Financial Times: Volkswagen-ი შეწყვეტს დრეზდენში მდებარე ქარხანაში წარმოებას, რაც ავტომწარმოებლის 88-წლიან ისტორიაში პირველი შემთხვევაა, როდესაც ის გერმანიაში წარმოებას აჩერებს

გერმანული ავტომწარმოებელი კომპანიაVolkswagen-ი შეწყვეტს დრეზდენში მდებარე თავის ქარხანაში მანქანების წარმოებას, რაც ავტომწარმოებლის 88-წლიან ისტორიაში პირველი შემთხვევაა, როდესაც ის გერმანიაში წყვეტს წარმოებას. ინფორმაციას ამის შესახებ ბრიტანული გამოცემა Financial Times ავრცელებს.

საწარმოო ხაზის დახურვა ხდება მაშინ, როდესაც ევროპის უმსხვილესი ავტომწარმოებელი ფულადი სახსრების ნაკადის პრობლემის წინაშე დგას, რაც გამოწვეულია ჩინეთში სუსტი გაყიდვებით, ევროპაში მოთხოვნის შემცირებით, ასევე აშშ-ის ტარიფებით, რომლებიც ამერიკაში გაყიდვებზე ახდენს გავლენას.

Volkswagen-ს ბოლო დროს სირთულეები აქვს მომდევნო ხუთი წლის განმავლობაში დაახლოებით 160 მილიარდი ევროს ოდენობის საინვესტიციო ბიუჯეტის განაწილებასთან დაკავშირებით, რადგანაც ბენზინის ძრავით აღჭურვილი მანქანებისთვის უფრო ხანგრძლივი საექსპლუატაციო ვადაა მოსალოდნელი.

ავტომწარმოებლის ფინანსურმა დირექტორმა, არნო ანტლიცმა ოქტომბერში განაცხადა, რომ 2025 წლის წმინდა ფულადი ნაკადი, რომელიც მანამდე ნულთან ახლოს იყო პროგნოზირებული, შესაძლოა ოდნავ დადებითი გახდეს. თუმცა, ანალიტიკოსებმა აღნიშნეს, რომ ავტომწარმოებელი კვლავ ზეწოლის ქვეშ დარჩება.