5 საკითხი, რომელზეც ChatGPT-ის 2026 წელს არ უნდა ესაუბროთ

ხელოვნური ინტელექტის მქონე ჩატ-ბოტები, როგორიცაა ChatGPT, ყოველდღიური ცხოვრების განუყოფელ ნაწილად იქცა: ადამიანები მას იყენებენ პასუხების მოსაძებნად, ტექსტების შესადგენად, იდეების გენერირებისთვის და მონაცემების ანალიზშიც კი.

თუმცა, რაც უფრო აქტიურად ვურთიერთობთ მასთან, მით უფრო მნიშვნელოვანია გვახსოვდეს, ეს არ არის უსაფრთხო საცავი თქვენი პირადი ან კონფიდენციალური ინფორმაციისთვის, წერს SlashGear.

ChatGPT ყოველდღიურად დაახლოებით 2,5 მილიარდ შეკითხვას პასუხობს და მიუხედავად ჩაშენებული დაცვის მექანიზმებისა, კვლავ რჩება მონაცემების გაჟონვისა და თქვენ მიერ შეყვანილი ინფორმაციის უკონტროლო გამოყენების რეალური რისკები. ტექნოლოგია მუდმივად ვითარდება, მაგრამ სიფრთხილე მაინც აუცილებელია.
აი ხუთი რამ, რაც არასდროს უნდა გაუზიაროთ ChatGPT-ს ან ნებისმიერ სხვა საჯარო „ჭკვიან“ ჩატ-ბოტს:

პირადი ინფორმაცია
ბევრი მომხმარებელი შეუმჩნევლად უთითებს საკუთარ სრულ სახელს, მისამართს, დოკუმენტების ნომრებსა და საკონტაქტო მონაცემებს, მაგალითად, რეზიუმეს შესადგენად. მონაცემების შესაძლო „გაჟონვის“ ან ბოროტმოქმედების მიერ სისტემაზე წვდომის შემთხვევაში, ამას სერიოზული შედეგები შეიძლება მოჰყვეს.
თუნდაც ბოტი „მეგობარივით“ გესაუბრებოდეთ, ეს ინფორმაცია შეიძლება სისტემამ დაამუშაოს და გამოიყენოს თქვენი სურვულის საწინააღმდეგოდ.

ფინანსური დეტალები
ChatGPT-ს შეგიძლიათ სთხოვოთ, დაგეხმაროთ ბიუჯეტის დაგეგმვაში ან თუნდაც საპენსიო სტრატეგიის შედგენაში, მაგრამ კონკრეტული მონაცემები საბანკო ანგარიშებზე, საკრედიტო ბარათებზე, ინვესტიციებზე ან გადასახადებზე არ გაუზიაროთ.
ექსპერტები აღნიშნავენ, რომ მონაცემების შეყვანის შემდეგ შეუძლებელია იცოდეთ, რა ბედი ეწევა მათ. ფინანსური ინფორმაციის გაზიარებამ შეიძლება გამოიწვიოს სერიოზული რისკები, თაღლითობიდან და პერსონალური მონაცემების გაჟონვიდან დაწყებული, ფიშინგითა და პროგრამების დავირუსებით დამთავრებული.

სამედიცინო მონაცემები
ბოლო კვლევის მიხედვით, დაახლოებით ყოველი მეექვსე ზრდასრული ადამიანი მინიმუმ თვეში ერთხელ მიმართავს ChatGPT-ს სიმპტომების გასაანალიზებლად ან მკურნალობის დასაგეგმად. ახალგაზრდებში ეს მაჩვენებელი ყოველი მეოთხედია. ექსპერტები მოგვიწოდებენ განსაკუთრებულ სიფრთხილეს და გვახსენებენ, რომ ეს არ არის ექიმი და ვერ ჩაანაცვლებს სპეციალისტის კონსულტაციას.
ფინანსური ინფორმაციის მსგავსად, პრობლემას აქაც ამძაფრებს ის, რომ მონაცემების შეყვანის შემდეგ მათი შემდგომი ბედი უცნობია.

სამუშაოსთან დაკავშირებული მასალები
დოკუმენტები, ანგარიშები, კომპანიის სტრატეგიები, ყველაფერი, რაც დაკავშირებულია დამსაქმებელთან, კლიენტთან ან მიმდინარე პროექტთან და არ ექვემდებარება გასაჯაროებას.
როგორც გამოცემა აღნიშნავს, ხელოვნური ინტელექტი შეიძლება მოსახერხებელი ჩანდეს ტექსტების რედაქტირებისთვის ან დოკუმენტების მოკლე შინაარსის მისაღებად, თუმცა ეს ასევე ზრდის არასაჭირო რისკებს.

ნებისმიერი არალეგალური მოთხოვნაამისგან თავი უნდა შეიკავოთ არა მხოლოდ უსაფრთხოების, არამედ იურიდიული მიზეზების გამო. კითხვებმა დანაშაულის ჩადენის, თაღლითობის ან მანიპულაციის შესახებ შეიძლება გამოიწვიოს სერვისის დაბლოკვა და სამართლებრივი პასუხისმგებლობაც კი, რადგან პლატფორმები ვალდებულნი არიან დაიცვან კანონი და შესაძლოა სამართალდამცავი ორგანოების მოთხოვნით მონაცემებიც გაამჟღავნონ.