საქართველოში მყოფი უცხოელებისთვის დასაქმების პირობები მკაცრდება - შრომითი მიგრაციის შესახებ კანონში ცვლილებებს იურიდიულ საკითხთა კომიტეტი პირველი მოსმენით დღეს განიხილავს

საქართველოში მყოფი უცხოელებისთვის დასაქმების პირობები მკაცრდება - ცვლილებები შედის შრომითი მიგრაციის შესახებ კანონში, რომელსაც დღეს იურიდიულ საკითხთა კომიტეტი პირველი მოსმენით განიხილავს.

ცვლილებების მიხედვით, შემუშავდება და დაინერგება უცხოელის დასაქმებისთვის სპეციალური სამუშაო უფლების გაცემის მექანიზმი; დარეგულირდება საქართველოში უცხოელი ფიზიკური პირების შრომითი/სამეწარმეო საქმიანობა; შემუშავდება კანონმდებლობით დადგენილი ნორმების აღსრულების ახალი მექანიზმები და განისაზღვრება მათი აღმასრულებელი უწყებები; გაიზრდება საჯარიმო სანქცია იმ დამსაქმებლებთან მიმართებაში, ვინც უცხოელს დაასაქმებს სპეციალური სამუშაო უფლების მოპოვების გარეშე; დაწესდება საჯარიმო სანქცია თითოეული შრომითი მიგრანტისთვის, რომელიც საქართველოში სპეციალური სამუშაო უფლების გარეშე ეწევა შრომით/სამეწარმეო საქმიანობას.

მმართველ გუნდში განმარტავენ, რომ ცვლილებების მიზანი, საქართველოში მიგრაციული პროცესების რეგულირება და მართვის უკეთესი მექანიზმების დანერგვაა, რაც უზრუნველყოფს არალეგალური მიგრაციული ნაკადების შემცირებასა და საქართველოში შრომითი მიგრაციის პროცესების ლეგალურ ჩარჩოებში მოქცევას.