„ნუ ეტყვით ამას ადამიანს, რომელმაც ყველაფერი დაკარგა!“ - ილია თოფურიას ყოფილი მეუღლის მიმართვა

ვენესუელაში განვითარებულ მოვლენებს UFC-ის მებრძოლის ილია თოფურიას ყოფილი მეუღლე, ჯორჯინა უზკატეგი ემოციური პოსტით ეხმიანება.

„ყველაფერი ხდება რაღაცის გამო“ - გთხოვ, ნუ ეტყვი ამას ადამიანს, რომელმაც ახლახან ყველაფერი დაკარგა.

ეს იყო ღრმა მწუხარების დღეები. დღეები, რომლებიც გვახსენებს, თუ რამდენად მყიფეა ცხოვრება, დღეები, როდესაც გულები გვტკივა ჩვენი ხალხის ტანჯვის ხილვისას. იმედგაცრუების, უმწეობისა და გაოცების დღეები იმის გაცნობიერების გამო, რომ ამდენი ტკივილის მიუხედავად, მაინც არსებობენ ადამიანები, რომლებიც თანაგრძნობის ნაცვლად ბოროტებას ირჩევენ.

დაე, ამ რეალობამ გვასწავლოს, რომ სიცოცხლე უფრო მეტად დავაფასოთ, ჩავეხუტოთ მათ, ვინც გვიყვარს, დავეხმაროთ მათ, ვინც იტანჯება და არ მივცეთ სიბნელეს უფლება, რომ ბოლო სიტყვა თქვას. დღეს უფრო მეტად, ვიდრე ოდესმე, ვამაყობ, რომ ვენესუელელი ვარ, ვამაყობ ჩემი ხალხის უმეტესობის გამძლეობითა და კეთილშობილებით“, - წერს უზეკატეგი.

ცნობისთვის, ვენესუელა ბოლო ათწლეულების ყველაზე ძლიერ სეისმურ მოვლენას ებრძვის, სადაც ერთმანეთის მიყოლებით მომხდარმა 7.2 და 7.5 მაგნიტუდის მიწისძვრებმა ქვეყნის ჩრდილოეთი და ცენტრალური რეგიონები მნიშვნელოვნად დააზიანა.

ოფიციალური მონაცემებით, დაღუპულთა რაოდენობა ათასებს აღწევს, ხოლო დაშავებულების რიცხვი რამდენიმე ათასს აჭარბებს. დანგრეულია საცხოვრებელი სახლები, დაზიანებულია ინფრასტრუქტურა და ათასობით ადამიანი დარჩენილია საცხოვრებლის გარეშე.

სამაშველო ოპერაციები ამ დრომდე გრძელდება, თუმცა ძლიერი განმეორებითი ბიძგები და განადგურებული ინფრასტრუქტურა პროცესს ართულებს. ხელისუფლებამ ქვეყანაში საგანგებო მდგომარეობა გამოაცხადა, ხოლო საერთაშორისო ორგანიზაციები და პარტნიორი ქვეყნები დახმარებას აგრძელებენ.

მიწისძვრა შეფასებულია როგორც ბოლო ასწლეულში ერთ-ერთი ყველაზე ძლიერი სეისმური მოვლენა რეგიონში, რომელმაც ფართომასშტაბიანი ჰუმანიტარული კრიზისი გამოიწვია.