გამოვლინდა კვებასა და ცხოვრებით კმაყოფილებას შორის არაპირდაპირი კავშირი

პერუში ჩატარებულმა კვლევამ აჩვენა, რომ რეგულარული საუზმე და ხილისა და ბოსტნეულის უფრო ხშირი მოხმარება დაკავშირებულია ცხოვრებით უფრო მაღალი კმაყოფილების ხარისხთან. კვლევის შედეგები, რომელიც 511 სტუდენტის მონაწილეობით განხორციელდა გამოქვეყნდა ჟურნალში Nutrients.

ანალიზმა აჩვენა, რომ კვებითი ჩვევები თავად არ ზრდის ცხოვრების შეფასებას პირდაპირ, თუმცა მნიშვნელოვნად არის დაკავშირებული პოზიტიური ემოციების დონესთან, ენერგიულობასთან, სიხარულთან და საერთო კარგ განწყობასთან. სწორედ დადებითი ემოციური ფონი აღმოჩნდა მთავარი ფაქტორი, რომელიც ცხოვრების უფრო მაღალ კმაყოფილებას უკავშირდება. კვების გავლენა სწორედ ამ მექანიზმის მეშვეობით ვლინდება. სტუდენტები, რომლებიც უფრო ხშირად იღებდნენ ხილსა და ბოსტნეულს და რეგულარულად საუზმობდნენ, საშუალოდ უფრო გამოხატულ პოზიტიურ განწყობაზე მიუთითებდნენ. 

ავტორები აღნიშნავენ, რომ შედეგები აჩვენებს არა მხოლოდ რაციონის ნუტრიენტული ღირებულების მნიშვნელობას, არამედ მის როლსაც ყოველდღიურ ემოციურ მდგომარეობაში. მათი აზრით, სტუდენტთა მხარდამჭერმა პროგრამებმა კვება და ფსიქოლოგიური კეთილდღეობა ერთმანეთთან მჭიდროდ დაკავშირებულ ელემენტებად უნდა განიხილოს და არა ჯანმრთელობაზე ზრუნვის ცალკეულ სფეროებად.