გიორგი გაბუნია: სახელმწიფოს გაცხადებული აქვს კორუფციის წინააღმდეგ ეფექტური ბრძოლა, უნდა დაველოდოთ გამოძიებას, რომელიც ყველა კითხვას გასცემს პასუხს

სახელმწიფოს კორუფციის წინააღმდეგ ეფექტური ბრძოლა აქვს გაცხადებული. ამიტომ რა სახის დანაშაული იყო ჩადენილი, და თუ იყო, ძალოვანმა უწყებებმა უნდა დაადგინონ. ჯერ სრული ინფორმაცია არ გვაქვს, რომ ვიმსჯელოთ, – ამის შესახებ პარლამენტის კულტურის კომიტეტის თავმჯდომარემ, გიორგი გაბუნიამ ირაკლი ღარიბაშვილთან დაკავშირებით განაცხადა.

გაბუნიას თქმით, გამოძიება ყველა კითხვას გასცემს პასუხს და უმაღლესი სტანდარტით იქნება წარმართული.

„ადამიანურად, ეს ყველაფერი ძალიან ემოციური და მძიმე საყურებელია. ამ საკითხზე გამოძიება მიმდინარეობს. ვერაფერს გეტყვით, გარდა იმისა, რასაც ძალოვანი უწყებები ამბობენ. უნდა დაველოდოთ გამოძიებას და შედეგებს. მნიშვნელოვანია, საზოგადოებამ საქმეზე სრული სიმართლე გაიგოს. ემოციურია, რადგან ირაკლი ღარიბაშვილი ორჯერ იყო პრემიერ-მინისტრი და გუნდის ლიდერი. მასთან მეგობრობა, ურთიერთობა გვაკავშირებს. ეს ყველაფერი მოსასმენად და საყურებლად მძიმეა, მაგრამ სამართლებრივი სახელმწიფო ვართ და გამოძიების შედეგებს უნდა დაველოდოთ. სახელმწიფო ორგანოებს უნდა დავაცადოთ, რომ ჭეშმარიტება დაადგინონ. ირაკლი ღარიბაშვილის მიმართ ბრალდება ჯერ წარდგენილი არ არის. შესაბამისად, მან დააშავა რამე თუ არა, ჩვენი საუბარი ჭორაობას დაემსგავსება, ფაქტებს უნდა დაველოდოთ“, – აღნიშნა გიორგი გაბუნიამ.