უჩვეულო საგზაო ნიშანი ბაყაყით - რას აფრთხილებს ის მძღოლებს

მსოფლიოს სხვადასხვა ქვეყანაში შეხვდებით საგზაო ნიშნებს, რომელთა მნიშვნელობაც ერთი შეხედვით შეიძლება გაუგებარი იყოს. მათ შორისაა დიდი ბრიტანეთის უჩვეულო ნიშანი, რომელზეც ბაყაყია გამოსახული.

დიდ ბრიტანეთში ამ ნიშანს ძირითადად სოფლად, იმ ადგილებში ათავსებენ, სადაც გამრავლების სეზონზე ბაყაყები გზას მასობრივად კვეთენ, რათა ტბორებსა და ტბებს მიაღწიონ.

ნიშანი მძღოლებს აფრთხილებს, რომ შეანელონ სიჩქარე და გზაზე განსაკუთრებული სიფრთხილე გამოიჩინონ. ზოგიერთ შემთხვევაში, ამფიბიების დასაცავად, გამრავლების სეზონზე გზაზე მოძრაობაც იზღუდება.

წყაროს ცნობით, ბაყაყების უსაფრთხოების მიზნით მოძრაობა პირველად 1999 წელს შეზღუდეს. თუმცა, ასეთი პრაქტიკა დიდ ბრიტანეთში ფართოდ გავრცელებული არ არის.

ბაყაყის გამოსახულებიანი ნიშანი ერთადერთი არ არის, რომელიც მძღოლების ყურადღებას უჩვეულო სიმბოლოთი იქცევს.

ავსტრალიის კუინზლენდის შტატში გრძელ გზებზე გვხვდება ნიშნები სხვადასხვა კითხვით, რომლებიც ადგილობრივ ფლორასა და ფაუნას ეხება.

ინდოეთის ოკეანეში მდებარე შობის კუნძულზე კი მძღოლებს კიბორჩხალების გამოსახულებიანი ნიშნები აფრთხილებს. კიბორჩხალები გამრავლების პერიოდში მასობრივად გადაადგილდებიან ზღვისკენ, რის გამოც ზოგიერთი გზა დროებით იკეტება.

კანადის კვებეკის პროვინციაში ასევე გვხვდება უჩვეულო ნიშანი. მასზე სახეა გამოსახული, რომელიც გზისკენ უბერავს. მისი დანიშნულება მძღოლების გაფრთხილებაა, რომ ძლიერი ქარბუქის გამო ხილვადობა შეიძლება შემცირდეს.