ევა გოცირიძე ბეჟაშვილს "ვეტინგის" სისტემაზე: მე-9 საუკუნეში, სლავმა ტომებმა მიმართეს ვიკინგებს, ჩვენ კარგი ქვეყანა ვართ, მაგრამ წესრიგი არ გვაქვს, მობრძანდით და გვმართეთო, მე-9 საუკუნის რუსეთში დაბრუნებას გვთავაზობთ?

ბატონო ლევან, უცხოელების მოწვევა რატომ არის ასეთი აუცილებელი, თქვენი აზრით, საქართველოში არ არიან პატიოსანი ადამიანები? -, ამ კითხვით მიმართა მოსამართლე ევა გოცირიძემ „ნაციონალური მოძრაობის“ წევრ, ლევან ბეჟაშვილს.

საქმე ეხება ბეჟაშვილის განცხადებას, რომ ის მხარს უჭერს, ხელისუფლების ცვლილების შემდეგ სასამართლო რეფორმის ნაწილში „ვეტინგის“ სისტემის შემოღებას.

მოსამართლემ ქვეყნის სუვერენიტეტსა და კონსტიტუციურ პრინციპებზე გაამახვილა ყურადღება და აღნიშნა, რომ ამ უფლებამოსილებაზე უარის თქმა და მისი უცხოელებისთვის გადაბარება სახელმწიფოს მხრიდან არასრულფასოვნების და ნაკლოვანების დადასტურება ხომ არ არის.

„ვეტინგის“ სისტემა გულისხმობს უცხოელების მოწვევას. მე გეკითხებით ეს რატომ არის აუცილებელი. თავისთავად თუ დავაკვირდებით ამ არსს და უცხოელების მოწვევას ასეთი მნიშვნელოვანი საკითხის გადასაწყვეტად, როგორიც არის სასამართლო ხელისუფლების ჩამოყალიბება, რომელიც არის სახელმწიფოს ფუნქცია და კონსტიტუციით არის განსაზღვრული როგორ ხდება მოსამართლეთა შერჩევა, დანიშვნა და ასე შემდეგ, როდესაც ასეთი უფლებამოსილების განხორციელებაზე ქვეყანა თავად ამბობს უარს, სახელმწიფოს მხრიდან თავისი არასრულფასოვნების, ნაკლულობის დადასტურება ხომ არ არის და რამდენად შეესაბამება სუვერენიტეტს და ეროვნული თავმოყვარეობის საკითხებს. ასეთი ისტორიული ფაქტი გამახსენდა, რომ მე-9 საუკუნეში, 860-იან წლებში სლავმა ტომებმა მიმართეს ვიკინგებს, ჩვენ კარგი ქვეყანა ვართ, მაგრამ წესრიგი არ გვაქვს, მობრძანდით და გვმართეთო, ამ ასოციაციებს ხომ არ იწვევს ეს და მე-9 საუკუნის რუსეთში დაბრუნებას გვთავაზობთ თუ რას? სახელმწიფოს მხრიდან უარი ისეთ მნიშვნელოვან ფუნქციებზე, რომელიც არის საკუთრივ სახელმწიფოს ფუნქცია და განუყოფელი ფუნქცია სახელმწიფოს მხრიდან, ამაზე უარის თქმა არის თუ არა სწორი კონსტიტუციური სამართლებრივი თვალსაზრისით“, - აღნიშნა ევა გოცირიძე.