ბავშვი ჭკვიანია, მაგრამ სწავლა უჭირს - სამედიცინო მიზეზები, რომლებიც შეიძლება შეუმჩნეველი დარჩეს

ბავშვი ჯანმრთელად გამოიყურება, ენერგიულია, თამაშობს, თანატოლებთან ურთიერთობს, მაგრამ სკოლაში პრობლემები აქვს — უჭირს ყურადღების მოკრება, ნელა კითხულობს, ვერ იმახსოვრებს ნასწავლს, ხშირად ავიწყდება დავალება ან იმაზე დაბალ შედეგებს იღებს, ვიდრე მისგან ელიან. ასეთ შემთხვევაში მიზეზად ხშირად სიზარმაცეს, ინტერესის ნაკლებობას ან გაჯეტებით ზედმეტ გატაცებას მიიჩნევენ.

თუმცა ზოგჯერ სწავლის სირთულის უკან ჯანმრთელობასთან დაკავშირებული ისეთი პრობლემა დგას, რომელიც ყოველდღიურ ცხოვრებაში თითქმის შეუმჩნეველია. ბავშვი შეიძლება არაფერს უჩიოდეს და მშობელს არც კი ჰქონდეს საფუძველი იფიქროს, რომ მისი გამოკვლევაა საჭირო. ამიტომ, თუ სწავლის პრობლემა ხანგრძლივია ან მოულოდნელად გაჩნდა, ყურადღება რამდენიმე შესაძლო სამედიცინო მიზეზსაც უნდა მიექცეს.

1. რკინის დეფიციტი და ანემია

რკინის ნაკლებობა ყოველთვის არ ნიშნავს, რომ ბავშვი ფერმკრთალია ან მუდმივად წევს და არაფრის გაკეთება არ უნდა. განსაკუთრებით რკინის დეფიციტის ადრეულ ეტაპზე ბავშვი შეიძლება გარეგნულად სრულიად ჯანმრთელი ჩანდეს. ამავე დროს, შესაძლოა სწრაფად იღლებოდეს, უჭირდეს ყურადღების კონცენტრაცია და ინფორმაციის დამახსოვრება. რკინა ტვინის ნორმალური ფუნქციონირებისთვისაც მნიშვნელოვანია, ამიტომ მისი დეფიციტი სწავლის პროცესზეც შეიძლება აისახოს.

2. მხედველობის დაუდგენელი პრობლემა

ბავშვმა შეიძლება თავადაც არ იცოდეს, რომ ცუდად ხედავს — განსაკუთრებით მაშინ, თუ მხედველობა თანდათან გაუუარესდა. მას ჰგონია, რომ ყველა დაახლოებით ისე ხედავს, როგორც თვითონ. ასეთ ბავშვს შეიძლება უჭირდეს დაფიდან გადაწერა, კითხვისას მალე ეღლებოდეს თვალები, ერეოდეს სტრიქონები ან თავს არიდებდეს კითხვას. შედეგად პრობლემა ზოგჯერ უყურადღებობად ან სწავლისადმი ინტერესის ნაკლებობად აღიქმება.

3. სმენის მსუბუქი დაქვეითება

სმენის პრობლემა ყოველთვის არ ნიშნავს, რომ ბავშვს ჩვეულებრივი საუბარი არ ესმის. მსუბუქი დაქვეითებისას სახლში შეიძლება ყველაფერი ნორმალურად იყოს, მაგრამ ხმაურიან საკლასო ოთახში მასწავლებლის ნათქვამის ნაწილი გამორჩეს. ბავშვი ვერ იგებს ინსტრუქციას სრულად, ვერ მიჰყვება ახსნას და თანდათან ჩამორჩება მასალას. ზოგჯერ ასეთი პრობლემა ხშირი შუა ყურის ანთებების შემდეგაც ვითარდება. განაგრძე კითხვა...