POLITICO: ევროკავშირის ელჩებმა ვერ შეძლეს შეთანხმების მიღწევა 90 მილიარდი ევროს ოდენობის სესხზე, რომელიც უკრაინის თავდაცვის დასაფინანსებლად არის განკუთვნილი

ევროკავშირის ელჩებმა ვერ შეძლეს შეთანხმების მიღწევა 90 მილიარდი ევროს ოდენობის სესხზე, რომელიც რუსეთის წინააღმდეგ უკრაინის თავდაცვის დასაფინანსებლად არის განკუთვნილი. ამის შესახებ გამოცემა POLITICO-ს ოთხმა დიპლომატმა განუცხადა.

„შემდეგი შეხვედრა, სავარაუდოდ, უახლოეს დღეებში გაიმართება,“ - განაცხადა კვიპროსის თავმჯდომარეობის წარმომადგენელმა.

„მოლაპარაკებებს გადამწყვეტი მნიშვნელობა აქვს, რადგან წინააღმდეგ შემთხვევაში, უკრაინას აპრილში ფული ამოეწურება; მას ფინანსები სჭირდება როგორც სახელმწიფო აპარატის ფუნქციონირების შესანარჩუნებლად, ასევე რუსეთის წინააღმდეგ ბრძოლის გასაგრძელებლად“, - წერს POLITICO.

ელჩებს შორის აზრთა სხვადასხვაობის მთავარი მიზეზი ისაა, თუ რა სახის წვდომა ექნებათ ევროკავშირის არაწევრი ქვეყნების კომპანიებს იმ შესყიდვებზე, რომლებიც ამ სესხით დაფინანსდება. სავარაუდოდ, მესამე ქვეყნებს მოუწევთ სესხის დაფინანსებაში წვლილის შეტანა, თუკი მათ ამ პროცესში მონაწილეობა სურთ.

შეხვედრის მიზანი ასევე იყო ბრიტანული კომპანიებისთვის გზის გახსნა მონაწილეობის მისაღებად, მიუხედავად იმისა, რომ გასულ წელს გაერთიანებულმა სამეფომ ვერ მოიპოვა წვდომა იარაღის შესყიდვისთვის განკუთვნილ ცალკეულ, 150 მილიარდი ევროს ღირებულების SAFE პროგრამაზე.

მიუხედავად იმისა, რომ საფრანგეთი სათავეში ედგა წინააღმდეგობას მესამე ქვეყნების ჩართულობის მიმართ, პარიზი აცხადებს, რომ მას გაერთიანებული სამეფოს მონაწილეობა სურს.