ბაქო-თბილისი-ბაქოს მატარებლებს 10 ივლისიდან ვაგონები დაემატება

10 ივლისიდან ბაქო-თბილისი-ბაქოს მატარებლებს კიდევ სამი ვაგონი დაემატება.

აზერბაიჯანის რკინიგზის ინფორმაციით, ვაგონების დამატების შედეგად თითოეულ რეისზე დამატებით 104 სამგზავრო ადგილი იქნება ხელმისაწვდომი, ხოლო თითოეულ რეისზე სამგზავრო ადგილების რაოდენობა დაახლოებით 60 პროცენტით, 178-დან 282 ადგილამდე გაიზრდება.

დამატებითი ვაგონების ბილეთების გაყიდვა დღეიდან დაიწყო.

„შტადლერის“ ტიპის ვაგონებთან შედარებით, მარშრუტზე დამატებული „სტანდარტ+“ ტიპის საძილე ვაგონების უფასო ბარგის დასაშვები ნორმა 36 კგ-ით განისაზღვრა, ამ ვაგონების ტექნიკური მახასიათებლებისა და სტრუქტურული შესაძლებლობების გათვალისწინებით.

აღსანიშნავია, რომ ბაქო-თბილისი-ბაქოს მარშრუტზე, 25 მაისიდან 6 ივლისის ჩათვლით, დაახლოებით 25 ათასი ბილეთი გაიყიდა. აქედან, მატარებლით 6 356 ადამიანმა იმგზავრა თბილისიდან, 4 343 – ბაქოდან, 1 112 – განჯიდან, 808 – ევლახიდან, 520 – აღსტაფადან და სხვა სადგურებიდან. ეს მიუთითებს, რომ ბაქო-თბილისი-ბაქოს მარშრუტით მგზავრთა დაახლოებით 40 პროცენტი რეგიონებზე მოდის.