პეტერ მადიარის წინააღმდეგ გამოძიების დაწყების მოთხოვნით პროკურატურაში ორი განცხადება შევიდა - როგორც გამოცემა Magyar Nemzet წერს, საქმე ეხება შანტაჟისა და ოჯახური ძალადობის შესაძლო ფაქტებს, რაც პოლიტიკოსის ყოფილი მეუღლის, იუსტიციის ყოფილი მინისტრის, იუდიტ ვარგას ჩვენებებს ეფუძნება

უნგრეთის პრემიერ-მინისტრის, პეტერ მადიარის წინააღმდეგ გამოძიების დაწყების მოთხოვნით პროკურატურაში ორი განცხადება შევიდა. როგორც გამოცემა Magyar Nemzet-ი წერს, საქმე ეხება შანტაჟისა და ოჯახური ძალადობის შესაძლო ფაქტებს, რაც პოლიტიკოსის ყოფილი მეუღლის, იუსტიციის ყოფილი მინისტრის, იუდიტ ვარგას ჩვენებებს ეფუძნება.

გამოცემის ცნობით, პარტია „ფიდესის“ ყოფილმა დეპუტატმა, ილონა ეეკეშმა უნგრეთის ცენტრალურ საგამოძიებო პროკურატურას მიმართა. განცხადებაში აღნიშნულია, რომ მიმართვა ეფუძნება ვარგას ჩვენებებს, რომლებიც მან აღმასრულებელი ხელისუფლების სისტემაში უფლებამოსილების შესაძლო გადამეტების საკითხებზე მომუშავე საპარლამენტო საგამოძიებო კომისიის სხდომაზე მისცა, ასევე მედიაში გავრცელებულ ცნობებს.

სარჩელის თანახმად, 2023 წლის იანვარში მადიარმა მათ საერთო საცხოვრებელში, ვარგას ინფორმირებისა და თანხმობის გარეშე, საუბარი ფარულად ჩაწერა. განმცხადებელი ამტკიცებს, რომ პოლიტიკოსი ამ ჩანაწერს შანტაჟისთვის იყენებდა. გარდა ამისა, გავრცელებული ინფორმაციით, მადიარი რეგულარულად ემუქრებოდა ყოფილ მეუღლეს ჩანაწერის გასაჯაროებითა და „ცხოვრების დანგრევით“, თუ ის განქორწინების პროცედურას გააგრძელებდა ან ქონების გაყოფისა და ბავშვების საცხოვრებელი ადგილის შესახებ მისთვის არახელსაყრელ პირობებს დაეთანხმებოდა.

განცხადების მიხედვით, მუქარისა და ფსიქოლოგიური ზეწოლის გამო, ვარგა იძულებული გახდა, განქორწინება გადაედო ან არახელსაყრელ პირობებზე დათანხმებოდა.

ეეკეში ცენტრალურ საგამოძიებო პროკურატურას საქმის შესწავლისა და სავარაუდო მტკიცებულებების, მათ შორის 2023 წლის იანვრის აუდიოჩანაწერისა და მუქარის ფაქტების გამოძიებისკენ მოუწოდებს. ჟურნალისტების ხელთ არსებული დოკუმენტის მიხედვით, საპარლამენტო მოსმენების დროს ვარგამ ყოფილი მეუღლის წინააღმდეგ იმდენად მძიმე ბრალდებები წამოაყენა, რომ ისინი შესაძლოა სისხლის სამართლის საქმის აღძვრის საფუძველი გახდეს.