში არსებული ახალგაზრდების სამშობლოში დაბრუნების პროგრამების გამოცდილება. იყო ასეთი მიზნობრივი სახელმწიფო გრანტები, შუა აზიის ქვეყნებში, ასევე თურქეთში, როდესაც ახალგაზრდა სპეციალისტს მიზნობრივად უშვებდნენ საზღვარგარეთის წამყვან  ცენტრებში გამოცდილების მისაღებად. შემდგომ, ის ვალდებული იყო, დაბრუნებულიყო და სამშობლოში ემუშავა. ამან შექმნა საფუძველი, რომ ესა თუ ის დარგი ამ ქვეყნებში განვითარებულიყო. ამგვარი მაგალითი შეიძლება იყოს თურქეთში მედიცინის განვითარების ახალი ტალღა, რომელიც ჩვენს თვალწინ მოხდა.მეც გარკვეულწილად გავიარე ე.წ. „თერგდალეულების“ მსგავსი გზა. გერმანიაში ვმუშაობდი, ხანგრძლივად ვიყავი იქ გერმანიის აკადემიური გაცვლის პროგრამით, მქონდა შეთავაზება, რომ დავრჩენილიყავი, მაგრამ ბედნიერი ვარ, რომ დავბრუნდი.  საერთაშორისოდ წარმატებულ დაწესებულებაში ვმუშაობ, დარგში, რომელიც ჩემთვის საინტერესოა და ძალიან მიხარია, რომ ეს მიმართულება დღეს საქართველოში არის ისეთ დონეზე, როგორიც მედიცინის სფეროში წამყვან ქვეყნებშია.ხაზგასასმელია, რომ დღეს ნამდვილად გულანთებული და დაინტერესებული ახალგაზრდები გვყავს. სადოქტორო ნაშრომებს ვხელმძღვანელობ და ხშირ შემთხვევაში, ეს საქმიანობა მათ ენთუზიაზმზეა დაფუძნებული, მათ კვლევის და საგნის მიმართ ინტერესზე.ერთი მომენტია, რაც ცოტა გაუგებარია დღევანდელი ახალგაზრდებისთვის, თუკი სადოქტორო პროგრამებზე ვსაუბრობთ, სამწუხაროდ ჩვენთან ესეც შეიცვალა და ცოტა შეიძლება გაუფასურდა კიდეც. ადრე, აკადემიური ხარისხის ორსაფეხურიანი სისტემა არსებობდა, რაც გარკვეულწილად, გერმანულ მოდელზე იყო დაფუძნებული. გერმანიაშიც ორი საფეხურია პროფესორის წოდებამდე - ე.წ. პრომოცია და შემდგომ, ჰაბილიტაცია. ჩვენთან მხოლოდ ერთსაფეხურიანი აკადემიური დოქტორის ხარისხის შემოღებით ამ მიმართულებით საქმიანობამ უფრო მეტად საგანმანათლებლო პროგრამის სახე მიიღო და არა სამეცნიერო კვლევითი პროექტების. ბაკალავრის ან მაგისტრის წოდების შემდეგ, ზოგი ისე უყურებს, რომ დოქტორანტურა ახალი საფეხურია, რომ რაღაც ცოდნა შეიძინოს. მაგრამ სადოქტორო ნაშრომზე მუშაობა არ არის მხოლოდ ცოდნის შეძენა, პირველ რიგში ეს არის სამეცნიერო კვლევა. რა თქმა უნდა, ამ კვლევის დროს ახალ ცოდნას იღებ, მაგრამ კვლევითი კომპონენტი უნდა იყოს წამყვანი. ამიტომ, თუკი ახალგაზრდა სპეციალისტებზე ვსაუბრობთ, ყოველთვის სჯობს, რომ გარკვეული კვლევითი გამოცდილება ჰქონდეს და მერე გადადგას ნაბიჯი დოქტორანტურისკენ.საჭიროა დოქტორის ხარისხს მეტი მნიშვნელობა მიენიჭოს. მიმაჩნია, რომ მეცნიერებათა აკადემიას შეუძლია სწორედ ამაშიც ითამაშოს მნიშვნელოვანი როლი. მოგეხსენებათ, დღესდღეობით, ყოველ უმაღლეს დაწესებულებას, რომელსაც აკრედიტებული პროგრამა აქვს სადოქტორო საფეხურისა, შეუძლია, აკადემიური დოქტორის წოდების მინიჭება. დაცული დისერტაციების დონე ნამდვილად არ არის ყოველთვის მაღალი სტანდარტების შესაბამისი. ხომ არ სჯობს, არსებობდეს უმაღლეს დაწესებულებებს შორის საბჭო, სადაც მოხდება დისერტაციის დასაცავად წარმოდგენილი ნაშრომების განხილვა. აკადემია აქაც შეძლებდა საექსპერტო-სათათბირო როლის აღებას. საქართველოს ჯანდაცვა და მედიცინა მრავალი გამოწვევის წინაშე დგას. რა პრობლემატიკა და მიმართულება მიგაჩნიათ აქტუალურად, რასაც სახელმწიფოს მხრიდან განსაკუთრებული ყურადღება ესაჭიროება?- ბოლო ათწლეულებში, მხოლოდ საქართველოში არა, ზოგადადაც, გარკვეული დარგები უფრო სწრაფად განვითარდა და ამით ჯანდაცვის სფეროში შედარებით ის პრობლემები მოგვარდა, რომელიც მანამდე ძალიან აქტუალური იყო. მაგალითად, დიდი პროგრესია კარდიოლოგიაში, დაინერგა ახალი ინტერვენციული მეთოდები, სრულიად სხვა დონეზე ავიდა კარდიოქირურგია. მანამდე, ასეთი შესაძლებლობები არ იყო. ძალიან სასიხარულოა, რომ საქართველოშიც, ამ მხრივ, წარმოუდგენელი წინსვლა გვაქვს. ამიტომ ის დაავადებები, რომელიც სახელმწიფოსთვის აქტუალობით ნომერ პირველი იყო ადრე და ეს იყო გულ-სისხლძარღვთა დაავადებები, დღეს არსებული მკურნალობის მეთოდებით და პლუს იმით, რომ აქტიურად ხდება პრევენციული მეთოდების აქტუალიზაცია და პროპაგანდა, ცოტა უკან დაიწია. ეს ძალიან სასიხარულოა, მაგრამ ამ ფონზე მეტად აქტუალური ხდება ონკოლოგიურ დაავადებებთან ბრძოლა და ამას ჩვენ ყოველდღიური ჩვენი საქმიანობით ვხედავთ. იმ დაწესებულებაში, სადაც მე ვმუშაობ, ერთ-ერთი როგორც სამედიცინო, ასევე კვლევითი თემატიკა სწორედ ონკოლოგიაა. ეს რა თქმა უნდა, არის საჭირბოროტო და სახელმწიფოებრივი მნიშვნელობის პრობლემა, რასაც საბედნიეროდ შესაბამისი ყურადღება ექცევა ჩვენი ქვეყნის ჯანდაცვის სისტემის მხრიდან. მეორე, რაც ძალიან მნიშვნელოვანია და შედარებით ყურადღების მიღმაა, ეს არის დეგენერაციული დაავადებები. ამ შემთხვევაში, ცენტრალური ნერვული სისტემის დეგენერაციულ დაავადებებზე ვსაუბრობ, რომელიც წინა პლანზე მოდის ქვეყნის პოპულაციის საშუალო ასაკის მატებასთან ერთად. ძალიან კარგია, რომ სიცოცხლის საშუალო ხანგრძლივობა იმატებს, გულ-სისხლძარღვთა დაავადებებს ჩვენ უფრო ეფექტურად ვებრძვით, მაგრამ ამ დროს აქტუალური ხდება ის დაავადებები, რომლებიც ასაკთანაა დაკავშირებული. დღესდღეობით, ეს ნამდვილად მნიშვნელოვანი თემაა. ისევ და ისევ, ვთვლი, რომ ეს მარტო პრაქტიკულ საქმიანობას არ მოიცავს, ამ მიმართულებით სამეცნიერო კვლევებიც აუცილებელია. ამ განხრით ჩვენც ვმუშაობთ, კოლეგა ნევროლოგებთან ერთად შევისწავლით თავის ტვინის დეგენერაციული დაავადებების ადრეულ ტომოგრაფიულ და კლინიკურ მარკერებს. - ტექნოლოგიურმა რევოლუციამ და კომპიუტერული მეცნიერების უკანასკნელმა მიღწევებმა დიამეტრიულად შეცვალა სხვადასხვა დარგი და ხშირად, ჩვენი ყოველდღიური ცხოვრებაც. რა პერსპექტივები ისახება მედიცინაში ახალი ტექნოლოგიების და ხელოვნური ინტელექტის გამოყენებასთან დაკავშირებით?- ნამდვილად, ახალმა ტექნოლოგიებმა მედიცინა რევოლუციურად შეცვალა. განსაკუთრებით, ისეთ დარგში, როგორიც არის რადიოლოგია. არ შეიძლება, არ ვახსენო პიროვნება, რომლის სახელსაც ატარებს ეს დაწესებულება, სადაც ჩვენ დღეს ვიმყოფებით, აკადემიკოსი ფრიდონ თოდუა, რომელიც 1991 წელს დაბრუნდა სამშობლოში და შეიძლება ითქვას, დარგს ახალი სიცოცხლე შესძინა. მანამდე, რადიოლოგია საქართველოში, ძირითადად, კარგად ნაცნობ მეთოდებს მოიცავდა. მან დანერგა თანამედროვე კომპიუტერული ტომოგრაფია და შემდგომ, მაგნიტურ-რეზონანსული ტომოგრაფია საქართველოში, ამ პიონერულ მოძრაობაში გარკვეულ მონაწილეობას მეც ვიღებდი.ამას ხშირად ვამბობ და მინდა, ახლაც გავიმეორო - ჩემი აზრით, ბატონმა ფრიდონმა არა მარტო რადიოლოგია განავითარა, მან ასევე ბიძგი მისცა სხვადასხვა კლინიკურ დარგს საქართველოში, რომ ფეხი აებათ ახალი მიდგომებისთვის. ონკოლოგია, ნევროლოგია, ნეიროქირურგია და სხვა მიმართულებები სრულიად გარდაიქმნა და დღეს წარმოუდგენელია სხივური დიაგნოსტიკის მეთოდების გარეშე. ამ გამოკვლევებით სრულიად ახალი ინფორმაცია მივიღეთ. შეგვიძლია მიკროსტრუქტურულ დონემდე დავიდეთ და მკურნალ ექიმს დავეხმაროთ როგორც დიაგნოზის დასმაში, ასევე მკურნალობის ეფექტურობის შეფასებაში. ამ თვალსაზრისით, მედიცინაში ნამდვილად გადატრიალების მომსწრენი ვართ.თუკი გადავხედავთ რა სწრაფად მოხდა ტექნოლოგიური ნახტომი, ძველი დიაგნოსტიკური აპარატებიდან თანამედროვე ტომოგრაფიულ მეთოდებამდე, ადვილად წარმოსადგენია, რომ მომავალ 20-30 წელიწადში რადიოლოგია კიდევ უფრო მნიშვნელოვან პროგრესს განიცდის. ტენდენცია უკვე ჩანს, ჩვენ დავდივართ მოლეკულურ დონეზე, ვსწავლობთ ნივთიერებათა ცვლის ნატიფ ძვრებს, რომელიც შეიძლება ამა თუ იმ პათოლოგიის დროს განვითარდეს. აუცილებლად მეტად წინ წავალთ ე.წ. ფუნქციური კვლევების თვალსაზრისით, რასაც დღესაც ვაკეთებთ თავის ტვინის უმაღლესი ფუნქციების შესწავლისას. არაინვაზიურად, რაც მთავარია - ყოველგვარი დამატებითი ჩარევის, მავნებელი გამოსხივების გარეშე ხდება ჩვენი ორგანიზმიდან ინფორმაციის აკრეფა. ჩემი აზრით, ეს დარგი სულ უფრო მეტად გაძლიერდება და საბოლოო ჯამში ყოველივე ეს დაეხმარება დაავადებათა დიაგნოსტიკას და პაციენტების მკურნალობას.რაც შეეხება კომპიუტერული მეცნიერების პროგრესს, ეს უკვე დღევანდელობაა ზოგადად მედიცინაში, მით უმეტეს, რადიოლოგიაში. ჩვენ უკვე ვიყენებთ ხელოვნურ ინტელექტს. ძალიან დიდი სჯა-ბაასი იყო იმაზე, რომ ხელოვნური ინტელექტი ექიმ-რადიოლოგს შეცვლის. ამისგან ჯერ ძალიან შორს ვართ, მაგრამ ახალი ტექნოლოგიები და კომპიუტერული ალგორითმები ჩვენთვის ძალიან დიდი დამხმარეა. ხელოვნური ინტელექტის მეშვეობით, პირველ რიგში, ვითავისუფლებთ თავს გარკვეული განმეორებადი, დამღლელი მოქმედებისგან. ეს ბევრად უფრო ადვილად შეუძლია გააკეთოს მანქანამ - მოცულობის დაანგარიშება, შედარება სუბმილიმეტრულ დონეზე, შეიცვალა თუ არა დაზიანების კერა, ნატიფი სტრუქტურა და ა.შ.. რა თქმა უნდა, ადამიანი ისე ზუსტად ვერ გაზომავს, როგორც შესწავლის შემდგომ ეს შეუძლია მანქანას.დღესდღეობით, ხელოვნური ინტელექტის გამოყენება შესაძლებელია რაოდენობრივი ანალიზისათვის და ეს კიდევ უფრო დაიხვეწება. მეორე რაც ასევე უკვე დანერგილია რადიოლოგიაში - ახალი მეთოდები გამოსხივების დოზის შემცირების საშუალებას გვაძლევს. მანქანური ალგორითმებით ჩვენ შეგვიძლია კომპიუტერს შევასწავლოთ, როგორია გამოსახულება იმ შემთხვევაში, თუ ვიყენებთ ნაკლებ გამოსხივებას და როგორი იქნებოდა, თუკი გამოვიყენებდით ჩვეულებრივ დოზას და ამის საფუძველზე შეგვიძლია შესაბამისი ხარისხიანი სურათის მიღება.ასევე, მოგეხსნებათ, მაგნიტურ-რეზონანსული ტომოგრაფია ცოტა ხანგრძლივი გამოკვლევაა და ხელოვნური ინტელექტის ალგორითმებით შესაძლებელი გახდა, გამოკვლევის დროის შედარებით შემოკლება.ერთი შეიძლება დანამდვილებით ითქვას, რომ ხელოვნური ინტელექტი იქნება ძლიერი დამხმარე ექიმებისთვის პაციენტების ჯანმრთელობის სადარაჯოზე. ერთის მხრივ ის გააადვილებს დიდი მოცულობის და რუტინული მონაცემების დამუშავებას და მეორეს მხრივ გამოყენებული იქნება პაციენტების უსაფრთხოების და  კომფორტის გასაუმჯობესებლად. რა თქმა უნდა, კომპიუტერი ვერ შეცვლის ექიმს და იმ აუცილებელ ადამიანურ კონტაქტს, რომელიც პაციენტსა და მკურნალს შორის უნდა იყოს.

პოლიტიკა • 1745917950

ოპოზიცია და ე.წ. მდიდარი „ენჯეოები“ თავდაუხრელად შრომობენ, რათა ქვეყანას ვიზალიბერალიზაცია დააკარგვინონ - იციან, აბსოლუტურად განულებულები არიან და ახლა არწმუნებენ თავიანთ პატრონებს, რომ ეს მათი გადარჩენის ერთადერთი გზაა - ლევან მაჭავარიანი

ე.წ. მდიდარი „ენჯეოები“ და მათი პარტნიორი რადიკალური ოპოზიცია თავდაუხრელად შრომობენ იმისათვის, რომ ქვეყანას ვიზალიბერალიზაცია დააკარგვინონ - განაცხადა ფრაქცია „ქართული ოცნების“ თავმჯდომარის მოადგილემ ლევან მაჭავარიანმა პარლამენტის პლენარულ სხდომაზე.მისი თქმით, ისინი აბსოლუტურად განულებულბი არიან და ახლა თავიანთ საერთო პატრონებს არწმუნებენ, რომ ეს მათი გადარჩენის ერთადერთი გზაა.„მინდა დღევანდელი თემა დავუთმო, თუ როგორ იბრძვიან ჩვენი ოპონენტები, რომლებსაც უსამშობლოებს ვეძახით, ე.წ. მდიდარი „ენჯეოები“ და მათი პარტნიორი რადიკალური ოპოზიცია იმისათვის, რომ ქვეყანას ვიზალიბერალიზაცია დააკარგვინონ. ისინი ამისთვის თავდაუხრელად შრომობენ, დადიან კაბინეტებიდან კაბინეტებში, იწერებიან წერილებს, დანოსებს ბრიუსელში და ა.შ. ვინაიდან, იციან, რომ აბსოლუტურად განულებულები არიან და ახლა არწმუნებენ თავიანთ პატრონებს და მათ ჰყავთ საერთო პატრონი, რომ ეს არის მათი გადარჩენის ერთადერთი გზა.რა თქმა უნდა, ჩვენ ყველა „ენჯეოს“ არასდროს ვეხებით და ყოველთვის გამოვყოფთ ხოლმე, რომ საქართველოში არიან ისეთი „ენჯეო“ ორგანიზაციები, რომლებიც ნამდვილად კეთილ საქმეს ემსახურებიან და ამის თვალსაჩინო მაგალითი იყო, როდესაც 500-მდე „ენჯეო“ ორგანიზაცია დარეგისტრირდა აბსოლუტურად უპრობლემოდ გამჭვირვალობის რეესტრში, ვინაიდან დასამალი არაფერი აქვთ, ქვეყნისთვის კეთილ საქმეს აკეთებენ. მაგრამ არის „ენჯეოების“ ძალიან დიდი ნაწილი, რომელიც არის პირდაპირ უსამშობლო და ეწევა ძირის გამომთხრელ სამუშაოებს, რომლებსაც ჩვენ მოვიხსენიებთ, მაგალითად, კოლექტიურ ლომჯარიებად, კოლექტიურ გიგაურებად, სუბელიანებად, პატარაიებად, მაქარაშვილებად ა.შ. ეს არის ადამიანთა ის ჯგუფი, რომელსაც ჰყავს ძალიან დიდი ბაბლი თავის გარშემო, ზუსტად იგივენაირი უსამშობლოები, რომელთა დღის წესრიგსაც, თუ გადავხედავთ წინა წლებს, წარმოადგენდა ის, რომ ჩვენთვის თავს მოეხვია მიუღებელი პროპაგანდა, ელანძღა ჩვენი ეკლესია, შეურაცხყოფა მიეყენებინა ჩვენი პატრიარქისთვის, ანუ არაფერი, რაც ქართულია - ტრადიციები, კულტურა, იდენტობა - მათთვის აბსოლუტურად არანაირ ღირებულებას არ წარმოადგენს. სწორედ ამიტომ ვეძახით მათ უსამშობლოებს.კიდევ ერთხელ შეგახსენებთ, რომ ზუსტად ერთი და იგივე პატრონი ჰყავთ მათაც და „კოლექტიურ ნაციონალურ მოძრაობასაც“, ერთი და იგივე პატრონისგან ფინანსდებიან. ძალიან სასაცილო და ღიმილის მომგვრელია, როდესაც ეს ე.წ. ფიგურები, რომლებიც ჩამოვთვალე, მას შემდეგ, რაც წლების განმავლობაში პატრიარქს გვილანძღავენ სამარცხვინოდ, შემდეგ მოდის ხოლმე აქციების დღეები, რომლებიც ემთხვევა, მაგალითად, აღდგომის ბრწყინვალე დღესასწაულს და იქ ბრჭყალებში ანგელოზის სახეებით დადგებიან ხოლმე, სანთლებს დაიჭერენ ხელში და იწყებენ გალობას.უახლეს ისტორიას რომ გადავხედოთ, ეს შემადგენლობა ხელს გვიშლიდა ვიზალიბერალიზაციის მოპოვებაში. ეს ყველაფერი დადასტურებულია და გადაბრალებულიც აქვთ ერთმანეთზე. როდესაც კანდიდატის სტატუსს ვიღებდით 2023 წელს, იქ ჩვენ გამოვაქვეყნეთ, თუ არ ვცდები, „პოს ტივის“ ეთერი იყო და არქივი არსებობს, იმ „ენჯეო“ ორგანიზაციების ჩამონათვალი, რომლებიც საშინელ დასკვნებს აგზავნიდნენ იმისათვის, რომ კანდიდატის სტატუსი არ მიგვეღო და ოპოზიციონერები კაბინეტებში დადიოდნენ, რომ ხელი შეეშალათ. როდესაც უკვე მიხვდნენ იმას, რომ კანდიდატის სტატუსს ვიღებდით, შეგახსენებთ, რომ ერთმანეთზე დაიწყეს იქაც გადაბრალება, რომ, არა, მე არაო, სხვა ოპოზიციური პარტია დადიოდა ხელის შესაშლელადო.ამ მდიდარ „ენჯეოებზე“ რომ ვისაუბროთ, ომში ჩართვისკენ როგორ მოგვიწოდებდნენ, შევახსენოთ საზოგადოებას. როდესაც ისინი აქციებს გვიწყობდნენ იმის გამო, რომ მოხალისეებით სავსე ჩარტერული რეისი მთავრობის ოფიციალური თანხმობით არ გავაგზავნეთ უკრაინაში და რუსეთთან ესკალაცია არ გამოვიწვიეთ. პირდაპირ სცენაზე ავიდნენ და ითხოვდნენ მთავრობის გადადგომას, ჩამოვაყალიბებთ ტექნიკურ მთავრობასო“, - განაცხადა ლევან მაჭავარიანმა.

პოლიტიკა • 1745576386

გვიხარია, რომ აშშ-ის ახალმა ადმინისტრაციამ არა მხოლოდ ამხილა მავნე პრაქტიკა, თავადაც დაიწყო რისკების დაზღვევა, რომ უცხოურ გავლენას სჭირდება გამჭვირვალობა - შალვა პაპუაშვილი

გვიხარია, რომ აშშ-ის ახალმა ადმინისტრაციამ არა მხოლოდ ამხილა მავნე პრაქტიკა, თავადაც დაიწყო რისკების დაზღვევა, რომ უცხოურ გავლენას სჭირდება გამჭვირვალობა, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.პაპუაშვილი ამერიკულ უნივერსიტეტებში უცხოური გავლენის გამჭვირვალობის შესახებ დონალდ ტრამპმის აღმასრულებელ ბრძანებას გამოეხმაურა.„ბრძენი ხალხი იყვნენ რომაელები და მათი გამონათქვამები არაერთხელ გამიმეორებია – ის რაც შეეფერება იუპიტერს, არ შეეფერება ხარს. რა ვქნათ, ასე არის აწყობილი გეოპოლიტიკა, დიდ პატარაობა აქაც არის. ის, რაც თავისთვის უნდა ზოგიერთს, სხვისთვის არ ემეტება. ასე არ იმეტებდნენ ჩვენთვის რაღაცებს ხან მოსკოვი, ხან სხვა დედაქალაქები, მაგრამ ჩვენ ჩვენს თავს უნდა მივხედოთ. ამ წნეხსაც ხომ გავუძელით მაშინ. ყველაზე საინტერესო ის არის, რომ იგივე დასახელებით არის, ჰქვია უცხოური გავლენის გამჭვირვალობა, ამ შემთხვევაში სპეციფიკურად უმაღლეს დაწესებულებებში. ტერმინოლოგიურადაც კი იგივეა, რაც ჩვენთან მოქმედებს, „უცხოური გავლენის გამჭვირვალობის შესახებ“ კანონი. შეგახსენებთ, 2023 წელს ამ ქართულ კანონს პირველად რუსული კანონი დაარქვა ბაიდენის ადმინისტრაციის ელჩმა, კელი დეგნანმა. მან თქვა პირველად, მან მოიგონა ეს ტერმინი და ახალი ადმინისტრაციის მხრიდან ახლა უკვე ვიცით, ეს სქემები როგორ მოქმედებს, როგორ ერთვებოდა ამაში იუსეაიდი, ნედი, სხვა დამფინანსებლები, როგორ აძლევენ დირექტივებს „ენჯეოებს“, რომლებსაც თავად აფინანსებენ, რათა ძირი გამოუთხარონ სხვა ქვეყნებში დემოკრატიას, როგორ აკონტროლებენ მედიას. სხვათა შორის, გუშინაც გავრცელდა ინფორმაცია, ამერიკული ორგანიზაცია იყო „ინტერნიუსი“, რომლის მეშვეობითაც ათასობით მედია იყო კონტროლის ქვეშ, რათა გაეტარებინა ის პროპაგანდისტული ხაზი, რომელიც მოდიოდა დამფინანსებლისგან. ასე რომ, თავის დროზე ამერიკის შეერთებული შტატების ყოფილმა ელჩმა შექმნა ყალბი პროპაგანდისტული ხაზი. მას უყვარდა ხოლმე თქმა, სპეცსამსახურების სახელმძღვანელოდან არისო. ზუსტადაც რომ სპეცსამსახურების სახელმძღვანელოდან ამოკითხულ სცენარს ჰგავდა ის ჰიბრიდული ომის ტაქტიკები, რაც 2023 წელს ვიხილეთ. აბსოლუტურად ყალბი ბრალდებების სათავე იყო ზუსტად აშშ-ის მაშინდელი ელჩი, რომელმაც ჯერ კანონპროექტის სტიგმატიზება მოახდინა, შემდეგ იუესაიდის თუ სხვა ასეთი, როგორც დღეს ამერიკის ხელისუფლება უწოდებს, თაღლითი ორგანიზაციების დაფინანსებით ძალადობრივი თავდასხმა იყო პარლამენტზე.გახსოვთ მაშინ პირველად საქართველოს ისტორიაში „მოლოტოვის კოქტეილი“ ესროლეს ადამიანს და ცოცხლად წვავდნენ პოლიციელს. 2023 წლიდან გავიდა ორი წელი და არცერთ ხმამაღლა მოსაუბრე დიპლომატს არ დაუგმია „მოლოტოვის კოქტეილის“ სროლა, პირიქით. გრიგორიადისი, ადამიანი, რომელმაც ეს დანაშაული ჩაიდინა და რომელიც ადამიანს წვავდა ცოცხლად, ლამის გმირად გამოგვიცხადეს. შეგახსენებთ, ევროკავშირის, იიდის დაფინანსებით ორგანიზაცია „სირცხვილია“ გარდა იმისა, რომ ამ კრიმინალს რაცხავდა გმირად, ასევე „მოლოტოვის კოქტეილის“ სროლას აცხადებდა, როგორც პოლიტიკური ბრძოლის მისაღებ ინსტრუმენტს. ეს ფინანსდებოდა ევროკავშირის ბიუჯეტიდან. ამის შემდეგ არათუ ვინმემ წუხილი გამოთქვა ან დაგმო პოლიციელზე თავდასხმა, ან ბოდიში მოგვიხადა, რომ ამას აფინანსებდა, პირიქით. ამის შედეგი არის, რომ 2023 წელს „მოლოტოვის კოქტეილი“ პირველად საქართველოს ისტორიაში გავარდა მიტინგებზე, რომლებიც რადიკალური ოპოზიციისა და „ენჯეოების“ მხრიდან იყო ორგანიზებული. პროევროპულს ეძახიან და ამ „პროევროპულ მიტინგზე“ პირველად ისტორიაში რომ გავარდება „მოლოტოვის კოქტეილი“, ხომ უნდა დაფიქრდეს ის, ვისაც ევროკავშირის პასპორტი უდევს ჯიბეში, რა წარმოდგენას ქმნის ევროკავშირსა და პროევროპულობაზე, ქართველი ხალხის თვალში „მოლოტოვის კოქტეილებს“ რომ უთანაბრებენ ევროპულ ღირებულებებს. ზუსტად ამ არდაგმობის შედეგი იყო ის, რომ ერთი „მოლოტოვის კოქტეილი“ შარშან, დეკემბერში იქცა უკვე ათ „მოლოტოვის კოქტეილად“. ეს ქმედებები არ დაუგმია არცერთ ხმამაღლა მოსაუბრე დიპლომატს, რომლებიც ქართველი პოლიტიკოსებივით ლამის ყოველდღიურ საკითხებს ეხმიანებიან. იცით რატომ? შემდეგში ერთი „მოლოტოვის კოქტეილი“ გახდეს 30. შეგახენებთ, რომ როგორც მაშინ დაშავდნენ პოლიციელები, ამ ჯერზეც დაშავდნენ, ერთმა პოლიციელმა დაკარგა მხედველობა და ამ ხმამაღლა მოსაუბრე რომელიმე დიპლომატმა არც კი იკადრა, მოენახულებინათ ეს პოლიციელი ან წუხილი გამოეთქვათ. ეს აქციები ორგანიზებული იყო მათ მიერ დაფინანსებული ადამიანებისგან.  ჩართული იყვნენ ადამიანები, რომლებიც მათგან ხელფასს იღებდნენ. ერთი წუხილიც კი არ გამოთქვეს ამასთან დაკავშირებით. ამიტომ ვფიქრობ, რომ ამ მხრივაც ყველაფერი გასაგებია. გვიხარია, რომ ახალმა ადმინისტრაციამ არა მხოლოდ ამხილა და აღიარა მავნე პრაქტიკა, რომლის გამოყენებითაც ამერიკული ფული იხარჯებოდა სხვა ქვეყნებში, სხვისი ძირის გამოთხრისთვის, არამედ თავადაც იმ რისკების დაზღვევა დაიწყო რაზეც ჩვენ  ამდენი წელია ვსაუბრობთ, რომ უცხოურ გავლენას სჭირდება გამჭვირვალობა“, – განაცხადა პაპუაშვილმა.როგორც პაპუაშვილმა აღნიშნა, ზოგიერთმა დიპლომატმა თუ უცხოელმა პოლიტიკოსმა ბოდიში უნდა მოუხადოს ქართველ ხალხს, რომ ყალბი პროპაგანდა იყო წარმოებული საქართველოს წინააღმდეგ.„როგორც გამოვიდა ტრამპი და თქვა, რომ ქალი ქალია და კაცი კაცი, წერტილი დაუსვა მთელ პროპაგანდისტულ ხაზს, რომელსაც წლები აშენებდნენ, რომ სქესი არჩევითია და გემოვნებაზეა დამოკიდებული. დარწმუნებული ვარ, ახლა ამ აქტით, რომ უცხოური გავლენის გამჭვირვალობა მნიშვნელოვანია, მათ შორის ამ შეფასებებით, რომ დასამალი თუ არაფერი გაქვს, რატომ არ ასაჯაროებ, ერთი ერთში იმეორებენ ჩვენს მიდგომებს. ვფიქრობ, ამითი ყველაფერს წერტილი დაესვა. ახლა გამოვიდნენ ისინი, რომლებმაც „მოლოტოვის კოქტეილები“, მაშხალები დატენეს და ისროლეს და ამასთან დაკავშირებით თავისი განმარტებები თქვან. მგონი, ზოგიერთმა დიპლომატმა თუ უცხოელმა პოლიტიკოსმა ბოდიშიც უნდა მოუხადოს ქართველ ხალხს, რომ ასეთი ყალბი პროპაგანდა იყო წარმოებული საქართველოს წინააღმდეგ“, – აღნიშნა პაპუაშვილმა.ცნობისთვის, აშშ-ის პრეზიდენტმა, დონალდ ტრამპმა ამერიკულ უნივერსიტეტებში უცხოური გავლენის გამჭვირვალობის შესახებ აღმასრულებელ ბრძანებას ხელი მოაწერა. ბრძანების მიხედვით, აშშ-ის განათლების მდივანმა უნდა უზრუნველყოს ამერიკელი ხალხისთვის უმაღლესი განათლების დაწესებულებებში უცხოური დაფინანსების შესახებ ინფორმაციაზე უკეთესი წვდომა, უნდა მიიღოს შესაბამისი ზომები, რათა უნივერსიტეტებს მოეთხოვოთ, გაამჟღავნონ უფრო კონკრეტული დეტალები უცხოური დაფინანსების შესახებ, მათ შორის, თანხების რეალური წყარო და მიზანი.აღნიშნულ ბრძანებას გამოეხმაურა ამერიკელი სენატორი ჯიმ რიში, რომელმაც აღნიშნა: „მივესალმები ტრამპის ბრძანებას, რომელიც აიძულებს უნივერსიტეტებს, გაასაჯაროონ უცხოური დაფინანსება, ჩვენ უნდა მივყვეთ თანხებს, დასამალი თუ არაფერია, მაშინ რატომ არის წინააღმდეგობა?“

მსოფლიო • 1745504975

კრემლში აცხადებენ, რომ რუსეთი განაგრძობს შეერთებულ შტატებთან მუშაობას სამშვიდობო შეთანხმების მისაღწევად

რუსეთი განაგრძობს მუშაობას ამერიკულ მხარესთან, ჩვენ ორიენტირებული ვართ მშვიდობის მიღწევისკენ მიმართული ძალისხმევის გაგრძელებაზე, – ამის შესახებ კრემლის პრესსპიკერმა, დიმიტრი პესკოვმა განაცხადა.„ჩვენ და პრეზიდენტი პუტინი ვემხრობით მშვიდობის მიღწევას ჩვენი ქვეყნის ინტერესების უზრუნველყოფით. ეს სავალდებულო პირობაა. ეს სამუშაო გრძელდება“, – აღნიშნა პესკოვმა.​კრემლის სპიკერმა უარყო ის ფაქტიც, რომ რუსეთმა კიევის მიმართულებით თავდასხმა განახორციელა.„არა, ეს სიცრუეა. უკრაინული მხარე განაგრძობს პროპაგანდას. ჩვენი სამხედროები განაგრძობენ „სპეციალურ სამხედრო ოპერაციას“, თავიანთი ამოცანების შესრულებას, რომლებიც მათ დაუსახა უმაღლესმა მთავარსარდალმა და ამ ჩარჩოებში ახორციელებენ დარტყმებს სამხედრო ობიექტებზე“, – დასძინა პესკოვმა.ამასთან, დიმიტრი პესკოვის თქმით, ამერიკის პრეზიდენტის განცხადება, რომ უკრაინამ ყირიმი დიდი ხნის წინ დაკარგა, მათ აზრს შეესაბამება.