ეუთოს საპარლამენტო ასამბლეა საქართველოში ვიზიტთან დაკავშირებით განცხადებას ავრცელებს

 ეუთოს საპარლამენტო ასამბლეა, საქართველოში ოფიციალური ვიზიტის დასრულების შემდეგ შემაჯამებელ განცხადებას აქვეყნებს.

ცენტრალური და აღმოსავლეთ ევროპის საპარლამენტო ასამბლეის პრეზიდენტმა, პერე ჟოან პონსმა და ეუთოს საპარლამენტო ასამბლეის მაღალი დონის დელეგაციამ, დღეს, დაასრულეს მრავალდღიანი ვიზიტი საქართველოში, რომლის მიზანიც დიალოგის ხელშეწყობა, დემოკრატიული ინსტიტუტების გაძლიერება და პოლიტიკური სპექტრის ჩართულობის ხელშეწყობა იყო.

ვიზიტის ფარგლებში, დელეგაცია შეხვდა საქართველოს პრეზიდენტს, პარლამენტის თავმჯდომარეს, პრემიერ-მინისტრს, საგარეო საქმეთა მინისტრს, შინაგან საქმეთა მინისტრს, სახალხო დამცველს, პარლამენტის შიგნით და მის გარეთ არსებული მრავალი ოპოზიციური პარტიის წარმომადგენლებს, სამოქალაქო საზოგადოების წევრებს და დიპლომატიური კორპუსის წევრებს. დელეგაცია ასევე ეწვია ადმინისტრაციულ სასაზღვრო ხაზს და შეხვდა საქართველოს ოკუპაციის შედეგად დაზარალებულ იძულებით გადაადგილებულ პირებს".

ეუთოს საპარლამენტო ასამბლეის პრეზიდენტი, პერე ჟოან პონსი შეშფოთებას გამოთქვამს პოლიტიკური პოლარიზაციის გამო და მოუწოდებს მხარეებს დიალოგისკენ:

"ბოლო რამდენიმე დღემ დაადასტურა ჩემი შთაბეჭდილება, რომ საქართველოს ბევრი ძალიან შთამბეჭდავი პოლიტიკოსი ჰყავს. როგორც პარლამენტში, ასევე მის გარეთ, ისინი, როგორც ჩანს, მუდმივად და აქტიურად ურთიერთობენ თავიანთ საერთაშორისო პარტნიორებთან. სამწუხაროდ, შოკირებული ვიყავი, როდესაც აღმოვაჩინე, რომ ისინი ერთმანეთთან არ ურთიერთობენ. მოვუწოდებ ყველა მხარეს, კონსტრუქციულად ჩაერთონ და დაიწყონ პირდაპირი კომუნიკაცია, რომელიც დიალოგის აღდგენას ისახავს მიზნად. მთავრობას ამაში განსაკუთრებული პასუხისმგებლობა აკისრია".

დელეგაცია მიესალმა ფართო კონსენსუსს საქართველოს ევროპული ინტეგრაციისკენ სწრაფვისა და იმის აუცილებლობის შესახებ, რომ შემდეგი არჩევნები ჩატარდება ეუთოს წინაშე არსებული ვალდებულებების შესაბამისად. თუმცა, მათ აღნიშნეს, რომ პოლიტიკურ ასპარეზზე ძლიერი პოლარიზაცია კვლავაც შეაფერხებს ამ მიზნების მიღწევას და ხაზგასმით აღნიშნეს, რომ ამომრჩევლები დააჯილდოებენ მათ, ვისაც ისინი ამ მიზნების კონსტრუქციულად წინ წამოწევად მიიჩნევენ.

"ნათელია, რომ საქართველოს პოლიტიკასა და საზოგადოებაში არსებული პოლარიზაცია ხელს უშლის ქვეყნის პოტენციალს. ჩვენი დელეგაცია პოლიტიკურად მრავალფეროვანია და ბევრ საკითხზე ვერ ვთანხმდებით, მაგრამ ერთად ვმუშაობთ. იმავეს ველით საქართველოში მყოფი პოლიტიკური ლიდერებისგან“, - განაცხადა სამხრეთ კავკასიაში სპეციალურმა წარმომადგენელმა ლუის გრასამ.

გავრცელებულ განცხადებაში მკაცრად არის დაგმობილი სახელმწიფო ინსტიტუტებზე, მათ შორის პრეზიდენტის სასახლეზე განხორციელებული ძალადობა.

"მოდით, ნათლად გავიმეოროთ, როგორც ოქტომბერში გავაკეთე: სახელმწიფო ინსტიტუტების წინააღმდეგ ძალადობის გამოყენება მიუღებელია. ცვლილებები უნდა მოხდეს საარჩევნო ყუთების და პოლიტიკური გადაწყვეტილების მიმღები ორგანოების მეშვეობით და არა მათი დამხობისკენ მიმართული ძალადობით".

კრისტინ ბლოუერის განცხადებით ქვეყანაში არსებული პრობლემების მოგვარება, ქართველი ხალხისა და ლიდერების პასუხისმგებლობაა და ეს არც ეუთოს და არც სხვა საერთაშორისო ორგანიზაციის კომპეტენციაში არ შედის.

"ჩვენი, ეუთოს ან სხვა რომელიმე საერთაშორისო ორგანიზაციის საქმე არ არის აქ არსებული პრობლემების მოგვარება. ეს საქართველოს ხალხისა და ლიდერების პასუხისმგებლობაა და იმედი მაქვს, რომ პოლიტიკური სიტუაციის დეესკალაციისა და ნამდვილი პოლიტიკური დიალოგის დაბრუნებისთვის პასუხისმგებლიან ნაბიჯებს დავინახავ."

დელეგაციამ სინანული გამოთქვა მმართველი პარტიის წევრების მიერ ზოგიერთი ოპოზიციური პარტიის აკრძალვის მცდელობების გამო, რაც, მათი აზრით, სავარაუდოდ გაამწვავებს განხეთქილებას და კიდევ უფრო მეტ იზოლაციას გამოიწვევს.

"ამჟამინდელ რთულ გეოპოლიტიკურ გარემოში ქვეყანას სტაბილურობა და ერთიანობა სჭირდება. პარტიების ან ჩვეულებრივი პოლიტიკური თუ სამოქალაქო საქმიანობის აკრძალვა გამოსავალი არ არის. ანალოგიურად, პოლიტიკა უნდა განხორციელდეს შესაბამის ინსტიტუტებში და ბოიკოტი არ შეიძლება იყოს დიალოგისა და პოლიტიკური აქტივიზმის ალტერნატივა".

დელეგაციამ ხელისუფლებას სთხოვა შეხვედრა იმ პირებთან, რომლებსაც ოპოზიციური ძალები “პოლიტიკურ პატიმრებად” მოიხსენიებენ და გამოთქვა სინანული, რომ ამჯერად ასეთი შესაძლებლობა არ გაჩნდა.

ვიზიტის პირველ დღეს დელეგაციის წევრები ადმინისტრაციულ გამყოფ ხაზთან იმყოფებოდნენ, სადაც კიდევ ერთხელ დაადასტურეს ეუთოს საპარლამენტო ასამბლეის მტკიცე და თანმიმდევრული მხარდაჭერა საქართველოს სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში. მათ აღნიშნეს, რომ მიმდინარე ოკუპაციის ჰუმანიტარული შედეგები კვლავ საერთაშორისო საზოგადოების შეშფოთების საგანს წარმოადგენს.

აღნიშნული ვიზიტი ასამბლეის მხრიდან საქართველოსთან მუდმივი თანამშრომლობის ნაწილია, რაც მოიცავს როგორც არჩევნებზე დაკვირვებას, ასევე საპარლამენტო კოოპერაციას. ვიზიტის შედეგების განხილვა იგეგმება ეუთოს საპარლამენტო ასამბლეის ბიუროს უახლოეს სხდომასა და ჰააგაში გასამართ ყოველწლიურ სესიაზე.