გერმანიაში პარტია „ალტერნატივა გერმანიისთვის“ მემარჯვენე ექსტრემისტულ ორგანიზაციად გამოაცხადეს

გერმანიაში პარტია „ალტერნატივა გერმანიისთვის“ მემარჯვენე ექსტრემისტულ ორგანიზაციად გამოაცხადეს. შესაბამისი გადაწყვეტილება კონსტიტუციის დაცვის ფედერალურმა ოფისმა მიიღო, რომელიც პარტიის საქმიანობას რამდენიმე თვის განმავლობაში სწავლობდა.

გერმანული მედია წერს, რომ ანგარიში 1 100-ზე მეტ გვერდს მოიცავს და შეიცავს მრავალ მტკიცებულებას, რაც ადასტურებს პარტიის ანტიკონსტიტუციურ ხასიათს. ეს არ ნიშნავს, რომ პარტია აკრძალულია, თუმცა სამსახურებს ზედამხედველობის მეტ უფლებამოსილებას ანიჭებს მასზე, რაც შესაძლებელს ხდის შეხვედრების დაკვირვებას და ტელეფონების მოსმენას.

გერმანული მედიის შეფასებით, პოლიტიკური დებატები პარტიის შესაძლო აკრძალვის შესახებ, სავარაუდოდ, იმპულსს მოიპოვებს.  ბუნდესტაგს ან ფედერალურ მთავრობას შეუძლიათ, აკრძალვის მოთხოვნა წარუდგინონ საკონსტიტუციო სასამართლოს.

პარტიამ „ალტერნატივა გერმანიისთვის“ ბოლო დროს პოპულარობა მოიპოვა და პირველად რეიტინგებში პირველ ადგილსაც კი მიაღწია. ვადამდელ საპარლამენტო არჩევნებში მან 152 ადგილი მოიპოვა, თითქმის ორჯერ მეტი, ვიდრე ჰქონდა და მთავარ ოპოზიციურ ძალად იქცა. პარტიის მხარდაჭერა ყველაზე მაღალია აღმოსავლეთ ფედერალურ მიწებზე.