შეისწავლეს სიმღერის ტექსტის გავლენა ადამიანების ქცევაზე - ახალი კვლევა

სიმღერების ტექსტები მნიშვნელოვან გავლენას ახდენს მსმენელთა ემოციურ მდგომარეობაზე, დამოკიდებულებებსა და ქცევაზე, და ეს გავლენა ბევრად სცდება მუსიკის უბრალო ფონურ ფუნქციას. ასეთ დასკვნამდე მივიდნენ ფსიქოლოგები პაბლო მარინ-ლიებანა და ხავიერ იბიასი, რომლებმაც ჟურნალ Psychology of Music-ში სისტემატური მიმოხილვა და მეტაანალიზი გამოაქვეყნეს.

ავტორებმა გააანალიზეს 82 ემპირიული კვლევა და გააერთიანეს მონაცემები 42 ფსიქოლოგიური მაჩვენებლის მიხედვით. შედეგებმა აჩვენა, რომ სიმღერების ტექსტები იწვევს ძლიერ ემოციურ რეაქციას და ასევე ახდენს მდგრად, თუმცა ზომიერ გავლენას დამოკიდებულებებსა და კოგნიტურ-ქცევით რეაქციებზე. ამასთან, ეფექტი თითქმის ყოველთვის შეესაბამებოდა ტექსტის შინაარსს: აგრესიული, პრო-სოციალური ან რომანტიზებული სიუჟეტები იწვევდა შესაბამის ფსიქოლოგიურ რეაქციებს.

მკვლევრები აღნიშნავენ, რომ სიმღერების სიტყვები აყალიბებს ხატებს, სცენარებსა და სოციალური რეალობის ინტერპრეტაციებს, რაც გავლენას ახდენს იმაზე, თუ როგორ აღიქვამენ ადამიანები საკუთარ თავსა და სხვებს. შეგნებული ანალიზის გარეშეც კი, მსმენელები ავტომატურად ამუშავებენ ლირიკას, რაც მუსიკას ძლიერ ემოციურ და სოციალურ გავლენის არხად აქცევს.

მიღებული მონაცემების საფუძველზე ავტორები გვთავაზობენ, მუსიკა განვიხილოთ არა მხოლოდ გართობის საშუალებად, არამედ განათლებაში კრიტიკული ანალიზის მნიშვნელოვან ობიექტადაც. მათი აზრით, კრიტიკული მუსიკალური აზროვნების განვითარება მსმენელებს დაეხმარება სიმღერების ტექსტების უფრო გააზრებულ აღქმაში და ყოველდღიურ ცხოვრებაში მათი უკონტროლო ფსიქოლოგიური გავლენის შემცირებაში.