1768248959
ყავა შეიცავს დიტერპენებს - ნაერთებს, რომლებსაც შეუძლიათ „ცუდი“ ქოლესტერინის (LDL) დონის გაზრდა . ამ ქოლესტერინმა შეიძლება გამოიწვიოს ნადებების დაგროვება არტერიებში და გულის პრობლემები. ახალი კვლევის თანახმად, ყავის ქაღალდის ფილტრებით მოდუღება გულის ჯანმრთელობისთვის საუკეთესოა.
რა აჩვენა კვლევამ?
შვედმა მეცნიერებმა დიტერპენების დონის შესადარებლად ყავის მოხარშვის სხვადასხვა მეთოდი გამოსცადეს, მათ შორის ფრანგული პრესა, ქაღალდის ფილტრები და ყავის აპარატები. როგორც აღმოჩნდა, გაუფილტრავი ყავა, როგორიცაა სკანდინავიური მოხარშული და თურქული, დიტერპენების ყველაზე მაღალ რაოდენობას შეიცავდა , ხოლო ქაღალდის ფილტრით მომზადებულ ყავაში - ყველაზე დაბალს.
„თუ რეგულარულად სვამთ ყავას ესპრესოს აპარატებიდან, ამან შეიძლება გავლენა მოახდინოს თქვენს ქოლესტერინის დონეზე, თუმცა ეს დამოკიდებულია აპარატზე და იმაზე, არის თუ არა ყავა გაფილტრული მომზადების დროს“, - განმარტა დევიდ იგმანმა.
გარდა ამისა, მეცნიერებმა აღმოაჩინეს, რომ სამუშაო ადგილებზე არსებული ყავის აპარატების უმეტესობა სათანადოდ არ ფილტრავს დიტერპენებს. 2020 წელს ჩატარებულმა კვლევამ ასევე აღმოაჩინა კავშირი გაუფილტრავ ყავასა და გულ-სისხლძარღვთა დაავადებებისა და სიკვდილის გაზრდილ რისკს შორის.
რა სარგებელი მოაქვს გაფილტრულ ყავას ჯანმრთელობისთვის?
თუ ქოლესტერინის დონე გაწუხებთ, შეგიძლიათ სცადოთ ფილტრიან ყავაზე გადასვლა. მკვლევარების აზრით, ასეთმა ყავამ შეიძლება შეამციროს გულის დაავადებების, ალცჰაიმერის დაავადების და ინსულტის რისკი.
